Lukas 10

Si Isa meneꞌ pitumpuꞌ-duwa mulit na masaplag

1Pus meꞌ looy, lay na baw Papuꞌ Isa meneꞌ pitumpuꞌ-duwa jama ni baanan ma mmeꞌ niiya. Pag-anu, boꞌ da sohoꞌ na lumān masaplag pa siga daira ka ga kakawum-kawman ma song tiniluꞌ meꞌ na. Meꞌ na bay nohoꞌ sila lumān, duwa-duwa maglimbang paninggai-paninggai jaꞌ tiluꞌ da. 2Yuk na ninsila, “Meka na sina jama ni batnaa bukaꞌ na puad da pitsayaꞌ niyaku. Sila ilay meꞌ sapantun pawoy njawom huma tahan sa kinattom. Salla na, dangkitiꞌ du tukang ngattom. Sangkon maku na pin kam duwaa pa mman ilooy ma dapu huma, yana Tuhan. Kamura-murahan nohoꞌ du ya jama paeka ngattom ni huma na. 3Batnaa pilay na kam, sugaꞌ paayad-ayad kam batan sohoꞌ ta na sina kam patabbaꞌ pa jawom jama jahat. Sibuꞌ du sina mintu karuha bi ka siga bili-bili njawom baanan idoꞌ tawun ma doman jaꞌ nokob. 4Pag mintu kam lumān, daa na kam moo sīn, bāg atawa sinilas sarī man ilooy ma patuk bi. Maka daa na kam mmeꞌ magmiting-miting ka jama pa hallom ni tangngaꞌ lān taggahaꞌ lantan na baw mintu palanan bi.

5“Na pag dutai bi pa lumaꞌ jama, duhuꞌ-duhuꞌ halling bi, ‘Kamura-murahan binuwanan du kam meꞌ Tuhan kasannangan.’ 6Na bong ina sabana-bana luu du dawom da ni kasannangan ma bay paku bi, malaingkan takoleꞌ da jaꞌ sina. Bong ina niyaꞌ, malaingkan yaꞌ du luu takoleꞌ da oy maka oy na. 7Nnoy-nnoy lumaꞌ mman bi pahantiꞌ, patattog na jaꞌ kam ndooy. Daa na kam maghalin-halin. Maka oy-oy binotang ningkaam, daa na kam alang-kapalang mmeꞌ nginum mangan, batan ilooy ilay mintu tabilang na hasil bi. Ndang-ndang soysoy ina maghulas-sangsāꞌ, tawop du binuwanan oy-oy kulang niiya meꞌ sagannap ma bay tabangan na. 8Sangkon, nnoy-nnoy jaꞌ daira, bong kam hinulmat, oy-oy pinaawop meꞌ da ningkaam, kakanun bi jaꞌ. 9Maka bong luu ndooy sakihan, ulian bi, boꞌ baan bi, ‘Luu na pamarinta Tuhan tapit mman bi.’ 10Sugaꞌ mamooy-mamooy daira tiluꞌ bi, boꞌ yaꞌ kam hinasi, subay kam lakka. Sugaꞌ lān bi palakka, yuk bi ni mayran, 11‘Indanan bi. Luu na silay siꞌ pamarinta Tuhan bay patapit pa mman bi, sugaꞌ lay jaꞌ tuwak bi. Sangkon sampay momok tanaꞌ daira bi ma ngakkot ni sinilas kami, papasan kami na tandaꞌ yaꞌ na luu lamud kami ningkaam.’ ”

12Maka yuk si Isa lagi, “Baan ta kam banahan, bong luu jama daira meꞌ looy yaꞌ ngahasi kaam, pag ina mintu taabut llaw hukuman Tuhan, bohat gi sina mulkaꞌ njataꞌ da man ni siga jama daira Sodom mattoꞌ.”#(10.12) Ndaun Panagnaan ni Awwal Jaman 19.1-29.

Siya-siya jama ma yaꞌ nawbat

(Matiyu 11.20-24)

13Pus meꞌ looy, yuk si Isa lagi, “Kaam, jama man Korasin ka Betsayda, tud siya-siya kam. San meka na sipat kawasa Tuhan bay pakitahan ku kaam, yaꞌ du kam bay kuhi nawbat. Bong siꞌ ilay ndang bay na pinakitahan ni jama Tayil ka Saydon mattoꞌ, mastiꞌ lay na silay sila matuk karut kasap sampay ngannaan kōk da abu tandaꞌ da sasso ni bay dusa da. 14Sangkon, pag ina mintu taabut llaw hukuman Tuhan, bohat gi sina mintu mulkaꞌ njataꞌ bi man mulkaꞌ njataꞌ siga jama Tayil ka Saydon.

