Lukas 5

Siga mulit si Isa ma bay duhuꞌ mmeꞌ niiya

1Na luu disu llaw, lay si Isa magnasihat ni bihing Danaw Genesaret. Manusiyaꞌ siꞌ tu, magdogsog-dogsog na bong pin kapatapit jaꞌ niiya mari mahap meꞌ da kale umanat Tuhan. 2Pag-anu siꞌ, luu takita si Isa ndooy duwa bagung ni bihing tapiyan. Kuwan jama ma dapu, lay duwai ngosoan pukut da. 3Disu bagung, si Saymon dapu. Dari lay dutai si Isa taꞌ bagung looy boꞌ sohoꞌ na sinugan ni si Saymon dangkitiꞌ man bihing. Pag-anu, lay na ya ningkōꞌ ndooy magnasihat ni baanan jama ni tapiyan.

4Pag lupus na magnasihat, yuk na man si Saymon, “Pilay doꞌ kitabi ndē njawom kalawman mukut.”

5Iya tampung si Saymon, “Uy la Tuwan, dabuhiꞌ dambahangi banahan kami bay mukut. San sisik yaꞌ san kami bay koleꞌ. Sugaꞌ pagka kau bay nohoꞌ, suwayan ku na pin.”

6Lai jaꞌ siꞌ sila ngalabuꞌ pukut da, oy doꞌ ba, landuꞌ na eka daying da, yaꞌ na taambat sampay adak geseꞌ na ga pukut da pag helaꞌ da. 7Dari siꞌ, lay na kambay da siga soheꞌ da ma ni taꞌ bagung looy disu nohoꞌ nabang ngahelaꞌ pukut. Pag takka da, lay na pannoan da bagung da sikaduwa ka daying sampay agon-agon tumallob na ga.

8-10Pag ndaꞌ si Saymon Pitel ka ga soheꞌ na biddaꞌ na eka daying bay takoleꞌ da, tud bay haylan sila. Sampay siga soheꞌ si Saymon ni bagung looy disu, yana si Yaꞌkub ka si Yahiya, ga anak si Sibidi, tud bay du haylan. Pag tabista si Saymon meꞌ looy na kawasa-kapatut si Isa, ilooy ma lay ya nangge ka tuut na ni awpan na sambayan na halling, “Papuꞌ, san bitu ku mbanan nu na. Yaꞌ san ku pataꞌ dambuwaꞌ ka kau batan aku itu baldusa.”

Pag-anu, yuk si Isa ni si Saymon, “Daa ko ba tawu. Labba man batnaa, manusiyaꞌ na sina pinukut meꞌ nu.”

11Pag lay jaꞌ sinallaran meꞌ da ga bagung da, lay jaꞌ mbanan da ga kalangkapan da labbasakayi ni tapiyan, sampay lay na sila mmeꞌ ni si Isa.

Si Isa ngulian disu lalla inipu

(Matiyu 8.1-4; Malkus 1.40-45)

12Na disu llaw, sasang si Isa lay ni daira disu, luu pasōng pa mman na disu lalla lapat baran na meꞌ ipu. Pag-anu, boꞌ na sujud ni awpan si Isa nganjunjung, yuk na, “Tuwan, bong siꞌ ko la kuhi, mastiꞌ kaulian jaꞌ situ ku meꞌ nu.”

13Dari siꞌ, lay na tappak si Isa bumbunan na sambayan na halling, “Kuhi ku ba. Kaulian na sina ko.” Dari siꞌ, sarunduun du lanyap ipu na. 14Pag-anu, yuk si Isa niiya, “Amay-amay daa ko maꞌ-māꞌ ni jama aku bay ngulian kau. Arapun pilay na ko pa mman imam nohoꞌ maliksaꞌ kuwit nu mari tarang na niiya yaꞌ na ko inipu. Pag-anu, boꞌ nu nong kulban meꞌ ndang bay tinaat ni saraꞌ Nabi Musa supaya kinatoonan na meꞌ mimon lay na ko kaulian.”

15Sugaꞌ san lalla looy bay sinupali yaꞌ nohoꞌ maꞌ-māꞌ, masi du lataꞌ na lahat habal pasal kawasa si Isa. Dari yaꞌ na taambat baanan manusiyaꞌ bahuklud pa mman na pakale ni umanat na sampay nohoꞌ inulian. 16Sugaꞌ daran ya palakka dangan-dangan na pa lugar yaꞌ magjama maku duwaa pa Tuhan.

Si Isa ngulian lalla matoy baran na

(Matiyu 9.1-8; Malkus 2.1-12)

17Na disu llaw sasang si Isa nōꞌ njawom lumaꞌ, luu du siga paki man palhimpunan Parisi ka ga guru saraꞌ agama ningkōꞌ ndooy pakale. Sila siꞌ tu lakka man kakawum-kawman ni Jalil ka Yahudiya, sampay man Jerusalem.

Na si Isa siꞌ tu, luu na pin kawasa na man Tuhan nguliꞌ. 18Dari luu na baw jama takka ngalanggung disu lalla matoy baran na ddas ka patulihan na. Kainagon da ta-nnaꞌ da na ni awpan si Isa nohoꞌ inulian, 19sugaꞌ yaꞌ san sila kapassut ni kaeka jama ni lumaꞌ looy. Dari bbuwatan da, lay dutai pa taꞌ sapaw ngalakkahan kasohean lambahan sapaw buwat lowang. Pag-lupus, lay na tonton da lalla looy ddas ka patulihan na pa tangngaꞌ baanan jama ni awpan si Isa. 20Pag ndaꞌ si Isa meꞌ looy na basag pangando da niiya, yuk na ni lalla looy ma matoy baran na, “Nges, puwas na sina dusa nu labbasakayi.”

