Luka 9

Yesuw a slər gà ɓəzla mazazama ŋgat ata kurwa gəra sula ya

Mata 10:1,5-15; Markus 6:7-13

1Aləka i dəba ŋa ya, Yesuw a yaha gər a gà ɓəzla mazazama ŋgat aaha ndeɗiŋa kurwa gəra sula ya. A vəl a tar ndzəɗa aà madalawa gà sitene aà mburma ya, dite aà məmbàlà à gà ɓəzla dukw məməta asa. 2I dəba ŋa ya ka, a slər tar aà metsìkè bazlam *mekwere Mbulum a mburma, dite asa, aà məmbàlà à tar mbaŋa. 3A gwaɗa a tar: «Dum, ama ka tə zlum dər duwa aà ahər ilik tsa kəla. Ku mege zəva, kige tsa kìywa, nda gà dukw mezime, bəla siŋgwe tsa. Ama ka tə ndzəkum dər petek sula ɓav tsa asa. 4Aləka a təv ana kàa ndzwim aɗəm, bəla tàa gwaɗa a kurum: <Dumara, ndzum a faha> ya ka, ka tə zazaɗum a təv ŋgiɗ pam tsa. Say a pat ana ki mèhwim a ba i fataya dzekwiŋ. 5Na bəla kàa ndzwim a kwite ana ta waya kurum tsiye ka, tatakum a tar aba à ahəɗ tar à tsàpà kurum a, dite ka dum ba dukw kurum. Taŋa ka, kamala megweɗe ya: Maa be a kurum à ɗaf, sida ŋa ika gər kurum.»

6Aləka i dəba ŋa ya, gà ɓəzla mazazama Yesuw ata ta mah ba, tə da aà kwite aà kwite, ti tsikewa bazlam ŋgwal ŋana a mburma. Tə daha, ta mbala à gà mburma ana i dukw məməta tar a, ku mege i ŋga.

Madzala gà gər *Hiridus a mbəɗ aba

Mata 14:1-12; Markus 6:14-29

7Ama ka, batsah Əbay duwa a riŋ i fata, zləm ŋgar Hiridus. A tsaraka meɗè zləm Yesuw nda dukw ana a ge ba ya tsara ka, a ndzək ihər metsehe ya, a sər dukw ana a ge a ya asa tsa. Aɗaba gà asiŋ gà mìsle ŋgiɗ ta gwa ahər ka: «Yuhana metsìlwìɓè à mburma a yam aka mbəlara i məməta ya.» 8Gà mìsle ŋgiɗ pam, ta gwa i tar ka: «A ge a ka, Iliya ana akahər ata ya, na a dara ya.» Gà mìsle ŋgiɗ pam asa, ta gwa ahər: «A ge a ka, wura ilik ika magər gà ɓəzla məma à guma Mbulum ana akahər ata ya, na a mbəlara i biye ya.» 9Ama Hiridus a gwa: «Yuhana ka, Yàa mbər mesèse ikəka gər a dze ana, dite weke na, i tsereke a maɗə̀và zləm ŋa nda təv gà dukw ŋgiɗ a pampam kataya asa ya?» I fataya ka, a sasar aà maŋgata a Yesuw zləmana.

Yesuw a vəl dukw mezime a gà mburma hinne, ti sle

dəbuw ə̀zləm

Mata 14:13-21; Markus 6:30-44; Yuhana 6:1-14

10Aləka i dəba ŋa ya, gà ɓəzla meslire Yesuw aaha ndeɗiŋa a slər tar a, tàa mbəɗaha gər a təv ŋgar. Tə daha ka, tə ɗamar dukw ana ta ge riŋ i fataya fit dze. A sàs a Yesuw na ti de a a kwite ŋa a riŋ tə zalar Betsayida ya, kətsah aà kwite ya zaakwa, à gər tar. A ndzək dər gà ɓəzla mazazama ŋgat ata, tə da akaba tserdze. 11Aləka gà asiŋ gà mburma aaha tə sər aaba, tàa da ka, tə zazamaha tar a fata mbaŋa. Ti ndzeha a fata tsara ka, Yesuw a gwaɗa a tar: «Dumara a təv ga ya.» Tə daha ka, a tsik a tar bazlam mekwere Əbay Mbulum. A mbala à gà mburma i dukw məməta tar a tserdze.

