uMaaliko 9

1UYeesu ahavhavhuuzya avhantu ahati, “Nalyoli nkuvhavhuuzya kuuti, vhaliipo vhamo vhe vhimiliiye ipa, te vhahaafwe, she vhatavhuvhwenyi uvhumwene uvhwa Mulungu lwe vhukwinza ku maha.”

UYeesu akwanduha

(uMataayi 17:1-13; uLuuka 9:28-36)

2Lwe zyatuuha insiku 6, uYeesu ahavhanyatula avha Peeteli nu Yaakobu nu Yoohani. Ahazuvha navho kukwilu pi igamba itali, vhahavha vheeka. Pe uYeesu ahagalunkana pa minso pilongolela lyavho. 3Amenda gaakwe gahataliha kunyengʼenyela, gahavha mazelu nkaani, nuumo umuntu mu nsi umu we angahanda kufishila uvhuzelu uvhwo. 4Pe uEeliya nu Moose vhahavhaloleshela nu kuyanga nu Yeesu. 5UPeeteli ahamuvhuuzya uYeesu ahati, “We Musambiilizi, hinza iswe tusyale panaapa, tuzenje ivwegwi vitatu. Shimo shivhe shaaho, ishamwavho shivhe sha Moose, ni shamwavho shivhe sha Eeliya.” 6Ileelo uPeeteli atámanyile lye akuliyanga, mwe pe vhálemwilwe ni lyoga nkaani. 7Pe lihaloleha ivhingo, lihavhagubishila, izwi lihivwiha kufuma mwi ivhingo ilyo kuuti, “Uno Mwana waane unkundwa. Mumutejelezyaje uweene!” 8Pe lwe vhakutalanganya, vhatahamulola uwunji naawumo, nkandi we Yeesu weeka na vhoope.

9Lwe vhakwiha mwi igamba liila, uYeesu ahavhahaana kuuti vhatahamuvhuuzye umuntu nuumo zye vházivhwenyi, kufishila lwe uweene uMwana wa Aadamu azyuha. 10Vhahalilema izwi liila, vhahanda kuvhuzilizyanya vheeka kuuti, “Kuzyuha she shooni?” 11Vhahamuvhuziilizya uYeesu vhahati, “Shooni she avhasambiilizi avha ndajizyo vhakuti, yikwanzilwa uEeliya amulongolele uChilisiti kwinza?” 12UYeesu ahavhaamula ahati, “Mwe muumwo, uEeliya akwanzilwa alongolele kwinza, inga asengaanye zyonti. Pooka niizyo, shooni she yisimviilwe mu Vhusimbe uVhufinjile kuuti, ine ne Mwana wa Aadamu ndiyimba amayimba aminji, nu kujevhulwa? 13Ileelo nkuvhavhuuzya kuuti, uEeliya ahinza,#9:13 UEeliya ahinza: UYeesu ahamuholanyaaga uYoohani uMwozyi nu Eeliya. UYoohani uMwozyi ávhomvile imbombo ye aVhayuuda vhahasuvhilaga kuuti uEeliya alivhomba. Imbombo iyo yáali ya kumusenganizanya uYeesu idala. Vhaazya uMataayi 11:13-14; uMaaliko 1:2-4. vhoope avhalongozi vhahamuvhombela imbiivhi zyonti inza vwe vhahanzaga,#9:13 uMaaliko 6:14-29 inza vwe zyásimviilwe mu Vhusimbe uVhufinjile.”

UYeesu akumuponia umwana uwa mpepo inkandamanu

(uMataayi 17:14-21; uLuuka 9:37-43)

14Vhahafiha ku vhasundikwa avhamwavho, vhahaaga pali ivhungaana ipiti ilya vhantu livhazyunguluuye, avhasambiilizi avha ndajizyo izya Moose vhahadalinkanaga navho. 15Avhantu vhonti lwe vhamulola uYeesu vhahasukumila nkaani, vhahamushimbiilila, inga vhamulamushe. 16UYeesu ahavhavhuziilizya avhantu vhaala ahati, “Mukudalinkana ishooni navho?” 17Umuntu wumo pi ivhungaana ahamwamula ahati, “We Musambiilizi, namuleeta umwana waane ku kwaho, ali ni mpepo inkandamanu, yoope yikumuvhiiha uvhwashinuunu. 18Lwe yikumulema, yikumugwisya pansi, akufumwa itatafula mwi ilomu, akusyekula amiino, akwuma nkaani umuvhili wonti. Mbalaavile avhasundikwa vhaaho kuuti vhayishimbizye, ileelo vhaposiitwe.”

