uMaaliko 11
11
UYeesu akwinjila mu Yelusaleemu nu ludovhelo
(uMataayi 21:1-11; uLuuka 19:28-40; uYoohani 12:12-19)
1Lwe uYeesu na vhasundikwa vhaakwe vhapalamila ku Yelusaleemu, papiipi nu lutala ulwa Besifaage nu lwa Besaniya, muntende mwi igamba ilya Mazayituuni,#11:1 Amazayituuni makwi aga mantonongwa amansi aga mafuta. ahavhasonteelezya avhasundikwa vhaakwe vhavhili. 2Ahavhavhuuzya ahati, “Sogooli mu lutala lwe luli pilongolela lyinyu. Lwe mukwinjila mwenemwo vhweleele, kwe muyilole inyaana iya ndogomi ye yitahalimbilwa nu muntu naalumo, vhayikunjiliiye. Muyisatule, muyileete ipa. 3Inga umuntu avhavhuziilizya ati, ‘Shooni she mukuvhomba vhwevhulo?’ Muhatinji, ‘UMwene uYeesu akuyanza, kwe ayigalusye shiniishi.’”
4Vhahasogola, vhahayaaga inyaana iya ndogomi pa luvhazu pi idala ipiti, vhayikunjiliiye panzi pa nyumba, pe vhahayisatula. 5Avhantu vhamo vhe vhímiliiye paala lwe vhakusatula, vhahavhavhuziilizya vhahati, “Shooni she mukuyisatula inyaana ino iya ndogomi?” 6Vhahavhaamula inza vwe uYeesu ávhalajiziizye, vhoope vhahavhitishila. 7Vhahamutwalila uYeesu inyaana yiila iya ndogomi,#11:7 Indogomi: Ku Vhayuuda indogomi vwáli vihanu ivwa kuvhanyatula avhantu na maligo. UYeesu álimbiiye pa ndogomi lwe akwinjila mu Yelusaleemu, kulolesya kuuti wu mwene uwa vhutehamu. vhahaala amenda gaavho gamo pamwanya pa ndogomi iyo, pe uYeesu ahalimbila nu kutendama penepo.
8Avhantu avhinji vhahaala amenda gaavho gamo mwi idala, vhamo amatundu ge vhátemile mu magunda. 9Avhantu vhonti vhe vhálongoleeye na vhe vhahalandataga mwisinda mwa Yeesu, vhahavhilishilaga vhahatinji,
“Ashindikwaje uMulungu!#11:9 Ashindikwaje uMulungu: IShiyunaani shikuti Hosiyaana, ilyo lizwi lya Shihebuuli, kwe kuuti, Ashindikwaje uMulungu.
Alosiitwe we akwinza kwi izina ilya MWENE uMulungu!#11:9 iZabuuli 118:26
10Vhulosiitwe uvhumwene uvhwa taata wiitu uDaavhudi
vhwe vhukwinza.
Ashindikwaje uMulungu uMupiti uwa ku Mwanya!”
11UYeesu na vhasundikwa vhaakwe vhahafiha mu nkaaya iya Yelusaleemu, vhahinjila pa Nyumba iMfinjile.#11:11 INyumba iMfinjile: Vhaazya mu Ntantiho izya Mazwi aMajeni. UYeesu ahenyeelezya ahinza mwonti, mwe háamile havhaliilizyo ha hamazuuvha, ahafuma pooka na vhasundikwa vhaakwe 12, vhahasogola ku Besaniya.
UYeesu akulitipa itiini
(uMataayi 21:18-19)
12Isiku ilya vhuvhili inzanshi, uYeesu na vhasundikwa vhaakwe vhahafuma ku Besaniya, inzala yihamuluma uYeesu. 13Ahalilola ikwi ilya itiini ukutali, lilemvile amatundu aminji. Ahalipalamila, inga ayeenye inga lihomile amantonongwa. Lwe aafiha, ahaaga lili na ge matundu geeka, mwe pe hatáamile havhaliilizyo ha mantonongwa. 14Pe ahalivhuuzya ikwi ilyo ahati, “Kufuma ileelo ili na shiima, umuntu atahagaaje amantonongwa kufuma muli iwe.” Avhasundikwa vhaakwe vhahiivwa vwe akuyanga.