12Aka pat ana à dìɗ a ya ka, gà ɓəzla mazazama Yesuw aaha kurwa gəra sula ya, ti sìrìkaha a təv ŋgar. Ta gwaɗar: «Gwaɗa a gà mburma aaha, tə da, tə ti yahaba gà duwa aà bazlam a huɗ kwite, nda gà a kə̀sà ana a mbera bise ya, ti yaha aaba gà təv mehinne tsəna, meme? Araha, kwa tekeɗe ka, i kusak məfara ŋa asa ya.» 13Ama Yesuw a gwaɗa a tar: «Kurum ŋa, vəlum a tar dukw mezime.» Ta gwaɗar aaka: «Araha, na aà kwa ka, tapa ɗaf ə̀zləm, nda kilif sula pəra ana, meme? Wànà a sàsak ana, mi da sə̀kəmara dukw mezime aɗaba gà mburma aaha fit a ya?» 14Ama mburma a riŋ i fata kəla ka, ti sle dəbuw ə̀zləm.

Yesuw a gwaɗa a gà ɓəzla mazazama ŋgat ata: «Ndzakum i ba tar a, dzik ə̀zləm dzik ə̀zləm, ka ndzayum à tar a bəɗ.» 15Gà ɓəzla mazazama ŋgat ata tə tsaraka ka, tə daha, tə ndzaya à tar a bəɗ. 16I dəba ŋa ya, Yesuw a daha, a ndzək gà ɗaf aaha tapa ə̀zləm a, nda kilif aaha sula ya, akahər ŋgar. A fə̀r dər a gəza mbulum, a ge dərraha kəkaaha a Mbulum. Aləka a sàs ikaba gà ɗaf ata nda kilif a, a vəl a gà ɓəzla mazazama ŋgat ata. Dite gà mburma ata ibam, tə dzaya a gà asiŋ gà mburma ana i fataya tserdze. 17Tar ata tserdze ya, tə zəm ɗaf ata ka, a sleye a tar lele. Ti yaha gər a mezehe ŋa ana a zeha aà tar a ka, a raha a gà tàkwasa kurwa gəra sula.

Piyer a ɗe à zləm Yesuw, dite Yesuw a ɗif à məməta ŋgar ana

a ta mbilere a i biye ya, malahalah ŋa

Mata 16:13-19; Markus 8:27—9:1

18A pat duwa Yesuw a riŋ a heme a a Mbulum à gər ŋgar ilik. I təv ana a riŋ a heme a ya ka, gà ɓəzla mazazama ŋgat ata tə daha a təv ŋgar. Ti ndzeha a təv ŋgar ka, Yesuw a gwaɗa a tar: «Gà mburma ta gwa dze ana, iye ana, weke?» 19Ta gwaɗar aaka: «Gà mìsle ŋgiɗ ta gwa: Kər ka, Yuhana metsìlwìɓè à mburma a yam. Gà mìsle ŋgiɗ pam asa ta gwa: Kər ka, Iliya ana akahər ata ya. Dite gà mìsle ŋgiɗ ibam, ta gwa, i tar ka: Kər ka, mìsle ŋgiɗ ilik i liwiŋ gà ɓəzla məma à guma Mbulum ana akahər ata ya, aka mbəlara i biye ya.» 20Yesuw a gwaɗa a tar i dəba ŋa ya asa: «Dite kurum a ge, kù gwaɗum dze ana, iye ana, weke?» Piyer a gwaɗar aaka: «Kər ka, *Kiristi, mala məmbàlà à mburma ana Mbulum a gwa, i slir a kurumehe a ya.»

21Yesuw a tsaraka taŋa ka, a gwaɗa a tar: «Ndzer kaɗəŋ, ama ka, ka ti tsikwim a wura a tsa kəla.» 22I dəba ŋa ya, Yesuw a gwaɗa a tar asa: «Iye, *wur ana a dara i təv Mbulum a, say i ti sèwèr a are aka miɗ mba hinne. Gà bàba gà mburma ana ta kwere a gà Yahuda ya, nda gà Əbay gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum tserdze, ti ti lìmiŋ a aba ya, dite ta kiɗ a iye. Ama i huɗ mehinne makər a ka, i ta mbilere a i məməta ya asa.»

