Lukas 9

Siga mulit si Isa sikasapu-duwa sinohoꞌ masaplag

(Matiyu 10.5-15; Malkus 6.7-13)

1Na luu disu llaw, lay linganan si Isa ga rasul na sikasapu-duwa nohoꞌ kumpo pa bihing na. Luu jaꞌ siꞌ, lay sila buwanan na kawasa-kapatut malakka siga seytan sampay ngulian jama sakihan. 2Pus meꞌ looy, lay na sila sinohoꞌ ngalataan lahat masaplag umanat mahap pasal pamarinta Tuhan sampay nohoꞌ ngulian jama ma sakihan. 3Yaꞌ gi siꞌ sila bay lakka, yuk si Isa ninsila, “Daa na kam moo oy-oy halliꞌ ni palanan bi. San tungkud, bāg, lutuꞌ atawa sīn, sampay pasaynan, daa na du kam moo. 4Bong kam bay kinaddoꞌ meꞌ jama nohoꞌ pahantiꞌ ni lumaꞌ da, ndooy na jaꞌ mman bi halloman bi yaꞌ gi palakka man daira da. 5Sugaꞌ bong baw kam bay takka ni disu daira man bi yaꞌ hinasi, lakka na jaꞌ kam. Sugaꞌ pag pōꞌ bi man daira looy, papasan bi momok tanaꞌ lahat da man sinilas bi tandaꞌ yaꞌ na luu lamud bi ninsila.”

6Dari siꞌ, lay na lumān ga rasul na ngalataan kakawum-kawman masaplag umanat mahap pasal pamarinta Tuhan. Maka lay na du sila ngulian sagannap ma sakihan.

Lingog pikilan Gubnul Herod Antipas

7Na pag taaka Gubnul Herod pasal mimon bay kadarihan ga si Isa, yaꞌ na katoon-toonan na pamiki na sabap baꞌ-bāꞌ kasohean si Isa yana si Yahiya ma Tukang Mandi llum na pabalik. 8Tanggap kasohean baw, Nabi Eliyas konoꞌ ya luu na kaluwa pabalik. Kuwan kasohean māꞌ iya disu nabi sarī man maruhuꞌ-ruhuꞌ llum na pabalik. 9Dari lingog pamiki Gubnul Herod, yuk na, “Si Yahiya bilay, lay na sohoꞌ ku pinonggolan kallong na. Dari soy na baw ilay siꞌ jama looy ma daran bay taaka ku.” Dari labba mandooy, tud doman na ya sitammu ka si Isa.

Si Isa makan jama labi lima libu

(Matiyu 14.13-21; Malkus 6.30-44; Yahiya 6.1-14)

10Na balik ta pa siga rasul si Isa siꞌ, pag beleng da bay ngalataan lahat, lay na tuntutan da si Isa mimon bay pabuwat da. Pag lupus, lay na baw sila binoo meꞌ si Isa song pilay pa tagan daira inawnan Betsayda, sila-sila jaꞌ. 11Sugaꞌ pag taaka ga baanan jama lay na lakka ga si Isa, lay na sila patuhut. Pag taabut da si Isa, lay du sila hinasi meꞌ na sampay lay gi sila tinoan pasal pamarinta Tuhan. Maka soysoy ndooy sakihan, lay du ulian na.

12Pag taabut kohap, pasōng na siga rasul na sikasapu-duwa pa mman na, yuk da, “Tuwan, daa busung, sōn na baanan ga jama looy pilay pa kakawum-kawman miha kalumaan man da tuli sampay mangan batan lahat tuu bitu yaꞌ maglumaꞌ.”

13Sugaꞌ yuk si Isa, “Kaam sa ba makan sila.”

Yuk da baw siꞌ tu, “Uy, lutuꞌ tabi bitu limam batang du tinapay ka duwa lisu du daying! Bong baw sila ballihan kami balanjaꞌ meꞌ naa na eka da, yaꞌ du takaya kami.” 14Kon da ilay siꞌ bay halling meꞌ looy batan eka ga lalla ndooy siꞌ, luu ga lima libu, sarī gi karandahan ka ga anak-anak.

Sugaꞌ yuk si Isa ninsila, “Kumpohun bi jaꞌ sila ga lima-limampūꞌ njawom disu baanan nohoꞌ ningkōꞌ.”

