Lukas 7

Si Isa ngulian tindog kapitan sundalu

(Matiyu 8.5-13)

1Paddus jaꞌ siꞌ si Isa bay mitsala ni ga jama ndooy, lay na baw ya pilay pa Kapelniyum. 2Ndooy siꞌ, luu disu kapitan sundalu, bangsa Rom, boꞌ luu disu tindog na saki ma kasengan na banahan, agon magkamatoy-matoy na. 3Pag taaka kapitan looy siꞌ luu na si Isa ni daira na, lay ya nohoꞌ kasohean matatoa bangsa Yahudi maku tulung ni si Isa nohoꞌ pa lumaꞌ na ngulian tindog na.

4Pag takka ga matatoa looy siꞌ pa mman si Isa, lay na sila maku junjung, yuk da, “Tuwan, luu la kapitan bay nohoꞌ kami pitu. Bong siꞌ kadarihan ningkau, tulungun doꞌ ya. San ilay ya saꞌ bangsa tabi, pataꞌ du ya tinulung batan jama mahap du ya. 5Iya ilay maaseꞌ du ningkitabi bangsa Yahudi sampay lay gi ya matanggehan kami langga.”

6Dari siꞌ, lay na si Isa mmeꞌ ninsila. Sugaꞌ tapit jaꞌ siꞌ sila pa lumaꞌ kapitan, luu na baw kabagayan kapitan looy nampang si Isa, yuk da, “Tuwan, tugun kapitan, san ko konoꞌ daa na mahusaan dī nu pawus sabap yaꞌ san konoꞌ ya tawop nohoꞌ kau pilay pa lumaꞌ na. 7Yuk na siꞌ, ni kaehe kawasa-kapatut nu, yaꞌ san ya konoꞌ tawop sitammu ka kau balharapan. Sugaꞌ yuk na siꞌ, basta lay jaꞌ ko konoꞌ ngabtang mantuu, kaulian jaꞌ du silay tindog na. 8Ndang tahati na du konoꞌ hāl kapatut, batan iya disu ndiyoan kapatut panghuluꞌ na; damikiyan, luu du siga sundalu ndiyoan kapatut na. Dari bong sohoꞌ na konoꞌ dangan pilay, pilay du. Bong sohoꞌ na disu pitu, pitu du. Maka bong sohoꞌ na tindog na buwat, buwat du. Dari yuk na siꞌ, labi na saꞌ subay inasip bong kau na bay nohoꞌ. Sangkon tatantu na konoꞌ bong ko bay jaꞌ ngabtang mantuu, mastiꞌ kaulian jaꞌ tindog na.”

9Pag takale si Isa bitsala da siꞌ, kapajayip ya sampay lay ya paawop pa baanan jama ma ngahaboyan iya, boꞌ na halling, “Baan ta kam banahan, ni sikaliput Israil, yaꞌ gi ku bay ngita san disu Yahudi meꞌ basag pangando kapitan looy.”

10Na pag beleng ga sosohoan kapitan looy siꞌ pa lumaꞌ na, pag ndaꞌ da, koleꞌ na tindog na.

Si Isa makallum disu anak bawu danda

11Yaꞌ hallom, lakka na baw si Isa ka ga mulit na mandooy song pa disu daira inawnan Nain. Boꞌ tud meka gi jama mmeꞌ ninsila. 12Tapit jaꞌ siꞌ sila pa behe lawang kutaꞌ ma ngaliput daira looy, lay sila sitammu ka baanan jama pōꞌ man daira looy nuhiyan mayat pa kubu. Mayat looy ilay yana disu lalla anak tungga, boꞌ bawu lagi nneꞌ na. Maka meka du jama daira looy bay mmeꞌ ni bawu looy nuhi sasang na patuhut ni pangkaꞌ anak na.

13Pag takita jaꞌ bawu looy meꞌ Papuꞌ Isa, kapaluuy ya. Dari yuk na, “Daa na ko Daꞌ nangis.” 14Pag-anu siꞌ, pasōng na si Isa pa pangkaꞌ looy, boꞌ pinurut meꞌ na. Sampay lay na patagong ga jama ma ngalanggung. Pag-anu, yuk si Isa ni mayat looy, “Toꞌ, bangun na ko.” 15Pag-anu, ilooy ma bangun du lalla looy sampay mitsala na ga. Dari siꞌ, yuk si Isa ni nneꞌ na, “Atu na Daꞌ anak nu.”

16Pag takita leꞌ baanan jama ndooy, takkahan tawu na sila labbasakayi sampay mudji na ga sila Tuhan, yuk da, “Luu na bitu Tuhan pitu nabang kitabi sukuꞌ na. Batan luu na bay papitu na disu nabi biddaꞌ na ehe kawasa na pa mman tabi.” 17Dari habal pasal bay kadarihan si Isa siꞌ lataꞌ na ni sikaliput Yahudiya sampay ni siga lahat ma ni bihing-bihing na.

