Luka 4

Əbay sitene ana a dzik à Yesuw a

Mata 4:1-11; Markus 1:12-13

1Aləka Yesuw a rah nda Mezite Mesife Mbulum lele ka, a dara i dulwa Yurdan a. Dite Mezite Mesife Mbulum ata a da à ŋgat a kusak. 2A daha, a ge riŋ mehinne dzik faɗ ka, tar nda Əbay sitene. I huɗ mehinne ata ya ka, Əbay sitene ata a riŋ a dzik a à ŋgat pərra. Aka mə̀ndzər duwa tsidze. Aləka i dəba ŋa ya ka, may a dza ahər ba kuɗa. 3Əbay sitene ata a gwaɗar: «Na kù gwa, iye Kəla Mbulum ka, gwaɗa a kur aaha, ma ne ɗaf.» 4Ama Yesuw a gwaɗar aaka: «Mewetse ŋa a riŋ i wakita Mbulum ka, a gwa: <Mburma a sle aà mendze a ka, nda ɗaf ɗekɗek tsa.> «*fa*

5I fataya tsara ka, Əbay sitene ata a tsəl à ŋgat a gər kwite asa. A daha, a patar à gà ahəɗ ana pampam ika gər ahəɗ tserdze ya tsara. 6-7A gwaɗar: «Ta vəl mekwere gà ahəɗ aaha fit ka, a iye. Ama i sle a aà məvəla a wur ana i waya ya mbaŋa. Na kàa dziŋ gurmits a bəɗ ka, i vilek a gər ahəɗ aaha fit dze ya, a ahər yak, nda limana ana ikəka ya fit, ki kweriŋa.» 8Yesuw a gwaɗar aaka: «Mewetse ŋa a riŋ i wakita Mbulum asa ka, a gwa: <Zàmbaɗa à Mbulum Batsah yak ŋa, dite ka zazam ŋgat ilik pəra.> «*fb*

9I dəba ŋa ya, Əbay sitene a da à ŋgat a Yeruzalem. A daha, a tsəl à ŋgat aka zligiɗìŋ aka gər ga Mbulum batsah ŋana. I fata ka, a hitse à ŋgat aka tsèke zəraŋaŋŋà ŋana. A gwaɗar: «Na kər Kəla Mbulum kaɗəŋ ndzer ka, kal à ba yak a bəɗ i faha ya. 10Aɗaba mewetse ŋa a riŋ i wakita Mbulum ka, a gwa: <Mbulum a ta gweɗe a a gà gawla ŋgar ka, ta kasla kər.> 11A tsik mbaŋa ka: <Dite tə ta kətsawa kər, aɗaba kà dəɗ a bəɗ, kur ma ta gik mbəlak tsa.> «*fc* 12I dəba ŋa ya, Yesuw a gwaɗar aaka: «Mewetse ŋa a riŋ i wakita Mbulum mbaŋa asa ka, a gwa: <Ka ti dzik à Mbulum Batsah yak ŋa tsa.> «*fd*

13I dəba medzike à Yesuw ana Əbay sitene a dzik dər nda təv gà dukw ŋgiɗ pampam a ka, a ya ba masakəŋa. I dəba ŋa ya, a daba i təv ŋgar a tsara, haa a pat ŋgiɗ asa.

Mege megemir Yesuw ana a dza ahər ba ika ahəɗ Galile ya

Mata 4:12-17; Markus 1:14-15

14I dəba ŋa ya, Yesuw a mbəɗ gər aka ahəɗ Galile ka, maràhà ŋa nda gà ndzəɗa Mezite Mesife Mbulum i ba ŋgar hinne. Gà mburma tə dza ba aà maɗə̀vàr zləm i gà kwite ana i fataya. 15A dzeŋgewa guma ŋgar a mburma i gà ga mahàmà a Mbulum. I dəba ŋa ya, gà mburma ata i fataya tserdze ka, tə zləbawa à ŋgat.

Gà mburma ana i Nazaret a, ta gəs Yesuw nda gəzləŋ tsa

Mata 13:53-58; Markus 6:1-6

16Dite i dəba ŋa ya, Yesuw a dara a Nazaret a, a təv ana a gəl iɗəm ba ya. Aləka pat mesìfìkà ba a ndzera ka, a da a ga mahàmà a Mbulum tar, kamala ana a gewa dər a. A daha, a hitse aà mbulum, aɗaba a sasar aà medzeŋge a tar bazlam Mbulum. 17Tə daha, ta vəlarra wakita Ezaya, mala məma à guma Mbulum ana a tsikewa ya, a tsik a ter a iɗəm a. A pəl ikaba à wakita ata ya. A le aɗəm aà bazlam ana mewetse ŋa iɗəm a. A gwa:

18«Iye i ahər Mezite Mesife Mbulum, aɗaba

a zla iye aà meɗìfè à bazlam ŋgwal ŋana

a gà ɓəzla matawak. A slərra iye ya ka,

a təv gà ɓəzla daŋgay a,

aà meɗife a tar à məpala à tar.

