uMaaliko 10
10
UYeesu akusambiilizya izya kulehaana
(uMataayi 19:1-12; uLuuka 16:18)
1UYeesu na vhasundikwa vhaakwe vhaheepa pe vhahavhanga, vhahazyunguulaga mu shigavho isha nsi isha Yudeeya, na mu nsi iya mwi isyila ilya ijenje uYoolodaani. Ivhungaana ilya vhantu lihasogolaga ku kwakwe nu kumuzyunguula. Ahataliha kuvhasambiilizya inza vwe ahavhombaga.
2Isiku limo, aVhafalisaayi vhahasogola kumulinga, vhahanda kumuvhuziilizya, vhahati, “Vhuli, indajizyo izya Moose zikwitishila umulume kumutavhula umushi waakwe?” 3UYeesu ahamwamula ahati, “UMoose álajiziizye ishooni?” 4AVhafalisaayi vhahamwamula vhahati, “UMoose ahiitiha kuuti umwanaavuli amupanje umushi ukalaata uwa kulehaana nu kumuleha.” 5UYeesu ahati, “UMoose ásimvile indajizyo izyo, mwe pe ávhwenyi uvhugomu uvhwa mooyo giinyu. 6Ileelo kufuma ku vhwandilo uvhwa nsi, ‘UMulungu ápezile umwanaavuli nu mwantanda.’#10:6 uVhwandilo 1:27 7‘Kuli izyo, umwanaavuli alimuleha uyise nu nyina nu kusopenkana nu mushi waakwe, 8vhavhili ivho vhaliivha umuvhili wooka.’#10:8 uVhwandilo 2:24 Pe avhantu ivho vhatakuvha vhavhili havhili, vhakuvha umuvhili wooka. 9Kuli izyo, she uMulungu ashisopenkiinye, umuntu atahashilehaanye.”
10Lwe vháali mu nyumba yimo, avhasundikwa vhaakwe vhahamuvhuziilizya havhili izwi ilya kulehaana. 11Ahavhavhuuzya ahati, “Umuntu wonti we akumutavhula umushi waakwe nu kunyatula umwantanda uwunji, akuvhomba uvhuvhembu, akumunanjila umushi waakwe. 12Woope umwantanda inga amuleha umulume waakwe nu kwimalwa nu mwanaavuli uwunji, akuvhomba uvhuvhembu.”
UYeesu akuvhaloota avhaana avhansi
(uMataayi 19:13-15; uLuuka 18:15-17)
13Isiku limo, avhantu vhámuleteeye uYeesu avhaana, inga avhavhiishile inyoovhe kuvhaloota, ileelo avhasundikwa vhaakwe vhahavhapilila vhe vhávhaleesite avhaana ivho. 14Ileelo uYeesu atahasungwa lwe aalola vhakuvhadindila, ahati, “Vhaleshi avhaana ivho vhinze kuli ine, mutavhadindaje ndaali, mwe pe uvhumwene uvhwa Mulungu vhwa vhantu vhe vhali inza avhaana ivho. 15Nalyoli nkuvhavhuuzya kuuti, umuntu wonti we atakumusuuvhila uMulungu inza umwana vwe akumusuuvhila utaata waakwe, te ahinjile naalumo mu vhumwene uvhwa Mulungu.#10:15 Lumo kwe kuuti, Umuntu wonti we atakwitiha kulongolwa nu Mulungu inza umwana vwe akwitiha kulongolwa na vhapaafi vhaakwe, atanginjila inga hansi mu vhumwene uvhwa Mulungu.” 16UYeesu ahavhapahatila avhaana ivho, ahavhavhiishila inyoovhe, kuvhaloota.
UYeesu akusambiilizya izya vhulanzi uvhwa shiima
(uMataayi 19:16-30; uLuuka 18:18-30)
17UYeesu ahanda kwepa paala, umuntu wumo ahamushimbiilila, ahamusugamilila, ahamuvhuziilizya ahati, “We Musambiilizi umwinza, imbombe ishooni, inga nkaposheele uvhulanzi uvhwa shiima?” 18UYeesu ahamwamula ahati, “Shooni she ukumbuuzya kuuti ne mwinza? Ataliipo we mwinza, nkandi we Mulungu weeka! 19Uzimanyile indajizyo izya Mulungu zye zikuti, ‘Utagogaje, utavhembuhaje, utiivhaje, utafumwaje uvhwahoome uvhwa ilenga, utahopenkanyaaje, umushindihaje utaata waaho nu maayi waaho.’#10:19 Kufuma 20:12-16; iNkumbushizyo izya Ndajizyo 5:16-20” 20Woope ahamwamula, ahati, “We Musambiilizi, indajizyo zyonti izyo nkazilema kufuma kwe ku vhunsi vhwane.” 21UYeesu ahamwenya, ahamukunda, ahamuvhuuzya ahati, “Usovheliilwe ishintu shooka. Sogoola ukazye ivintu vwonti vwe uli navwo, impiiya zye waposheela uuvhape avhapiina. Inga wavhomba vhwevhulo, ukuvha wayisengulila inkoma ku mwanya. Pe uyinze, undandate.” 22Umuntu uyo lwe ayiivwa izyo, aheepa uku aswimiliilwe nkaani, mwe pe áamile ni vwuma ivwinji.