19UYeesu ahavhavhuuzya ahati, “Mwe vhantu avha havhaliilizyo iha, mutali nu lwitiho! Kwe ntendame niimwe kufishila lyeli? Havhili kwe mbajimbiilile kufishila lyeli? Muleete umwana uyo kuli ine.” 20Vhahamutwala ku kwakwe. Impepo lwe yamulola uYeesu, yihamuvhiiha umwana ishinzilisi, ahagwa pansi, ahanda kugalagaata nu kufumwa itatafula mwi ilomu. 21UYeesu ahamuvhuziilizya uyise uwa mwana ula ahati, “Zyaamwazile lyeli?” Ahati, “Kufuma ku vhunsi vhwakwe. 22Ulwinji yikumusumba mu mwoto na mu minzi, inga yimugoje. Inga ungavhwezya, tufwile uvhwila, utwavwe.” 23UYeesu ahati, “Shooni she ukuti, ‘Inga ungavhwezya’? Zikuvhwezenkana zyonti kwa muntu wonti we ali nu lwitiho.” 24Pepaala, uyise uwa mwana ula ahahoola inkoolo, ahati, “Niitiha! Ileelo ulwitiho lwane lutakwiliine, naavwa imbe nu lwitiho ku kwaho!”

25UYeesu ahalola avhantu vhakwonjela kumwinzila. Ahayipilila impepo inkandamanu yiila ahati, “We mpepo we umuvhomvile umwana uno kuvha wu shinuunu havhili wu kuutwi, yeepa, utahasheele havhili kumwinjila naalumo!” 26Impepo inkandamanu yiila yihahoola nu kumugalagaasya ku maha nkaani, pe yiheepa. Umwana ula ahiima ngati afuuye, avhantu avhinji vhahatinji aafwa. 27UYeesu ahamulema inyoovhe, ahamuvhuusya, woope ahimiilila.

28UYeesu na vhasundikwa vhaakwe vhahinjila mu nyumba paala pe vhahavhanga, vhahamuvhuziilizya kukwilu vhahati, “Shooni she iswe twaaposiitwe kuyishimbizya impepo inkandamanu yiila?” 29UYeesu ahati, “Impepo inkandamanu ye yili vhwevhulo utangayeefwa, nkandi lwe ukumulaavha uMulungu nu kuyiima kulya.”

UYeesu akukuvhwa havhili izya kufwa nu kuzyuha kwakwe

(uMataayi 17:22-23; uLuuka 9:43-45)

30UYeesu na vhasundikwa vhaakwe vhaheepa kuula, vhahatuuha pahati pa shigavho isha nsi isha Galilaaya. Atahanzaga avhantu vhamanye kwe ali, 31mwe pe ahavhasambilizyaga avhasundikwa vhaakwe. Ahatinji, “Ne Mwana wa Aadamu kwe vhambiishe mu nyoovhe izya vhalugu nu kungoga, ileelo isiku ilya vhutatu uMulungu alinzyusya.” 32Avhasundikwa vhaakwe vhatályagiinye izwi ilyo, ileelo vhahoogopa kumuvhuziilizya.

Umupiti mu vhumwene uvhwa Mulungu

(uMataayi 18:1-5; uLuuka 9:46-48)

33UYeesu na vhasundikwa vhaakwe vhahafiha ku Kapelanawuumu. Lwe vhali mu nyumba mwe vháfishiiye, ahavhavhuziilizya ahati, “Mwadalinkanaga ishooni mwi idala?” 34Mwi idala vhahadalinkanaga vhuuvho vheeka kuuti wu naanu mu vheene we mupiti. Lwe avhavhuziilizya, vhahiima mwaa. 35UYeesu ahatendama pahati, ahavhiita vhaala 12, ahati, “Inga umuntu akwanza kuvha wa kwanda, avhe kwisinda ku vhonti, havhili avhe muvhomvi wa vhonti.” 36Ahamunyatula umwana umunsi, ahamuvhiiha pahati yaavho, ahamupahatila, ahati, 37“We akumuposheela umwana umunsi inza uno kwi izina lyane, akumposheela neene. Woope we akumposheela ine, akumuposheela ula we antumiliziizye.”

