Markus 14

Gà Əbay gà Yahuda ti yaha vatwa aà magəsa Yesuw

Mata 26:1-5; Luka 22:1-2; Yuhana 11:45-53

1A zeha mehinne sula i huɗ kwaskwa ya, na dite gà Yahuda tì lèh a aà *megirive Paska, nda mazəma dukuməŋa a riŋ giɗe ikəka tsa, na dite a kwese a tsiye.*fa* I fataya ka, gà bàba gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum ti yaha vatwa aà magəsa Yesuw, ta waya makə̀ɗà ŋgat nda akəl. 2Ama ta gwaɗaba ika magər tar asa: «Ki slekwe a aà magəsa màyə̀m màyə̀m aaha a pat megirive aaha tsa, aɗaba gà mburma ta beha hinne, ti ta wise a duwa.»

Məkəs duwa a dzaya à wirdè aka gər Yesuw

Mata 26:6-13; Yuhana 12:1-8

3Akahər ata ka, Yesuw a riŋ mandza ŋa i kwite Betaniya i bəra Simun ana batsah mbəlak ba ihər a. I təv ana Yesuw a riŋ mandza ŋa i fata, dite tə dza ba aà mazəma dukw mezime i ga ata ya ka, məkəs duwa a riŋ, a wiyeha tar a ga ata a fata. A daha ka, nda gà wirdè ihər i kwalaba, à sìkim a ba tsa, a ze hwaŋŋà hinne. A daha, a həɓ ikəka à ahəm a, a dzaya dər aka gər Yesuw. 4Ama ka, a tsəɓ a gà asiŋ gà mburma ŋgiɗ ana i fataya hinne. Ta gwaɗaba ika magər tar: «Aàla na a nəs à wirdè ŋgwal ŋa ata taf a? Dukùla na a ger a iɗəm ŋgulum i fataya? 5Ŋgulum ma kal dər ndeɗiŋa tsiye, a ŋget a dər siŋgwe hinne, à dzèye a a gà ɓəzla matawak a.» Ti tsik bazlam ana ŋgwal ŋa tsiye, aà məkəs ata hinne. 6Ama Yesuw a gwaɗa a tar: «Miyakum à məkəs aka nda bazlam. Aàmala na ki gìzlwimer a gər a? Aɗaba dukw ana a giŋ a ka, ŋgwal ŋa ndzer, a tsahən aà iye lele. 7Aɗaba gà ɓəzla matawak ka, tar riŋ i təv kurum kəla pat. Ki slwim a aà mazlàkà tar, kamala ana gəzləŋ kurum a waya ya. Ama iye ka, ki ndzekwe akaba a nda gà iye kəla pat tsa, i de a aà kurum a. 8Məkəs aaha ka, aka giŋ dukw ana ndzəɗa ŋgar a sle ya. Taŋa ka, aka mbər mege aà iye wirdè ana ti zle a dər akaba iye a biye ya aka ndəv. 9Iye ihər i gweɗe a kurum a nda ndzer: A təv ana gà mburma ti ti de aɗəm a, aà metsìkè bazlam Mbulum fit dze ya ka, ti ɗemewe aɗəm a dukw ana məkəs aaha a giŋ a, dite mə̀ məts a tar gər tsa.»

A sàs a Yudas aà mege ɗaf aà Yesuw

Mata 26:14-16; Luka 22:3-6

10Aləka i dəba ŋa ya, mìsle ŋgiɗ ilik a da i magər gà ɓəzla mazazama Yesuw a kurwa gəra sula ŋa ata ya, taŋa zləm ŋgar Yudas Iskariyut. A da i fataya, a da a təv gà bàba gà ɓəzla mandəva kuɗa a Mbulum. A daha ka, aɗaba a sasar mege ɗaf aà Yesuw, dite ta kəɗ ŋgat. 11Gà mburma ata tə tsaraka bazlam Yudas ana a tsik a tar a ka, a ŋgeye a tar ba i gəzləŋ hinne. Ta gwaɗar i sida ya: «Mìi dzèk a siŋgwe na kàa ɗe a mər à Yesuw ndzer a.» I dəba ŋa ya, Yudas a tsaraka kataya tsara ka, hèlèwrèw a ge metsehe tsara. A dza ba aà mayaha vatwa aà mege a tar ɗaf aà Yesuw.

