Lukas 8

Karandahan ma mmeꞌ ni si Isa

1Yaꞌ hallom, lay na baw si Isa ngalataan siga daira ka kakawum-kawman masaplag umanat mahap pasal pamarinta Tuhan. Maka luu na du bay mmeꞌ siga mulit na sikasapu-duwa. 2Maka luu gi karandahan mmeꞌ ninsila ma lay na kaulian meꞌ si Isa jinisan saki da. Maka luu gi kasohean ninsila bay sineytan lay na du kaulian. Disu ninsila yana si Mariyam, danda man Magdala. Iya ilay bay pingkaꞌ luu pituꞌ seytan njawom baran na lay na pinalakka. 3Maka luu gi bay mmeꞌ si Jowanna, yana nda si Kusa ma tukang magmalim ni astanaꞌ Gubnul Herod. Maka luu gi si Susana sampay meka gi karandahan bay du mmeꞌ. Sila ilay bay nganggastusan si Isa ka ga mulit na ka sīn da dī da.

Dalil pasal jama naburan bani

(Matiyu 13.1-9; Malkus 4.1-9)

4Ni waktu looy, meka na jama pilay pa mman si Isa lakka man jinisan daira ka kakawum-kawman. Luu jaꞌ siꞌ sila kumpo, lay na si Isa ngandalil man na noan sila, yuk na, 5“Luu disu jama lay naburan bani ni huma na. Pag sabud na, kasohean lay tumiluꞌ pa tangngaꞌ lān. Dari siꞌ, lay jaꞌ tagiok meꞌ jama sampay lay katis kinakan meꞌ siga manuk-manuk. 6Kuwan kasohean bani, lay tumiluꞌ pa jawom kabatuhan dangkitiꞌ du tanaꞌ na. Lay du baw tomoꞌ, sugaꞌ song hallom lay du ngalayu, batan yaꞌ na ngambang tanaꞌ na pag pasuꞌ jaꞌ llaw. 7Kuwan kasohean bani lay tumiluꞌ pa jawom lumput itingan. Pag tomoꞌ na, pasulig du lumput looy sampay lay jaꞌ limbo meꞌ lumput. 8Kuwan kasohean bani lay tuwaꞌ ni tanaꞌ mahap. Dari siꞌ, mahap meꞌ da sulig sampay pag buwaꞌ na, lay gi lipat min dahatus.” Pag-anu, yuk si Isa lagi, “Kaam ma pakale ni bitsala ku, pahamun bi paayad.”

Maksud si Isa ngandalil

(Matiyu 13.10-17; Malkus 4.10-12)

9Pag-anu siꞌ, tinilaw na si Isa meꞌ siga mulit na bong oy kamaatunan dalil looy siꞌ.

10Pag tampung si Isa, “Kaam, siga mulit ku, ndang sinukuꞌ sina ningkaam pinahatiyan hāl pamarinta Tuhan ma yaꞌ gi bay lahil maruhuꞌ. Sugaꞌ bong ni siga jama sarī ma yaꞌ pitsayaꞌ niyaku, ngkod ngandalil jaꞌ ku man ku noan sila. Kon ku buwat meꞌ looy supaya san sila ngita, sibuꞌ du sila ka yaꞌ ngita. Maka san sila kale, yaꞌ du sila kahati.

Si Isa makkasan kamaatunan dalil looy pasal jama naburan bani

(Matiyu 13.18-23; Malkus 4.13-20)