Si Yahiya ma Tukang Mandi nohoꞌ siga mulit na pa mman si Isa

(Matiyu 11.2-19)

18Na siga mulit si Yahiya ma Tukang Mandi siꞌ tu, lay du taaka da bay kadarihan si Isa. Dari lay sila pilay pa mman si Yahiya njawom jīl nuntutan iya. Pag lupus, lay si Yahiya nohoꞌ mulit na duwa, 19yuk na, “Pilay doꞌ kam pa mman si Isa. Tilawun bi teꞌ bong tud iya na tukang nalamat ma bay njanjiꞌ meꞌ Tuhan pinapitu, atawa luu gi ka sarī subay agad tabi.”

20-21Dari siꞌ, lay na sila pilay. Pag takka da pa mman si Isa, magsabtan baw ka sasang na ngulian jinisan saki jama ka ga jama sineytan sampay jama buta. Pag-anu, yuk mulit si Yahiya ilooy siꞌ sikaduwa, “Tuwan, lay siꞌ kami la sohoꞌ Tuwan Yahiya nilaw kau bong tud kau na tukang nalamat ma bay njanjiꞌ meꞌ Tuhan pinapitu atawa luu gi ka sarī subay agad kami.”

22Tampung si Isa, “Pabeleng na kam, boꞌ baan bi jaꞌ si Yahiya bong oy bitsala bay takale bi niyaku sampay ma bay takita bi pabuwat ku. Baan bi ya jama buta ngita na, jama tongkaꞌ kapalān na paayad, jama inipu kaulian na, ma bisu kale na, sampay jama matoy pinakallum na. Maka luu na umanat mahap pinasaplag ni jama miskin. 23Baan bi ya, njawom supaat soysoy yaꞌ hawal-hawalan niyaku.”

24Lay jaꞌ siꞌ lakka ga mulit si Yahiya, lay na mitsala si Isa ni siga baanan jama ndooy pasal si Yahiya, yuk na, “Jaman bi ilay bay pilay pa mman si Yahiya ndooy ni lahat lau-lau, kumpas ku saꞌ ga maksud bi pilay ngandaꞌ parang maghapoy-hapoy meꞌ baliyu. 25Maka kumpas ku saꞌ du maksud bi pilay ngandaꞌ jama hagaan pamakoy na. Batan bong ina kita doman ngandaꞌ jama ma mamakoy meꞌ looy sampay ma lakkop meꞌ altaꞌ, subay kita pilay pa astanaꞌ, saꞌ ga ni lahat yaꞌ maglumaꞌ. 26Saꞌ ba, maksud bi pilay sabap doman kam ngita nabi? Tud bana du baw silay si Yahiya nabi. Sugaꞌ ni sabana na, patingkat gi ya man nabi. 27Batan iya na silay sosohoan looy ma bay awnan Tuhan njawom kitab ma pōꞌ duhuꞌ man Almasi. Yuk Tuhan ni Almasi,

‘Bbos-bbos luu sina sohoꞌ ku duhuꞌ man kau disu sosohoan ku masaplag mari saddiya na jama ni katakka nu.’ ”#(7.27) Kitab Nabi Malakay 3.1.

28Yuk si Isa lagi, “Baan ta kam banahan, bong inawnan manusiyaꞌ, yaꞌ luu bay pinamaddihan patingkat labi man si Yahiya. Sugaꞌ ni batnaa, soysoy ina tumabeꞌ na ni pamarinta Tuhan, san du pooy diyoꞌ na ni bandingan manusiyaꞌ, malaingkan patingkat gi ya man si Yahiya.”

29Na pag takale ga jama ndooy sampay ga tukang ninga sukay bitsala si Isa, honaꞌ-honaꞌ da, “Tud yaꞌ la luu sibuꞌ sabanding ayad kahandak Tuhan!” Ga jama looy ilay siꞌ ma bay mantug Tuhan meꞌ looy, ndang lay na du tabeꞌ ni sagannap ma mean kahandak Tuhan jaman da bay nohoꞌ pinandi ni si Yahiya. 30Boꞌ siga Parisi ka ga guru saraꞌ agama lay jaꞌ nuwak kahandak Tuhan batan yaꞌ sila bay kuhi pinandi meꞌ si Yahiya.

31Pag-anu, yuk si Isa, “Jama ni angkat-angkatan batnaa, yaꞌ ku pandoy nguwalnaꞌ batan awod sila takoleꞌ sinulut. 32Sila ina meꞌ karuha siga anak-anak ni tabuꞌ ma yaꞌ doman mmeꞌ kuli-kuli san gi oy kuli-kulihan pinōꞌ meꞌ siga soheꞌ da. Bong sawpama siga soheꞌ da maglami-lami niyup suling, yaꞌ du sila kuhi mmeꞌ magsayaw. Bong siga soheꞌ da bahasa ngalangan-langan mayat, yaꞌ du sila kuhi mmeꞌ magbawuꞌ-bawuꞌ maglindu.