15“Kaam pun, jama man Kapelniyum, kanna bi mareꞌ inangkat kam pa sulgaꞌ sampay pinaehe, boꞌ ko, gam pin ina mintu, hiniyakan gi kam pa jawom nalkaꞌ.

16“Na kuwan kaam siga mulit ku, soysoy ina mintu ngahasi bitsala bi, saliꞌ du sila ka bay ngahasi bitsala ku. Soysoy nuwak kaam, saliꞌ du ka aku bay tuwak da. Maka soysoy nuwak aku, saliꞌ du sila ka nuwak ilooy ma bay mapitu aku.”

Luu na bay pabeleng ga mulit si Isa sikapitumpuꞌ-duwa

17Na hallom maka hallom na, luu na bay pabeleng ga mulit si Isa ilooy siꞌ ma sikapitumpuꞌ-duwa. Tud bay gāk sila maka yuk da ni si Isa, “Tuwan, sampay siga seytan ngasip jaꞌ la ningkami bong awon nu sabbut kami!”

18Yuk si Isa ninsila, “Ndang lay na silay takita ku Ibilis labuꞌ man taꞌ langit meꞌ hantangan mangirat tandaꞌ lay na ya ā. 19Ibilis ina ka ga pagkahi na seytan yana banta tabi. Sugaꞌ lay na sina kam buwanan ku kawasa-kapatut man bi tumanjataꞌ ninsila. Sibuꞌ du sina karuha da ka ga sō atawa patikāꞌ giniok meꞌ bi, boꞌ yaꞌ du kam kongoy-kongoy. 20Sugaꞌ saꞌ du sina inaa puntukan banahan man bi gāk sukat kam inasip meꞌ siga seytan. Arapun ilooy ya subay kagakan bi banahan, sabap lay na sinuwatan awon bi ni listahan jama sukuꞌ sulgaꞌ.”

21Na ni waktu looy siꞌ, katakkahan na si Isa kagakan mehe meꞌ Rū Sutsiꞌ sampay yuk na pa Tuhan, “Maꞌ, meꞌ kau Papuꞌ mimon-mimon taꞌ gumi sampay taꞌ langit, pudji ta ko. Magsuku ku ningkau sabap kabanahan ma bay limbuhan nu ni siga jama ma milang dī da halul-akka ka lawom pangahati, palahil nu na ni jama ma kuhi tinoan meꞌ karuha anak-anak. Lay na gantaꞌ nu meꞌ looy batan ilooy kasulut ningkau.”

22Pag-anu, yuk si Isa na baw ni baanan ga jama ndooy, “Mimon-mimon lay na hinalap meꞌ Mmaꞌ ku niyaku. Yaꞌ luu toon njawom atay ku sarī man Mmaꞌ ku. Damikiyan, yaꞌ du luu toon njawom atay Mmaꞌ ku sarī man aku ka sagannap ma peneꞌ ku pinakitau.”

23Pag-anu, ilooy ma paawop na baw si Isa pa mman ga mulit na, boꞌ na māꞌ ninsila sadjaꞌ, yuk na, “Njawom supaat kam sabapan siga pakaradjaan ma takita bi ni masa batnaa. 24Baan ta kam banahan, meka silay nabi ka ga sultan mattoꞌ tud bay doman ngita siga pakaradjaan ma takita bi batnaa. Maka tud mehe kainagon da kale ituu ma takale bi batnaa, sugaꞌ yaꞌ du bay luu dapat da.”

Aseꞌ disu lalla bangsa Samariya

25Pag-anu siꞌ, luu na baw disu guru lahal ni saraꞌ agama pasōng nuway-nuwayan si Isa, yuk na, “Tuwan Guru, oy tu la subay pabuwat ku mari sampulnaꞌ nyawa ku saumu-umu?”

26Yuk si Isa niiya, “Ni jawom saraꞌ Nabi Musa ma bay batsa nu, pooy baw lay la?”

