Markus 15

Yesuw i sida ika miɗ Pilatus

Mata 27:1-2,11-14; Luka 22:66—23:13; Yuhana 18:28-38

1Aləka aka mbulum ana a də̀v i mèkwède ya ka, gà bàba gà ɓəzla mandəva kuɗa a Mbulum, nda gà bàba gà mburma ana ta kwere a gà Yahuda ya, nda gà ɓəzla medzeŋge məpala ahəm Mbulum tserdze, ti yaha ba gər aka seriye ŋa. Tə dza akaba dukw ana ta ge a à Yesuw a. I fataya ka, tə daha, tə dzaw ŋgat tez tsara. Tə da à ŋgat a bəra Pilatus, mala sik Əbay ana a kwere a ahəɗ gà Ruma ya. 2Ti ta mede dərraha ka, Pilatus a gwaɗar: «Kər ana, batsah Əbay gà Yahuda kaɗəŋ a?» Yesuw a gwaɗar aaka: «Haya, iye ka, ŋgat ŋa.» 3Gà bàba gà ɓəzla mandəva kuɗa a Mbulum aaha ta ŋgawa gər a Yesuw nda pàrsa ŋgiɗ pampam hinne. 4Aləka Pilatus a tsam ahər asa, a gwaɗar: «Aàla na kə̀ gəs mifefile a tar aaka tsiye? Fə̀r aà maŋgawa gər ana ta ŋgewek a ya kwaŋ.» 5Ama Yesuw ka, mbə̀rə̀ts mbə̀rə̀ts mendze ba, a gəs mifèfiler aaka ɓav tsa asa. Taŋa mendze ŋgar ata a ndza kataya ya ka, a ge aà Pilatus kamala dukw mene aà mburma ya.

Ta ge seriye Yesuw ka, biy mekìɗe

Mata 27:15-26; Luka 23:13-25; Yuhana 18:39—19:16

6Aləka i dəba ŋa ya, kəla pat *megirive Paska aka ndzera ka, Pilatus a pə̀lawa à gà ɓəzla daŋgay ilik, kamala ana a sàs a gà mburma ŋgar, ta waya mipìle dər a. 7Akahər ata ka, wele duwa a riŋ i daŋgay mbaŋa, zləm ŋgar Barabas. Ŋgat i liwiŋ gà ɓəzla mene are ŋgumna ana ta ge ahər maàga, ta kəɗ mburma ya. Ta gasa akaba tar nda gà mburma ata a daŋgay tserdze. 8Aləka a ta megeha i təv ana megirive ata a ndzera ya ka, gà mburma hinne tə da a təv Pilatus. Tə daha, ta wiz aà ŋgat məpəla à mburma ana a pə̀lawa a tar dər a pat megirive ya. 9Pilatus a gwaɗa a tar: «A sàs a kurum, i pəl a kurumaha ana, à Yesuw, Əbay gà Yahuda ya?» 10A tsik a tar kataya ka, aɗaba a sər ka, gà Əbay gà ɓəzla mandəva kuɗa a Mbulum ta gə̀saraha Yesuw ka, agəra ana ti ner are sàmma ya.

11Ama gà Əbay gà ɓəzla mandəva kuɗa a Mbulum ata ta waya gà asiŋ gà mburma aaha tserdze ya, tə̀ dza a taraha ka, aka biy tar. Ta gwaɗaraha, ku weke: «Ŋgulum pə̀lara ka, à Barabas a ivaɗ.» 12Dite Pilatus a gwaɗa a gà mburma ata asa: «A sàs a kurum i ge dze ana, meme na à wur aaha kà zalumar Əbay gà Yahuda ya?» 13Gà mburma ata ta gwaɗar aakaha nda magala gərmelik tsara: «Ndwandway ŋgat aà dizl magə̀làwà ŋa.» 14Pilatus a gwaɗa a tar: «Wànà a ge dze ana, dukùla na ŋgwala tsiye?» Ama ta màraha à metsìkè ŋa nda magala asa. Ta gwaɗar: «Mì gwaɗak ka, ndwandway ŋgat aà dizl magə̀làwà ŋa tiye, wele.» 15I dəba ŋa ya, Pilatus a pəl a tarra à Barabas a, aɗaba a sasar ka, gà mburma ŋgar ta ŋgayaba nda ŋgat. Ama Yesuw ka, a gwaɗa a gà mburma ŋgar: «Gə̀zlum, dite kà ndwandwayum ŋgat aà dizl magə̀làwà ŋa ata kuɗa.»