Gà Yesuw nda gà ɓəzla mazazama ŋgat tə zəm aba

ɗaf Paska ya

Mata 26:17-25; Luka 22:7-14; 22:21-23; Yuhana 13:21-30

12A pat malahalah megirive ana gà Yahuda tə zəmawa dukw ata giɗe ikəka tsa, na dite a kwese a tsiye, a pat ata ta batsawa gà təmaŋ*fb* aà Paska ya ka, gà na ti zezem a Yesuw a, tə tsam ihər ahəm a. Ta gwaɗar: «A sàsak mì dek ɗaf Paska aaha ana, a ŋga?» 13I dəba ŋa ya, Yesuw a slər gà ɓəzla mazazama ŋgat ata sula i magər tar a. A gwaɗa a tar: «Dum a huɗ kwite. Kàa dumaha ka, ki lwim a aà wele duwa a riŋ nda gà dzagwaya ika gər. Kàa lwim ahər ka, zazamum ŋgat a təv ana a de aɗəm a ya. 14Ga ana aka pəts aɗəm a ka, ka dumaha, ki gweɗwim a a mala ga ata: <Əbay mər a gwa ka, ga ana mìi ti zim a iɗəm ɗaf Paska nda gà ɓəzla mazazama iye ya ana, awara?> 15Tsam ka, a ɗif a kurum a à huɗ ga ana mazlazla ŋa batsah ŋa ika gər biy ŋgiɗ. Ga ata ka, malàmbàɗà ŋa lele. Ki dwim a iɗəm ɗaf ata ka, i fata.» 16Gà ɓəzla mazazama ŋgat a sula ŋa ata, tə ndzək ba i fataya tsara. Tə daha ka, tàa le aà ga dukw ata tserdze ya, kamala ana a tsik a taraha ya kaɗəŋ. Tə daha, ti de ɗaf Paska ata i fata kuɗa.

17Aləka hawa a ge ka, gà Yesuw nda gà ɓəzla mazazama ŋgat aaha, ta mà akabaha a fata kurwa gəra sula fit dze. 18I təv ana tar ihər ti zim a ɗaf a ka, Yesuw a gwaɗa a tar: «Iye ihər i tsik a kurum a nda ndzer, pàrsa iɗəm tsa: Wura ɗa ilik ika magər kwa aaha kwa ihər ki zimekwe a ɗaf tserdze ya, na a ta ge a aà iye ɗaf a.» 19Gà ɓəzla mazazama ŋgat ata tserdze ya, ta mata i are ya satəttà. Ta gwaɗar aaka ilik ilik tserdze: «Wànà iye ya? Na iye tsa.» 20Yesuw a gwaɗa a tar: «Mburma ŋa ɗa ilik ika magər kurum a kurwa gəra sula ŋa aaha. Wur ana mər riŋ ihər mìi dzeke akaba a ahər a səra ŋa ilik a. 21Taŋa iye, *wur ana a dara i təv Mbulum a, i ta mìt a ka, kamala ana wakita Mbulum a tsik a. Ama mesewere are a dere a aka gər wele ana a ta ge aà iye a ɗaf a ka, batsah ŋa hinne. A ta ge a dər kaɗəŋ ana, meme ɗara? Ŋgulum na ta wa ŋgat tsiye.»

