Luka 5

Gà ɓəzla mazazama Yesuw ana malahalah ŋa ya

Mata 4:18-22; Markus 1:16-20

1A pat duwa, Yesuw a riŋ mandza ŋa aà gùva duluv Genezaret, dite gà mburma hinne ta mbàha aba a təv ŋgar aà matsaraka bazlam Mbulum. Ti yahaba gər, ta ŋgiɗits a ŋgat. 2Ama Yesuw a pə̀r ikaba ya ka, a ŋgat a gà slə̀làh yam a riŋ aà gìgìze i fata sula. Gà ɓəzla magàsà kilif tàa tarra iɗəm a, tar riŋ ta bere a aà gà ndzàràwà tar a. 3Yesuw a daha, a tsəl a biy ŋgiɗ ilik, a biy Simun. A ndza aɗəm, a gwaɗa a Simun: «Kamkam, sìrìk à slə̀làh yam yak aaha aà gùva gìgìze ya zaakwa te.» Wele aka a sìrìk dər aka magər yam zaakwa. Dite Yesuw a daha, a ndza aɗəm. I dəba ŋa ya, a dzara ba aà metsìkè guma ŋgar a gà mburma iɗəm i fataya.

4Aləka a ndəv à mifefile ŋgar ata lele ka, a gwaɗa a Simun: «Sìrìk à slə̀làh yam yak aaha aka magər yam a təv ana biye iɗəm a asa. Dite kà pə̀lum aɗəm à gà ndzàràwà kurum nda gà ɓəzla meslire yak, kə gasumara iɗəm kilif a.» 5Simun a gwaɗar aaka: «Əbay gà, maa ya ba ndaàvəɗ ka, hinne, ama maa gəs kilif ŋa ilik tsidze. Ama ka, na kàa gweɗiŋ, pəl dər aɗəm ka, i niw a tsa, i pìl a dər aɗəm.» 6Ta pəl aɗəm à ndzàràwà ata, a da a huɗ yam. Zàkwayiya ka, aha ŋana ta gwa, mìi ŋgil a dərra iɗəm a tsiye ka, ndzàràwà ata a ɗe ndìrìtsìtse, kilif maràhà ŋa iɗəm ìdìp. 7Ta geha wiyèw a gà masla tar ana i slə̀làh yam ŋgiɗ a, dite ka, tə dara, tə̀ zlak ahərra iɗəm tar a te. Gà mburma ata tə daha, tə zlak ahər tar aà mə̀ŋgəlà dərra iɗəm a. Tə raha dər a gà slə̀làh yam tar ata fèɗìɗe fèɗìɗe. A zehe ka, hinne tsidze, na slə̀làh yam tar ata à pìts à ter a a huɗ yam a, aɗaba mibe kilif ata a rah aɗəm hinne ya.

8Simun Piyer a ŋgat a kilif ata kataya tsara ka, a daha, a kal aba aka sik a Yesuw nda gà mandza gurmits a biye. A gwaɗa a Yesuw: «Sìrìk i təv ga ya, Batsah ga ŋa. Iye ka, mala bakal kweleŋ.» 9Aɗaba kilif ata ta gasara i yam a hinne ya ka, a ge magəɗa a gà Simun nda gà ɓəzla meslire ŋgar ata tserdze ya. 10A dzadzar à gà masla ŋgar gà Zakup nda Yuhana, gà ɓəza Zebede aaha a zal a tar aaba ya mbaŋa. I dəba ŋa ya, Yesuw a gwaɗa a Simun: «Magəɗa ma gik tsa. Daga aà kinehe ya, ki ne a mala mayahara gà mburma i luvuŋ a, kamala kilif aaha kurum riŋ ki geswimere a i yam a, dite ka, gà mburma ata ibam, tə dara a təv dzaydzay ŋa ya.» 11I dəba ŋa ya, gà mburma ata ti sìrìkera à slə̀làh yam tar aka gìgìze ya. Ta məsak à gà tsir tar nda gà ɓəzla meslire tar nda gà dukw tar ata tserdze ya a fata, tə zazam Yesuw tsara.

Yesuw a mbəl à mala vèdègwè duwa

Mata 8:1-4; Markus 1:40-45

12A pat duwa, Yesuw a ndze a batsah kwite duwa ka, tàa lə̀ma nda mala vèdègwè duwa. Ama wele ata a ŋgat a Yesuw tsara ka, a kal aba aka miɗ ŋgar, a hamar. A gwaɗar: «Əbay, na mege kà waya ka, ki sle a aà mimbile à iye te.» 13I dəba ŋa ya, Yesuw a tsaraka bazlam ŋgar ata ka, a zla ahər ŋgar, a ləm dər ahər. A gwaɗar: «Haya, a sèsiŋ na ki mbil a ya. Kinehe ka, mbəl i dukw məməta yak a.» I fataya ka, mbəlak ba wele ata a ndala ihər a suwut tsara.

