Luka 3

Guma Mbulum ana Yuhana metsìlwìɓè à mburma a yam

a tsik a

Mata 3:1-12; Markus 1:1-8; Yuhana 1:19-28

1Akahər ata Yuhana a pàt à ba ŋgar ka, Tiberiyus ŋgat batsah Əbay ana a kwere a ahəɗ gà Ruma ya. Aka ve iɗəm kurwa gəra ə̀zləm. Ŋgat na a tike aɗəm Puntiyus Pilatus ana a kwere a ahəɗ gà Yuda ya. *Hiridus i ŋgar ka, ŋgat a riŋ a kwere a ahəɗ Galile. Damər ŋgar Filip ibam, a riŋ a kwere a gà ahəɗ gà Ituriya nda Tərakunitis. Lisaniyas i ŋgar, Əbay gà mburma ana ika ahəɗ Abilen a. 2Gà Hanas nda Kayafas ka, tar gà bàba gà ɓəzla mandəva kuɗa a Mbulum.

Akahər ata Yuhana kəla Zakari ka, a ndzawa ka, i kusak. I dəba ŋa ya, Mbulum a dara, a zalar, a slər ŋgat aà metsìkè bazlam ŋgar a mburma. 3Dite Yuhana a dza ba aà meɗìfè dər i gà kwite ana ta mbeha a dulwa Yurdan a. A gwaɗawa: «Mbəɗum à madzala gà gər kurum, dite i tsilwiɓ à kurum a a yam. Mbulum tekeɗe, à pìl a à bakal kurum.» 4Kərga taŋa ya, dukw ana Ezaya, mala məma à bazlam Mbulum a wetse i wakita ŋgar akahər ata ya, aka ndzera. Kamala ana Mbulum a gwa ka:

«Mburma ŋa a riŋ i kusak,

à fèfil a ŋgəlakəkka, a gweɗe a:

<Làmbaɗum aba vatwa a Əbay a gəzləŋ kurum a.

Ki fefetwimer a fehhè lele.

5Mbə̀sum a gà tulwah gà dìyes,

dite ka mbazlum akaba a gà kwite nda gà

ɗùɗùŋgul ana biye iɗəm a, fèɗìɗe akaba.

Làmbaɗum à gà madzàdzàkà gà bàrama,

ma da ser lele. Kà ndzəkum duwa i vatwa ya,

mə̀ pəl akaba lele.

6I dəba ŋa ya, gà mburma tserdze ta ŋgeter a ka,

meme na Mbulum a ta mbil a à gà mburma

ŋgar a.> «*fa*

7Aləka i dəba ŋa ya, gà mburma hinne tə dawaha a təv Yuhana aà ma tsilwiɓ à tar a yam. A gwaɗawa a tar: «A kurum gà palas aaha, weke na a gwaɗa a kurum ka, ki ta beywim a i matsəɓatsəɓ Mbulum ana a dere a mba ya seyiŋ a? 8Ama kinehe ka, gwim gà megemir ana gà mburma ta ŋgeter a, dite ti sir a dər ka, madzala gà gər kurum aka mbəɗ a təv Mbulum a dzekwiŋ. Kù gwaɗum ka, làŋa Abəraham batsah tsir mər ana, duwa à lìm a aà mər ana, meme ya tsa. Aɗaba iye ihər i gweɗe a kurum ŋa: Mbulum a sle a aà mene à gà kur aaha gà gwala Abəraham mbaŋa. 9Iye ihər i gweɗe a kurum a asa: Ku kinehe tekeɗe, zlaba a riŋ matasla ŋa hapəpəpa na tì ses a dər dizl ɗaf a. Aɗaba taŋa, dizl ana a we a lele tsiye ka, tì sèsere a i biye ya nda zlile ŋa dze, dite ta wene a nda akwa, kamala megweɗe ya ka, seriye Mbulum à gis a gà na ta ge a dukw ana ŋgwala tsiye.»

10Gà mburma ata ta gwaɗar: «Dite mìi ge a ana, meme na kinehe ya?» 11A gwaɗa a tar aaka: «Na gà petek wura a riŋ sula ka, mə vəl ihər a ilik a wur ana petek ŋgar a riŋ tsiye. Bəla na dukw mezime wura a riŋ ka, tə̀ dza aba nda mìsle ŋgiɗ ana biy ŋgar a riŋ tsiye.» 12I dəba ŋa ya, gà ɓəzla duwan tə daha a təv ŋgar, aà mà tsilwiɓ à tar a yam mbaŋa. Tə daha, ta gwaɗa a Yuhana: «Əbay mər, mìi ge a dze ana, meme na kinehe ya?» 13A gwaɗa a tar aaka: «Ka tə ndzəkum duwa à mburma ya, mà za i gər a biy na ŋgumna a tsik a tsa.» 14Gà sliwdze ibam, ta gwaɗar asa mbaŋa: «Dite mər a ge, mìi ge a ana, meme ɗara?» A gwaɗa a tar aaka: «Kurum ka, ka ta kə̀zalum siŋgwe aà wura ya nda ndzəɗa tsa, kige tsa, kə̀ gàwàɗumar gər taf masakəŋa tsa. Ama ka, say ŋgeywim ba nda siŋgwe megemir kurum.»