Yesuw a sasaba ɗaf a gà ɓəzla mazazama ŋgat

Mata 26:26-30; Luka 22:15-20; 1 Kurintiya 11:23-25

22Aləka i dəba ŋa ya, tar riŋ aà mazəma ɗaf tar ata hiywe. Yesuw a zla tapa ɗaf ata ilik, a ge dərraha kəkaaha a Mbulum, dite a sasa ikaba ya, a dzaya a gà ɓəzla mazazama ŋgat kuɗa. A gwaɗa a tar: «Ndzəkum, ka zəmum, aɗaba taŋa ka, slu ba gà.» 23I dəba ŋa ya, a zla kup meɗwìtsè mawà dukw duwa iɗəm makwàsà ŋa. A ge dərraha kəkaaha a Mbulum asa, dite a vəl a tar. Udzùɓ udzùɓ udzùɓ ta mandzara, tar ata tserdze ya. 24Yesuw a gwaɗa a tar: «Naha ka, məmbəz ga ana i ti dze a dər a bəɗ, aɗaba gà mburma ana ika gər ahəɗ hinne ya. Taŋa ka, dukw ana i sir a dər ba à gà mburma nda Mbulum hiywe aà biybiy a. 25Iye ihər i gweɗe a kurum a nda ndzer: I ti se a meɗwìtsè mawà dukw makwàsà ŋa aaha asa tsidze, haa a pat ana ki ti sekwe a dukw ata awiya ŋa, a təv mendze *mekwere Mbulum a.» 26I dəba ŋa ya, tə zàmbaɗa à Mbulum nda dimis, dite ta màhara ba i fataya, ti de a aà sik kwite Ndzendzebire.

Yesuw a ɗif à Piyer ana a ta gweɗe a aà ŋgat, i sər ŋgat tsiye

Mata 26:31-35; Luka 22:31-34; Yuhana 13:36-38

27Aləka, aka təv ana ti ndze aà vatwa ya ka, Yesuw a gwaɗa a gà ɓəzla mazazama ŋgat: «Aləka ka, kurum aaha tserdze ya, ki tìzwim a aà iye ya, magəɗa a ge a kurum ŋa. Aɗaba a riŋ mewetse ŋa i wakita Mbulum, a tsik aà iye, Mbulum a gwa: <I kiɗ a mala makəva gà təmaŋ, dite gà təmaŋ ata ta wiye a ba bìrìm a dala.> «*fc* 28I dəba ŋa ya, Yesuw a gwaɗa a tar asa: «Ama Yàa ta mimbilera i məməta ya ka, i lèh a kurum a a Galile.» 29I dəba ŋa ya, Piyer a gwaɗar aaka: «Ku mege gà mìsle ŋgiɗ tàa miyak à kər tserdze tekeɗe, iye ka, i miyek à kər a tsidze.» 30Ama Yesuw a gwaɗar aaka: «Iye ihər i gweɗek a nda ndzer: Ka bana ba yak nda iye tsa, aɗaba ələk guŋgwazl a ti tiwe a i həvəɗ aaha mbakum a sula ka, kər kàa gwa medzige makər, i sər Yesuw tsa.» 31Ama Piyer a gwaɗar aaka nda magala tsara: «I tsikik a ka, nda ndzer, pàrsa iɗəm tsa: Ama i sər kər tsəka, i gweɗe a tsidze. Ku mege ki meteme a sula məma tekeɗe ka, i tsik a tsa.» Gà asiŋ gà ɓəzla mazazama ŋgat tserdze ibam, ti tsik kataya asa mbaŋa.

Yesuw a hama a Mbulum i təv duwa tə zalar Getsemene

Mata 26:36-46; Luka 22:39-46

32Aləka i dəba ŋa ya, gà Yesuw nda gà ɓəzla mazazama ŋgat ti ndze a tə̀vəməŋa a riŋ i dala, tə zalar Getsemene ka, a gwaɗa a tar: «Ndzum a bəɗ a faha, iye ka, i de a aka miɗ, i ta heme a a Mbulum a fata dzekwiŋ.» 33Aka təv ana a de a ya ka, a ndzək dər gà Piyer nda Yuhana, nda gà Zakup aà ahər. Tə da i təv gà asiŋ gà ɓəzla mazazama ŋgat aaha ya. Aka təv ana ti ndzeha a fataya ka, Yesuw a dza ba aà medzedzere nda magəɗa hinne. 34A gwaɗa a gà ɓəzla mazazama ŋgat aaha makər a: «Gəzləŋ ga ka, aka rah nda məməta ana a ŋgiɗits a iye ya. Ndzum a faha. Ama ka ndzum kə̀la ka, nda metsehe lele.» 35A miyak à tar a fata, a da kətsah a zlawak. A daha, a kal aba a bəɗ aka ahəɗ. A dza ba aà meheme a Mbulum, dite ka, ma zla aà ŋgat mazlə̀b mesewere are aaha ya te. 36A gwaɗar: «Kamkam Tsir gà, aka təv ana mesewere are ata aka ndzera ka, ma ta giŋ ba a gər tsa te, na mege a ge a ba ya. Aɗaba kər ka, kà sle aà duwa tserdze. Ama ki ge a kəla ka, kamala ana a sàsak a, tsəka, kamala ana a sèsiŋ a tsa.»