14Ama Yesuw a gwaɗar asa: «Hey, ka ti tsik a wura tsidze. Ama kəla ka, da, ka ta pàt à ba yak a mala mandəva kuɗa a Mbulum, dite mà samata kər, ma sər dər ka, meme na kà ndza kinehe kuɗa ya. I dəba ŋa ya, ka vəl dukw masakəŋana a Mbulum, kamala ana Musa a tsik a. Dite gà mburma ta ŋgeteke a, ti sir a dər ka, kàa mbəl kaɗəŋ a.» 15Tsaatsa ivaɗ, wele ata a mbəɗ ba, a neye ŋgat. Meɗè zləm Yesuw a ɗe zləm i fata hinne. Gà mburma hinne ti yahawa ba gər aà matsaraka dukw ana a tsik a ya, ta waya, dite mə mbala à tar i dukw məməta tar a. 16Ama Yesuw ka, a hitse i fataya tsara, a daba a təv ana mburma a riŋ iɗəm tsiye. A daha, a hama a Mbulum i fata.

Yesuw a mbəl mala magàha a bəɗ duwa

Mata 9:1-8; Markus 2:1-12

17A pat duwa, Yesuw a riŋ ihər a tsik a guma ŋgar a gà mburma. Gà *Farisa nda gà ɓəzla medzeŋge məpala ahəm Mbulum a riŋ mandza ŋa i ga i təv ŋgar bise. Ama gà mburma ata ka, tə dayara ka, i Yeruzalem a nda gà i gà asiŋ gà kwite ŋgiɗ ana ika ahəɗ Yuda ya, nda gà ika ahəɗ Galile ya mbaŋa. Ama ka, ndzəɗa Əbay Mbulum a riŋ nda Yesuw, a zlàkawa ŋgat aà məmbàlà à gà ɓəzla dukw məməta.

18I təv ana a riŋ a tsik a guma ŋgar ata ya ka, gà mìsle ŋgiɗ pam tə daraha à mala magàha a bəɗ duwa, meŋgè ŋa aà slə̀làh. Gà mburma ata tə da dərraha ya ka, ta waya metìkè wele ata aka miɗ Yesuw, aà mipèter dər riŋ i ga ata. 19Ama tə sər dər vatwa a təv ŋgar a ga tsa, aɗaba gà mburma a riŋ hinne i ga i təv ŋgar i fata ndaka biye hərmaga ŋa dze. Tə daha, ti yaha dər vatwa, tə tsəl dər aka ga ata ŋgat iɗəm a. Ŋgər tə təm gər ga, ser aka Yesuw. Tə zla mala magàha a bəɗ ata, ta gasa i liɓir a. Ti ndzer dərraha nda slə̀làh ŋa dze. 20I dəba ŋa ya, Yesuw a samata gəzləŋ gà mburma ata ka, ta gəs ŋgat lele. A gwaɗa a mala magàha a bəɗ aaha: «Masla gà, Yàa pə̀lak à bakal yak.»

21Aləka i dəba ŋa ya asa, gà ɓəzla medzeŋge məpala ahəm Mbulum ata nda gà Farisa ya, tə dza ba aà madzala ŋa nda gà gər. Ta gwa: «Wele aaha dze ana, weke, na ŋgat ka, a tsik a duwa aà Mbulum kataya, a ndeveyer a ya? Weke na a sle aà məpəla à bakal a mburma ya, na Mbulum ilik tsiye?» 22Yesuw a səraha aka dukw ana tə dzala i gər tar a tsara. A gwaɗa a tar: «Aàmala na kà dzalum gà gər kataya ya? 23Magwàɗà a mala magàha a bəɗ: <Yàa pə̀lak à bakal yak> nda bazlam masakəŋa ka, a wur ba tsa, kige tsa: <Hitse, ka zla slə̀làh yak, dite ka da> ka, taŋa ka, a wur ba. 24Ama a sèsiŋ ka, sərum dər, iye, *wur ana a dara i təv Mbulum a, iye riŋ nda gà ndzəɗa aà məpəla à bakal a mburma ika gər ahəɗ.» I dəba ana Yesuw a tsik a tar kataya ya tsara ka, a gwaɗa a mala magàha a bəɗ ata: «Iye i gwaɗak, hitse, ka zla slə̀làh yak, ka daba a ma.» 25Wele ata a hitse tsara, ika miɗ mburma i fata, a zla slə̀làh ŋgar ata tə zla dərraha ŋgat a. A daba a ma nda gà mazàmbàɗà a Mbulum hinne. 26A mà dər a gà mburma ata tserdze ya dà/?asasa, a ge aà tar kamala dukw mene aà mburma ya. Tə dza ba aà mazàmbàɗà a Mbulum nda magəɗa hinne i gəzləŋ tar. Ta gwa: «Yweh, yweh, maa ŋgat a gà dukw mene aà mburma mbakum.»