Wur ana a zezem a Yesuw a ka, ma dzala ba ŋgar asa tsa

Mata 10:33,39; 16:20-28; Yuhana 12:25

23I dəba ŋa ya, a gwaɗa a mburma a tserdze kuɗa: «Na aka sàs a wura aà madə̀ɗà aka iye ka, ma dzala ba ŋgar asa tsa. Ma zla dizl magə̀làwà ŋana kəla pat, kamala ana iye, i ti zle a mba ya, dite ma dara, ma zezem iye kuɗa. 24Aɗaba wur ana aka sasar məmbə̀là à mesife ŋgar ɗa ika gər ahəɗ a ka, a dzeye a dər seyiŋ ivaɗ. Ama wur ana a dzeye a à mesife ŋgar, aɗaba iye ya ka, a mbil a dər ivaɗ asa. 25Na wura aka ŋgat dukw gər ahəɗ tserdze, a ŋgayar ba i gəzləŋ, dite a dzeye a à gər ŋgar, à mìt a asa ana, duwa a riŋ a ger a ŋgulum a? Awaŋ. 26Na wura a gweɗe a ika miɗ mburma, i sər Yesuw tsa, nda bazlam gà ana i tsik a ya ka, iye, *wur ana a dara i təv Mbulum a tekeɗe, i ti tsik a kataya mbaŋa. I ti niw a ŋgat i təv ana i dere a nda Əbay ga, nda ndzəɗa Tsir gà ana ti zlibe a dər a, dite nda biy gà gawla Tsir gà ana a ndzək tar a. 27Iye i gweɗe a kurum a nda ndzer: Gà mìsle ŋgiɗ ɗa ika magər kurum gà mburma ana kinehe ya ka, ta mete a zukw tsa, say ta ŋget a a *mekwere Mbulum ana a kwere a nda ndzəɗa ya fit dzekwiŋ.»

Yesuw a mbəɗ ba ŋgiɗ pam

Mata 17:1-9; Markus 9:2-9

28A ge kwaskwa ilik i dəba mifefile ŋgar ata ya ka, Yesuw a ndzək gà Piyer nda Yuhana, nda gà Zakup. Tə tsəl a kwite aà meheme riŋ i fata. 29I təv ana tar riŋ ta heme a ya ka, Yesuw a mbəɗ ba ŋgiɗ pam. A mbəɗ i are ya. Petek ŋgar ibam, a mbəɗ dər herrè, wùzlwùzl a wìtiɗ a are. 30Zàmma tsəka, gà mburma sula tə daha a təv ŋgar, tə daha, tə dza ba aà mifefile nda gà ŋgat. Gà mburma ata ka, gà Musa nda Iliya ana akahər ata ya. 31Mede tar ata tə daha a təv Yesuw a ka, nda gà ndzəɗa Əbay Mbulum ana a vəl a tar a. Gà mburma ata sula ya, ta fàfəl ka, aka gər megemir Yesuw ana a ti ndìv a dər a Yeruzalem, dite meme na à mìt a ya ya.

32Ama gà Piyer nda gà màndàla ŋgar ka, tàa mata aka mendze are fit. Aləka i dəba ŋa ya, ta piɗeke tsara ka, ta ŋgat a Əbay Yesuw ata a wìtiɗ a are ya. Tar riŋ nda gà mburma ata sula mandza ŋa i tsaka ŋgar a. 33Aləka i təv ana gà mburma ata sula tə dza ba aà mede i təv Yesuw a ka, Piyer a gwaɗa a Yesuw: «Əbay, lele na kwa ɗa i faha ya. Mìi kiriw a kurum a ga makər a faha, ilik biy yak, ilik biy Musa, ilik ŋa aaha biy Iliya.» Piyer a tsiker kataya ka, aɗaba a sər dukw ana a tsik a ya tsa.

34I təv ana a tsiker kataya ya tsara ka, magùdwagùdwa a tarra aka gər tar a, tits a le a tar. I fataya ka, gà mburma ata ta ge magəɗa hinne. 35Tə tsarakara iɗəm mifefile i fataya. Mbulum a gwaɗa a tarra: «Naha ka, kəla gà ana i zla ya. Dzum zləm a dukw ana a tsik a kurum a ya.» 36Aləka i dəba mifefile ata ya ka, gà wele aaha ta ŋgat ka, a Yesuw ilik na a zeha i fataya. Tar ibam, tàa tsik aba dukw ana ta ŋgatar ndeɗiŋa ya, a wura ya zukw tsa, tə ndzaba dər ɗikɗik.