21Pag lay jaꞌ takale bitsala na meꞌ siga guru saraꞌ agama ka ga Parisi, tud bay dugahan sila. Honaꞌ-honaꞌ da, “Uy, lalla naa la, tatammu na ga mitsala pangka pa Tuhan! Isu-isu Tuhan bina luu kapatut na muwasan dusa!”

22Na si Isa siꞌ tu, ndang katoonan na du njawom pamiki da. Dari yuk na ninsila, “Marean ta kanna bi yaꞌ luu kawasa-kapatut ku muwasan dusa. 23Sugaꞌ subay siꞌ tabista bi pagka luu kawasa-kapatut ku ngulian jama, mastiꞌ luu du kawasa-kapatut ku muwasan dusa. 24Na supaya katoonan bi luu kapatut ku, yana Anak Manusiyaꞌ, muwasan dusa, pakitahan ta doꞌ kam buktiꞌ.” Dari yuk na ni lalla looy ma matoy baran na, “Nges, nangge na ko, boꞌ boonun na patulihan nu moleꞌ.”

25Dari magti du nangge lalla looy ni awpan da sikamimon. Maka lay na ya mūt patulihan na boꞌ na moleꞌ sambayan na mudji Tuhan. 26Dari sikamimon siꞌ ndooy tud bay haylan sampay lay na ga sila mudji Tuhan. Maka yuk da, “Tud kainu-inu la siga pakaradjaan bay takita tabi llaw tuu.”

Si Isa nohoꞌ si Libay#(5.27) Si Libay pinag-awnan si Matiyu. mmeꞌ niiya

(Matiyu 9.9-13; Malkus 2.13-17)

27Pag lakka si Isa mandooy, lay ya ngita disu tukang ninga sukay ningkōꞌ ni upis na, awon na si Libay. Yuk si Isa niiya, “Tu ko. Mmeꞌ na ko niyaku.” 28Dari siꞌ, lay na ya nangge sampay lay jaꞌ mbanan na pabuwatan na labbasakayi, boꞌ na mmeꞌ ni si Isa.

29Na song hallom, lay na baw si Libay ballang mehe ni lumaꞌ na man na ngalak si Isa. Ndooy siꞌ, meka du tukang ninga sukay ka ga jama sarī bay mmeꞌ paharung mangan. 30Pag tasayu siga Parisi ka ga guru saraꞌ agama, lay sila nahawi siga mulit si Isa, yuk da, “Ongoy doꞌ ilay kam kuhi paharung nginum-mangan ni siga tukang ninga sukay ka ga pagkahi da baldusa?”

31Pag lay jaꞌ takale leꞌ si Isa tilaw da, iya na ya bay nampung, yuk na, “Siga baldusa ilay meꞌ karuha jama saki. Boꞌ jama saki ina subay inulian meꞌ duktul. Boꞌ sagannap ma yaꞌ saki, san daa na. 32Intong na, aku itu bay pitu, saꞌ ga maksud ku ngaliyun jama ma mista dī da intong. Arapun aku itu bay pitu ngaliyun sagannap ma mangaku baldusa supaya nawbat na sila.”

Si Isa tinilaw pasal puwasa

(Matiyu 9.14-15; Malkus 2.18-20)

33Yaꞌ hallom, yuk kasohean ni si Isa, “Tuwan, siga mulit si Yahiya la ka ga mulit siga Parisi daran puwasa ka maku duwaa. Sugaꞌ ni lilingan kami, bong siga mulit nu, nginum-mangan na pin. Ongoy doꞌ lay meꞌ looy?”

34Pag tampung si Isa, lay ya ngandalil siga mulit na pa jama ngaluruk ni pangawinan, yuk na, “Yaꞌ bilay sikatuwaꞌ bong siga luruk ni pangawinan puwasa halloman pangantin ma lalla masi dambuwaꞌ ka sila. 35Sugaꞌ luu du sina mintu masa man pangantin ma lalla llakkahan na mman da. Ni masa looy ilay mintu, bohoꞌ da pataꞌ yaꞌ na nginum atawa mangan ni kabasag lindu da.”

Tōꞌ si Isa ka tōꞌ agama Yahudi yaꞌ tapagsilamud

(Matiyu 9.16-17; Malkus 2.21-22)

36Pag-anu, lay na baw si Isa ngandalil pasal tōꞌ na yaꞌ dari llamuran ka tōꞌ inantanan meꞌ agama Yahudi, yuk na, “Yaꞌ sina sikatuwaꞌ gineret badjuꞌ bahau man nupakan badjuꞌ daan sabap senseng ilooy ma bahau. Sarī gi, yaꞌ magbēꞌ walnaꞌ tupak looy ka badjuꞌ looy ma daan.

37“Damikiyan, yaꞌ du dari inisi tubaꞌ anggul bahau ni jawom pangannaan daan ma bay pinabuwat ka kuwit kambing pasal yaꞌ pahenet. Batan pag lappuꞌ na, mastiꞌ passaꞌ jaꞌ pangannaan looy sampay lopas jaꞌ isi na. 38Sangkon, subay du sina pangannaan bahau man ngisi tubaꞌ anggul bahau. 39Sugaꞌ ilooy salla na, bong karuhung kabiyasahan jama tubaꞌ anggul ma hallom na, pag sila sinongan ilooy ma bahau, yuk da, ‘Mas kamahapan kami ni ilooy ma hallom na.’ ”

Currently Selected:

Lukas 5: sjm

Highlight

Copy