23UYeesu aheenya imbazu zyonti, ahavhavhuuzya avhasundikwa vhaakwe, ahati, “Shiliivha shigomu nkaani avhadumbwe kwinjila mu vhumwene uvhwa Mulungu!” 24Avhasundikwa vhaakwe vhahasukumila kwivwa amazwi gaakwe. UYeesu ahavhavhuuzya havhili ahati, “Vhaana vhaane, shigomu nkaani kwinjila mu vhumwene uvhwa Mulungu!#10:24 Shigomu nkaani kwinjila mu vhumwene uvhwa Mulungu: IBiibiliya intanzi zye zisimviilwe mu njango iya Shiyunaani nyinji. Muli izyo, amazwi iga zimo zikuti, Shigomu nkaani vhe vhakusuuvhila uvhudumbwe kwinjila mu vhumwene uvhwa Mulungu. 25Shipupuusu nkaani ingamila kutuuha pi indovhoolwi ilya nsindaani, kuluusya udumbwe kwinjila mu vhumwene uvhwa Mulungu.” 26Avhasundikwa vhaakwe vhahasukumila nkaani, vhahavhuzilizanya vhahati, “Ishi inga vwe zili vhwevhulo, pe wu naanu we angaapokwa?”#10:26 AVhayuuda vhahitihaga kuuti avhadumbwe vhonti vhaliipokwa. 27UYeesu ahavhazyamila, ahati, “Ku vhantu zitangavhombeha, ileelo te kwa Mulungu, mwe pe kwa Mulungu zyonti zikuvhombeha.”
28UPeeteli ahanda kumuvhuuzya kuuti, “Yeenya, iswe tuvilesile ivintu vwonti, tukukulandata iwe!” 29UYeesu ahati, “Nalyoli nkuvhavhuuzya kuuti, umuntu wonti we ayilesile inyumba yaakwe, poosye avhanine avhanaavuli, poosye avhantanda, poosye utaata waakwe, poosye umaayi waakwe, poosye avhaana, poosye amagunda, ku zyane na kuzya Izwi iLyinza ilya Mulungu, 30uMulungu kwe aamupe ivwinji nkaani ahavhaliilizyo iha he ali mu nsi. Kwe avhe ni nyumba na vhanine avhanaavuli na vhantanda nu nyina na vhaana na magunda. Pooka niizyo kwe avhanje na mayimba. Ahavhaliilizyo he hakwinza, aliposheela uvhulanzi uvhwa shiima. 31Ileelo avhantu vhe vhatakushindikwa ahavhaliilizyo iha vhaliivha vhantu vhe vhakushindikwa, vhoope vhe vhakushindikwa ahavhaliilizyo iha, vhaliivha vhantu vhe vhatakushindikwa.”
UYeesu akukuvhwa ulwa vhutatu izya kufwa nu kuzyuha kwakwe
(uMataayi 20:17-19; uLuuka 18:31-34)
32UYeesu na vhasundikwa vhaakwe vháali mwi idala kuzuvha ku Yelusaleemu, avhantu avhanji vhahanda kuvhalandata. UYeesu ahalongolela mwilongolela, avhasundikwa vhaakwe vhahasukumila, avhantu vhe vhahamulandataga vhahiima ni lyoga. Ahavhanyatula havhili kukwilu vhaala 12, ahanda kuvhavhuuzya zye kwe zimwaje. 33UYeesu ahati, “Yeenyi, tukuzuvha ku Yelusaleemu. Ukwo ne Mwana wa Aadamu nkusogola kulemwa nu kutwalwa ku vhapiti avha vhapuuti na vhasambiilizi avha ndajizyo. Vhoope kwe vhandonje kuuti vhangoje. Kwe vhambiishe mu nyoovhe izya vhe te Vhayuuda 34nu kunjevhula nu kunswilila amati. Havhili kwe vhankome nu muchaapu nu kungoga. Ileelo isiku ilya vhutatu uMulungu alinzyusya.”
