Lukas 6

Pasal buwat ni Llaw Pahali

(Matiyu 12.1-8; Malkus 2.23-28)

1Na ni disu Llaw Pahali, lay si Isa ka ga mulit na palintas man tinanom poonan taligu. Sasang da siꞌ lumān, kuwan ga mulit na, lay ngattuꞌ buwaꞌ na dangkitiꞌ boꞌ lay kakan da isi na. 2Pag takita meꞌ siga Parisi ndooy, yuk da ni si Isa, “Uy, Llaw Pahali bitu batnaa! Yaꞌ dari ngattuꞌ ni llaw tuu.”

3Tampung si Isa, “Uy, hantak bitsala bi, maat pabuwatan siga mulit ku meꞌ naa. Bong siꞌ ina bay bana ningkaam, labi na saꞌ maat bay pabuwatan Sultan Daud mattoꞌ. Yaꞌ gi kilay bay tabatsa bi njawom kitab bong oy bay pabuwat na bay jaman da kalingantuhan ka ga soheꞌ na? 4Saꞌ ba, lay ya bay paasok pa jawom langga boꞌ na mangan tinapay ma bay sinongan pa Tuhan? Sampay lay gi buwanan na siga soheꞌ na. Mingkan ilay siꞌ, tinapay meꞌ looy tagga ni saraꞌ kinakan leꞌ soysoy sarī man siga imam. Sugaꞌ san meꞌ looy, yaꞌ du bay dari man na ndusa.” 5Yuk si Isa lagi, “Boꞌ na, meꞌ aku itu Anak Manusiyaꞌ, luu situ kapatut ku magbayaꞌ bong oy pataꞌ pinabuwat atawa niyaꞌ ni Llaw Pahali.”

Si Isa ngulian lalla kimoy tangan na

(Matiyu 12.9-14; Malkus 3.1-6)

6Pag luu na baw disu Llaw Pahali, lay na baw si Isa magnasihat ni disu langga. Ndooy siꞌ, luu disu lalla kimoy tangan na huwin pa kawnan. 7Bbuwatan siga guru saraꞌ agama ka ga Parisi baw siꞌ tu, maimanan si Isa bong ya ngulian lalla looy. Batan bong bay takita da si Isa nguliꞌ, luu na sangdanan man da malkalaꞌ iya sabap meꞌ na buwat ni Llaw Pahali.

8Kuwan si Isa baw siꞌ tu, tasayu na du bong oy njawom pamiki da. Dari yuk na ni lalla looy ma kimoy tangan na, “Tu ko, Nges. Nangge doꞌ ko ntuu ni duhuan.”

Lai jaꞌ siꞌ, 9yuk si Isa ninsila sikamimon ndooy, “Tilaw ta teꞌ kam. Mamooy lay la numan ni saraꞌ pasal Llaw Pahali, buwat mahap atawa buwat maat? Nalamat pagkahi tabi manusiyaꞌ atawa makaat?” 10Pus na nilaw, lay ya ngandaꞌ ninsila sikamimon. Pag-anu, yuk na ni lalla looy, “Pa-nnatun na tangan nu.” Pag nnat na, sarunduun du ya kasay.

11Pag ndaꞌ siga Parisi ka ga guru saraꞌ agama meꞌ looy, tud bay sinalaputan tabbuk da. Dari lay na ga sila isun bong pooy meꞌ da makaat si Isa.

Sapu-duwa jama pineneꞌ meꞌ si Isa binuwat rasul na

(Matiyu 10.1-4; Malkus 3.13-19)

12Na luu jaꞌ daka dangoy ngallaw, lay si Isa nukad punu boꞌ na maku duwaa pa Tuhan pupus dambahangi. 13Pag kallat llaw, lay linganan na sagannap ma mmeꞌ niiya boꞌ na meneꞌ sapu-duwa binuwat rasul na. 14Siga rasul na ilay siꞌ yana ga:

si Saymon ma inawnan du meꞌ si Isa si Pitel,

si Andru, yana danganakan si Saymon,

si Yaꞌkub,

si Yahiya,

si Pilip,

si Baltolome,

15si Matiyu,

si Tomas,

si Yaꞌkub, yana anak si Alpiyus,

si Saymon ma bay pingkaꞌ ngatuhan parinta Rom,

16si Judas,#(6.16) Si Judas itu inawnan si Tadiyus ni Matiyu 10.3 maka ni Malkus 3.18. yana anak si Yaꞌkub, maka

si Judas Iskariyut ma bay muwan tipu-akka njataꞌ si Isa song hallom.

Si Isa magnasihat sampay ngulian jama

(Matiyu 4.23-25)

17Pag lupus, lay na ga si Isa ka ga rasul na palūd. Pag takka da ni kapantayan, meka na mulit na bay nampang iya ndooy. Maka luu na du ndooy sakiyan jama lakka man sikaliput Yahudiya ka Jerusalem. Maka luu du jama man Tayil ka Saydon, yana duwa daira ndooy ni bihing tapiyan. 18Kon da ilay bay pilay, doman sila pakale ni tōꞌ si Isa sampay nohoꞌ inulian jinisan saki da. Maka sila ma malasahi meꞌ siga seytan, lay du inulian meꞌ na. 19Dari sikamimon siꞌ ndooy magtuyuꞌ na pin papassūt murut iya sabap luu kawasa pōꞌ man baran na ngulian sila sikamimon.