Yesuw a zal a Levi

Mata 9:9-13; Markus 2:13-17

27Aləka i dəba ŋa ya, Yesuw a dara i ga ata ya, a daba. I təv ana a riŋ a de a ya ka, a ŋgat a mala duwan duwa, zləm ŋgar Levi, a riŋ mandza ŋa i ga duwa i təv megemir ŋgar. Yesuw a daha, a gwaɗar: «Dara, zezem iye.» 28Ama Levi a tsaraka kataya tsara ka, a hitsera i fataya, a miyak à gà dukw ŋgar nda gà megemir ŋgar ata tserdze, a zazam ŋgat.

29Aləka i dəba ŋa ya, Levi a de dukw mezime hinne i ma ŋgar. A ndzəkara aka miɗ Yesuw a. A zal dər a gà ɓəzla duwan ŋgiɗ, nda gà masla ŋgar tserdze hinne. Tə zəm akaba. 30Ama gà *Farisa nda gà ɓəzla medzeŋge məpala ahəm Mbulum ana gà mburma tar a, tə dza ba aà masàyà ahəm, ta gwaɗa a gà ɓəzla mazazama Yesuw ana i fataya: «Aàmala na kà zəmum akaba ɗaf nda masàyà duwa nda gà ɓəzla duwan aka dze ya, dite nda gà mburma aka meɗè zləm tar ŋgwala tsiye ya?» 31Ama Yesuw a gwaɗa a tar aaka: «Wura a de a a dàkwtar tsa, na ba ŋgar a riŋ lele ya. Say na a riŋ nda gà dukw məməta ya dzekwiŋ. 32I dara ka, aà mazàlà a gà na ta gweɗe a, waytsà mər gà ŋgwal ŋa ika miɗ Mbulum a tsa. Say a gà ɓəzla bakal ivaɗ, dite ka, ta mbəɗ à gəzləŋ tar a təv Mbulum mbaŋa.»

Mege ndəra i təv Yesuw

Mata 9:14-17; Markus 2:18-22

33Aləka gà mburma ata ta gwaɗa a Yesuw: «Gà ɓəzla mazazama Yuhana ta gewa ndəra, dite ka, ta hamawa a Mbulum asa. Gà mburma mər gà *Farisa tekeɗe ibam, ta gewa kataya mbaŋa dze ana, aàla na gà ɓəzla mazazama kər ka, tə zəmawa ɗaf nda masàyà duwa tserdze ya?» 34Ama Yesuw a fàfəl a tar aaka, a live dər à ba ŋgar nda mazla daala ya. A gwaɗa a taraha: «Kà dzalum dze ana, ti sle mifère ndzəɗa aka gà mburma ana zal daala a zal a tar à dukw mezime ya ya, dite ka, tə zəm ɗaf ata asa tsiye ya? Bəla na tar riŋ i təv ŋgar ibam a? Taŋa ka, a sle a ba tsa. 35Ama pat ŋgiɗ a riŋ a ndzere a mba, na ti zle a aà tar zal daala aaha ya. Na pat ŋa aka ndzera ka, taŋa ka, ti sle a aà mege ndəra kuɗa.»

36I dəba ŋa ya, Yesuw a tsik a tar bazlam minew ŋgiɗ pam asa. A live dər aba nda guma ŋgar ana awiya ŋa ya. A gwaɗa a tar: «Wur a a sle a aà mesèsera awiya petek a, dite a dep a a miviye petek tsa. Aɗaba taŋa ka, awiya ŋa aaha aka nəs mbaŋa. Miviye ŋa aaha ibam, a ge a ŋgulum asa tsa, ndzəɗa ŋgar aka mbər mendìve. 37Kamala taŋa ya asa mbaŋa, wura a sle aà medzè a guzum himmè ŋa, a duwa kwiye ana miviye ŋa ya tsa. Aɗaba dukw ata ka, a kwese a mba. Duwa kwiye ata miviye ŋa ya ka, à zlìrite a asa tsa, ə̀nduh à ndìzliŋa. Bəla na aka ndə̀zl ka, dukw aaha à dzìŋa, dite duwa kwiye ata ibam, aka dzeye. 38Ama ka, kataya tsa. Say mandza guzum himmè ŋana ka, a duwa kwiye ana awiya ŋa ya mbaŋa. 39Ama wura a sle a aà masà guzum himmè ŋana asa tsa, na aka mbər mese makwàsà ŋana ya. A gweɗe a ka, say makwàsà ŋana, na ŋgwal ŋa ya.»

Currently Selected:

Luka 5: gnd

Highlight

Copy