11“Batnaa, passaꞌ ku na ningkaam kamaatunan dalil looy siꞌ. Kuwan ilooy ma inawnan meꞌ ku siꞌ bani, yana umanat Tuhan pinasaplag. 12Kuwan tanaꞌ ni tangngaꞌ lān man bani looy bay tumiluꞌ, tuwaꞌ pa sagannap ma bay kale umanat Tuhan, sugaꞌ magti ndagmit meꞌ Ibilis man jawom atay da mari yaꞌ na luu dapat da pitsayaꞌ sampay sinalamat. 13Kuwan tanaꞌ looy ma njawom kabatuhan man bani looy bay tumiluꞌ, tuwaꞌ pa sagannap ma bay kale umanat Tuhan sampay magti pitsayaꞌ ni kagāk da. Sugaꞌ pagka yaꞌ bay nganggamut pa lawom umanat looy njawom atay da, yaꞌ du hallom tatasan da pitsayaꞌ. Pag luu jaꞌ kabinsanaan atawa laug tuwaꞌ pa jataꞌ da, siglaꞌ du sila patatak. 14Kuwan tanaꞌ looy ma meka lumput itingan na man bani looy bay tumiluꞌ, tuwaꞌ pa sagannap ma bay kale umanat Tuhan sampay pitsayaꞌ sugaꞌ wā sila hanggaw ni hāl meꞌ da llum ni junyaꞌ. Altaꞌ tud hagaan ninsila. Maka meꞌ da nganduwan napsu da ni kajinisan meꞌ punu njawom atay da. Dari song hallom, umanat Tuhan njawom atay da, bong dalil ta pa tinanom, lay na limbo leꞌ lumput sampay yaꞌ du buwaꞌ. 15Boꞌ tanaꞌ looy ma mahap man bani looy bay sinaburan, tuwaꞌ pa sagannap ma bay kale umanat Tuhan, boꞌ kinanna meꞌ da ni kahilas atay da. Wā sila mean umanat looy san gi oy katuwaꞌ ninsila. Sangkon jinisan kaayaran na takita ni kaallum da. Kaayaran da ina, bong dalil ta pa tinanom, yaꞌ luu hantiꞌ da buwaꞌ, boꞌ ayad jaꞌ buwaꞌ da.”

Kabanahan yaꞌ dari tinapuk

(Malkus 4.21-25)

16Pag-anu, yuk si Isa, “Kaam ina, katoonan bi na kabanahan. Sangkon daa na tapukun bi. Bong dalil ta pa palitaan, yaꞌ sina luu jama pus na nantikan palitaan tinangkopan na baw ka undam atawa inannaꞌ ndiyoꞌ kantil. Mastiꞌ gowet na jaꞌ sina pa jataꞌ supaya ngita soysoy paasok. 17Batan basta ina lay na ginowet palitaan, yaꞌ luu saꞌ karantaan meꞌ na. Intong na, pag pōꞌ kabanahan, mimon ma bay llimbuhan, pinalahil na. Damikiyan, mimon ma bay sinipuk, kinatoonan na. 18Sangkon pakale kam paayad, batan soysoy ina nganna bitsala ku, mastiꞌ sinampunan gi sina pangahati na. Sugaꞌ soysoy ina yaꞌ nganna, malaingkan lugiꞌ jaꞌ ya. Sakayi na ina mintu kasayu, san luu pangahati na dangkitiꞌ, lay na kinaddoan.”

Sagannap ma inawnan paglūng si Isa

(Matiyu 12.46-50; Malkus 3.31-35)

19Na sasang si Isa nōꞌ, luu na baw takka nneꞌ na ka ga danganakan na. Sugaꞌ yaꞌ san sila bay kapassut pa mman na sabap meka na manusiyaꞌ. 20Dari siꞌ luu bay maan si Isa, yuk na, “Tuwan, alay la nneꞌ nu ka ga danganakan nu nangge ni poan. Doman konoꞌ sila magbitsala ka kau.”

21Pag tampung si Isa, “Ohoꞌ, sugaꞌ meꞌ ku ngingat, saꞌ sat sila nneꞌ ku ka ga danganakan ku. Batan sagannap ma pakale sampay ngasip ni umanat Tuhan, sila pun ina bilang ku du nneꞌ ku ka ga danganakan ku.”

Si Isa mataddoꞌ libut

(Matiyu 8.23-27; Malkus 4.35-41)

22Na disu llaw, yuk si Isa ni ga mulit na, “Palintas doꞌ kitabi pa dambilaꞌ danaw.” Dari lay na sila dutai taꞌ kumpit, boꞌ da lakka. 23Lān da siꞌ pilay, lay na baw kapatuli si Isa. Sasang na tuli, takka na libut. Ni kabasag lamba nimpok, meka na ga boheꞌ paisi sampay piligru na ga tumallob kumpit da. 24Dari lay binatiꞌ meꞌ da si Isa, yuk da, “Tuwan! Ū Tuwan! Limbo na kitabi!” Dari siꞌ, ilooy ma bangun du ya, boꞌ sinohoꞌ meꞌ na baliyu looy sampay lamba na patagong. Dari siꞌ, sarunduun du banti baliyu looy ka lamba na sampay taddoꞌ na lahat.

25Pag-anu, yuk si Isa ni siga mulit na, “Ongoy doꞌ ina yaꞌ luu pangando bi pa Tuhan?”

