Lukas 4

Si Isa sinasat meꞌ Ibilis

(Matiyu 4.1-11; Malkus 1.12-13)

1Na pus si Isa bay pinandi, lay na ya lakka man Sōng Juldan. Maka inassob ya meꞌ Rū Sutsiꞌ. Pag-anu siꞌ, lay na baw ya pinagmundaan meꞌ Rū Sutsiꞌ pa lahat lau-lau yaꞌ maglumaꞌ. 2Sasang na ndooy njawom mpatpūꞌ ngallaw, luu na pin Ibilis nasat iya. Na halloman si Isa siꞌ ndooy, yaꞌ na san ya bay mangan oy maka oy na sampay kalingantuhan na ga.

3Dari yuk Ibilis niiya, “Bong ko bana-bana Anak Tuhan, sōn teꞌ padari tinapay ga batu naa mari luu na kakan nu.”

4Iya tampung si Isa, “Yuk njawom kitab baw ba, ‘Saꞌ sat makanan man manusiyaꞌ llum.’ ”#(4.4) Kitab Tawrat, Duteronomi 8.3.

5Pag-anu siꞌ, lay na baw binoo si Isa meꞌ Ibilis pa taꞌ punsak punu langkaw banahan, boꞌ na pinakitahan mimon paglahat njawom junyaꞌ sakayi mata pakiraw du. 6Yuk Ibilis niiya, “Mimon pamarinta ka mimon pangaltaꞌ njawom junyaꞌ lay na sina pina-ntan niyaku sampay aku na magbayaꞌ ninsila. Ilooy ilay siꞌ labbasakayi dari dean ku ni soysoy pineneꞌ meꞌ ku. 7Na bong ko sujud numba aku, malaingkan dean ku na kau labbasakayi.”

8Iya tampung si Isa, “Yuk njawom kitab baw ba, ‘Isu-isu Papuꞌ bi Tuhan sumbahun bi maka iya jaꞌ isbatun bi.’ ”#(4.8) Kitab Tawrat, Duteronomi 6.13.

9Pag-anu siꞌ, lay na baw si Isa binoo meꞌ Ibilis pa Jerusalem. Ndooy siꞌ, lay ya pinatangge meꞌ Ibilis taꞌ buhungan langga mehe. Yuk Ibilis niiya, “Bong ko bana-bana Anak Tuhan, kupa teꞌ ko pa diyoꞌ. 10Ndang-ndang luu du bay sinuwatan njawom kitab, ‘Tuhan nohoꞌ siga malaikat na nganjaga mari ko yaꞌ kongoy-kongoy. 11Sila sa nayak kau supaya yaꞌ san sumantuk battis nu ni batu.’ ”#(4.10-11) Kitab Jabul 91.11-12.

12Iya tampung si Isa, “Sugaꞌ yuk njawom kitab baw ba, ‘Daa suway-suwayan bi kawasa Papuꞌ bi Tuhan.’ ”#(4.12) Kitab Tawrat, Duteronomi 6.16.

13Na pag ndaꞌ Ibilis yaꞌ na takoleꞌ na si Isa sinasat, lay na doꞌ ya palakka halloman na yaꞌ gi bay kasipi nasat pabalik.

Si Isa pabeleng pa Jalil

(Matiyu 4.12-17; Malkus 1.14-15)

14Na paddus meꞌ looy, lay na pabeleng si Isa pa Jalil. Boꞌ luu na pin kawasa Rū Sutsiꞌ njataꞌ na. Dari song hallom, habal pasal iya lataꞌ na ni sikaliput Jalil sampay ni mimon lahat ma ngaliput ndooy. 15Bbuwatan na magnasihat ni kalangga-langgahan ndooy sampay sinanglitan na ya meꞌ sikamimon.