UYaakobu nu Yoohani vhakulaavha uvhupiti kwa Yeesu
(uMataayi 20:20-28)
35UYaakobu nu Yoohani, avhaana vha Zebedaayi, vhahasogola kwa Yeesu, vhahati, “Musambiilizi, tukwanza utuvhombele lyonti lye tukukulaavha.” 36UYeesu ahavhavhuziilizya ahati, “Mukwanza imbavhombele ishooni?” 37Vhahati, “Lwe wakonzya uvhumwene vhwaho tukukulaavha tuhaavhe pooka niiwe, wumo ahatendame ku luvhazu ulwa kundiilo, uwamwavho ulwa kumongo.” 38UYeesu ahati, “Mutamanyile zye mukulaavha. Vhuli, mungayimba amayimba inza ge nandi nsogole nkuyimba ine,#10:38 Vhuli, mungayimba amayimba inza ge nandi nsogole nkuyimba ine: IShiyunaani shikuti, Mungamwelela ulupindi lwe nkumwelela ine? poosye kwozelwa ulwozyo ulwa vhufwe lwe nkwozelwa ine?” 39Vhoope vhahamwamula vhahati, “Eena tungayifumwa.” UYeesu ahavhavhuuzya, ahati, “Amayimba ge kwe njimbe ine, niimwe kwe muyimbe, nu lwozyo lwe kwe noozelwe ine, niimwe vhweleele kwe mwozelwe. 40Ileelo kutendama ku luvhazu lwane ulwa kundiilo, poosye lwa kumongo, te mbombo yaane kuvhitishila. Uvhuzilo uvhwo, vhwa vhaala vhe vhavhasenganiziinye nziila.”
41Lwe avhasundikwa avhamwavho vhaala 10 vhiivwa izyo, vhahanda kuvhaviitilwa avha Yaakobu nu Yoohani. 42UYeesu ahavhiita, ahavhavhuuzya ahati, “Mumanyile vwe avhalongozi avha vhe te Vhayuuda vhakuvhakonzya avhantu vhaavho ku maha, havhili vwe avhapiti ivho vhakuvhavijiilizya avhantu kuvhomba. 43Ileelo kuli imwe zitahaavhe vhwevhulo. We akwanza kuvha mupiti wiinyu, avhe muvhomvi wiinyu. 44Havhili we akwanza kuvha mulongozi muli imwe, avhe muzya wa vhonti. 45Yeenya, ine ne Mwana wa Aadamu ntínzile kuvhombelwa, nkandi kuvhavhombela avhantu, nu kufumwa uvhulanzi vhwane kuvhatavhula avhinji.”
UYeesu akumuponia untonko
(uMataayi 20:29-34; uLuuka 18:35-43)
46UYeesu na vhantu vhamo vhahafiha mu nkaaya iya Yeeliko. Lwe uweene na vhasundikwa vhaakwe ni ivhungaana ilya vhantu vhakwepa mu nkaaya iyo, vhahamwaga umuntu wumo pi idala we áali wu ntonko. Izina lyakwe áali wu Balitimaayo, uyise áali wu Timaayo. UBalitimaayo ahatendamaga pa luvhazu pi idala kuvhalaavha avhantu. 47Lwe ayiivwa kuuti uYeesu uwa ku Naazaleeti akutuuha, ahataliha kuhoola kwi izwi ipiti, ahati, “We Yeesu, Mwana wa Daavhudi,#10:47 UMwana wa Daavhudi: Vhaazya uDaavhudi mu Ntantiho izya Mazwi aMajeni. umfwile uvhwila!” 48Avhantu avhinji vhahamupilila kuuti apuume. Ileelo uweene ahonjezya kuvhilishila nkaani ahati, “We Mwana wa Daavhudi, umfwile uvhwila!”
49UYeesu ahimiilila, ahati, “Mwite.” Pe vhahamwita untonko ula, vhahati, “Akukwita, gomaaga umwoyo! Vhuuha.” 50Pepaala, ahadomoha ahalileha igolole lyakwe, ahasogola kwa Yeesu. 51UYeesu ahamuvhuziilizya ahati, “Ukwanza inkuvhombele ishooni?” Ahati, “We Musambiilizi, nkulaavha umponie, intalishe kulola havhili.” 52UYeesu ahamuvhuuzya ahati, “Sogolaaga, waapona, mwe pe waniitiha.” Ahavhaliilizyo hanaaho untonko uyo ahataliha kulola havhili, pe ahataliha kumulandata uYeesu mwi idala.
Currently Selected:
uMaaliko 10: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