Kuwan ga mulit na siꞌ tu, tud bay tawu. Inu-inu sila sampay sitilaw-tilaw na sila, yuk da, “Jama oy doꞌ tu meꞌ tuu? Sampay baliyu ka lamba ngasip jaꞌ du bong iya nohoꞌ!”

Si Isa malakka siga seytan man jawom baran disu lalla

(Matiyu 8.28-34; Malkus 5.1-20)

26Pag pawus da, lay na sila parungguꞌ ni Gerasa ndooy ni dambilaꞌ danaw man lahat Jalil. 27Pag lay jaꞌ duwai si Isa ndooy, luu na baw pasōng pa mman na disu lalla sineytan. Hallom na ya nantang na sadjaꞌ. Yaꞌ na luu meꞌ na taꞌ lumaꞌ. Ndooy na jaꞌ ya ni kakubuhan. 28-29Boꞌ daran patakka seytan na. Maka san daran pinusas battis-tangan na ka karina sampay njagahan lagi, masi du tabakkasan na. Pag-anu, boꞌ na pinaggos meꞌ seytan na nohoꞌ pilay pa tangngaꞌ dile yaꞌ maglumaꞌ.

Na llaw looy siꞌ, pag takita na si Isa, ilooy ma killahap ya sampay pahangkop ni awpan na. Pag-anu siꞌ, lay na sohoꞌ si Isa seytan looy palakka man jawom baran na. Dari magti ngahowap lalla looy siꞌ, yuk na, “Batōy nu itu ku Isa? Katoonan ku du bina kau Anak Tuhan Mahatinggi. Junjung ku na ningkau, daa jaꞌ ku pidjalaun.”

30Pag-anu, tinilaw na ya meꞌ si Isa, yuk na, “Soy ina awon nu?” Pag tampung na, “Si Libuhan.” Ngkon na ngawnan dī na meꞌ looy sabap meka seytan bay paasok pa jawom baran na. 31Kuwan siga seytan looy baw siꞌ tu, lay nganjunjung ni si Isa yaꞌ nohoꞌ hiniyakan pa jawom lowang tangob ma yaꞌ luu ngkoran lawom na.

32Na ndooy siꞌ, luu baanan bawi inipat magkakanan ni tabbis punu. Dari siꞌ, bbuwatan siga seytan njawom baran lalla looy siꞌ nganjunjung ni si Isa, yuk da, “Bong dari ningkau, pasayin na jaꞌ kami pa jawom baran baanan bawi looy.” Dari lay na sila nduwan. 33Pag pōꞌ ga seytan looy man lalla looy, lay na du sila pasayin pa jawom baran baanan ga bawi looy. Pag-anu siꞌ, ilooy ma magti magsonsehan baanan ga bawi looy palūd pa jawom danaw sampay lay na katis limbo.

34Pag takita meꞌ siga tukang ngipat bawi looy meꞌ looy, magti sila sonse pa jawom daira sampay pa siga kawum ni bihing na nuntutan jama mimon ma bay tasakup da. 35Dari ilooy ma bahuklud du jama pilay pa mman si Isa masā bong mawjud du habal ma bay tinuntut ninsila. Pag takka da, takita da na lalla looy ma bay sineytan ningkōꞌ ni bihing battis si Isa. Boꞌ lay na ya mamakoy maka basanayan na pamiki na. Dari siꞌ takkahan tawu na ga sila ni kaehe kawasa si Isa. 36Pag-anu, lay na sila tinuntutan meꞌ sagannap ma bay kasakup bong pooy meꞌ lalla looy siꞌ bay kaulian.

37Sugaꞌ bbuwatan jama sikamimon ni sikaliput Gerasa, lay maku luuy nohoꞌ si Isa lakka man lahat da sabap tawu sila. Dari siꞌ lay na ga si Isa dutai taꞌ kumpit da song palakka. 38Kuwan lalla looy baw siꞌ ma bay sineytan, lay maku junjung mmeꞌ ni si Isa. Sugaꞌ yaꞌ bay kuhi si Isa, gam pin yuk na, 39“Gam na ko baw moleꞌ boꞌ nu nuntut mimon bay pabuwat Tuhan ningkau.” Dari lay na moleꞌ lalla looy, boꞌ na ngalataan daira nuntut pasal mimon bay pabuwat si Isa niiya.

