Luka 11

Mahàmà a Mbulum

Mata 6:9-13; 7:7-11

1A pat duwa, Yesuw a hama a Mbulum i təv ŋgiɗ pam. I təv ana a ndəv à meheme ŋgar ata ya ka, wura ilik i liwiŋ gà ɓəzla mazazama ŋgat a, a gwaɗar: «Batsah mər ŋa, ɗif a mər dər, meme na mìi heme a a Mbulum, kamala ana Yuhana a ɗif dər a gà ɓəzla mazazama ŋgat a mbaŋa te.» 2Yesuw a tsaraka kataya ka, a dza ba aà meɗìfè a tar dər. A gwaɗa a tar: «I təv ana ki hemwim a ya ka, gwaɗum:

Tsir mər,

kər ka, tsəɗaŋŋa,

bakal i təv yak tsa.

Gà mburma tserdze tə̀ zlə̀b dər à kər.

Mekwere yak ana ki kwere a ya ka,

ma ge ba i təv mər mbaŋa.

3Vəl a mər dukw mezime,

ma sle a mər kəla pat.

4Pəl a mər à bakal mər,

aɗaba mər tekeɗe ka,

mìi pìl a dər a gà mburma ana tserdze,

ta ge a mər a dukw ana ŋgwal ŋa tsiye.

Kasla mər lele i təv gà na

ta bene a mər zləmana ya,

dite ka, mì dəɗ a bakal tsa.»

5I dəba ŋa ya, Yesuw a gwaɗa a tar asa: «Weke na masla ŋgar a riŋ, dite bəla masla ŋgar ata a daha a təv ŋgar nda magər həvəɗ, a gweɗere a: <Kamkam, masla gà, maɗaval aka zeha aà kər a zaakwa beye? Viliŋ te. 6Aɗaba masla gà duwa naha a dara i təv ŋa ya ka, duwa a riŋ aà iye aà miviler tsa, i mèk a dər mba ya.> 7Dite mala ga ata ta wiz ahər dukw mezime ya, a gweɗerre a i ga ya: <Ka ne aà iye bakal tsa, wele. Yàa mbər mehìndìkè a ga, maa həna nda gà ɓəza gà. I sle aà mehitse a aà mbulum, aà məvə̀làkaha dukw mezime asa tsa.> « 8Yesuw a gwaɗa a tar asa: «Iye ihər i gweɗe a kurum a nda ndzer: Ku mege gər ŋgar aà mehitse tsa tekeɗe ka, a hitse a, a viler a dukw ana a waya ya, aɗaba ana a geraha kamkam hinne ya, tsəka, agəra ana masla ŋgar a ɗekɗek tsa.

9Aɗaba taŋa iye i gweɗe a kurum a kinehe: Wizwim, Mbulum a vile a kurum ŋa. Yahum, ki ŋgetwimiŋa. Lakum a dukw mahə̀ndə̀kà ga, dite à hìndìk a kurum a i ga ya. 10Aɗaba ku weke na aka wiz ka, a vileriŋa. Wur ana aka yaha ya ka, a ŋgetiŋa. Dite wur ana aka lak a dukw mahə̀ndə̀kà ga ya, tùwaŋ à hìndìker a iɗəm a mbaŋa. 11Na wura ilik ika magər kurum, tsir gà ɓəza ana, bəla kəla ŋgar ata aka wiz ahər kilif ana, a viler a mesiwiɗ a? 12Kige tsa aka wiz ahər slèsle ana, a viler a hìrde ya? 13Na kurum ana gà ŋgwal ŋa tsiye ka, ka sərum məvəla gà ŋgwal gà dukw a gà ɓəza kurum seyiŋ ana, sakwàn Tsir kwa ana i gər ŋa ya ivaɗ a. A vile a Mezite Mesife ŋgar a gà na ta wiz ahər a ya ana, à zè a taŋa tsiye?»

Yesuw a fàfəl a gà na ti tsik ahər dukw ana ŋgwala tsiye

Mata 12:22-30; Markus 3:20-27

14I dəba ŋa ya, Yesuw a dalawa sitene aà wele duwa ya, aka ge dər mandək ŋa. Aləka sitene ata a dara i ba ŋgar a ka, wele ata a dza ba aà mifefile wìlè wìlè lele kuɗa. A ge aà gà mburma ata i fata tserdze ya, kamala dukw mene aà mburma ya. 15Ama gà mìsle ŋgiɗ pam i liwiŋ gà mburma ata i fataya, ta gwa: «A ge a ka, *Beldzebul, Əbay sitene na a vəlar ndzəɗa, aà madalawa gà sitene ya, tsəka, a sle a tsa.»