Dite aà mahə̀ndə̀kà are

a gà ɓəzla guluf mbaŋa

nda gà aà mibeyè à gà na

ti sèwèrewa a tar are ya.

19Aà meɗìfè à mive ana Mbulum a sasar

a ta ge a ŋgwal ŋa a gà mburma ŋgar a

asa mbaŋa.»*fe*

20I dəba ŋa ya, Yesuw a paɗa akaba wakita ata, a mà dər a mala meslire ga Mbulum ata, a daha, a ndza a bəɗ. Gà mburma ana i fata i ga mahàmà a Mbulum ata ya, tə dza are aà Yesuw tserdze. 21Ama Yesuw a gwaɗa a tar: «Bazlam ana i tsik i wakita Mbulum a ta ge a ba ya ka, aka ndze aɗəm kuɗa. Ku mege kamala ana kinehe i dzeŋge, kà tsarakum a tekeɗe ya.» 22Ama gà mburma ata tserdze ya, ta màraha aba, tə dzala i gər tar, ta gwa: «Bazlam ata a tsik a ya ka, a da a kwa a gər.» Ta fə̀r ahər ka, ta gwa: «A ŋgatara metsehe aaha dze ana, i ŋga ya kataya ya? Aɗaba ŋgat ka, kəla Yasufa ya?»

23I dəba ŋa ya, Yesuw a gwaɗa a tar aaka: «Ki ti sewlwim aà iye a nda bazlam ata, pàrsa iɗəm tsa. Ki gweɗwim a ka: <Kər kà ne dàkwtar, mbəl à ba yak dukw yak.> Ki ta gweɗwim a mbaŋa ka: <Maa tsaraka gà dukw ana ki ge i Kafarnahum a. Ama kinehe ka, ge i faha, i kwite ana ta gəl iɗəm kər a asa mbaŋa.> « 24I dəba ŋa ya, Yesuw a gwaɗa a tar aaka asa: «Iye ihər i gweɗe a kurum a nda ndzer, pàrsa iɗəm tsa: Wura ta wa ŋgat i fata, a gəl ba tekeɗe, i kwite ata, dite à me à bazlam Mbulum i fata asa ka, wura à gis a bazlam ŋgar nda gəzləŋ, ta ger a magəɗa lele tsa. 25Iye ihər i tsik a kurum a ka, nda ndzer, màhaw iɗəm tsa: Akahər ana Iliya a màwa à guma Mbulum a mburma ya ka, gà madakwa gà məkəs duwa a riŋ hinne ika ahəɗ Isərayel. Ama ka, yam aka dza tsa mive makər nda kiye ndilik. I fataya ka, batsah may a ndəv gà mburma ana i fataya fit. 26Ama Mbulum aka slər Iliya a təv gà madakwa gà məkəs ata ɓav tsa. A slər ŋgat ka, a təv madakwa məkəs duwa a riŋ mandza ŋa i Sarapta ika ahəɗ Sidun. 27Akahər ana Iliyaza a màwa à guma Mbulum a tekeɗe ka, gà ɓəzla vèdègwè a riŋ i kwite Isərayel hinne mbaŋa asa. Ama wura aka mbəl ika magər tar a ilik tsidze. Say Naaman ana ika ahəɗ Siriya ya ɗekɗek.»

28Gà bazlam ata Yesuw a tsik i ga mahàmà a Mbulum a ka, a wur aà gà mburma ana i fataya tserdze. Ta ge arəv nda təv ŋgar hinne. 29Tə daha, ti tsiheyerra ahər i kə̀sà ya. Tə da à ŋgat aka gər zalaŋ ana zəraŋaŋŋà ŋana, aà melìmer aɗəm zləmana. 30Ama i dəba ŋa ya, Yesuw a dara ika magər tar a tsìrìɗ tsìrìɗ tsìrìɗ, a mà aka vatwa ŋgar dukw ŋgar.

