Luka 10

Yesuw a slər gà ɓəzla mazazama ŋgat dzik təsəla gəra sula

Mata 10:7-16; Markus 6:7-13

1I dəba ŋa ya, BATSAH kwa ŋa a ndzək gà asiŋ gà mburma ŋgiɗ dzik təsəla gəra sula, a slər tar sula sula aka miɗ, a gà təv ana a sasar a de aɗəm a ya, ku mege a batsah kwite, ku mege a kəla ŋana tekeɗe. 2A gwaɗa a tar: «Gà dukw mezime a riŋ i bəɗ ka, ndzə̀ɗak ndzə̀ɗak hinne, na biy mipele ya. Ama gà ɓəzla məpala ŋa, aà mada dər a ma ka, ti sle tsa. Aɗaba taŋa, hamum a mala gùvàh, dite mà sə̀kàhara à gà ɓəzla meslire ŋgar a, aà mandzàkà ŋa a ma. 3Ama kinehe ka, dum, i slir a kurum ana kà nwim kamala gà ɓəza təmaŋ, ndzəɗa kurum a riŋ tsa liɓèt liɓèt a. Ama ki dwim a kə̀la ka, a liwiŋ gà mburma ana ti ne kamala də̀var a. 4Ka tə zlum dər siŋgwe aà ahər tsa, ku mege kìywa, nda gà tsàpà kurum tekeɗe ka, ka tə zlum dər tsa. Ka ta mətsum aà vatwa aà mege wusa a mburma tsa asa. 5Na kàa ndzwim a bəra wur a ka, ki gweɗwim a a mala ga ata: <Wusa, Mbulum mə vəlak mandza zayzay lele,> dite ki dwim a a ga a ma ŋgar. 6Na wura a riŋ i ga ata, a waya bazlam kurum ata ka, mandza zayzay kurum ata a ndze a nda ŋgat lele. Na kataya tsəka, mipìsè ahəm kurum ata ki mwim a dər. 7Na bəla wura a waya kurum i fata ka, ndzum i ga ata, zəmum dukw ana tàa vəl a kurum a, ka sum dukw ana tàa tə̀f a kurum a mbaŋa. Aɗaba mala megemir ka, a sle a aà maŋgata dukw maya ba ŋgar mbaŋa. Ka tə dum aà ga aà ga tsa kəla. 8Na kàa ndzwim a kwite ana gà mburma tàa gəs kurum lele ya ka, zəmum dukw ana ta vile a kurum a ya fit dze. 9Mbalum à gà ɓəzla dukw məməta ana i kwite ata ya. Gwaɗum a gà mburma ana i fataya ka: <*Mekwere Mbulum aka à mendzera a təv kurum a.> 10Ama kàa ndzwim a kwite ana ta waya kurum tsiye ka, dum, hitswim aka bàrama, kù gwaɗum a tar: 11<Mìi tetekwe a aba à ahəɗ kurum à sik mər a. Ama kə̀la ka, maa be a kurum à ɗaf, sərum dər: Mekwere Mbulum aka à mendzera a təv kurum a.> 12Iye ihər i gweɗe a kurum a nda ndzer, pàrsa iɗəm tsa: Gà na tàa gəs bazlam kurum ata tsiye ka, mesewere are ana Mbulum a ta vile a ter a a pat seriye ya ka, biy gà Suduma duwa i təv a tsa.»

Mesewere are gà kwite ana ta gəs Yesuw nda gəzləŋ tsiye

Mata 11:20-24

13Yesuw a gwaɗa a tar asa: «A kurum ana i kwite Kurazin a, waya ba kurum a. Dite a kurum ana i kwite Betsayida ya, waya ba kurum a asa. Aɗaba gà dukw mene aà mburma ana i geye i kwite kurum a, mege i geye ka, i gà kwite Tirus, nda Sidun ka, ana ka, ti dzele a ba tar daga piŋŋe. Ti tiwiŋa, tì dzèye akaba a gà makwàtsak bùhwa, dite ti ndèye akaba a à bitekwe aà məpàtà dər ka, a sàs a tar məmbə̀ɗà à gəzləŋ tar a. 14Aɗaba taŋa, a pat seriye Mbulum ka, mesewere are ŋa i kurum a ta ge a ka, ŋgulum biy gà mburma ata i gà kwite Tirus, nda Sidun a. 15Dite a kurum ana i kwite Kafarnahum a, kurum ana ki gwim a aba zlapa ya, kù gwaɗum i kurum ana, Mbulum a ti dzik a kurum aà gəza mbulum pam a? Awaŋ, tì lìm a kurum a a təv mendze gà məməta ivaɗ.» 16Aləka i dəba ŋa ya, Yesuw a gwaɗa a gà ɓəzla mazazama ŋgat ata asa: «Wur ana aka dza zləm a bazlam kurum a ka, a dza zləm taŋa ka, a biy gà. Dite wur ana aka niw bazlam kurum a ka, a niw taŋa ka, biy gà mbaŋa. Ama ka, biy gà ɗekɗek tsa. A niw ka, biy wele ana a slərra iye ya mbaŋa asa.»