16Gà mìsle ŋgiɗ pam ka, a sàs a tar megìseraha ahəm aà are. Aɗaba taŋa, tə tsam ahər ndzer ŋana, ta gwaɗar: «Ge a mər dukw mene aà mburma yak, dite na mìi sir a dər ka, Mbulum na a slərra kər a kaɗəŋ a.» 17Ama Yesuw a sər a taraha aka dukw ana tə dzala ya. A gwaɗa a tar: «Gà mburma ana a riŋ ika ahəɗ ilik ŋa, ta ge a gùvəl ika magər tar ka, ti sle a aà mendze a i təv ilik ŋa tsa, ahəɗ tar a nisiŋa. Ama gà mburma ana i ga ilik ŋa ya tekeɗe, na maàga ika magər tar ka, kataya mbaŋa. 18Dite meme na kù gwaɗum ka, Əbay sitene na a viliŋ ndzəɗa aà madalawa gà sitene ya ya. Ama na sitene a riŋ a ge a maàga aà ba ŋgar vùŋŋa dze ana, meme na mekwere ŋgar a sle aà mendze a ya? 19Na bəla iye i ge a kamala na kà tsikwim a dze ana, dite weke na a vəl ndzəɗa a gà mburma kurum aà madalawa ŋa mbeete ya? I gər kurum, kù gwaɗum ana, Mbulum tsiye? Ndzer ŋana na a tsik a kurum a ka, gà mburma kurum ata. 20Ama na bəla i delewe a gà sitene ata nda ndzəɗa Mbulum ka, taŋa ki slwim aà mesire a dər ka, *mekwere Mbulum aka dara a təv kurum a.»

21Yesuw a gwaɗa a tar asa: «Əbay sitene a ne ka, mala ndzəɗa. Na ŋgat a riŋ nda gà dukw ahər ŋgar ihər, a kesle a dər ga ŋgar ka, limana ŋgar a ndze a tèpèppe lele. 22Ama mala ndzəɗa ana a za biy ŋgar a, aka slala ka, à gis a ŋgat, à dzik a ihər gà dukw ahər ŋgar ana a gewa dər ndzəɗa ya. Dite a dzeyekwe a limana ŋa a mburma fit. 23Iye ihər i gweɗe a kurum a kinehe: Wur ana a waya iye tsiye ka, taŋa ŋgat ka, mala mene are gà. Dite wur ana aka zlak iye aà megemir gà tsiye ka, a dzeyiŋ a ka, à megemir gà ivaɗ.»

Sitene a mà aka wele ana a məsak à vatwa Mbulum a

Mata 12:43-45

24Yesuw a gwaɗa a tar asa: «Na tàa dalawa sitene, aka dara i ba mburma ya ka, a de a aka mandazla a dala, gurùŋ gurùŋ a yehe a riŋ təv mendze ana a sasar aà mendze aɗəm a. Na aka ŋgat tsəka, a gweɗe a: <Ŋgulum i mbìɗ a gər a təv ana i dara iɗəm a.> 25Aləka aka màra ka, a le a aà ga ŋgar ata məfàɗà ŋa, kàzlàŋa malàmbàɗà ŋa tits tits lele. 26I dəba ŋa ya, a de a, a ti ndzikere a gà asiŋ gà sitene ŋgiɗ a təsəla, aà mendze i fata, gà na gà ŋgwal ŋa tsa ndeyndey a. Ti de akabaha aɗəm a tserdze a fata. Zàmma tsəka, dukw ata a me a aka wele ata, mendze ŋgar a ge a ŋgwala tsa ndeyndey, à zè a dər na piŋŋe ya asa.»

Maŋgayaba gà na ta gəs Mbulum a

27Yesuw a ndəv à mifefile ŋgar ata tsara ka, məkəs duwa a gwaɗarra i magər mburma ya: «Maŋgayaba ika gər məkəs ana a wa kər, kà sa awah ŋgar a.» 28Ama Yesuw a gwaɗar aaka: «Seyiŋ tsa ivaɗ, maŋgayaba ka, ika gər gà mburma ana ti tsereke a bazlam Mbulum, ta gis ahər a ahəm lele ya.»