Si Isa mahati bong soy sinupaatan maka soy siya-siya

(Matiyu 5.1-12)

20Pag-anu siꞌ, lay na baw si Isa paawop pa mman sagannap ndooy ma mmeꞌ niiya, boꞌ na halling,

“Njawom supaat kaam ma miskin#(6.20) Meꞌ kaekahan ngahati sagannap ma inawnan miskin ntuu, yana soysoy ma mangaku tiksaꞌ nyawa da maka gunahan ninsila tukang nalamat. batan kapakaam pamarinta Tuhan.

21Njawom supaat kaam ma lingantu,#(6.21a) Meꞌ kaekahan ngahati sagannap ma inawnan lingantu ntuu, yana mimon jama ma doman paintong ka doman lungbid ka Tuhan. batan pinaasso du sina kam bbos-bbos.

Njawom supaat kaam ma nangis#(6.21b) Sagannap ma inawnan nangis ntuu, yana sagannap ma sasso ni bay dusa da atawa susahan jama ma yaꞌ pitsayaꞌ ni si Isa. ni batnaa, batan gāk du sina kam bbos-bbos.

22“Bong ina kam kinalammisan, tinuwak, pinadiyoꞌ sampay pinitnahan sabap meꞌ bi mmeꞌ niyaku, yana Anak Manusiyaꞌ, njawom supaat du sina kam. 23Bila ina kam mintu lumangga na ni kabinsanaan meꞌ looy siꞌ, gam pin pupusan bi na kagakan njawom atay bi, batan luu du sina tungbas ayad para ningkaam ni sulgaꞌ. Sibuꞌ du sina kadari bi ka bay jaman kanabi-nabihan nilaugan meꞌ kabboꞌ-bboan tabi.

24“Boꞌ kaam ina ma dayahan, ma masannang dī bi sadjaꞌ ka altaꞌ bi, tud siya-siya sina kam. Lay na takoleꞌ bi kasannangan bi ntuu ni junyaꞌ, pag ni sinōng, yaꞌ na luu. 25Damikiyan, kaam ma maabak meꞌ bi maasso dī bi sadjaꞌ, siya-siya du sina kam. Batan bbos-bbos kalingantuhan du sina kam. Maka siya-siya du sina kam ma tatto-tatto ngisbat jaꞌ kagakan ni hāl junyaꞌ, batan bbos-bbos ina, magkarukkaan du kam sampay nangis.

26“Kaam ma sinanglitan meꞌ sikamimon manusiyaꞌ, siya-siya du sina kam batan yaꞌ kam kuhi nanggehan kabanahan. Sibuꞌ du kam ka siga nabi palsu mattoꞌ ma bay pinagsanglitan meꞌ kabboꞌ-bboan tabi.

Subay kaasean tabi sagannap ma manta kitabi

(Matiyu 5.43-48)

27“Na kaam ma pakale batnaa, ituu jaꞌ meꞌ ku ka kaam: Kaasean bi sagannap ma manta kaam. Maka buwat kam mahap ni jama ma lammis ningkaam. 28Sagannap ma numpaan kaam, pakuhan bi sila supaat pa Tuhan. Sagannap ma minsanaꞌ kaam, pakuhan bi sila duwaa. 29Bong luu nampa luwa bi ni dambilaꞌ, patampahun bi lagi pa dambilaꞌ. Maka bong luu ngaddoꞌ jaket bi, deanun bi lagi sampay badjuꞌ bi. 30Bong luu maku mman bi, buwanan bi. Bong luu ngaddoꞌ pabuwatan bi, daa na sohoun bi pinapoleꞌ. 31Pooy-pooy karomanan bi meꞌ jama buwat kaam, subay meꞌ naa du meꞌ bi buwat sila.

32“Bong ya du sat kaasean bi sagannap ma maaseꞌ ningkaam, yaꞌ du ina man bi sinanglitan. Minsan ina siga baldusa, maaseꞌ du ni sagannap ma maaseꞌ ninsila. 33Damikiyan, bong ya du sat inaa jaꞌ pahāp bi sagannap ma buwat mahap ningkaam, yaꞌ du ina man bi sinanglitan. Minsan ina siga baldusa buwat du meꞌ naa. 34Bong ya du sat inaa jaꞌ paindaman bi sagannap ma katoonan bi kabayaran utang da, yaꞌ du ina man bi sinanglitan. Minsan ina siga baldusa maindam du ni pagkahi da baldusa bong katoonan da luu du dapat da mayad.