Gà mburma ata dzik təsəla gəra sula ya, ta mbəɗara gər

a bəra ya

Markus 16:18; Yuhana 12:31

17Gà mburma ata ndeɗiŋa Yesuw a slər tar dzik təsəla gəra sula ya, ta mbəɗaha gər a təv ŋgar nda gà maŋgayaba. Tə daha, ta gwaɗar: «Batsah mər ŋa, ku mege gà sitene tekeɗe, tàa gəs ahəm mər i təv ana mì dalawa tar nda zləm yak a.» 18Yesuw a tsaraka kataya ka, a gwaɗa a tar: «Kaɗəŋ, Yàa ŋgat a Əbay sitene aka dəɗara i mbulum a tiɗèy gər melek, kamala mewìtìɗè mbulum ana à wìtiɗera i gər ŋa ya, tsikw ara a bəɗ a. 19Kinehe ka, Yàa vəl a kurum ndzəɗa aà məɓàlà aka gà mesiwiɗ, nda gà hìrde, dite Yàa vəl a kurum ndzəɗa aà makwàrà mala mene are kurum tserdze mbaŋa, duwa a riŋ a ge a kurum a duwa tsidze. 20Ama ka ta ŋgayum ba agəra ana gà sitene tàa gəs aà kurum ahəm a ɗekɗek tsa. Say ŋgeywim ba ka, agəra ana gà zləm kurum mewetse ŋa i təv Mbulum a ivaɗ.»

Yesuw a ŋgaya ba

Mata 11:25-27; 13:16-17

21Aləka i dəba bazlam ata ya tsara ka, Mezite Mesife Mbulum a rah a ba a Yesuw nda maŋgayaba hinne. A hama a Mbulum, a gwaɗar: «A kər Tsir ga, kər ana ki kwere a gà gəza mbulum nda gər ahəɗ a. Iye ihər i gek a kəkaaha, aɗaba kər ka, kàa kaha duwa aà gà ɓəzla metsehe ya, nda gà na tə sər duwa hinne ya. Ama kinehe ka, kər ihər ki ɗif a dər a gà na tə sər duwa tsiye. Kataya Tsir gà, lele na ki ge a taŋa ya. Taŋa ka, kamala ana a sàsabak nda gər yak a.» 22Dite a gwaɗa a gà mburma ana a riŋ mayahaba gər ŋa i təv ŋgar a: «Ama Tsir gà aka dziŋ gà dukw a ahər tserdze. Wura a riŋ na a sər ka, weke na Kəla Mbulum a tsa, say Tsir ŋa, dite wura a riŋ na a sər ka, weke na Tsir ŋa ya tsa asa, say Kəla ŋgar ata, nda gà mburma ana Kəla ŋgar ata a sasar meɗife a tar dər tserdze ya.»

23Dite Yesuw a mbəɗ aba a təv gà ɓəzla mazazama ŋgat, a gwaɗa a tar: «Ŋgayum ba, aɗaba dukw ana kə̀ ŋgatumar, a ge ba i təv kurum kinehe ya. 24Aɗaba iye ihər i gweɗe a kurum ŋa: Akahər ata ka, gà ɓəzla məma à guma Mbulum hinne nda gà Əbay, tàa yaha vatwa aà maŋgata a dukw ana kurum ihər ki ŋgetwimer a ya, ama ka, tàa ŋgatar tsa. A sàs a tar matsaraka dukw ana kurum ihər ki tserekwim a kinehe ya, ama tar ka, tàa tsaraka ɓav tsa asa.»

Bazlam minew Samariya duwa a ge ŋgwal ŋa

Mata 22:34-40; Markus 12:28-34

25I dəba ŋa ya, mala medzeŋge məpala ahəm Mbulum duwa a sasar magəsa Yesuw a gedzewe. A gwaɗar: «Əbay, i ge a dze ana, meme, na dite i ŋget a mesife ana à ndìv a tsa aà biybiy a?» 26Yesuw a gwaɗar aaka: «Dukùla na a riŋ mewetse ŋa i məpala ahəm Mbulum a? Kà tsaraka i yak ana, meme, na i təv ana kà dzeŋge ya?» 27Wele ata a gwaɗar aaka: «I tsaraka ka, say <ki weye a Mbulum Batsah yak ŋa nda gəzləŋ ilik, nda mesife yak dze, nda ndzəɗa ba yak fit, dite nda madzala gà gər yak dze mbaŋa.*fa* Dite ki weye a mburma kamala ana kà waya ba yak a.> «*fb* 28Yesuw a tsaraka kataya ka, a gwaɗar: «Kàa sər lele, ge kataya, dite ki ŋget a mesife ana à ndìv a tsiye.»