Gà mburma ta wiz dukw mene aà mburma aà Yesuw

Mata 12:38-42

29I təv ana gà mburma hinne riŋ ti yahaba gər a təv Yesuw a ka, a dza ba aà megweɗe a tar asa: «A kurum gà mburma ana kinehe ya, kurum ka, gà ŋgwal ŋa tsidze, na i təv Mbulum a. Meme na ki wizwim aà iye dukw mene aà mburma ka, dite kurum ŋa kà wayum Mbulum tsiye. Ama ka, ki ŋgetwim a a medzibe dukw mene aà mburma ata tsa, say na a biy Yunas, mala məma à guma Mbulum ana akahər ata ya ilik asa tsiye. 30Aɗaba taŋa, Yunas a ne dukw mene aà mburma aka gà mburma ana i kwite Ninive ya, dite kamala taŋa ya, iye, *wur ana a dara i təv Mbulum a tekeɗe, i ne a dukw mene aà mburma aka gà mburma ana kinehe ya mbaŋa. 31Aləka a pat seriye Mbulum ka, batsah Əbay məkəs duwa a kwara ɗa gà mburma ana ika tsèke gular a, a dere a, a hitse a aka miɗ gà mburma aaha kinehe ya, dite à me a ter a à bakal. Aɗaba məkəs ata a dara ka, aà zlile mbulum i təv ŋa ya diriŋ, aà mandza zləm a mifefile Əbay Salumun ana metsehe ŋgar a riŋ hinne ya. Tsaatsa wur ana ɗa i faha, ki ŋgetwimer a kinehe ya ka, a za Salumun fit. Ama kurum ka, kàa dzumar zləm tsa. 32A pat seriye Mbulum ka, gà mburma ana i kwite Ninive ya, ti dere a, ta hitse a aka miɗ gà mburma aaha kinehe ya, dite ta me a ter a à bakal mbaŋa. Aɗaba akahər ana Yunas a be a tar à ɗaf a ka, tàa mbəɗ à madzala gà gər tar. Ama tsaatsa wur ana ɗa i faha, ki ŋgetwimer a kinehe ya ka, a za Yunas asa mbaŋa. Ama kurum ka, kàa dzumar zləm tsa.»

Magəsa Mbulum a vile a dzaydzay a mburma

Mata 5:15; 16:22-23

33Yesuw a gwaɗa a tar asa: «Wura a riŋ a tike a akwa aà lalampa ka, dite à kèhe a dər dəɓ a təv ŋa, kige tsa aà huɗ tasà tsa. A tike a ka, a təv ana dzəgəɗaf ŋa ya ivaɗ, dite na gà mburma ana ti de a a ga ya ka, ta ŋget a dər a vatwa dzaydzay lele ya.

34Are yak ka, a ne kamala lalampa ba yak a. Aɗaba taŋa, na are yak a da aba ya ndzihndzih lele ka, ba yak ana tserdze i bəɗ a tekeɗe, i təv dzaydzay ŋa mbaŋa. Ama na are yak a da aba ya tsəka, ba yak tekeɗe, ar ka, kamala ana i luvuŋ a mbaŋa. 35Aɗaba taŋa, ge metsehe lele, dite ka, dukw ana i təv yak, a ɗek a à vatwa dzaydzay a, ma ti ne luvuŋ tsa. 36Na ba yak fit mandza ŋa i təv dzaydzay ŋa, luvuŋ a riŋ kwizikw tsidze ka, taŋa ba yak ka, i təv dzaydzay ŋa kamala lalampa ana à pèt a i təv yak, à div a ya.»

Yesuw a mà à bakal a gà *Farisa nda gà ɓəzla medzeŋge

məpala ahəm Mbulum

Mata 23:1-36; Markus 12:38-40

37Yesuw a ndəv à mifefile ŋgar ata tsara ka, Farisa duwa a zalar aà dukw mezime a ma ŋgar. Ta mah ba, tə da. Tə daha, ta patsa a ga. Tə daha, tə ndza a bəɗ, dite tə dza ba aà mazəma ɗaf. 38Farisa ata a samata Yesuw ka, aka bara ahər kamala ana fəla tar a tsik a tsa. A ge ahər kamala dukw mene aà mburma ya. 39I dəba ŋa ya, Əbay Yesuw a gwaɗar: «Kurum gà Farisa ka, kà sərum are matsakaɗa gà kəzliyam nda tasà kurum ka, lele. Dite aàla na gəzləŋ kurum kataya tsiye? Nda bəra ka, kù gwaɗum, mər gà ŋgwal ŋa, tsaatsa i huɗ ŋana ka, maràhà ŋa nda gà dukw ana ŋgwala tsiye, kamala megweɗe ya ka: Megeye akəl, nda megeye swalwa. 40Kurum ka, metsehe kurum a riŋ tsa, tsəna, wànà Mbulum ana a ge dəba ŋana, aka ge huɗ ŋa ti tsiye? 41Dzalum ivaɗ ka, aka dukw ana i huɗ ŋa ya. Ki dzwìm a dukw ata a gà ɓəzla matawak, dite ki ndzwim a tsəɗaŋŋa kuɗa.