Gà sliwdze ti ne bakal à Yesuw

Mata 27:27-31; Yuhana 19:2-3

16I dəba ŋa ya, gà sliwdze Pilatus, mala sik Əbay gà Ruma ata, tə da à Yesuw aka varavada a huɗ ga a ma ŋgar. Dite tə zal ahəraha a gà asiŋ gà sliwdze tserdze a fata. 17Aləka tə daha ka, tə zla ikəka petek a. Ti tike aaka andiw nduzzwa ŋana. Ti tike aaka aba ya ka, tə slàslapa akaba adak, ti ndìwìɗer dər gər, avukw felère Əbay ana ti tiker a a gər a. 18I dəba ŋa ya, tə dza ba aà megèyer wusa. Ta gwaɗar: «Wusa Əbay gà Yahuda. Mbulum mà sə̀kàhak à mendze yak aà biybiy.» 19I dəba ŋa ya, tə lakayar aà gər nda zəva tsara. Ŋgùɗasl ŋgùɗasl ti tifeye ahər tìzle. Tə dza ba aà megèyer wusa, kamala ana ŋgat Əbay a, nda madzàr gurmits a biye. 20Aləka i dəba ŋa ya, ti yà ba aà mene à ŋgat bakal a ka, tə zla ikəka petek andiw ata nduzzwa ŋa ya, ta màr akaba à petek ŋgar kuɗa, dite ta màra à ŋgat a bəra ya. Ti de a à ŋgat a təv ana ti ti ndwendwey a ŋgat aà dizl magə̀làwà ŋa ata ya, kətsah aà gùva kwite ya zaakwa.

Yesuw aà dizl magə̀làwà ŋana

Mata 27:32-44; Luka 23:26-43; Yuhana 19:16-27

21Aləka i təv ana ti de a ya ka, tàa lə̀ma aà vatwa nda gà wele duwa a dere a i dala ya, zləm ŋgar Simun, tsir gà Aleksandire nda Rufus. Wele ata ka, gà Kirene. Gà sliwdze ata ti de a à Yesuw a, ta hitse à ŋgat, ta fàr aaka ndzəɗa aà mazla dizl ata ti ti ndwendwey ahər a Yesuw a. 22Aləka i dəba ŋa ya, tə da à Yesuw a tə̀vəməŋa a riŋ tə zalar Gwalgwata, kərga megweɗe ya ka, «Atasl gər.» 23Ti ndzeha a fata ka, a sàs a gà sliwdze ata aà mivìlè meɗwìtsè mawà dukw duwa makwàsà ŋa. Tə ndàr aɗəm yàwuf, duwa a ndza ɗìwèkìke. Ta vəl a Yesuw, dite ka, ma sa. Ama ka, a sasar tsidze.

24I dəba ŋa ya, tə ndwandway ŋgat aà dizl magə̀làwà ŋa ata kuɗa. Tə daha, tə dzaya ikaba petek ŋa ya ika magər tar, dite ta ge tsetse, ta gwa: «Ŋgada, weke na a ŋget a ya?» 25Ama akahər ana tə ndwandway ŋgat aà dizl magə̀làwà ŋa ata ya ka, pat aka ge mekìɗe də̀var ide. 26Ta wetse bazlam ana tə ndwandway ahər ŋgat a, ta gwa: «Əbay gà Yahuda na naha ya.» Dàp ti tike aà dizl ŋa. 27Tə ndwandway ahəraha gà ɓəzla akəl sula aà dizl, a tsaka ŋgar a fata asa mbaŋa: ilik aka tsèke ahər mezime, ilik ŋa aaha aka tsèke ahər gùla ŋgar. 28{Taŋa na dukw ana i wakita Mbulum a, a ge ba kamala ana a tsik piŋŋe ya, a gwa: «Ti ɗeme a ŋgat ka, a liwiŋ gà ɓəzla mege dukw ana ŋgwala tsiye.»}*fa* 29Gà mburma ana tə dawaha nda təv ŋgar ata ya ka, ta gewa à gər kwatà kwatà, kamala megweɗe ya, na a gwa, kirim tsa iye ŋa ya ya. Dite tə dzawa ba aà mendeveyer pìslìɗìɗe. Ta gwaɗawar: «Naha ana, kər ana, kù gwa ka, i mbezle a à ga Mbulum batsah ŋana, dite i huɗ mehinne makər a, i zlèzl a dər biy ŋgiɗ pam a ibam a? 30Mbəl à ba yak kuɗa tsiye? Dite kà ndàbara aà dizl magə̀làwà ŋa aaha ya, na kù gwa ka, iye ŋa ya.» 31Gà Əbay gà ɓəzla mandəva kuɗa a Mbulum nda gà ɓəzla medzeŋge məpala ahəm Mbulum tekeɗe, tə sawla ahər hinne mbaŋa. Ta gwaɗaba ika magər tar: «Aka mbala à gà mburma pampam hinne, ama ŋgat ŋa ka, a sle aà məmbə̀là à ba ŋgar ŋa tsəna, meme? 32Na kige ŋgat a gwa, iye Əbay gà Isərayel, mala məmbàlà à mburma ka, ma tarra aà dizl aaha ya kuɗa, na dite mìi gis a ŋgat nda gəzləŋ a.» Gà na tə ndwandwayaha tar a tsaka ŋgar a tekeɗe, tàa mata zukw tsa, tə sawla ahər riŋ hinne mbaŋa.