15Gà mburma ata tserdze ya, tə dza ba aà madzala aka dukw ana a ta ge a ba ya. I huɗ madzala gà gər tar ata ya ka, ta gwa: «Wànà naha ana, Yuhana, mala məmbàlà à mburma ana Mbulum a gwa ka, i ta vile a kurumaha a ya yà?» 16I dəba ŋa ya, Yuhana a gwaɗa a tar ata tserdze ya: «Iye ka, i tsilwiɓ à kurum a ka, a yam pəra. Ama mìsle ŋgiɗ a riŋ a dere a i dəba gà ya mba. Ŋgat ka, a za iye nda ndzəɗa kweleŋ fètìte. I sle aà mesirikaha a təv ŋgar aà məpəla à liɓir tsàpà ŋgar tsidze. Ama ŋgat aka dara ka, a tsilwiɓ à kurum a ka, a yam asa tsa, say a Mezite Mesife Mbulum, nda seriye ŋgar ana a ge a nda akwa ya asa mbaŋa. 17Ŋgat a riŋ nda gà dukw məvàvàyà ikaba gà daw nda dzəndzar a. A vèveyè a dər ikaba ya. A dze a daw a awura. Dite a ndè a à dzəndzar ŋana a akwa ana a mbete a tsa aà biybiy a.»

18Ama Yuhana ka, a mà a taraha à arəv. A ɗif a tar à bazlam ŋgwal ŋana nda təv gà dukw ŋgiɗ pampam hinne asa. 19Aka tsik bazlam aà are a Hiridus mbaŋa, agəra ana a zla məkəs damər ŋgar a. Məkəs ata ka, zləm ŋgar *Hirudiya, dite agəra ana aka ge gà dukw pampam ŋgwal ŋa tsa hinne asa ya. 20I dəba ŋa ya ka, Hiridus a ge bakal batsah ŋa asa, aɗaba ana a gəs Yuhana, a tike ŋgat a daŋgay a.

Metsìlwìɓè à Yesuw ana Yuhana a tsilwiɓ dər a yam a

Mata 3:13-17; Markus 1:9-11; Yuhana 1:32

21Akahər ana Yuhana a tsilwiɓ à mburma a yam tserdze ya ka, i dəba ŋa ya, Yesuw a dara a təv ŋgar a mbaŋa, a tsilwiɓ aɗəm à ŋgat. I təv ana Yesuw a riŋ a heme a ya ka, kuvəl mbulum a hə̀ndə̀k ba ikaba ya tùwaŋ. 22Mezite Mesife Mbulum a tarra aka gər ŋgar a zərawwa i gəza mbulum a, kamala maadagwar ana a ndze a a bəɗ a. Gà mburma ata i fataya tserdze, ta ŋgatar aà are aà are. Dite tə tsarakara mifefile ata a ɗera i gəza mbulum a. Mifefile ata a ɗera ya ka, Mbulum a gwaɗara a Yesuw a: «Kər na kà ne mandərkwasla gà ya, Kəla gà. Maŋgayaba fit dze ka, ika gər yak.»

Gà bàba gà tsir Yesuw ana tə da a bəɗ a

Mata 1:1-17

23Aləka i dəba ŋa ya, Yesuw a dza ba aà megemir ŋgar ka, aka sle mive dzik makər. Kamala ana gà mburma tə dzala ya ka, ŋgat ka, kəla Yasufa. Yasufa ibam, kəla Heli, 24Heli tekeɗe, kəla Matat. Gà asiŋ gà tsir ŋgar ana ta mbeye aaka ya tekeɗe, Levi, Melki, Yanay, Yasufa, 25Matatiyas, Amus, Nahum, Hesili, Nakay, 26Mahat, Matatiyas, Simi, Yusek, Yawda, 27Yuhanan, Risa, Zarubabila, Salatiyel, Neri, 28Melki, Adi, Kwasam, Almadam, Ar, 29Yesuwa, Eliyazar, Yurim, Matat, Levi, 30Simeyun, Yuda, Yasufa, Yunam, Aliyakim, 31Meleya, Mena, Matata, Natan, Dawda, 32Yasa, Yubet, Buwaz, Sala, Naasun, 33Aminadab, Adimin, Arni, Heseruna, Perez, Yuda, 34Zakup, Izak, Abəraham, Terah, Nahur, 35Sarukw, Ragaw, Pelek, Abir, Sala, 36Kaynan, Arpahseɗ, Sem, Nuhu, Lamek, 37Matusala, Henuh, Yaret, Mahalayel, Kaynan, 38Anusu, Set. Aləka a ndisl ka, aà Adama, kəla Mbulum kuɗa.

Currently Selected:

Luka 3: gnd

Highlight

Copy