42Ama kurum gà Farisa ka, waya ba kurum a. Kurum kà yahawum gər a gà dukw mezime kurum ana i dala ya ka, ku mege dukw ana a ɗe a hinne tsa kwizikw a tekeɗe, ki livwime a kurwa, dite ki vilwim a ihər a Mbulum a ilik. Ama kà məsakum à mawàyà Mbulum nda dukw ana ndzer, a sasar gà mburma ta ger a ana, meme? Ana ka, ki gwim a gà taŋa dzekwiŋ, na dite ki gwim a gà naha kuɗa mbaŋa ya.

43Kurum gà Farisa ka, waya ba kurum a. I ga mahàmà a Mbulum ka, kà yahawum ka, say təv mendze ana ŋgwal ŋa ya, aà mendze dər aka miɗ mburma, dite ka, mburma ta fə̀r dər aà kurum lele. Na kàa dum a liwiŋ mburma tekeɗe, a sàs a kurum, mburma ta ge a kurum wusa ka, say nda mazàmbàɗà à kurum ɗekɗek. 44Ama taŋa ka, waya ba kurum a, kà ndzìkìɗwim ba ka, gà dive ana mburma tì sìweye a ndaka gər ŋa ka, ta ŋgatar tsiye.»

45Bazlam Yesuw ata a tsik a tar kataya ya ka, mburma ilik ika magər gà ɓəzla medzeŋge məpala ahəm Mbulum a, a gwaɗar aaka: «Əbay, metsìkè bazlam yak ata kà tsik a ka, kà ndavaya taŋa ka, a mər mbaŋa.» 46Yesuw a gwaɗar aaka: «A kurum gà ɓəzla medzeŋge məpala ahəm Mbulum, waya ba kurum a mbaŋa. Aɗaba kà ndzìkìɗwim ba ka, gà mburma ana tì dzèye a gà mibe gà duwa ə̀ŋgiɓ aka gər mburma, tar ŋa kuɗa ka, ìnets tì lìme ahər a tsidze ya.

47Waya ba kurum a, aɗaba kurum ka, ki zlèzlwim a aà dive gà ɓəzla məma à guma Mbulum ana akahər ata gà tsir kurum ta bats tar a. 48Kərga taŋa ya, ki gwim a ka, megemir gà tsir kurum ana ta ge ya. A da a kurum a gər ka, hinne. Aɗaba taŋa, tàa bats gà ɓəzla məma à guma Mbulum ata, dite kurum kà nwim ka, gà ɓəzla mazlàzlàyà a tar aà dive ŋa kuɗa. 49Mbulum ana metsehe ŋgar a riŋ hinne ya, a tsik aba ya daga piŋŋe ya, a gwa: <I slir a taraha gà ɓəzla məma à guma gà nda gà ɓəzla meslire gà tserdze, ti ta bets a gà asiŋ ŋa i liwiŋ tar a, dite ti ti sèwèr a are a gà na ti zeha ya mbaŋa.> 50Aɗaba taŋa na Mbulum ihər à tsèm a aà kurum ana kinehe ya, agəra məməta gà ɓəzla məma à guma Mbulum ata ta bats tar daga aà gər ana a ge gər ahəɗ a. 51Daga aà məməta Abel a, tsikw aà məməta Zakari ana ta kəɗ ika magər gà ga mahàmà a Mbulum batsah ŋana, nda təv ana ta batsawa aaka gà duwa a Mbulum a.*fa* Ama ka, iye ihər i tsik a kurum a nda ndzer: Kurum gà mburma ana kinehe ya, Mbulum a sèwèr a kurum a are agəra gà mburma ata ta bats tar a.

52Kurum gà ɓəzla medzeŋge məpala ahəm Mbulum ka, waya ba kurum a, aɗaba ana kà hə̀ndə̀kum a vatwa a gà mburma ana ta waya masəra Mbulum a. Kà ndzəkum lèkilè ŋa, dite kurum ŋa tekeɗe, kwets ki dwim aɗəm a ɓav tsiye.»

53I təv ana Yesuw a ndəv à mifefile ŋgar ata tsara ya ka, a mah ba, a da. A da iɗəm a ka, gà ɓəzla medzeŋge məpala ahəm Mbulum nda gà Farisa, tə dza ba aà mege arəv nda təv ŋgar hinne. Aləka i dəba ŋa ya, ta ge metsehe nda wirwir hiywe, tə tsàmawa ahər gà bazlam pampam. 54Aɗaba a sàs a tar megìser dərraha ahəm aà are, dite ka, ta ŋgat bazlam ana a tsik a ndaka vatwa ŋa tsiye i təv ŋgar a.

Currently Selected:

Luka 11: gnd

Highlight

Copy