Lukas 3
3
Umanat si Yahiya ma Tukang Mandi
(Matiyu 3.1-12; Malkus 1.1-8; Yahiya 1.19-28)
1-2Na luu jaꞌ daka dangon taun bay pingkaꞌ, kuwan si Yahiya, yana anak si Jakariya, lay binuwanan meꞌ Tuhan umanat waktu na maglahat ndooy ni lahat lau-lau yaꞌ maglumaꞌ. Ilooy siꞌ bay magkadarihan meꞌ looy sasang si Tiberius panghuluꞌ sultan ni bangsa Rom luu na sapu-liman taun. Boꞌ ilooy na du silay masa man si Puntus Pilatu maggubnul ni Yahudiya. Si Herod Antipas pun, maggubnul du ndooy ni Jalil. Maka danganakan na si Pilip maggubnul du ndooy ni Ituriya ka Tarakuniti. Maka luu gi gubnul ni Abilin inawnan si Lisani. Lay du magsabtan ka jaman si Kayapas gantiꞌ si Annas binuwat panghuluꞌ imam.
3Dari poonan bay umanat Tuhan siꞌ ni si Yahiya, lay na ya ngalataan lahat ni sikaduwambilaꞌ Sōng Juldan masaplag. Halling na ni jama, “Tawbatan bi na mimon dusa bi, boꞌ bi pinandi mari kam inampun na meꞌ Tuhan.”
4Na sabapan pabuwatan si Yahiya, lay na binakbul bay tunaꞌ Nabi Isaya mattoꞌ njawom kitab, ilooy ma yuk na,
“Luu sina mintu jama takale ngahowap ni lahat lau-lau, yuk na, ‘Saddiyahun bi na lān ni katakka Papuꞌ. Paintongun bi na mari tahan na patiluꞌ pa mman bi.
5Mimon labbak na lapatun bi na. Mimon punu na ka buntuꞌ na pantayun bi na. Ma libod, paintongun bi na. Ma batuhan, lassahan bi na.
6Pag lupus, takita na sina meꞌ mimon manusiyaꞌ kasalamatan lakka man Tuhan.’ ”#(3.4-6) Kitab Nabi Isaya 40.3-5.
7Na ndooy siꞌ, sakiyan na jama lay bahuklud pilay pa mman si Yahiya nohoꞌ pinandi. Sugaꞌ tabistu si Yahiya du meka sila yaꞌ hilas. Dari yuk na ninsila, “Tud maat kam. Sibuꞌ du kam ka sō latsunan. Kanna bi mareꞌ bong kam bay na tapandi, yaꞌ na kam tuwaꞌ mulkaꞌ Tuhan ma takka bbos-bbos. 8Bong bana-bana hilas meꞌ bi nawbat, subay paayarun bi kawul-piil bi. Daa kam mista sukat kam panubuꞌ Nabi Ibrahim salamat na kam pa Tuhan. Saꞌ sina inaa katabang ningkaam. Baan ta kam, minsan ina ga buran batu naa tapadari du meꞌ Tuhan panubuꞌ Nabi Ibrahim bong siꞌ tud inaa puntukan niiya. 9Bong yaꞌ tasayu bi, tapit na sina hisab Tuhan njataꞌ bi bong kam yaꞌ kuhi nawbat ka mōꞌ kawul-piil mahap. Tuhan ina sibuꞌ du karuha na ka jama saddiya ka kapa na nabbongan ga poon kayu ma yaꞌ kuhi buwaan, boꞌ hiniyakan pa jawom api.”
10Dari pag takale baanan ga jama looy bitsala na, yuk da, “Tuwan, oy tu la pataꞌ subay pabuwat kami mari tumatandaꞌ lay na tawbatan kami dusa kami?”
11Pag tampung si Yahiya ninsila, “Soysoy kam duwa badjuꞌ bi, deanun bi na disu ni jama ma yaꞌ luu niiya. Damikiyan, soysoy kam maglabi makanan bi, subay kam mahagian sagannap ma kabus balanjaꞌ.”
12Na ndooy siꞌ, luu du siga tukang ninga sukay parinta nohoꞌ du pinandi, yuk da, “Kami baw Tuwan Guru, oy baw tu pataꞌ subay pabuwat kami?”
13Pag tampung si Yahiya, “Daa kam ngalabi bong kam bay sohoꞌ parinta ninga sukay jama.”
14Maka luu gi du ndooy siga sundalu nohoꞌ binaan bong pooy ninsila. Tilaw da, “Hati, kuwan kami baw, pooy lay la Tuwan?”
Pag tampung si Yahiya, “Daa kam mitna atawa makitawu jama bong pin kam sinuap ka pilak. Magsuku jaꞌ kam ni gadji bi.”
15Pag takale leꞌ siga jama ndooy tōꞌ si Yahiya, njawom atay da, “Marean ta la si Yahiya na tukang nalamat, yana Almasi ma ndang inagad meꞌ tabi.”
16Sugaꞌ yuk si Yahiya, “Luu gi sina mintu pasunuꞌ niyaku tā biddaꞌ na langkaw kawasa-kapatut na man niyaku. Yaꞌ san ku tawop makkasan ingkot tumpaꞌ na. Aku tu mandi kaam ka boheꞌ jaꞌ. Boꞌ iya ina mintu, man na mandi kaam, Rū Sutsiꞌ ka api.#(3.16) Sagannap ma pitsayaꞌ ni Papuꞌ Isa pinatannaan Rū Tuhan, yana Rū Sutsiꞌ. Inaa na sina hatiyan “pinandi ka Rū Sutsiꞌ.” Meꞌ kasohean ngahati “pinandi ka api” tuwaꞌ pa pabuwatan Rū Sutsiꞌ nutsiꞌ atay tabi meꞌ karuha api ngalakkahan sakot ni mmas. Kuwan kasohean baw, meꞌ da ngahati “pinandi ka api” tuwaꞌ pa mulkaꞌ Tuhan ni jataꞌ sagannap ma yaꞌ pitsayaꞌ ni Papuꞌ Isa. 17Iya ina mintu meꞌ sapantun jama ka tapan na ngahampaan bohas. Isi na inannaꞌ ni jawom buriga na. Kuwan hampaꞌ na, tinunu meꞌ na njawom api ma yaꞌ kuhi pawom saumu-umu.”