37I dəba meheme ŋgar ata ya ka, a mbəɗ gər a dəba a təv gà ɓəzla mazazama ŋgat a makər ŋa aaha. A daha, a leha aà tar aka mendze are. A gwaɗa a Piyer: «Simun, ki ndze a are ya? Wànà kà sle aà mendze nda are ler ilik tsidze ya?» 38I dəba ŋa ya, a gwaɗa a tar asa: «Ndzum nda metsehe, ka hamum a Mbulum, dite ka tə də̀ɗum aka məbàzà Əbay sitene tsa. Ama kurum ka, kàa wayum lele, ba kurum na a sle aà magəsa ŋa tsiye pəra.»

39Aləka a tsik a tar aba ya kataya ka, a mbəɗ gər a zlawak asa. A daha, a hama a kamala ana lah ahər piŋŋe ya. 40I dəba ŋa ya, a màha a təv tar asa. A daha ka, tar riŋ ika mendze are mba hiywe. Ti sle mendze nda are ku ler ilik tsidze. Aləka ta piɗeke ika mendze are ya ka, tə sər dukw ana ti tsik a a Yesuw a asa tsa. 41Məmakər ŋana a mbəɗaha gər a təv tar asa ya ka, a gwaɗa a tar: «Kurum ana, aà mesìfìkà ba aaha ika mendze are ya mba pəra hiywe ya ya? Ama kinehe ka, ler ŋa aka sle kuɗa, fə̀rum aà iye, *wur ana a dara i təv Mbulum a, araha, ta vile a iye a ahər a gà ɓəzla bakal kuɗa. 42Hitswim aà mbulum, tàkwa a təv wele ana a ge aà iye a ɗaf a. Araha, aka à mendzera a faha ya.»

Magəsa Yesuw

Mata 26:47-56; Luka 22:47-53; Yuhana 18:3-12

43I təv mifefile Yesuw ata ya tsara ka, Yudas ika magər gà ɓəzla mazazama ŋgat aaha kurwa gəra sula ya, aka slalaha a təv ŋgar. Tə daha nda gà mburma hinne. Gà mburma ata tə daha ya ka, nda gà dukw ahər aà tar, gà màsalamà nda gà matakwazum. Na a sləraha tar ka, gà Əbay gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum, nda gà bàba gà mburma ana ta kwere a gà Yahuda ya. 44Ama i təv ana tì ti dze a ba aà magəsa Yesuw a ka, Yudas, mala medeɗef ata aka mbər meɗìfè a tar aba à wirwir ŋa ya. A gwaɗa a tar: «Araha, ki tèkwe a ka, wele ana Yàa ger wusa nda mendzìwìɗèba ahəm a ka, taŋa ka, ŋgat ŋa. Dite ka yabayum aaka, kə̀ gəsum, ka dum dər nda metsehe.» 45Aləka Yudas a ndzeha a təv Yesuw tsara ka, a sìrìkeha a təv ŋgar. A daha, a gwaɗar: «Wusa Əbay gà.» Dite a ndzìwìɗer ahəm. 46Gà mburma ata tə daha, ti yabaya aaka, ta gəs ŋgat kuɗa.

47Mìsle ŋgiɗ ilik aà gà mburma ata ti zezem a Yesuw a mbaŋa. A ndzàhara màsalamà ŋgar i ga ya. A lak dər a kəla meslire batsah mala mandəva kuɗa Mbulum. Pats a sàs dər ihər zləm a. 48Aləka Yesuw a gwaɗa a gà mburma ata ta gəs ŋgat a: «Kà dumara naha kataya nda gà màsalamà nda gà matakwazum ana, aà megìse iye ya? Wànà kamala ana iye ka, mala akəl a ya? 49Kəla pat iye riŋ i təv kurum, i tsikewa a kurum guma i ga Mbulum batsah ŋana ka, wàlaa kàa gəsum iye tsa. Ama taŋa ka, aɗaba dukw ana mewetse ŋa i wakita Mbulum a ka, məpàslà ahər ŋa aka ndze aɗəm kaɗəŋ a, tsəka, ki slwim a aà magəsa iye tsa.» 50I dəba ŋa ya, gà ɓəzla mazazama ŋgat tə tsaraka kataya tsara ka, ta wiye ba i fataya silit a dala kaɗəŋ, ta miyak à ŋgat a fata.