Məməta Yesuw

Mata 27:45-56; Luka 23:44-49; Yuhana 19:28-30

33I təv ana Yesuw à mìt a ya ka, daga aà magər pat a tsara, həvəɗ a ge ika ahəɗ ata tìtìktìk. Are a da aaba ya asa tsa, haa pat a ge metsìɓehe guzum ide. 34Akahər ana ndeɗiŋa pat aka à mege metsìɓehe guzum ide ya ka, Yesuw a wideye nda magala hinne. A gwa: |it"Eluy, eluy, lama sabahtani?»|re kərga megweɗe ya ka: «Mbulum gà, Mbulum gà, aàmala na kà miyak à iye ya?»*fb* 35Gà mìsle ŋgiɗ i liwiŋ gà mburma ana i fataya, tə tsaraka bazlam ŋgar ata kataya ka, ta gwa: «Tsarakum kwaŋ, araka, a zel aaba a a Iliya.» 36Mìsle ŋgiɗ ilik ika magər tar a, a val, a daha, a zlara dukw ana pàfpàfə̀ffa, yam a de aɗəm a hinne ya. Dite a tsilwiɓ dər a meɗwìtsè mawà dukw duwa makwàsà ŋa, a ndza ndùlàkə̀kka kamala mbəlar a. A dzak a zùbəl guvùkw. A tiker dərraha a bazlam, aà meɗìvìts ihər yam ŋa ya. A gwa: «Ŋgada kwaŋ, fə̀rakwa ahər dzekwiŋ. Ŋgada bəla Iliya a dere a, à pìlere a ŋgat aà dizl aaha ya ya?» 37I dəba taŋa ya ka, Yesuw a wideye nda magala hinne asa, dite a mət kuɗa.

38I təv ana a mət tsara ya ka, petek duwa a riŋ i ga Mbulum batsah ŋa ata zùbəl ŋa ya, madànà ŋa aà mbulum, a tayara ba ikaba i gər ŋa ya kwàŋŋa, kalkal tsikw a bəɗ. 39Əbay gà sliwdze gà Ruma duwa a riŋ i fata, mehìtsè ŋa i təv Yesuw. A ŋgat a Yesuw ana a wideye, dite meme na a mət tsara ya ka, a gwa: «Yweh, wele aaha ka, Kəla Mbulum kaɗəŋ ndzer.»

40Akahər ata ka, gà məkəs duwa tekeɗe, tar riŋ i fata mbaŋa. Ta hitse dzìrìk diriŋ nda təv tar ata zaakwa, aà məfəraha aà tar. Zləm gà məkəs ata ka, gà Mariya ana a dara i Magədala ya, nda gà Mariya məmər gà Zakup kəla ŋana nda Yusas, nda gà Salume tar riŋ i liwiŋ gà məkəs ata mbaŋa. 41Gà məkəs ata tserdze ya, tə zazamaha Yesuw daga aà gər ana ŋgat ika ahəɗ Galile mba ya. Ta gewar megemir lele, ti dewar ɗaf. Gà məkəs ŋgiɗ riŋ i fata hinne asa, tə da akabara nda gà ŋgat a Yeruzalem a.

Mazla məməta Yesuw a biye

Mata 27:57-61; Luka 23:50-56; Yuhana 19:38-42

42A pat ata ka, ndaàwa ŋana, mesìfìkà ba gà Yahuda aka ndze aɗəm, dite ndidwe ŋana tì sifik a ba kuɗa. I hawa ŋa ata ka, 43wele duwa a dara i Arimatiya ya, zləm ŋgar Yasufa. A mà aba à arəv lele, a da a təv Pilatus aà mewize ahər məməta Yesuw. Ŋgat ka, batsah gà Yahuda ŋa i liwiŋ gà na ta kwere a tar a. A riŋ a bebe a *mekwere Mbulum ana a kwere a gər ahəɗ mba ya ka, lele. 44Ama Pilatus a tsaraka ihər a kataya, Yesuw aka mət ka, a ge ahər kamala dukw mene aà mburma ya, aɗaba a gwa: «Aka mət bise ya?» A slər mburma, a gwaɗa a tar: «Zelwimiŋaha a Əbay gà sliwdze kwaŋ, wànà Yesuw aka mət tsara kaɗəŋ a?» 45Əbay gà sliwdze ata a daha ka, a gwaɗar: «Aka mət kaɗəŋ.» I dəba ŋa ya, Pilatus a gwaɗa a Yasufa: «Daha, ta vəlak.» 46Yasufa a daha, a səkəm ahər tùmbùlum tìv, dite a pə̀lara məməta Yesuw aà dizl a. A mbe ahər petek ata kuɗa, dite a tike ŋgat a dive, melè ŋa i giseh a, i təv ana gìrdzìdzìhhe ya. I dəba ŋa ya, a tàpàslara batsah beliŋ a. A hə̀ndə̀k dər ahəraha. 47I təv ana ti zle a ŋgat a biye ya ka, gà Mariya ana a dara i Magədala ya, nda Mariya məmər Yusas, tə daha, ta fə̀r aà tar na ti tike a ŋgat a biye ya.

Currently Selected:

Markus 15: gnd

Highlight

Copy