18Dari meꞌ looy na silay siꞌ meꞌ si Yahiya bay masaplag umanat mahap pasal Almasi ni siga jama ndooy. Boꞌ meka gi bitsala na bay pinōꞌ meꞌ na man mitsalahan ga jama ndooy nohoꞌ mmeꞌ ni kahandak Tuhan.
19Pus mandooy, lay gi si Yahiya nahawi Gubnul Herod Antipas pasal dusa na bay ngagaw ipa na si Herodiyas binuwat nda na. Boꞌ meka gi jinisan kalaatan na bay binungka meꞌ si Yahiya. 20Sugaꞌ Gubnul Herod baw si tu yaꞌ gi bay patagong. Gam pin lay gi duhunan na dusa na batan lay gi njīl leꞌ na si Yahiya.
Si Isa pinandi meꞌ si Yahiya
(Matiyu 3.13-17; Malkus 1.9-11)
21Na halloman si Yahiya yaꞌ gi bay tajīl, masi meka jama nohoꞌ pinandi niiya. Sampay si Isa lay du pa mman na nohoꞌ pinandi. Na lupus jaꞌ siꞌ si Isa bay pinandi, sasang na maku duwaa, bukaꞌ na langit, 22maka luu na Rū Sutsiꞌ duwai meꞌ dagbos atsang boꞌ na nampi taꞌ baran na. Boꞌ luu gi suwara man sulgaꞌ, yuk na, “Kau ina Anak ku, kakasi ku. Kasulutan ku banahan ningkau.”
Siga kabboꞌ-bboan si Isa Almasi
(Matiyu 1.1-17)
23Na pag taabut jaꞌ siꞌ ga tallumpūꞌ taun umu si Isa, lay na ya bay nagnaꞌ magnasihat. Kanna jama anak si Yusup ya rahasiyaꞌ.
Na si Yusup ilay yana anak si Heli.
24Si Heli yana anak si Mattat.
Si Mattat yana anak si Libay.
Si Libay yana anak si Malki.
Si Malki yana anak si Janni.
Si Janni yana anak si Yusup.
25Si Yusup yana anak si Mattati.
Si Mattati yana anak si Amos.
Si Amos yana anak si Nahum.
Si Nahum yana anak si Esli.
Si Esli yana anak si Nagge.
26Si Nagge yana anak si Mahat.
Si Mahat yana anak si Matatiyas.
Si Matatiyas yana anak si Semain.
Si Semain yana anak si Yusek.
Si Yusek yana anak si Joda.
27Si Joda yana anak si Jowanan.
Si Jowanan yana anak si Resa.
Si Resa yana anak si Sirubabel.
Si Sirubabel yana anak si Salati.
Si Salati yana anak si Neri.
28Si Neri yana anak si Malki.
Si Malki yana anak si Addi.
Si Addi yana anak si Kosam.
Si Kosam yana anak si Elmadam.
Si Elmadam yana anak si El.
29Si El yana anak si Jasuwa.
Si Jasuwa yana anak si Elisel.
Si Elisel yana anak si Jurim.
Si Jurim yana anak si Mattat.
Si Mattat yana anak si Libay.
30Si Libay yana anak si Simiyun.
Si Simiyun yana anak si Juda.
Si Juda yana anak si Yusup.
Si Yusup yana anak si Jonam.
Si Jonam yana anak si Elikim.
31Si Elikim yana anak si Melea.
Si Melea yana anak si Menna.
Si Menna yana anak si Mattata.
Si Mattata yana anak si Natan.
Si Natan yana anak Sultan Daud.
32Sultan Daud yana anak si Jesse.
Si Jesse yana anak si Obed.
Si Obed yana anak si Bowas.
Si Bowas yana anak si Salmon.
Si Salmon yana anak si Nasson.
33Si Nasson yana anak si Aminadab.
Si Aminadab yana anak si Admin.
Si Admin yana anak si Hesdon.
Si Hesdon yana anak si Peres.
Si Peres yana anak si Juda.
34Si Juda yana anak si Yaꞌkub.
Si Yaꞌkub yana anak si Isahak.
Si Isahak yana anak Nabi Ibrahim.
Nabi Ibrahim yana anak si Tera. Si Tera yana anak si Nahol.
35Si Nahol yana anak si Serug.
Si Serug yana anak si Reyu.
Si Reyu yana anak si Peleg.
Si Peleg yana anak si Ebel.
Si Ebel yana anak si Sela.
36Si Sela yana anak si Kenan.
Si Kenan yana anak si Alpaksad.
Si Alpaksad yana anak si Sem.
Si Sem yana anak Nabi Nū.
Nabi Nū yana anak si Lamek.
37Si Lamek yana anak si Metusela.
Si Metusela yana anak si Idris.
Si Idris yana anak si Jared.
Si Jared yana anak si Mahalalel.
Si Mahalalel yana anak si Kenan.
38Si Kenan yana anak si Enos.
Si Enos yana anak si Set.
Si Set yana anak Boꞌ Adam.
Kuwan Boꞌ Adam, binilang anak Tuhan.
Currently Selected:
Lukas 3: sjm
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