Wele ana sitene a darra i ba ya

Markus 1:21-28

31Aləka i dəba ŋa ya, Yesuw a da i fataya ka, a da riŋ a Kafarnahum ika ahəɗ Galile i fata. A daha a fata ka, a dza ba aà metsìkè guma ŋgar a gà mburma i ga mahàmà a Mbulum i fata, a pat mesìfìkà ba. 32Ama guma ŋgar ata a tsik a ka, arəv a da dər aà tar a, a ge aà tar kamala dukw mene aà mburma ya. Aɗaba bazlam ŋgar ana a tsik a ya ka, sləsla ihər, kamala biy Mbulum a.

33Ama ka, wele duwa a riŋ i ga ata, duwa a gasawa ŋgat. A dza ba aà Mewideye hinne nda ndzəɗa. 34A gwaɗa a Yesuw: «Ki yehe a aà mər la ya, na kər ana kà dara i Nazaret a? Kà dara ana, aà medzeye à mər kəla ya? I sər kər lele. Kər ka, wur ana bakal ŋgar a riŋ tsa, Mbulum a slərra a faha ya.» 35Yesuw a tirɓe akaba sitene aka lele. A gwaɗar: «Kà fàfəl asa tsa, tsəma, dara i ba wele aka ya.» Sitene ata a yà wele ata a bəɗ aka miɗ gà mburma ata. Dite a darra i ba ya nda zèyezèye ŋa ya, aka ger madzək tsa seyiŋ. 36A ge aà gà mburma ata i ga ata ya tserdze kamala sunwa ya. Ta gwaɗaba ika magər tar: «Yweh, yweh, medzibe mifefile là na naha, wele aaha a kwara akaba gà sitene aaha nda ndzəɗa ka, dite ta gəs ahər ahəm, tə dara i ba mburma ya?» 37I dəba ŋa ya, gà mburma ata tserdze ya, ti ɗewa zləm à Yesuw ika ahəɗ ata hinne.

Yesuw a mbala à gà ɓəzla dukw məməta hinne

Mata 4:23; 8:14-17; Markus 1:29-34

38Aləka i dəba ŋa ya, Yesuw a da i ga mahàmà a Mbulum ata ya, a da a bəra Simun. A daha ka, dzìdze Simun a riŋ mahə̀nà ŋa ika slə̀làh, màràɓàraɓ a geriŋa. Gà mburma ana i fataya, ta gwaɗa a Yesuw: «Mbəl à ŋgat te.» 39Yesuw a daha, a kirik aakaha a bəɗ, a kwara akaba màràɓàraɓ ata kwirik kwirik, dite a ndala aà məkəs ata ya tsara. I dəba ŋa ya, məkəs ata a hitse aà mbulum, a sle aà mege a tar mbəlakw lele kuɗa.

40Aləka pat a dəɗ ka, gà na gà masla tar a riŋ nda gà dukw məməta pampam hinne ya, tə ndzakara tar a təv Yesuw a. A dzaya aka tar ahər, aka gər gà ɓəzla dukw məməta ata ilik ilik tserdze. Dite ta mbala i dukw məməta tar a. 41A beye à tar i ahər sitene ya, dite tə dara i ba tar a nda gà Mewideye ya hinne mbaŋa. Ta gwaɗa a Yesuw nda gà Mewideye: «Kər ka, Kəla Mbulum.» Ama Yesuw a tirɓe akaba tar hinne. A gwaɗa a tar: «Kà fàfəlum tsa.» Aɗaba ana tar ka, tə sər ŋgat, ŋgat ka, *Kiristi, mala məmbàlà à mburma ana Mbulum a gwa, i slir a kurumehe a ya.

Yesuw a tsikewa bazlam Mbulum ika ahəɗ Yuda

Markus 1:35-39

42Aləka mbulum a də̀v mbètiyyè ka, Yesuw a mah ba i kə̀sà ata ya tsara, a daba a təv ana mburma riŋ iɗəm tsiye. Gà mburma ata tə ta medeha aləka ka, a riŋ i fata tsa, aka da a tsèke ŋgiɗ. Tə dza ba aà mayaha ŋgat. I dəba ŋa ya, ti le aà ŋgat aləka ka, tə dza ba aà magəsa ŋgat, dite ka, ma da aà tar a asa tsa. 43Ama Yesuw a gwaɗa a tar: «Say i ti tsik a bazlam ŋgwal ŋana biy mekwere Əbay Mbulum a gà asiŋ gà mburma ana i gà kwite ŋgiɗ a mbaŋa. Aɗaba taŋa na Mbulum a slərra iye ya.» 44A da aà tar i fataya. A da aka ahəɗ Yuda. A daha, a tsikewa bazlam Mbulum a mburma i gà ga mahàmà a Mbulum ana i fataya.

Currently Selected:

Luka 4: gnd

Highlight

Copy