35“Sangkon, bong kam bana-bana mulit ku, subay kaasean bi sagannap ma manta kaam. Maka buwat jaꞌ kam mahap ninsila. Mautang kam ni jama san kam yaꞌ ngaholat binayaran. Bong bean bi inaa, luu du sina mintu tungbas mehe takoleꞌ bi. Boꞌ na, tumatandaꞌ na sina anak Tuhan Mahatinggi na kam sabap meꞌ bi nutu arat-tabiat na. Intomun bi, Tuhan ina buwat mahap san ni jama maat sampay ni sagannap ma yaꞌ kaintom buddi. 36Sangkon, subay du kam manimbang ni jama meꞌ karuha Mmaꞌ bi Tuhan.”

Daa os-os manding jama pa kalaatan

(Matiyu 7.1-5)

37Maka yuk si Isa, “Daa kam os-os manding jama pa kalaatan, taggahaꞌ kaam na baw binanding pa kalaatan. Damikiyan, daa kam os-os nusunan jama, taggahaꞌ sinusunan du kam. Ampunun bi sagannap ma buwat maat ningkaam, boꞌ bi binuwanan du kaampunan.

38“Muwan kam ni pagkahi bi manusiyaꞌ, boꞌ bi sa binuwanan. Yaꞌ du sina kam lugiꞌ batan taabut bi binuwanan, bong nnaꞌ ta pa bohas inisi njawom bakaꞌ, ndasokan gi, binubungan gi, sampay ngalilip na. Intomun bi, pooy-pooy ina meꞌ bi muwan ni jama, meꞌ looy du sina meꞌ bi binuwanan.”

39Pag-anu, lay na baw si Isa ngandalil mari sila yaꞌ mmeꞌ ni soysoy guru awam ni kabanahan, yuk na, “Bong ina jama buta nondaꞌ pagkahi na buta, pag toklas na, labuꞌ sila pa jawom lowang sikaduwa. 40Sarī gi, bong luu mulit baguru ni guru awam, mastiꞌ kapandoyan na yaꞌ du lumabi man guru na. San ina lay na takoleꞌ na mimon kapandoyan guru na, sibuꞌ du kaawaman da.

41“Na kaam ma tigiꞌ nahawi, ongoy taggahaꞌ takita bi boboꞌ-boboꞌ jawom mata soheꞌ bi, pagka batang ni mata bi yaꞌ san paruli bi. 42Yaꞌ sina sikatuwaꞌ bong kam magtuyuꞌ ngalakkahan boboꞌ-boboꞌ ni mata soheꞌ bi, bong masi luu batang ni mata bi. Magbawuꞌ-bawuꞌ jaꞌ sina kam sutsiꞌ bong kam buwat meꞌ looy. Subay siꞌ kaddoan bi doꞌ duhuꞌ batang ni mata bi mari tampak pangandaan bi ngaddoan boboꞌ-boboꞌ man mata soheꞌ bi.”

Ni buwaꞌ na takila ta bong poon kayu mahap atawa maat

(Matiyu 7.15-20; 12.33-35)

43Pag-anu, lay na baw si Isa ngandalil manusiyaꞌ pa poon kayu, yuk na, “Bong luu poon kayu mahap, mastiꞌ buwaꞌ na ina mahap du. Sugaꞌ bong ina poon kayu maat, mastiꞌ buwaꞌ na maat du. 44Sangkon ni buwaꞌ na, tasilang bi jaꞌ sina bong kayu mahap atawa niyaꞌ. Yaꞌ luu takattuꞌ bi buwaꞌ ayad meꞌ sapantun buwaꞌ anggul atawa buwaꞌ igira ni poon kayu-kayu sumpot itingan atawa poon puhung. 45Manusiyaꞌ pun ina meꞌ naa du. Bong jama mahap, mahap du kawul-piil na sabap kaayaran jaꞌ kinanna njawom atay na. Sugaꞌ bong jama maat, maat du kawul-piil na sabap kalaatan jaꞌ kinanna njawom atay na. Oy-oy ina kinanna njawom atay manusiyaꞌ, inaa du sina pōꞌ man jawom behe da.”

Duwan jinis tukang buwat lumaꞌ

(Matiyu 7.24-27)

46Pag-anu, yuk si Isa lagi, “Kannahun bi bitsala ku. Yaꞌ sina sikatuwaꞌ bong kam ngawnan aku ‘Papuꞌ,’ boꞌ yaꞌ baw kam mmeꞌ ni tōꞌ ku. 47Jama ina ma mmeꞌ niyaku, ma pakale ni tōꞌ ku sampay bean na na du, meꞌ tuu kadari na: 48Iya meꞌ sapantun jama bay buwat lumaꞌ pagon makoy tehang mehe boꞌ kinalihan palawom sampay sinoksokan lagi batu mehe-mehe. Pag luu dunuk, san tuwaꞌ liyud basag lumaꞌ na, yaꞌ san kuhi jadjuꞌ sabap takkoꞌ meꞌ na bay buwat. 49Sugaꞌ bong ina luu bay pakale ni tōꞌ ku, boꞌ yaꞌ du bean na, tadalil ya pa jama bay buwat lumaꞌ taꞌ tanaꞌ sadjaꞌ. Pag taabut dunuk, magti langkat meꞌ liyud boheꞌ sampay magkanatan na kalangkapan na labbasakayi.”

Currently Selected:

Lukas 6: sjm

Highlight

Copy