29Ama mala medzeŋge məpala ahəm Mbulum ata a sasar ka, mene à ba ŋgar mala ndzer ŋa. A tsam biy ŋgiɗ aà Yesuw asa, a gwaɗar: «I weye a mburma dze ana, gà weke?» 30Yesuw a gwaɗar: «Wele duwa, ŋgat gà Yahuda, a dara i Yeruzalem a, a de a a Yeriko. I təv ana a riŋ a de a ya ka, tə lə̀ma nda gà ɓəzla akəl. Tə daha, urup ùrùp urup urup tə ndabaya aaka, tə surwat ikəka gà petek a. Dite ta gə̀zl ŋgat ŋa lehhè məməta məməta. Ta məsak à ŋgat a fata gùzlàɓ, tə daba. 31Zàkwayiya ka, mala mandəva kuɗa a Mbulum duwa aka daha ndaka vatwa ata te. A ŋgat a wele ata gùzlàɓɓa i bəɗ ka, a sìrìkar vatwa diriŋ, a da ndaà gùva bàrama ŋgiɗ. 32Zàmma tsəka, mìsle ŋgiɗ ilik gà gwala Levi duwa aka daha nda taŋa mbaŋa. A ŋgat a wele ata ka, a lèlìkw tsìfè tsìfè, a daba nda tsèke ŋgiɗ asa mbaŋa. 33I dəba ŋa ya, Samariya duwa a de a a təv ŋa nda gà hezweŋe. Aka daha nda taŋa mbaŋa asa. A ŋgataha a wele ata ka, a ndzer are tsehe hinne. 34Dzeŋ a hitse, a sìrìkaha a təv ŋgar. A daha, a barar ika mbəlak a nda meɗwìtsè mawà dukw duwa makwàsà ŋa. A bàhar aaka mal, dite a danar ahər nda petek. I dəba ŋa ya, a zla ŋgat aka hezweŋe ŋgar. A da à ŋgat a ga ana tə dzawuwa iɗəm à dukw mezime, dite ta hənawa iɗəm asa ya. A daha, a ger gər lele. 35Aləka ndidwe ŋana, aka təv ana à meh a ba ya ka, a ndzək kur siŋgwe sula, a dza a mala ga ata. A gwaɗar: <Ge gər a wele aaha lele. Bəla dukw ana ki viler a, à zè a naha ya ka, i dere a, i mèk a dər aɗəm, na a təv ana Yàa màra ya.> «

36I fataya ka, Yesuw a gwaɗa a wele aaha a tsam ahər bazlam a: «Kinehe, kər ka dzala ana, weke na a waya mburma i liwiŋ gà mburma ata makər a, a zlak wele ata ta gə̀zl a?» 37Mala mandəva kuɗa a Mbulum ata a gwaɗar: «I dzala ka, wele ana a ger ŋgwal ŋa ya.» Yesuw a gwaɗar: «Yawwa, kər tekeɗe, daha, ge kamala taŋa ya mbaŋa.»

Yesuw i bəra ga Marta nda Mariya

38Aləka i dəba ŋa ya, gà Yesuw nda gà ɓəzla mazazama ŋgat, ta mah ba i fataya, ti de a a kwite duwa. I təv ana ti ndzeha a fataya ka, tàa le aà məkəs duwa, tə zalar Marta. Məkəs ata a zal a tar a ma ŋgar. A daha, a ge a tar gər lele. 39I təv ata tə daha ya ka, ti leha aà damər Marta a riŋ, tə zalar Mariya. Dəm ata a daha, a ndza a bəɗ aà sik Yesuw. A dza zləm a dukw ana a tsik a ya. 40Ama Marta ka, ŋgat a riŋ nda gà megemir i zlaŋgwaɗ hinne. A dara a təv Yesuw a, a gwaɗar: «Batsah ga ŋa, i zlaŋa kər te tsiye, na damər gà aaha a miyekiŋ a à mege megemir aaha fit à gər gà ilik a? Gwaɗar, ma dara, mà zlak iye te.» 41Əbay Yesuw a gwaɗar aaka: «Marta, Marta, kər ka, ki wisebe a à gər nda megemir hinne. 42Ama ka, dukw ilik aka mətsa. Mariya ka, aka zla iɗəm dukw ata ŋgwal ŋa lele, wura a sle aà mezle ihər a tsiye.»

Currently Selected:

Luka 10: gnd

Highlight

Copy