Lúcas 14
14
Hesu omonguera peteĩ kuimba’e hasývape
1Ha Hesu oike sábado árape peteĩ fariséo ruvicha rógape okaru hag̃ua hendive, ha omaña porã hikuái opaite mba’e Hesu he’íva ha ojapóva guive rehe.
2Ha oĩ ningo Hesu renondépe peteĩ kuimba’e hete irurupáva ýgui.
3Ha Hesu oporandu umi oporombo’éva Ñanderuete ñe’ẽ ha fariseokuérape, ha he’i: Ijápa ñaporomonguera sábado árape térãpa nahániri.
4Ha’ekuéra okirirĩmbánte. Hesu opoko hese ha omonguera rire omondo ichupe hógape.
5Upérõ Hesu oporandu ichupekuéra: Mávapa pende apytépe, ita’ýra térã hymba guéi ho’a ramo pózope noguenohẽichéne ichupe sábado ára ramojepe.
6Ha ndaikatúi ombohovái hikuái ichupe mba’evépe.
7Hesu oma’ẽ porã rire mba’éichapa umi oñeconvidava’ekue oiporavókuri umi guapyha itenondevéva pe mesa jerekuévo, he’i ichupekuéra:
8 Reñeconvida ramo mendáva karuguasúpe, ani reguapy pe guapyha tenondevehápe, ani sapy’a ou peteĩ mba’eguasuvéva ndehegui,
9upéicharõ oúta pe ogajára nemotĩ, ome’ẽvo opavave rovake nde guapyha nde rapichápe ha nde reguapyva’erã pe mesa apyka ipaha peguápe.
10 Reñeconvida ramo, tereho eguapy pe guapyha ipahapeguápe uvei, ha pe ogajára neconvidava’ekue oúvo te’i ndéve: Che amígo, ejupi yvateve. Upéicharõmante nde revy’áta, Ha’e nembotuicha haguére opavave oñeconvidava’ekue rovake.
11Opaite oñembotuicháva ijupe oje’apo’iva’erã, ha opaite oñemomirĩva ijupe oñembotuichava’erã.
12Upéi Hesu he’i pe ogajárape: Rejapo ramo karuguasu asaje térã pyharépe, ani rehenoiuka ne irũnguérapente, térã nde ryvykuérape, térã ne pehẽnguekuérape, térã nde róga ypy pegua imba’eitávape, ani hag̃ua ha’ekuéra neconvida jey ikaruguasúpe ha péicha omyengoviapa ndéve.
13Rejapo ramo karuguasu, ehenoiuka uvei mboriahukuérape, ijyva’ỹvape, ikarẽvape, hesatũvape.
14Ha nde revy’aveva’erã, ha’ekuéra ndaikatúigui omyengovia ne rembiapo porã, ág̃a oñemyengoviáta ndéve umi heko potĩva oñemoingove jeyha árape.
15Peteĩ okarúva upépe, ohendúvo ko ñe’ẽ kóva he’i Hesúpe: Ovy’aiteva’erã upe okarútava Ñanderuete retãguasúpe.
16Hesu katu he’i ichupe: Peteĩ kuimba’e ojapo peteĩ karuguasu ha ohenoiuka hetápe.
17Ha omondo hembiguái ohenói hag̃ua umi oñeconvidamava’ekuépe ha he’iuka ichupekuéra: Pejupa katu, ambosako’ipáma ningo jakaru hag̃ua.
18Ha opaite oñeconvidamava’ekue oñepyrũ peteĩteĩ ojedisculpa. Upe peteĩha ningo he’i: Ajoguáma peteĩ kokue ha ahava’erãmante ahecha.
19Ambue he’iuka: Ajogua ningo 10 guéi ahava’erãmante ama’ẽ hesekuéra iporãpa térã nahániri.
20Ambueve katu he’i: Amendaramoite, upévare ndaikatumo’ãi aha.
21Ha pe ogajára rembiguái ojevy omombe’upa ijárape. Upérõ ha’e ipochyete ha he’i hembiguáipe: Pya’e tereho pe táva cálle rupi ha erupa umi imboriahúvape, ijyva’ỹvape, térã hetyma’ỹvape, umi hesatũvape ha umi ikarẽvape.
22Ha pe tembiguái ojapopa rire he’i ijárape: Karai, ajapopa nde ereva’ekue chéve, ha hemby gueteri hendag̃ua.
23Upérõ pe ogajára he’i hembiguáipe: Tereho jey mombyryve ha umi rehug̃uaitĩva guive tapére térã korapýpe erupaite ko’ápe tahenyhẽte che róga.
24Che voi ha’éma peẽme oimeraẽva che aconvida ñepyrũva’ekue ndoumo’ãvéima che karuguasuhápe.
25Heta hetãyguakuéra oho Hesu rapykuéri, ha Ha’e oñembojerévo he’i ichupekuéra:
26Oimeraẽ oúva che rendápe ha ohayhuvéva itúva térã isýpe, hembireko térã ita’ýrape, ityvýra térã iteindýrape, térã hekoveteépe jepe chehegui, ndaikatúi oiko che remimbo’e ramo.
27Ha upe ohupi’ỹva ikurusu ou hag̃ua che rapykuéri, ndaikatúi oiko che remimbo’e ramo.
28Máva piko pende apytégui omopu’ãse ramo peteĩ óga yvate (tórre), ndoguapýi raẽ oipapa hag̃ua mboýpa ohupitýne ichupe oikuaa hag̃ua ipirapire rupípa ojapótapa térã nahániri.
29Ani hag̃ua oñepyrũ ojo’o pe óga yvate raporã, ha upéi opágui ipirapire ndaikatuvéi ojapopa upe hóga yvate, ha oimeraẽva oñembohorýta hese he’ívo:
30Ko kuimba’e kóva naiñakã porãi, oñepyrũ omopu’ã ha ndaikatúi ojapopa, opágui ipirapire.
31Térã mba’eichagua mburuvichaguasúpa oñorãirõta ambue mburuvichaguasu ndive oikuaa porã’ỹre hese ija’e’ỹva pu’aka, ani hag̃ua ha’e oho ramo 10.000 soldádo reheve ñorãirõháme ha hese ija’e’ỹva ouvahína 20.000 soldádo reheve.
32Ha ikatu’ỹtarõ, ha’e ojerureuka hese ija’e’ỹvape oĩ aja gueteri mombyry oiko porã jevy hag̃ua oñondive.
33Upéicha avei oimeraẽva pende apytégui ohayhuve ramo imba’eita chehegui, ndaikatúi oiko che remimbo’e ramo.
34Pe juky iporã, opáichavo nahe’ẽvéi ramo, mba’éichapa ñamohe’ẽ jevýta.
35 Ndovalevéima yvýpe g̃uarã térã abónope g̃uarã, oñemombokuaántema ytýpe. Upe ijapysáva ohendu hag̃ua, tohendu.
Currently Selected:
Lúcas 14: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.