UYeesu akuyizelufwa iNyumba iMfinjile
(uMataayi 21:12-17; uLuuka 19:45-48; uYoohani 2:13-22)
15Vhahafiha mu Yelusaleemu, uYeesu ahinjila pa Nyumba iMfinjile. Ahanda kuvhashimbizya vhe vhahakazyaga nu kukala ivintu ipo. Ahazibenula imeeza izya vhe vhahatananiaga impiiya nu kuvibenula ivitengo ivwa vhe vhahakazyaga inkunda. 16Ahavhahaana vhonti kwinjizya ivintu ivwa kukazya pa Nyumba iMfinjile. 17Ahataliha kusambiilizya, ahati, “Yisimviilwe mu Vhusimbe uVhufinjile kuuti, ‘INyumba yaane yiliivha Nyumba iya kupuutila avhantu avha nsi zyonti.’#11:17 uYisaayi 56:7 Ileelo imwe muyivhiisile kuvha ‘lishembo ilya vhapumula vintu.’#11:17 uYelemiya 7:11”
18Avhapiti avha vhapuuti na vhasambiilizi avha ndajizyo izya Moose vhahazyivwa zye avhomba, vhahanda kulondola idala ilya kumugoga. Ileelo vhógofile kumulema, mwe pe ivhungaana ilya vhantu lihasukumilaga insambiilizyo zyakwe. 19Lwe haafiha ahavhaliilizyo aha hamazuuvha, uYeesu na vhasundikwa vhaakwe vhaheepa mu nkaaya muula.
UYeesu akusambiilizya izya kuvhaswila avhanji
(uMataayi 21:20-22)
20Indaavhi yaakwe inzanshi, lwe vhakutuuha vhahalilola itiini liila lyumile lyonti na mazi vhweleele. 21UPeeteli ahakumbuha izya itiini liila, ahati, “Musambiilizi, yeenya itiini lye waalitifile lyumile!” 22UYeesu ahamwamula ahati, “Mumwitihaje uMulungu. 23Nalyoli nkuvhavhuuzya kuuti, umuntu wonti inga alivhuuzya igamba ili ati, ‘Kumpuuha ipa, uyisumbe mwa sumbi muula,’ inga atali na maganigani mu mwoyo waakwe, ileelo akwitiha kuuti nalyoli zye akulaavha zikuvhombeha, zilivhombeha. 24Kuli izyo, nkuvhavhuuzya kuuti, vwonti vwe mukulaavha lwe mukupuuta, nalyoli mwitihaje kuuti mwaposheela, uMulungu kwe avhapanje. 25Lwe mukwimiilila kupuuta, inga umuntu wonti avhavhombeeye ivhiivhi mumuswilaje, inga uTaata wiitu uwa ku mwanya avhaswilaje niimwe uvhupuvi vhwinyu.” 26Ileelo inga mutakuvhaswila avhanji, woope uTaata wiitu uwa ku mwanya atangavhaswila niimwe uvhupuvi vhwinyu.#11:26 IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na hansi aha 26. Zyope iBiibiliya zimo izya manda iga zikuhaleha ahansi iha ishisita kusimba.
Avhalongozi vhakwanza kumanya amaha aga Yeesu
(uMataayi 21:23-27; uLuuka 20:1-8)
27Vhahafiha ku Yelusaleemu havhili, uYeesu ahajendaga pa Nyumba iMfinjile. Avhapiti avha vhapuuti na vhasambiilizi avha ndajizyo na vhasongo vhahamusogolela. 28Vhahamuvhuziilizya vhahati, “Tuvhuuzye, ukuvhomba izi ku maha aga naanu? Havhili, wu naanu we akupiiye amaha igo?” 29UYeesu ahavhaamula ahati, “Niine imbavhuziilizye lyoka, inga mwanaamula pe kwe mbavhuuzye kuuti maha vhuli ge nkuvhombela izi. 30Vhuli, amaha aga Yoohani aga kwozya avhantu, gáfumile kwa Mulungu, pamo ku vhantu? Munaamule.”
31Pe vhahapanzanya vhuuvho vheeka vhahati, “Inga twati gáfumile kwa Mulungu, kwe ati, ‘Pe shooni she mutámwitisile?’ 32Poosye inga twati gáfumile ku vhantu, avhantu kwe vhaviitwe.” Vhahoogopa, mwe pe avhantu vhonti vhámanyile kuuti uYoohani áamile mukuvhwi uwa nalyoli. 33Pe vhahamwamula vhahati, “Tutamanyile.” Woope uYeesu ahavhavhuuzya ahati, “Niine ntakuvhavhuuzya kuuti, maha ga naanu ge nkuvhombela izi.”
Currently Selected:
uMaaliko 11: nih
Highlight
Share
Copy
Want to have your highlights saved across all your devices? Sign up or sign in
© 2021 Wycliffe Bible Translators, Inc.