15Pag lay jaꞌ sila pinatingkōꞌ, 16lay kaddoꞌ si Isa tinapay looy sikalimam batang ka daying looy sikaduwa, boꞌ na pahangad pa taꞌ langit sambayan na muwan pagsukuhan pa Tuhan. Pag lupus, lay pinong-pōng meꞌ na mimon boꞌ lay songan na pa mman siga mulit na nohoꞌ ndean ga baanan jama ndooy. 17Dari lay na mangan mimon jama ndooy sampay sso na ga sila sikamimon. Pag lupus, luu gi bay pinumpung sapu-duwa bakaꞌ pannoꞌ leꞌ pisan tinapay ka daying bay takapin.

Si Pitel māꞌ bong soy si Isa

(Matiyu 16.13-19; Malkus 8.27-29)

18Na luu disu llaw, lay si Isa maku duwaa dangan-dangan na. Pag lupus, lay ya pasōng pa mman ga mulit na ma luu ndooy. Tilaw na ninsila, “Bong ni bitsala jama, soy itu ku konoꞌ?”

19Tampung da, “Pamāꞌ kasohean, kau na konoꞌ si Yahiya ma Tukang Mandi lay na llum pabalik. Yuk kasohean baw, kau na konoꞌ Nabi Eliyas atawa disu nabi sarī man maruhuꞌ-ruhuꞌ bay pinakallum pabalik.”

20“Na bong kaam,” yuk si Isa, “soy baw itu ku?”

Tampung si Pitel, “Kau na bina Almasi, tukang nalamat ma bay njanjiꞌ meꞌ Tuhan.”

21Pag-anu siꞌ, lay sila sinupali meꞌ si Isa yaꞌ nohoꞌ māꞌ ni soysoy bong soy ya. 22Maka yuk na lagi, “Ndang lay na situ ginantaꞌ talpaksaꞌ niyaku, yana Anak Manusiyaꞌ, natasan jinisan kabinsanaan. Boꞌ tinuwak lagi ku meꞌ siga matatoa ka ga imam langkaw sampay ga guru saraꞌ agama. Maka pinapatoy lagi ku. Sugaꞌ pag ina mintu taabut ni katallu ngallaw, llum na du sina ku pabalik.”

23Pag-anu, yuk si Isa ni sikamimon jama ndooy, “Soysoy doman mmeꞌ niyaku subay tikutan na kahandak na bong pin taduwan na jaꞌ kahandak ku. Subay atas na manangkit tehang halliꞌ man na nilansang, boꞌ na patuhut niyaku. Hati na, llaw-llaw subay atas na lumingkaꞌ njawom jinisan katiksaan ka kabinsanaan kalnaꞌ aku san man na matoy, boꞌ na kapa-mmeꞌ niyaku. 24Batan soysoy ina numbul satu niiya meꞌ na nulut dī na halloman na ntuu ni junyaꞌ, mastiꞌ tiksaꞌ jaꞌ nyawa na saumu. Sugaꞌ soysoy ina yaꞌ mean kahandak na bong pin tabean na kahandak ku, sampulnaꞌ nyawa na labba man junyaꞌ sampay pa ahirat. 25San ina sawpama mimon altaꞌ njawom junyaꞌ lay takoleꞌ bi, oy pus na bong tiksaꞌ du nyawa bi saumu-umu pag taabut bi ni ahirat?

26“Soysoy ina iyaꞌ mangaku mmeꞌ niyaku ka tōꞌ ku, malaingkan aku, yana Anak Manusiyaꞌ, iyaꞌ du ku mangaku iya sukuꞌ ku pag beleng ku pa junyaꞌ ddas ka kawasa lakka man kami ka Mmaꞌ ku sampay ga malaikat na. 27Baan ta kam banahan, kasohean ina ma luu nangge ntuu, yaꞌ gi sila bay matoy, ndang takita da na sina mintu katakka pamarinta Tuhan.”

Halin bantuk si Isa taꞌ punu

(Matiyu 17.1-8; Malkus 9.2-8)

28Na pag luu jaꞌ siꞌ ga wawuꞌ ngallaw bay pingkaꞌ, lay na baw si Isa nukad punu maku duwaa pa Tuhan. Maka luu du bay boo na ga si Pitel, si Yahiya, ka si Yaꞌkub. 29Sasang si Isa maku duwaa, halin na bantuk luwa na sampay pamakoy na lay na ga papoteꞌ malaas na maka nahayaꞌ na. 30-31Maka sarunduun du luu tulun duwa jama mattoꞌ nahayaꞌ na du, yana Nabi Musa ka Nabi Eliyas. Bbuwatan da magbitsala ka si Isa ni hāl kapatoy na song binakbul ndooy ni Jerusalem man Tuhan majatu garaꞌ na.

