Markus 16

Yesuw a mbəlara i məməta ya

Mata 28:1-8; Luka 24:1-12; Yuhana 20:1-10

1Aləka pat mesìfìkà ba gà Yahuda a da iɗəm a ka, gà Mariya ana a dara i Magədala ya, nda gà Salume, nda gà Mariya məmər Zakup, tə səkəm wirdè ana a ze hwaŋŋà lele ya, ta waya mibehe aà məməta Yesuw. 2Ndidwe ŋana, a pat ladà i mèkwède, aka pat ana birìzze à mbizere a ya ka, gà daala ata tə da aka dive Yesuw. 3I təv ana ti de a mba ya ka, tə dzala, ta gwa: «Weke na a ti tèpèslekwere a beliŋ aà dive ŋa ya kuɗa ya?» 4Ama ti ndzeha a fata, ta fə̀raha ka, batsah beliŋ ata mahə̀ndə̀kà ŋa ara ihər a. A riŋ dzèŋŋe aà gùva ŋa.

5Tə daha, ta patsaha aɗəm ka, tàa leha aà wele duwa gà ɓəza, ar taŋa a ge a gawla ya. A riŋ iɗəm tùŋŋa, mandza ŋa ika tsèke ahər mezime, nda gà andiw tàs herrè ŋa. Ta ŋgat a wele ata tsara ka, arəv a da aà tar a. 6Ama wele ata a gwaɗa a tar: «Ki gwim magəɗa, arəv ma da aà kurum a tsa. Ki yehwim a Yesuw ana a dara i Nazaret, tə ndwandway ŋgat aà dizl magə̀làwà ŋa ya tsə̀nà? Ama ka, ar ɗa i faha tsa. Mbulum aka mbəl à ŋgat i məməta ya. Fə̀rum aà təv ana ti tike aɗəm a kwaŋ bə̀là. 7Dum kinehe, ta gwaɗum a gà ɓəzla mazazama ŋgat, a gà Piyer ka, aka mbəlara i məməta ya. A lèh a kurum a aka miɗ a aka ahəɗ Galile. Ki ta ŋgetwimer a ka, a fata, kamala ana a tsik a kurum a.» 8Tə tsaraka bazlam wele ata kataya tsara ka, tə tə̀zara i dive ata ya. Tə dza ba aà medzedzere hinne, arəv a da aà tar a. Ta gəs metsike aba bazlam wele ata a wura ya tsa, aɗaba ta gwa: «Duwa aka ne aà mər.» Ta ge magəɗa.

Yesuw a lah məpàtà à ba ŋgar a Mariya ana a dara

i Magədala ya

Mata 28:9-10; Yuhana 20:11-18

9{Yesuw a mbəlara i məməta ya ka, i mèkwède hedwe, a pat ladà. A lah məpàtà à ba ŋgar ka, a Mariya ana a dara i Magədala ya, daala ana a dalawa ihər gà sitene təsəla ya. 10Daala ata a da a təv gà na tə ndzawa nda gà Yesuw tserdze ya. A daha ka, tar riŋ ti tiwiŋa, aɗaba gər a tsahən aka tar tsa. A tsik a tar dukw ana a ge ba nda ŋgat a. 11Ama tə tsaraka bazlam ŋgar ata, a gwaɗa a tar ka: «Yàa ŋgat a Yesuw, aka mbəlara i məməta ya» tekeɗe ka, ta gəs bazlam ŋgar ata a gəzləŋ tar tsidze. Ta gwaɗar: «Pàrsa.»

Yesuw a pàt à ba ŋgar a gà ɓəzla mazazama ŋgat sula

Luka 24:13-35

12I dəba ŋa ya, gà ɓəzla mazazama ŋgat sula ti de a a dala. Yesuw a mbəɗ ba ŋgiɗ, dite a pàt aba. A dara a təv tar aka vatwa ya. 13Gà mburma ata sula ya, ta mbəɗara gər a ma ya. Tə dara, ti tsik dukw ata a ge ba nda tar ika vatwa ya, a gà asiŋ gà mburma. Ama gà mburma ata ta gəs ɓav tsa asa, ta gwaɗa a tar: «Pàrsa mbaŋa.»

Yesuw a pàt à ba ŋgar a gà ɓəzla mazazama ŋgat

kurwa gəra ilik kuɗa

Mata 28:16-20; Luka 24:36-49; Yuhana 20:19-23; Gà Ɓəzla Meslire 1:6-8

14Aləka i dəba ŋa ya, i təv ana gà ɓəzla mazazama ŋgat kurwa gəra ilik ŋa aaha tar riŋ ti zim a ɗaf a ka, Yesuw a pàt a tar aba asa kuɗa. A pala a tar ahəm, agəra ana tàa gəs ŋgat nda gəzləŋ lele tsiye. Aɗaba ana tàa gəs bazlam gà mburma ata ta gwaɗa a tar ka: «Maa ŋgatar, aka mbəlara i məməta ya» ka, ta gəs tsiye. 15I dəba ŋa ya, a gwaɗa a tar: «Kinehe ka, dum, ku mege a ŋga, ka tsikwim bazlam ŋgwal ŋa aaha a gà mburma ana tserdze ika gər ahəɗ a. 16Wur ana aka gəs iye nda gəzləŋ, tàa tsilwiɓ dər a yam a ka, a mbiliŋa. Ama wur ana aka gəs iye tsiye ka, sida ika gər ŋgar. 17Gà na tàa gəs iye ya ka, i vile a ter a ndzəɗa, aà mege dukw mene aà mburma, nda madalawa gà sitene aà mburma ya nda zləm gà. Ta fèfil a gà bazlam gà kwite ŋgiɗ pampam.*fa* 18Ku mege tàa gəs mesiwiɗ a ahər, ku mege tàa sa mawur tekeɗe ka, à lèh a ter a duwa tsidze. Tàa tike ahər aka gà ɓəzla dukw məməta ka, ta mbil a tsara. Tàa ge gà dukw ata ka, gà mburma ti sir a dər ka, iye na a slər ahər tar a.»

Mbulum a zla Yesuw a təv ŋgar

Luka 24:50-53; Gà Ɓəzla Meslire 1:9-11

19Əbay Yesuw a fàfəl a tar aba ya kamala taŋa ya tsara ka, Mbulum a zla ŋgat. A da à ŋgat a ma. Yesuw a daha, a ndzaba aka tsèke ahər mezime Mbulum. 20Gà ɓəzla mazazama ŋgat ibam, tə da a metsìkè bazlam ŋgwal ŋa aaha ndeɗiŋa ya, ku mege a ŋga. Əbay Yesuw a gewa megemir nda gà tar kuɗa. A zlàkawa tar i dukw mene aà mburma ata ta ge a ya. Aɗaba gà na tə tsaraka ya tekeɗe, ta gəs bazlam tar ata ndzer kaɗəŋ.}

Currently Selected:

Markus 16: gnd

Highlight

Copy