Yesuw a mbəl à kəla duwa, mahuruvuv a gasawa ŋgat

Mata 17:14-20; Markus 9:14-29

37Ndidwe ŋana ka, gà Yesuw nda gà ɓəzla mazazama ŋgat tə tarra i kwite ata ya. Ta ŋgat a tar tsara ka, gà mburma hinne ta ŋgəzlaha aka Yesuw. 38Wele duwa a riŋ i magər gà mburma ata a fàfəlaraha nda magala. A gwaɗar: «Əbay, i gek kamkam, fìriŋ aà kəla gà aaha ilik a te. 39Sitene a gasawa ŋgat. I təv ana aka dza ahər ba ya ka, a wideyiŋa. A dzedzer a à ŋgat hinne, mazlə̀mbats a dawarra i bazlam a. A sèwèrer a are hinne, a ndalawa ikəka ya ka, gireŋ. 40I hama a gà ɓəzla mazazama kər, i gwa, ti delewiŋ ihər a te ka, kwets ti sle ɓav tsa.»

41Yesuw a gwaɗa a tar: «A kurum gà mburma ana ki giswim iye nda gəzləŋ kurum tsa, dite kurum kà tsarakum zləm tsa asa ya. Wànà iye dze ana, i gesl a aà metsìkè a kurum dze ana, hilè, na dite ki giswim a iye ya? I ndze a dze ana, hilè ɓav a, na i təv kurum a? A za, daha, zlara kəla ŋa a faha ya kwaŋ.» 42I təv ana tə daha à kəla ata ya ka, sitene ata i ba ŋgar a, a kal à ŋgat a bəɗ. Iŋgwits ìŋgwits ìŋgwits a dzadzar akaba à kəla ata hinne. Ama Yesuw a kwara akaba sitene ata nda magala hinne, a dalawa ihər a, a mbəl à kəla ata, dite a mà dər a tsir ŋa kuɗa. 43Ama batsah ndzəɗa Mbulum ata Yesuw a pàt dər a ka, a ge aà gà mburma ata i fata tserdze ya, kamala dukw mene aà mburma ya.

Yesuw a ɗif à məməta ŋgar ana a ta mbilere a i biye ya,

masula ŋa

Mata 17:22-23; Markus 9:30-32

I təv ana gà mburma ata tserdze ya, tar riŋ ti dzele a gà gər aka dukw ana Yesuw a geye mba ya ka, Yesuw a gwaɗa a gà ɓəzla mazazama ŋgat ata: 44«Tikwim dukw ana i tsik a kurum a kinehe ya, a gər kurum lele. Iye, *wur ana a dara i təv Mbulum a ka, ta gis a iye mba. Ta vile a iye a ahər a gà mburma.» 45Ama gà ɓəzla mazazama ŋgat ata tàa tsaraka dukw ana a sasar aà metsike ya tsidze. Tə samata bazlam ata ka, makàhà ŋa i huɗ ŋa. Magəɗa a ge a tar aà metsème ahər bazlam ata asa.

Meme na mene batsah ŋa ika miɗ Mbulum a?

Mata 18:1-5; Markus 9:33-37

46Aləka i dəba ŋa ya, gà ɓəzla mazazama Yesuw ata tə dza ba aà mimbètsè ba ahəm ika magər tar hinne. Ta gwa: «Weke na a ne batsah ŋa ika magər kwa ya?» 47Yesuw a sər a taraha aka dukw ana tə dzala i gər tar a tsara. A daha, a zla kəla duwa, a ndza dər a təv ŋgar. 48A gwaɗa a tar: «Ku weke na aka gəs aà mege gər a kəla ndirkiz kamala kəla aaha ya aɗaba iye ya ka, a ge gər taŋa ka, a iye. Dite wur ana aka giŋ gər a ka, a ge gər taŋa ka, a wele ana a slərra iye ya mbaŋa. Aɗaba wur ana aka həna à gər a bəɗ ika magər kurum aaha tserdze ya ka, ŋgat na a ne batsah ŋa i təv Mbulum a.»