Jama Nasaret yaꞌ pitsayaꞌ ni si Isa

(Matiyu 13.53-58; Malkus 6.1-6)

16Song hallom, lay na si Isa takka pa Nasaret, yana kawum man na bay sulig. Pag taabut Llaw Pahali, lay ya pa langga meꞌ ndang tabiat na man sibuwa. Taabut magbatsa kitab, iya bay nangge matsahan sila. 17Ilooy siꞌ bay sinongan niiya yana logoran kitab bay sinuwatan leꞌ Nabi Isaya mattoꞌ. Pag ungkad na, lay jaꞌ tangngad na suwat ma karomanan na binatsa. Batsahan na yana meꞌ tuu:

18“Inassob na ku meꞌ Rū Sutsiꞌ batan lay ku pineneꞌ meꞌ na masaplag umanat mahap pa mman siga jama miskin. Sinohoꞌ ku meꞌ na mahati sagannap ma tapalisu njawom komkoman Ibilis, inaa, bukaꞌ na lawang man da pōꞌ. Maka sinohoꞌ ku pitu masaplag ni sagannap ma buta supaya sila ngita na maka ni sagannap ma tinakkon mari sila kapaddus na.

19Maka aku itu bay pinapitu nohoꞌ masaplag, inaa, taabut na masa man Tuhan nalamat siga sukuꞌ na.”#(4.18-19) Kitab Nabi Isaya 61.1-2.

20Pag lupus si Isa matsa, lay na logoran na balik kitab looy, boꞌ lay na papoleꞌ na pa mman jama ma tukang ngintu ni langga, boꞌ na ningkōꞌ. Na mimon siꞌ tu jamaa ndooy, bbuwatan da maimanan iya na sadjaꞌ. 21Dari yuk si Isa ninsila, “Suwat njawom kitab looy ilay siꞌ ma bahau jaꞌ bay takale bi binatsa, binakbul na ntuu ni llaw tuu du.”

22Pag-anu, siga jamaa ndooy baw siꞌ tu, bbuwatan da nanglitan iya. Tud bay inu-inu sila ni kaayad bitsala na. Sugaꞌ kasohean baw sila kaawran pitsayaꞌ niiya sampay yuk da, “Saꞌ ba, anak si Yusup jaꞌ ya?”

23Pag-anu, yuk si Isa ninsila, “Tatantu ku yuk bi ina mintu niyaku, ‘Bong ko bana-bana panganguliꞌ, subay du ulian nu jama ntuu ni kawum nu mismu meꞌ karuha taaka kami bay pabuwat nu ndooy ni Kapelniyum.’

24“Sugaꞌ baan ta kam banahan, san gi ina oy pabuwat ku ningkaam, yaꞌ du kam pitsayaꞌ niyaku. Batan tabiat manusiyaꞌ, bong ina inawnan nabi, yaꞌ hinasi ni daira man da bay sulig. Sangkon tamūd sohoꞌ Tuhan sila pa siga bangsa sarī. 25Pamintangan bi na bay jaman Nabi Eliyas. Jaman looy, gotom lahat sabap yaꞌ bay uwan tallun taun ka tongaꞌ. Boꞌ meka na bawu danda ntuu ni Israil yaꞌ na luu kinakan da. 26Sugaꞌ saꞌ du sila bay sohoꞌ Tuhan tinabang ni Nabi Eliyas. Iya bay sohoꞌ Tuhan tinabang niiya, yana disu bawu danda ni Saripat ndooy ni Saydon, lahat bangsa kapil lagi.#(4.26) Ndaun Salsila Sibuwa pasal siga Sultan 17.7-16. 27Damikiyan, bay jaman Nabi Elisa, san meka pagkahi na bangsa Israil inipu, saꞌ du sila bay inulian meꞌ na. Ilooy ya bay ulian na disu lalla bangsa Siriya, yana si Nayman.”#(4.27) Ndaun Salsila ni Kaduwa pasal siga Sultan 5.1-14.

28Dari pag takale jaꞌ meꞌ siga jamaa ni langga looy bay bitsala si Isa, tud bay sinalaputan tabbuk da labbasakayi niiya. 29Dari magti helaꞌ-helaꞌ da si Isa pa poan daira da. Pag-anu, boꞌ na binoo pa taꞌ pampang langkaw. Angan-angan da ngahiyakan iya pa diyoꞌ. 30Sugaꞌ takka ndooy, lay jaꞌ si Isa palakka pingkaꞌ man tangngaan da.