32Ni waktu looy siꞌ, kuwan ga si Pitel, yaꞌ san luu bay tasayu da sabap tuli jaꞌ sila. Pag batiꞌ da, ilooy ma takita da na sahayaꞌ si Isa ka ga nabi looy siꞌ sikaduwa nangge ni bihing na. 33Dak jaꞌ siꞌ lakka Nabi Musa ka Nabi Eliyas, yuk si Pitel ni si Isa, “Tuwan, kahapan luu kami la ntuu. Bong anu, buwatan kami doꞌ kam bawung-bawung tallu, disu ningkau, disu ni Nabi Musa ka disu ni Nabi Eliyas.” Na ngkon si Pitel bay mitsala meꞌ looy sabap yaꞌ na katoon-toonan na bong oy pataꞌ halling na ninsila.

34Na sasang si Pitel siꞌ mitsala, luu na baw duwai tayiꞌ baliyu patambun ninsila. Dari takkahan tawu na ga si Pitel. 35Boꞌ lay gi sila kale suwara pōꞌ man jawom tayiꞌ baliyu looy, yuk na, “Inaa ina Anak ku bay peneꞌ ku majatu garaꞌ ku. Indanan bi bitsala na.”

36Paddus suwara looy siꞌ, pag ndaꞌ ga si Pitel, si Yahiya ka si Yaꞌkub, dangan-dangan si Isa sa nangge ndooy. Na ilooy siꞌ sikamimon ma bay tasakup ga si Pitel, yaꞌ gi bay pamāꞌ da ni soysoy jaꞌ jaman looy.

Si Isa ngulian disu anak-anak sineytan

(Matiyu 17.14-21; Malkus 9.14-29)

37Na pag meꞌ sumawung, pag lay jaꞌ palūd ga si Isa man punu looy, sakiyan na jama pasampang niiya. 38Maka luu du disu lalla ni baanan ga jama ndooy nginganan si Isa, yuk na, “Ū Tuwan Guru, junjung ku na ningkau, tabangun doꞌ ba anak ku. Isu-isu iya du situ anak ku. 39Tud malasahi na ya meꞌ seytan. Bila patakka na seytan na, killahap na ga ya, boꞌ magkuweregan lagi sampay ngalappuꞌ na ga behe na. Adak yaꞌ na situ luu hantiꞌ na pinakaat meꞌ seytan na. 40Bay na situ ku maku tulung ni siga mulit nu nohoꞌ malakka seytan na, sugaꞌ yaꞌ du bay takoleꞌ da.”

41Tampung si Isa, “Uy la, angkat-angkatan batnaa, tud kulang pangando da pa Tuhan maka tud bingkok pamiki da. Meꞌ noy na pin doꞌ tu hallom ku dambuwaꞌ ka kaam natasan arat bi?”

Pus meꞌ looy, yuk si Isa ni lalla looy siꞌ, “Bōn na pitu anak nu.”

42Na sasang anak-anak looy binoo pa mman si Isa, patakka na baw seytan na. Dari lay ya humantak meꞌ seytan na sampay lay na baw ya magkuweregan. Sugaꞌ pag saggong si Isa seytan na, ilooy ma lay na palakka sampay kaulian na anak-anak looy. Pag-anu siꞌ, lay na ya pinabalik meꞌ si Isa pa mman mmaꞌ na. 43Na ga jama siꞌ tu ndooy sikamimon, tud bay haylan ni kaehe kawasa Tuhan.

Kaminduwa si Isa nunaꞌ kapatoy na

(Matiyu 17.22-23; Malkus 9.30-32)

Na sasang ga jama ndooy masi haylan ni bay pabuwatan si Isa siꞌ, yuk na ni ga mulit na, 44“Indanan bi bitsala ku. Yaꞌ na hallom, pina-ntan na situ ku, yana Anak Manusiyaꞌ, pa jawom komkoman siga jama ma manta aku.”

45Na ga mulit na baw siꞌ tu, yaꞌ gi bay tahati da bitsala na. Meꞌ ga bay sa tinambunan pamiki da. Boꞌ yaꞌ baw sila nawakka nilaw iya.

Jama ma patingkat man sikamimon

(Matiyu 18.1-5; Malkus 9.33-37)

46Na yaꞌ gi siꞌ bay hallom, magjawap na baw ga mulit si Isa bong soy sila patingkat ni baanan da. 47Na si Isa siꞌ tu, katoonan na bong oy njawom atay da. Dari lay ya ngaddoꞌ disu anak-anak, boꞌ binoo pa bihing na. 48Pag-anu, yuk na ninsila, “Ngaddoꞌ kam matakaddam ni anak-anak tuu. Soysoy ina ngahasi jama diyoꞌ pangkat na meꞌ karuha anak-anak tuu kalnaꞌ aku, sibuꞌ du sina ya ka ngahasi aku. Damikiyan, sagannap ma ngahasi aku, saliꞌ du sila ka bay ngahasi ilooy ma bay mapitu aku. Indanan bi, soysoy ina pinakadiyoꞌ pangatayan na ni baanan bi, iya na sina patingkat man sikamimon.”