Wur ana a ge aà kurum a gùvəl tsiye ka, wur kurum

Markus 9:38-40

49I dəba ŋa ya, Yuhana a dza ba aà mifefile, a gwa: «Əbay, maa le aà wele duwa, a delewe a gà sitene i ba mburma ya nda zləm yak. Ama mì palar ahəm, aɗaba ana ŋgat ka, mburma kwa tsiye.» 50Yesuw a tsaraka kataya ka, a gwaɗa a tar: «Ka palumar ahəm tsa, aɗaba wur ana a ge aà kurum a gùvəl tsiye ka, wur kurum.»

A sàs a gà mburma ŋgiɗ duwa ika ahəɗ Samariya ka, Yesuw

ma daha a ma tar tsa

51I təv ana Mbulum aka à mezle Yesuw a gər ŋa ya ka, Yesuw a gwa: «A sèsiŋ ka, i de a a Yeruzalem dzekwiŋ.» 52I dəba ŋa ya, a slər gà ɓəzla meslire ŋgar aka miɗ, aà mayahar aba gà təv a bəɗ a. Gà mburma ata tə da tsara. Tə daha, tə da a kwite ŋa a riŋ ika ahəɗ Samariya. Ti yaha təv ata i fata. 53Ama gà mburma ana i fataya, ta waya na Yesuw a dehe a a ma tar a tsa, aɗaba ana a de a ndàra a Yeruzalem a. 54Gà ɓəzla mazazama Yesuw, gà Yuhana nda Zakup tə tsaraka bazlam gà mburma ata kataya tsara ka, ta gwaɗa a Yesuw: «Batsah mər ŋa, a sàsak ana, wànà mi gwaɗa, akwa ma tarra i mbulum a, ma wànà iɗəm tar a fit kitè kəla ya?» 55Yesuw a tsaraka bazlam tar ata ka, a mbəɗ aba a təv tar, a kwara akaba tar. {A gwaɗa a tar: «Kà sərum tsiye, na bazlam ata kà tsikwim ka, a da ndaka vatwa ŋa tsiye? 56Aɗaba iye, *wur ana a dara i təv Mbulum a, i dara ka, aà medzeye à mesife mburma tsa. I dara ka, aà məmbàlà à tar a ivaɗ.»} I dəba ŋa ya, ta mah ba i fataya, tə da a kwite ŋgiɗ pam.

Gà mburma ana a sàs a tar mazazama Yesuw nda ndzer tsiye

Mata 8:19-22

57I təv ana gà Yesuw nda gà ɓəzla mazazama ŋgat riŋ ika vatwa ti de a mba ya ka, wele duwa a gwaɗa a Yesuw: «I waya ka, i zezem a kər a təv ana ki de aɗəm a ya, ku mege a ŋga.» 58Yesuw a tsaraka kataya ka, a gwaɗa a wele ata: «Dzala dzekwiŋ, aɗaba ŋgulum gà mbayakà ka, biye tar a riŋ, gà ɗiyeŋ tekeɗe ibam, ga tar a riŋ mbaŋa, na ta hinne a iɗəm a. Ama iye, *wur ana a dara i təv Mbulum a ka, ga gà a riŋ, na i hinne a iɗəm, dite i sifik a ba ya tsa.»

59I fataya ka, Yesuw a gwaɗa a mìsle ŋgiɗ pam: «Dara, zezem iye.» Ama wele ata a gwaɗar aaka: «Əbay, iye ka, viliŋ vatwa, a təv ana tsir gà aka mət a ka, i le a aba ya dzekwiŋ.» 60Yesuw a gwaɗar aaka: «Sifek məsak à gà məməta, ti leye ba tar dukw tar. Ama kər ka, ti tsik bazlam *mekwere Mbulum a gà mburma.»

61Mìsle ŋgiɗ pam asa a gwaɗar: «I zezem a kər, Əbay. Ama kəla ka, viliŋ vatwa, i ta ge a wusa a gà mburma ana i ma gà ya dzekwiŋ.» 62Yesuw a gwaɗar: «Wur ana à fit a nda gà sla, dite à fir a ndàra a dəba ya ka, a ge a ba tsa. Kamala taŋa ya mbaŋa, gà na a sàs a tar ti zezem a iye, dite ka, ta fir a aà dukw ana ndàra a dəba ya ka, ti sle a aà megemir i mekwere Əbay Mbulum tsa mbaŋa asa.»

Currently Selected:

Luka 9: gnd

Highlight

Copy