27Tampung lalla looy, “Njawom saraꞌ, yuk na, ‘Kaasean bi Papuꞌ bi Tuhan ni pupus hilas atay bi sampay pa bigi-bigi jantung bi. Maka mimon pamiki bi ka hulas-sangsāꞌ bi subay magbēꞌ ka aseꞌ bi niiya.’#(10.27a) Kitab Tawrat, Duteronomi 6.5. Maka luu du njawom saraꞌ, ilooy ma yuk na, ‘Subay kaasean bi siga pagkahi bi sibuꞌ du ka aseꞌ bi ni dī bi.’ ”#(10.27b) Kitab Tawrat, Libitikus 19.18.

28Yuk si Isa niiya, “Katuwaꞌ ko. Basta inaa na bogbogan nu, sampulnaꞌ nyawa nu saumu-umu.”

29Sugaꞌ pagka doman lalla looy muwasan dī na mari ya yaꞌ taawnan yaꞌ maaseꞌ, tilaw na ni si Isa, “Mamooy lay la jama subay binilang pagkahi ku ma subay kaasean ku?”

30Tampung si Isa niiya, “Luu disu lalla bangsa Yahudi lay lumān lakka man Jerusalem song pa Jeriko. Iya siꞌ tu lay ginapahan meꞌ baanan mundu. Pag-anu, binonoꞌ na ya sampay dak na ga matoy. Boꞌ lay gi kinaddoꞌ mimon sīn na sampay ga pamakoy na, boꞌ na llabbahan. 31Yaꞌ hallom, luu na baw imam pingkaꞌ mandooy. Sugaꞌ san takita na lalla looy, lay jaꞌ ya pasihin pa dambilaꞌ lān. 32Pag-anu, pasunuꞌ na baw disu tatabang ni langga mehe, panubuꞌ si Libay. Pag takita na lalla looy, lay jaꞌ du lingkaan na.

33“Yaꞌ hallom, pasunuꞌ na baw disu lalla bangsa Samariya. Pag takita na lalla looy, kapaluuy ya san iya bangsa kinagigitan meꞌ bangsa Yahudi. 34Dari lay ya pasōng pa mman lalla looy, boꞌ na ngulian siga bakat na ka insallan magsakot ka tubaꞌ anggul, boꞌ pinutus. Pag-anu, boꞌ na pinabakuraꞌ taꞌ kuraꞌ na binoo pa lumaꞌ man jama nukay bilik. Ndooy siꞌ, lay gi ya inintu meꞌ na. 35Pag meꞌ sumawung, lay gi ya ngambanan sīn man jama dapu lumaꞌ looy boꞌ na halling, ‘Bong anu, intuhun doꞌ lalla naa. Bong hati yaꞌ sukup sīn naa, gastusan nu na doꞌ. Pag beleng ku, boꞌ sa gantian ku.’ ”

36Pag-anu, yuk si Isa ni guru looy siꞌ, “Ni bistahan nu, ni ga jama looy siꞌ sikatallu, soy ilay sila bay maaseꞌ ka buwat dī na pagkahi jama looy ma bay binonoꞌ meꞌ mundu?”

37Pag tampung na, “Ilooy ma bay kapaluuy nabang iya.”

Yuk si Isa, “Katuwaꞌ ko. Bong meꞌ looy, ilooy jaꞌ akigun.”

Si Isa binoo meꞌ si Malta pa lumaꞌ na

38Na sasang ga si Isa palanja, lay sila nakka pa disu kawum tapit ni Jerusalem. Ndooy siꞌ, lay sila binoo leꞌ disu danda inawnan si Malta pa lumaꞌ da. 39Si Malta siꞌ tu, luu danganakan na inawnan si Mariyam. Bbuwatan si Mariyam siꞌ tu, lay ningkōꞌ ni bihing battis Papuꞌ Isa pakale ni bitsala na. 40Kuwan si Malta, ilooy kagampangan na hāl meꞌ buwat leꞌ mangan man ngahulmat ga si Isa. Dari pag ndaꞌ na yaꞌ san ya tinabangan meꞌ si Mariyam, lay ya masamba ni si Isa, yuk na, “Tuwan, pinabiya na jaꞌ bitu ku meꞌ danganakan ku ngintuhan kaam dangan-dangan ku du. Bong anu, sōn doꞌ ku tinabangan niiya.”

41Iya tampung si Isa, “Uy Malta, meka la kinagampangan meꞌ nu. 42Sugaꞌ disu du patingkat gunahan ni jama, yana ituu na situ ma bay peneꞌ si Mariyam. Boꞌ yaꞌ na sina talakkahan mman na.”

Currently Selected:

Lukas 10: sjm

Highlight

Copy