49Pag-anu siꞌ, yuk si Yahiya ni si Isa, “Tuwan, lay kami la ngita disu lalla malakka siga seytan makoy awon nu. Sugaꞌ lay bay saggong kami sabap yaꞌ ya tabeꞌ ni baanan tabi.”

50Yuk si Isa, “Daa na ba saggongun bi. Tiyap-tiyap ilay jama yaꞌ nguntra kaam, malaingkan tabilang nanggehan kaam.”

Bangsa Samariya yaꞌ doman ngahasi si Isa

51Na tapit jaꞌ siꞌ waktu man si Isa pabeleng pa sulgaꞌ, katobtoban pamiki na, subay ya pilay na pa Jerusalem. 52Dari lān ga si Isa siꞌ pilay, luu ni duhuan da disu kawum bangsa Samariya. Dari lay doꞌ si Isa maruhuꞌ siga jama pa kawum looy nohoꞌ miha man da pahantiꞌ. 53Sugaꞌ jama lahat looy baw siꞌ tu, yaꞌ luu kuhi sabap katoonan da ga si Isa bangsa Yahudi song pilay pa Jerusalem.#(9.53) Gigitan bangsa Samariya ni bangsa Yahudi batan bistahan bangsa Samariya Tuhan subay sinumba ndooy ni Punu Gerizim. Sangkon yaꞌ sila doman ngahasi bangsa Yahudi ma song pilay pa Jerusalem numba Tuhan ndooy.

54Pag taaka si Yaꞌkub ka si Yahiya tinuwak sila meꞌ jama kawum looy, yuk da ni si Isa, “Bong ko doman Tuwan, maku doꞌ kami tabang pa Tuhan mari ya ngalabuan sila api man taꞌ langit boꞌ da tutung sampay hansu.” 55Sugaꞌ lay doꞌ si Isa paawop ninsila sambayan na naggong sila yaꞌ nohoꞌ mamiki meꞌ looy. 56Dari lay na jaꞌ sila papagsiꞌ pa kawum sarī.

Bitsala si Isa ni sagannap ma doman mmeꞌ niiya

(Matiyu 8.19-22)

57Lān da siꞌ palanja, luu disu lalla pa mman si Isa, yuk na, “Tuwan, mmeꞌ ku la ningkau paninggai-paninggai jaꞌ ko.”

58Tampung si Isa, “Mamiki doꞌ ko ba paayad. Gam gi ina ga sattuwa tawun, luu gi katattogan man da patannaꞌ sangom-sangom. Minsan ga manuk-manuk, luu du ka sāng da. Boꞌ aku itu, yana Anak Manusiyaꞌ, yaꞌ san luu lumaꞌ man ku tuli.”

59Pag-anu siꞌ, yuk si Isa na baw ni disu, “Tu ko. Mmeꞌ na ko niyaku.”

Sugaꞌ yuk jama looy, “Ohoꞌ, Tuwan, sugaꞌ moleꞌ doꞌ ku duhuꞌ. Yaꞌ na du ilay hallom matoy na du mmaꞌ ku. Pus na mintu bay kinubu, boꞌ ku sa patuhut pa mman nu.”

60Pag tampung si Isa, lay ya ngandalil, yuk na, “Bbiyahun na ba sagannap ma matoy ngubu jama matoy. Boꞌ kau, sukuꞌ nu ngalataan lahat masaplag umanat mahap pasal pamarinta Tuhan.”

61Yuk disu na baw, “Mmeꞌ ku la ningkau Tuwan, sugaꞌ bong siꞌ kadarihan ningkau, moleꞌ doꞌ ku duhuꞌ muhun ni ga jama lumaꞌ kami.”

62Iya tampung si Isa niiya, “Soysoy mmeꞌ niyaku subay kahandak ku pandang na. Bong nnaꞌ ta pa jama madjaꞌ, subay ya ngandaꞌ paruhuan sadjaꞌ. Bong ina ya magtelean lagi, yaꞌ sampulnaꞌ pabuwatan na. Damikiyan, jama ma mmeꞌ niyaku ina, bong yaꞌ disu du pandang na, malaingkan yaꞌ ya tawop pinakoy masōng pamarinta Tuhan.”

Currently Selected:

Lukas 9: sjm

Highlight

Copy