Si Isa malakka seytan man jawom baran jama

(Malkus 1.21-28)

31Pus meꞌ looy, lay na baw palūd si Isa pa Kapelniyum ndooy ni Jalil. Pag taabut Llaw Pahali, lay ya magnasihat ni langga ndooy. 32Takale jaꞌ siꞌ meꞌ jama ndooy tōꞌ na, tud jayip sila batan tumatandaꞌ luu kapatut na man Tuhan.

33Pag-anu, ndooy ni langga looy siꞌ, luu na baw disu lalla sineytan, boꞌ magti ngahowapan si Isa, yuk na, 34“Aha! Kau na hati si Isa, lalla looy man Nasaret, hāꞌ? Manggoy ko pitu? Pakaat nu na baw kami? Katoonan ku du bina bong soy ko. Kau na sina ilooy ma Mahasutsiꞌ lakka man Tuhan.”

35Pag-anu siꞌ, ilooy ma sinaggong na seytan looy meꞌ si Isa, yuk na, “Daa ko hibuk! Pōꞌ na ko man jawom baran lalla naa!” Dari ilooy ma magti lalla looy humantak meꞌ seytan na ni awpan da sambayan seytan na lay na pōꞌ lahi. Sugaꞌ yaꞌ du baw bay kongoy-kongoy lalla looy.

36Ni kahaylan ga jama ndooy, yuk dangan pa dangan, “Jama oy doꞌ tu meꞌ tuu? Tud basag la kawasa-kapatut na. Sampay siga seytan, ngasip jaꞌ ni bitsala na. Bong karuhung sohoꞌ na pōꞌ, sarunduun du pōꞌ!” 37Dari aka siꞌ pasal kadarihan si Isa lataꞌ na ni sikaliput lahat looy.

Si Isa ngulian matoa si Saymon

(Matiyu 8.14-17; Malkus 1.29-34)

38Na pag lakka ga si Isa man langga looy, lay sila pilay pa lumaꞌ si Saymon. Pag asok da, luu ndooy matoa si Saymon ma danda biddaꞌ na basag lammun na. Dari lay sila maku tulung ni si Isa nohoꞌ ngulian iya. 39Dari siꞌ, lay na si Isa pasōng pa bihing danda looy, boꞌ na nohoꞌ lammun na lakka, sampay koleꞌ du ya magti. Dari siꞌ, lay na ya bangun sampay iya na bay motangan ga si Isa.

40Na tapit jaꞌ siꞌ sumaddop llaw, meka na jama lay moo pagkahi da ma sakihan pilay pa mman si Isa. Dari san gi oy saki da, pag lay jaꞌ tinappak meꞌ si Isa bumbunan da saliꞌ-saliꞌ, lay du sila kaulian labbasakayi. 41Kasohean jama ndooy sineytan. Sugaꞌ paddus na pin si Isa nohoꞌ siga seytan da pōꞌ, magti du sila lakka man jawom baran ga jama looy. Pag pōꞌ da, kakillahapan howap, yuk da, “Kau ina Anak Tuhan!” Sugaꞌ lay sila sinaggong meꞌ si Isa yaꞌ nohoꞌ mitsala. San katoonan da iya na Almasi ma bay njanjiꞌ meꞌ Tuhan, yaꞌ baw ya doman pinamāꞌ meꞌ da bong soy ya.

Magnasihat si Isa ni kalangga-langgahan

(Malkus 1.35-39)

42Pag deꞌ subu, lay lakka si Isa mandooy dangan-dangan na boꞌ na pilay pa lugar yaꞌ magjama. Dari jama siꞌ tu lay na miha iya. Tatammu jaꞌ siꞌ ya meꞌ da, lay ya njunjung yaꞌ nohoꞌ palakka man lahat da. 43Sugaꞌ yuk si Isa ninsila, “Daa na doꞌ kam ha tarawom. Mastiꞌ subay du situ ku pawus pa siga daira kasohean masaplag umanat mahap pasal pamarinta Tuhan, batan ituu na situ ngkon ku bay pinapitu.” 44Dari siꞌ, lay na ya ngalataan Yahudiya magnasihat ni kalangga-langgahan.

Currently Selected:

Lukas 4: sjm

Highlight

Copy