51Ama wele duwa a riŋ gà ɓəza i təv tar i fata nda gà ndura. A dəɗ aka Yesuw. Ta waya magəsa ŋgat mbaŋa. Tə daha, tsisl ta gəs ŋgat i ndura ŋgar ata ya. 52Ama wele ata sùrwat, a surwat a tar aba petek ata a ahər a. Ndzìslif a wiye ba a dala.

Yesuw a i seriye ika miɗ gà bàba gà Yahuda

Mata 26:57-68; Luka 22:54-55,63-71; Yuhana 18:12-14,19-24

53Aləka gà mburma tə da à Yesuw a bəra *batsah mala mandəva kuɗa a Mbulum. Dite gà Əbay gà ɓəzla mandəva kuɗa a Mbulum, nda gà bàba gà mburma ana ta kwere a gà Yahuda ya, nda gà ɓəzla medzeŋge məpala ahəm Mbulum, ti yaha ba ahəraha gər a fata tserdze. 54Aləka i dəba ŋa ya, megìse ana ta gəs, ti de a dər a ka, Piyer a zazam ŋgat i sik a i sik a, i dəba ya diriŋ, tsìm a bəra batsah mala mandəva kuɗa a Mbulum ata. A daha, a pəts a ga, a ndza a bəɗ aà akwa, aka varavada i huɗ ga. Tə ndza ahər a fata nda gà ɓəzla makàslà ga wele ata tserdze.

55Aləka gà bàba gà ɓəzla mandəva kuɗa a Mbulum nda gà asiŋ gà mburma ana ta kwere a gà Yahuda ya tserdze, ti yaha vatwa aà mege seriye a Yesuw i fata kuɗa, aɗaba a sàs a tar makə̀ɗà ŋgat. Ama tàa ŋgat bakal ŋa tsa. 56Gà mburma hinne tə sasa ahəraha pàrsa. Ama pàrsa tar ata a ne aka tar bazlam huwwa ika magər tar masakəŋa, tə sər dukw ana ta kiɗ ahər a ŋgat a tsa. 57I fataya ka, gà asiŋ gà mìsle ŋgiɗ ta hitse aà mbulum, tə sasa ahəraha pàrsa asa. Ta gwa: 58«Mər mì tsarakara i bazlam Yesuw a ka, a gwa: <I mbezle a à ga Mbulum batsah ŋa aaha mburma tə zlàzl nda ahər a. Dite i huɗ mehinne makər a ka, Yàa zlàzl aɗəm biy ŋgiɗ nda ahər asa tsa.> Taŋa dze ana, meme?» 59Ku mege ti tsik kataya tekeɗe, tàa gəs aaba ɓav tsa.

