Lúcas 13

Ñañembyasyva’erã jajapo vai haguére

1Upejave oime umi oúva Hesu rendápe omombe’u hag̃ua Piláto ojukauka hague Galileayguakuérape oikuave’ẽ jave hikuái ikuave’ẽmby, ombojehe’ávo umi Galileaygua ruguy ikuave’ẽmby ruguy reheve.

2Hesu katu ombohovái ichupekuéra: Peimo’ã piko umi Galileaygua umíva oñemoangaipave ambue Galileayguakuéragui, ojehúgui ko mba’e kóva hekovekuérape.

3Nahániri, Che ha’e peẽme, ha peẽ napeñembyasýi ramo, pejapo haguére mba’evai, peñehundiva’erã peẽ avei.

4Térãpa peimo’ã umi 18 kuimba’e ári ho’ava’ekue pe Siloe pegua óga yvate, oñemoangaipaveva’ekue opaite ambue Jerusalenguakuéragui.

5Nahániri, Che ha’e peẽme, ha peẽ napeñembyasýi ramo pejapo haguére mba’evai, katuete peẽ péicha peñehundipáta avei.

6Upérõ Hesu omombe’u ko ñe’ẽ mbojoja kóva: Peteĩ kuimba’e oñotỹ peteĩ hígo máta iparraltýpe. Uperire ou omono’õ hag̃uáicha hi’akuéra, ndojohúi katu mba’evete.

7Upévare he’i iparralty ñangarekohárape: Ma’ẽ, mbohapy áñoma aju amono’õ hag̃uáicha, ha ndajohúi hi’akuéra, upévare eity pe hígo máta. Ma’erãpa oiko rei che kogatýpe, omokangy hag̃ua che yvy porã.

8 Iparralty ñangarekohára katu he’i ichupe: Nde karaiguasu, ehejamína gueteri ko áño kóva, tajo’o ha tamoĩ abóno ijyvy rendápe.

9Jahecha ndahi’áipa ko áño kóvape, upeicha’ỹrõ aikytĩta uperire.

Hesu omonguera peteĩ kuñáme sábado árape

10Ha Hesu oike peteĩ Ñanderuete rógape oporombo’e hag̃ua sábado árape.

11Ha upépe og̃uahẽ avei peteĩ kuñakarai hasýva, peteĩ mba’epochy omokarapãva ichupe, ha ndikatuvéima oñembo’y porã 18 áño pukukue rupi.

12Hesu ohechávo ichupe ohenói ha he’i ichupe: Nde kuñakarai, ne mba’asy ojeíma ndehegui.

13Ha Hesu omoĩvo ipo hi’ári, upevove ha’e oñakãrapu’ã ha oñembo’y porã jevy, ha ha’e omomba’eguasu Ñanderuetépe.

14Upe Ñanderuete róga rerekua katu ipochy Hesu ndive, Ha’e omonguera haguére peteĩ hasývape sábado árape, ha he’i umi oñembyatývape: Oĩ ningo 6 ára (meme semánape) ñamba’apo hag̃ua, upévare anítei peju sábado árape Ha’e penemonguera hag̃ua, peju uvei hendápe umi ambue 6 árape.

15Hesu katu ombohovái ichupe he’ívo: Nde tova mokõi, peẽ voi pejora avei sábado árape pene rymba guéi ha pende búrro ikaruhágui pemboy’u hag̃ua.

16Ko Abraham rajýpe Satana oñapytĩ 18 áñoma, ha naiporãi piko jajora isã sábado árape.

17Ha umi oñemoĩva Hesu rehe otĩmba opytávo, umi ambue oñembyatýva katu, ovy’aite opaite mba’eguasu Hesu ojapóvare.

18Upéi Hesu he’i: Mba’épepa ojogua Ñanderuete retãguasu, mba’eichagua mba’e reheve piko ambojojáta.

19Ojogua ningo mostáza ra’ỹime peteĩ kuimba’e oñotỹva’ekue ikokuépe, ha okakuaapa rire oiko ichugui peteĩ yvyra tuicháva, ha umi guyra ojehaitypo hakã rehe.

20Ha Hesu he’i jevy: Mba’e rehevépa ambojojavéta Ñanderuete retãguasu.

21Ojogua ningo avei levadúrape peteĩ kuña omoĩva’ekuépe 25 lítro harínape ombovupa peve.

22Upéicha Hesu ohasa táva ha tava’ikuéra rupi oporombo’e hag̃ua, og̃uahẽ meve Jerusalénpe.

23Ha upejave peteĩ kuimba’e oporandu Hesúpe: Karaiguasu, mbovymi piko umi ojesalvátava. Ha Hesu ombohovái ichupekuéra:

24Peñeha’ãmba peike hag̃ua pe okẽ po’i rupi, Che ningo ha’e voi peẽme: Heta ohekátava oike hag̃ua, ndoikemo’ãi katu noñeha’ãmbáigui hikuái.

25Pe óga jára opu’ã rire omboty hag̃ua hokẽ peẽ peñepyrũta pepyta okẽ renondépe ha pembotáta pe okẽ pejévo: Ore Jára, eipe’ána oréve ne rokẽ; Ha’e katu ombohováita peẽme he’ívo: Che ndapoikuaái, mamoguápa peẽ.

26Ha peñepyrũta peje: Nde rovake ningo ore rokaru ha roy’úmi, ha ore távape Nde voi orerekombo’eva’ekue.

27Ha’e katu he’íta peẽme: Ha’éma ningo peẽme ndapoikuaaiha, ni mamoguápa peẽ, tapehopa che rendágui peẽ mba’evai apoha.

28Peẽ pejahe’óta ha tãi pururũme pehecháta Abraham, Isaac, Jacóbo ha opaite profetakuérape Ñanderuete retãguasúpe ha peẽ pepytáta okápe, peñemosẽ haguére Ñanderuete retãguasúgui.

29Ha og̃uahẽva’erã hikuái kuarahy resẽguio ha kuarahy reikéguio, yvatéguio ha yvýguio oguapy hag̃ua Ñanderuete retãguasu mesápe.

30Peikuaa porãke, oime ramo ko’ág̃a itapykuéva upérõ itenondéta, ha oime ramo ko’ág̃a umi itenondéva upérõ itapykuéta.

31Upe hórape og̃uahẽ umi fariseokuéra Hesu rendápe ha he’i ichupe: Iporã Nde reho ko’águi, mburuvichaguasu Heródes ndejukaségui.

32Ha Hesu he’i ichupekuéra: Tapeho ha peje pe aguara pévape, ema’ẽ porãke, amosẽ ningo mba’epochýpe ha aporomonguera ko árape, ha ko’ẽrõ, pe ára mbohapyhápe, opáta che rembiapo.

33Che aguatava’erã gueteri ko árape, ko’ẽrõ ha ko’ẽambuérõ, ndaikatúigui peteĩ proféta omano mombyry Jerusaléngui.

34Jerusalen, Jerusalen, nde ningo rejukáva umi proféta, rejapívo itápe omano meve, umi oñemboumava’ekue ne rendápe. Mboy jevy piko Che ambyatyse nde tavayguakuérape ku ryguasu kuru ombyaty háicha imembykuéra ipepo guýpe, peẽ katu ndapeipotái.

35Peikuaa porãke, pende róga oñemonandiva’erãha. Che ha’éma peẽme, peẽ ndacherechamo’ãveimaha, og̃uahẽ meve upe ára peje hag̃ua: Toñemomba’eguasu pe ouvahína Ñanderuete rérape.

Currently Selected:

Lúcas 13: ÑÑP2015

Highlight

Copy