33“Na kaam ina, sibuꞌ karuha bi ka ga anak-anak meꞌ looy siꞌ. Luu na si Yahiya bay pinapitu meꞌ Tuhan pa mman bi, sugaꞌ yaꞌ du kam bay kuhi mmeꞌ niiya. Gam pin sukat makanan na saꞌ meꞌ ningkaam, boꞌ yaꞌ lagi ya nginum oy maka oy na makalango, baꞌ-bāꞌ bi sineytan na baw ya. 34Pag sunuꞌ Anak Manusiyaꞌ, yana aku, san ku mangan kinakan biyasa sampay nginum tubaꞌ anggul meꞌ karuha kaekahan manusiyaꞌ, baꞌ-bāꞌ bi lagak na baw ku maka palalango lagi. Maka sukat ku palamud ni siga tukang ninga sukay ka ga pagkahi da baldusa, pinalaat na baw ku meꞌ bi. 35Sugaꞌ biyahun na luu. Bong ina jama tud katuwaꞌ du mamiki, tasayu da du kami ka si Yahiya saliꞌ-saliꞌ bay pinapitu meꞌ Tuhan.”

Disu danda numpahan battis si Isa insallan hamut

36Na luu disu llaw, lay na baw si Isa kinaddoꞌ mmeꞌ mangan meꞌ disu Parisi inawnan si Saymon. Dari siꞌ, lay na du ya mmeꞌ pilay pa lumaꞌ na mangan. 37Na ni daira man Parisi looy siꞌ, luu disu danda tanyag baldusa. Pag taaka na luu si Isa ni lumaꞌ Parisi looy, lay ya pilay moo katsaꞌ-katsaꞌ insallan hamut. 38Takka ndooy, lay ya nangge ka tuut na ni bihing battis si Isa sambayan na nangis. Sampay lay na ga baseꞌ battis si Isa kakattapan meꞌ boheꞌ mata na. Pag-anu siꞌ, lay puusan na battis si Isa ka dūn kōk na. Pus meꞌ looy, lay ūk na battis na, boꞌ lay gi nnaan na insallan hamut.

39Pag takita jaꞌ meꞌ Parisi looy ma bay ngaddoꞌ si Isa meꞌ looy, njawom atay na, “Bong siꞌ bina mawjud lalla naa disu nabi, yaꞌ ya kuhi sinagid leꞌ danda naa, batan mastiꞌ tasayu na jaꞌ danda naa baldusa.”

40Na si Isa siꞌ tu, ndang tasayu na bong oy njawom pamiki Parisi looy. Dari yuk na niiya, “Saymon, luu situ siꞌ bāꞌ ku ningkau.”

Tampung si Saymon, “Oy lay siꞌ Tuwan?”

41Yuk si Isa, “Luu duwa jama utangan ni disu tukang mautang. Ilooy siꞌ disu, utang na lima hatus dublun pilak porol, kuwan ilooy disu, limampūꞌ. 42Na ga jama looy siꞌ, saliꞌ-saliꞌ yaꞌ bay kabayad. Dari sabap luuy lalla looy ma bay mautang ninsila, lay puwasan na utang da sikaduwa. Na Saymon, tilaw ta teꞌ ko, bong kau mista, mamooy lay sila mas mehe aseꞌ na ni lalla looy ma bay mautang?”

43Yuk si Saymon, “Bong aku mista, ilooy ma mehe utang na.”

Yuk si Isa, “Tuwaꞌ bana bandingan nu.”

44Pag-anu, tineleꞌ na meꞌ si Isa danda looy siꞌ sambayan na maan si Saymon, yuk na, “Saymon, ndaun doꞌ ba danda tuu. Aku siꞌ dutai taꞌ lumaꞌ bi, yaꞌ ku bay buwanan nu boheꞌ man ku ngosoan battis ku. Boꞌ danda tuu, bay gi maseꞌ battis ku ka boheꞌ mata na, boꞌ pinuusan ka dūn kōk na. 45Pag takka ku ntuu, yaꞌ ku bay hulmat nu ka ūk. Boꞌ danda tuu, labba man katakka ku, yaꞌ bay patagong ngūk battis ku. 46Ni katakka ku siꞌ, yaꞌ san bay kattapan nu kōk ku ka insallan man nu ngahulmat aku. Boꞌ iya, lay gi nnaan na battis ku insallan hamut salangkaw-langkaw hagaꞌ na. 47Baan ta ko Saymon, bana na meka situ bay dusa danda tuu, sugaꞌ lay na situ bay puwasan ku. Ituu situ kon mehe aseꞌ na niyaku. Sugaꞌ bong ina jama mista dangkitiꞌ du dusa na, pag pinuwasan, malaingkan dangkitiꞌ du aseꞌ na.”

48Pag-anu siꞌ, yuk si Isa ni danda looy, “Nang, lay na silay puwas dusa nu labbasakayi.”

49Sila siꞌ tu ma siharung-harung mangan ka si Isa, njawom atay da, “Uy, soy doꞌ tu lalla tuu saula-ula tapuwasan na dusa jama?”

50Sugaꞌ gam pin ndarahan gi meꞌ si Isa halling na ni danda looy, yuk na, “Salamat na sina ko sabapan pangando nu niyaku. San ko moleꞌ na. Maka pasannangun na atay nu.”

Currently Selected:

Lukas 7: sjm

Highlight

Copy