60I dəba ŋa ya, batsah mala mandəva kuɗa a Mbulum ata a hitse aà mbulum aka miɗ tar tserdze, a fàfəl a Yesuw. A gwaɗar: «Kà fàfəl a tar aakaha tə tsəna, meme, na kà ndza ɗikɗik a? Dukùla na ti tsik aà kər a ya?» 61Ama Yesuw a gəs mifèfiler aaka ɓav tsa, a ndzaba ɗikɗik. Wele ata a tsam ahər asa. A gwaɗar: «Kər ana, mala məmbə̀là à mburma ana, Mbulum a gwa ka, i slir a kurumehe a ya kəla ya? Nda gà kər ana, Kəla Mbulum ana mburma à zèmbeɗe a dər a ya?» 62Yesuw a gwaɗar aaka: «Haya, iye ka, ŋgat ŋa. Iye, *wur ana a dara i təv Mbulum a, aləka ki ta ŋgetwimiŋ a ka, iye mandza ŋa ika tsèke ahər mezime Mbulum ana a za gà dukw tserdze ya. Ki ŋgetwimiŋ a asa ka, aà gəza mbulum tirwenihhe, i dere a nda hulɓukw a.» 63Wele ata a tsaraka bazlam Yesuw ata tsara ka, a tsəɓar hinne. A tayara ikaba petek ŋgar a kwìyeɗ kwìyeɗ fit a bəɗ a. A gwaɗa a gà mburma ŋgar ata: «Bazlam a riŋ asa tsa. 64Kàa tsarakum mezelme bazlam ŋgar ata a ndavaya a Mbulum a te tsiye? Kù gwaɗum aaka, i kurum dze ana, meme na aka bazlam ŋgar ata ya? Wànà ki gekwe a dər ana, meme na kinehe ya?» Gà mburma ata tserdze ya, ta gwa: «Na kataya ka, bazlam a riŋ asa tsa, ŋgat ka, mala bakal ndzer, say makə̀ɗà ŋgat ilik pəra na a zeha ya.» 65Gà mìsle ŋgiɗ ika magər gà mburma ata ya, ŋgùɗàsl ŋgùɗàsl tə dza ba aà metìfèyè ahər tìzle tsara. Ta handakar ahər aka are. Dite tə lakayar waŋ waŋ aka mahalum. I dəba ŋa ya, ta gwaɗar: «Weke na a lakayak a, na kù gwa, i sər duwa hinne ya?» Aləka gà ɓəzla makàslà ga batsah mala mandəva kuɗa a Mbulum ata tə daha, ta gəs Yesuw tsara, ta gə̀zl ŋgat lehhè asa mbaŋa.

Piyer a ɗe bərakə̀zam a Yesuw

Mata 26:69-75; Luka 22:56-62; Yuhana 18:15-18,25-27

66Piyer ka, ŋgat a riŋ mandza ŋa i bəɗ ika varavada i ga ata hiywe, i təv akwa ana ndeɗiŋa a ndza ahər a. Daala duwa a riŋ ilik i liwiŋ gà na ta gewa mege megemir a *batsah mala mandəva kuɗa a Mbulum ata ya. A daha a fata. 67A ŋgat a Piyer ana à vìɗebe a akwa ya ka, a samata ŋgat ìzliɗ ìzliɗ lele. A gwaɗar: «Kər tekeɗe ka, mburma Yesuw aaha a dara i Nazaret a dìgiy?» 68Ama Piyer a ɗe bərakə̀zəm a Yesuw. A gwaɗa a məkəs ata: «Lalalala, iye ka, i sər dukw ana a sàsak aà metsikiŋ a tsa.» I dəba ŋa ya, a hitse i fataya, slip a ndza aà gùva biye hərmaga madàra a bəra ya. Ama guŋgwazl a dza ba aà tuwa tsara.

69Daala ata a ŋgataraha a fata asa ka, a gwaɗa a gà mburma ata i fataya: «Wele aaha ka, mburma Yesuw mbaŋa.» 70Ama Piyer a gwaɗa a tar: «I gwaɗa a kurum ka, i sər ŋgat tsa tiye, gà welè.» Zàkwayiya ka, gà mburma ata ta mà dər aka Piyer asa. Ta gwaɗar: «Kər ka, ki sle aà megweɗe a ka, iye ka, mburma ŋgar tsəka, ki sle a tsa. Aɗaba kər tekeɗe, kà dara ka, i Galile ya.» 71Ama Piyer a gwaɗa tar: «Mbulum mà sèwèriŋ are, na kige i sər ŋgat a. Taŋa i mbaɗa ka, nda ndzer ŋa, i sər wele aka kinehe ki tsikwim ahər a ya tsidze.» 72Piyer a ndə̀vara à mifefile ŋgar ata i bazlam a tsara ka, guŋgwazl a tuwa masula ŋa. I fataya tsara ka, bazlam Yesuw ana a gwaɗar: Ələk guŋgwazl a ti tiwe a sula ka, kàa gwa medzige makər, i sər Yesuw tsiye ka, aka màrra a gər a. A dza ba aà tuwa hinne.

Currently Selected:

Markus 14: gnd

Highlight

Copy