Anak si Jayrus ka disu danda ma katumpahan lahaꞌ

(Matiyu 9.18-26; Malkus 5.21-43)

40Pag beleng ga si Isa pa dambilaꞌ danaw, ndang meka na jama ngagad nampang iya. 41Pag duwai si Isa, luu pasōng pa mman na disu pa-mmean langga inawnan si Jayrus. Luu jaꞌ siꞌ ya ni awpan si Isa, lay ya sujud sambayan na maku junjung moo iya pa lumaꞌ da 42batan luu anak na magkamatoy-matoy na. Bohoꞌ ga sapu-duwan taun umu na, boꞌ isu-isu du anak na danda.

Na lān si Isa siꞌ song pilay pa lumaꞌ si Jayrus, magdogsog-dogsog na jama mmeꞌ niiya. 43Njawom baanan ga jama looy siꞌ, luu disu danda sapu-duwan taun na halloman na daran katumpahan lahaꞌ. Minsan meka na duktul man na bay nguliꞌ, yaꞌ du ya bay kaulian. Sampay lay na ga katis altaꞌ na hangat man na nguliꞌ padisu-padisu. 44Dari bbuwatan danda looy siꞌ, lay papassūt pa bukutan si Isa boꞌ na murut bihing-bihing juba na. Dari siꞌ, sarunduun du lay banti lahaꞌ na tumpa.

45Pag-anu yuk si Isa, “Soy doꞌ lay siꞌ bay murut aku?” Pag yaꞌ jaꞌ mangaku labbasakayi, yuk si Pitel, “Uy Tuwan, yaꞌ bitu la taambat manusiyaꞌ ntuu! Mastiꞌ tasagid jaꞌ ko meꞌ tuu magdogsog-dogsog na sila.”

46Sugaꞌ yuk si Isa, “Yaꞌ ba saliꞌ. Luu bitu bay takissa ku kawasa pōꞌ man baran ku nguliꞌ.”

47Pag ndaꞌ danda looy tasayu ya meꞌ si Isa, mipig na ga ya sampay lay na ya sujud ni awpan na. Pag-anu siꞌ, nuntut na ya ni pag-awpan sikamimon bong ongoy ya bay murut iya maka bong pooy meꞌ na bay kaulian deꞌ-dēꞌ. 48Dari yuk si Isa niiya, “Inaa ina siꞌ Nang man nu bay kaulian sabap pitsayaꞌ ko niyaku. Batnaa san ko moleꞌ na. Maka pasannangun na atay nu.”

49Sasang si Isa masi mitsala ni danda looy, luu na baw jama takka man lumaꞌ si Jayrus. Yuk na ni si Jayrus, “San daa na ba pahusaan ta Tuwan Guru. Lay na la taabut anak nu.”

50Sugaꞌ pag takale si Isa, yuk na ni si Jayrus, “Daa ko ba hanggaw. Mangando jaꞌ ko niyaku, boꞌ na kaulian.” 51Pag takka da pa lumaꞌ si Jayrus, ilooy du bay padari si Isa mmeꞌ paasok yana ga si Pitel, si Yahiya, si Yaꞌkub ka ga induꞌ-mmaꞌ anak-anak looy siꞌ. 52Kuwan sagannap ma ndang luu na ndooy njawom lumaꞌ, magtangisan na pin magkarukkaan ni anak-anak looy. Sugaꞌ yuk si Isa ninsila, “Daa na kam ba nangis. Yaꞌ du sina matoy anak-anak naa, arapun tuli jaꞌ sina.”

53Pag takale da bitsala na, lay jaꞌ ya pinatattohan batan katoonan da tud lai na matoy anak-anak looy. 54Sugaꞌ yaꞌ du bay paruli si Isa, gam pin kinaddoꞌ meꞌ na tangan anak-anak looy sambayan na halling, “Nang, bangun na ko.” 55Pag-anu, ilooy ma pabalik na galak na, boꞌ magti du ya bangun. Maka lay na sohoꞌ si Isa anak-anak looy pinakan ninsila. 56Dari kuwan siga induꞌ-mmaꞌ na siꞌ tu, tud bay kahimattaan ngandaꞌ anak da llum na pabalik. Sugaꞌ lay sila sinupali meꞌ si Isa yaꞌ nohoꞌ māꞌ ni soysoy jaꞌ bong oy bay pabuwat na.

Currently Selected:

Lukas 8: sjm

Highlight

Copy