We atakumuhaana uYeesu ali pooka nawo

(uLuuka 9:49-50)

38UYoohani ahati, “We Musambiilizi, twaamuvhwenyi umuntu wumo akushimbizya impepo inkandamanu kwi izina lyaho. Twaamuhaanile, mwe pe atali pooka niiswe.” 39UYeesu ahavhavhuuzya ahati, “Mutamuhaanaje haa, umuntu we akuvhomba amafindango kwi izina lyane, atangataliha kunjanga ahavhiivhi havhili panaapo, 40mwe pe we atakutuhaana iswe, ali pooka niiswe. 41Nalyoli nkuvhavhuuzya kuuti, umuntu wonti we akuuvhapa aminzi aga kumwela, mwe pe imwe mwe vhalandati vhaane, uMulungu aliimupa amalipilo gaakwe.”

Insoshi kuzya ndingo

(uMataayi 18:6-9; uLuuka 17:1-2)

42“Umuntu wonti we akumupelela kuvhomba uvhutalamalandu wumo mu vhansi ivha vhe vhakuniitiha ine, yaamile kwashi ku kwakwe kupinyiilwa ulwala ulupiti mu nsingo yaakwe, nu kusumbilwa mwa sumbi, kuluusya amayimba ge galimwaga. 43Inga inyoovhe yaaho yikukupelela kuuti uvhombe uvhutalamalandu, uyidumule! Yeenya, kwashi kwinjila mu vhulanzi uvhwa shiima ni shinkuntu kuluusya kusumbilwa mwi ipalaazya ilya mwoto uwa shiima#9:43 Ipalaazya ilya mwoto uwa shiima: Mu Shiyunaani vhakuti Jehenamu, pe pala pe uMulungu alivhalonga nu kumupaniha uSeetano na vhahavhizya vhaakwe na vhantu vhe vhatakumwitiha uMulungu. ni nyoovhe zyonti zivhili. 44Pa vhuyo paala imvinyu zililyanga ivwala vwavho havhili zitaliifwa, nu mwoto wutaliizima.#9:44 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na hansi aha 44. Zyope iBiibiliya zimo izya manda iga zikuhaleha ahansi iha ishisita kusimba. 45Inga ishinama shaaho shikukukupelela kuuti uvhombe uvhutalamalandu, ushidumule! Yeenya, kwashi kwinjila mu vhulanzi uvhwa shiima she we kwesu, kuluusya kusumbilwa mwi ipalaazya ilya mwoto uwa shiima ni vinama vwonti vivhili. 46Pa vhuyo paala imvinyu zililyanga ivwala vwavho havhili zitaliifwa, nu mwoto wutaliizima.#9:46 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na hansi aha 46. Zyope iBiibiliya zimo izya manda iga zikuhaleha ahansi iha ishisita kusimba. 47Havhili, inga ilyinso lyaho likukupelela kuuti uvhombe uvhutalamalandu, ulifwonkole nu kulisumba ukutali! Yeenya, kwashi kwinjila mu vhumwene uvhwa Mulungu ni lyinso lyoka, kuluusya kusumbilwa mwi ipalaazya ilya mwoto uwa shiima na minso gonti gavhili. 48Pa vhuyo paala imvinyu zililyanga ivwala vwavho havhili zitaliifwa, nu mwoto wutaliizima.#9:48 uYisaayi 66:24

49“Wonti we akundandata, uMulungu alimuzelufwa ku mwoto inza vwe impuutile vhahazizelufwaga ni ivheeya.#9:49 IShiyunaani shikuti, Avhantu vhonti vhalilungwaga ivheeya ku mwoto. 50Ivheeya shintu shinza, ileelo inga lyasuupa, shiliipo she shingalinonia? Muvhe ni ivheeya#9:50 Muvhe ni ivheeya: Ivheeya imbombo yaakwe kuleeta uvhunonu nu kuzelufwa. Pe muvhe ni ivheeya, kwe kulingaana na vhe vhakumulandata vhalizelufwaga nu kutendama ku vhutehamu. muhati zyinyu, mutendame ku vhutehamu mwemwe mweka.”

Currently Selected:

uMaaliko 9: nih

Highlight

Copy