Lukas 11

Toꞌ si Isa pasal meꞌ maku duwaa

(Matiyu 6.9-13; 7.7-11)

1Na luu disu llaw, pus si Isa maku duwaa, yuk disu mulit na niiya, “Tuwan, si Yahiya ma Tukang Mandi lay na la noan siga mulit na bong pooy meꞌ maku duwaa pa Tuhan. Bong siꞌ kadarihan ningkau, toan nu na du kami.”

2Yuk si Isa ninsila, “Bila kam maku duwaa pa Tuhan, meꞌ tuu hantang na, yuk bi,

‘Maꞌ, kamura-murahan pinaehe na pin awon nu meꞌ jama sikamimon. Kamura-murahan lillaꞌ na jaꞌ mimon manusiyaꞌ ni pamarinta nu.

3Maka kamura-murahan buwanan nu na pin kami balanjaꞌ llaw pa dangallaw.

4Maka Maꞌ, maku kami kaampunan ni bay dusa kami. Ndang-ndang lay na du kami ngampun sikamimon ma dusahan ningkami. Maka maku kami tabang ningkau mari yaꞌ kami takoleꞌ meꞌ jinisan sasat.’ ”

5Na pus meꞌ looy, lay gi si Isa noan sila pasal maku duwaa, yuk na, “Sawpama luu takka pa lumaꞌ nu bisita tangngaꞌ bahangi na, boꞌ yaꞌ luu man nu makan iya. Saꞌ ba, pasahid ko pa lumaꞌ bagay nu, yuk nu, ‘Ū Nges, sambian doꞌ ku la tallu susu jaꞌ bohas nu. 6Luu la takka pa lumaꞌ kami disu bisita man katāhan, boꞌ yaꞌ san luu man kami makan iya.’

7“Na sabap iya bagay nu, mastiꞌ tinabang jaꞌ sina ko. Yaꞌ sina ya nawakka halling ningkau, ‘Uy, kasasat bitu ko! Yaꞌ ku kabuwan batan lawang lay na kinunsiꞌ, boꞌ luu na kami taꞌ patulihan ka ga anak kami.’

8“Sugaꞌ baan ta kam, san ilay sawpama jama looy yaꞌ doman bangun muwan, bong kam amu-amu maku, mastiꞌ bangun jaꞌ sina ya sampay muwanan kaam oy-oy paku bi sabap bagay kam.

9“Dari, baan ta kam banahan, labi na sina bong Tuhan saꞌ muwan. Sangkon luu-luu kulang bi, maku jaꞌ kam niiya, boꞌ bi kabuwanan. Oy-oy piha bi, patiluꞌ kam niiya, boꞌ tatammu bi. Tuktuk gunahan ningkaam tulung, tugtugun bi jaꞌ lawang Tuhan, boꞌ bi binukisan. 10Batan sagannap ina ma maku, mastiꞌ binuwanan jaꞌ. Sagannap ma miha, mastiꞌ nammu jaꞌ. Maka sagannap ma nugtug, mastiꞌ binukisan jaꞌ sina lawang ninsila.

11“Na kaam siga induꞌ-mmaꞌ, bong ina anak bi bay maku daying, yaꞌ sina kam muwanan sila sō. 12Damikiyan, bong anak bi maku intallo, yaꞌ du sina kam muwanan sila patikāꞌ. 13Na bong kaam manusiyaꞌ pandoy muwan pakaradjaan ayad ni anak bi san meka kalaatan bi, labi na Mmaꞌ bi Tuhan ni sulgaꞌ saꞌ pandoy muwanan kaam pakaradjaan ayad. Sampay Rū Sutsiꞌ, dean na du sina soysoy maku.”

Si Isa ka Belsibul

(Matiyu 12.22-30; Malkus 3.20-27)

14Na luu disu llaw, lay si Isa sitammu ka disu lalla ma yaꞌ na kabitsala sabap sineytan ya. Dari lay na papōꞌ si Isa seytan man jawom baran lalla looy sampay kabitsala na ya pabalik. Pag ndaꞌ ga baanan jama ndooy meꞌ looy, tud bay haylan sila. 15Sugaꞌ yuk kasohean baw, “Ē, kon na bina kapalakka siga seytan man jawom baran jama batan bay ya binuwanan kawasa meꞌ Belsibul,#(11.15) Belsibul itu yana Ibilis. yana panghuluꞌ siga seytan.”

16Na ndooy siꞌ, luu du kasohean ma doman nuway-nuwayan si Isa. Dari lay sila nohoꞌ pinakitahan sipat kawasa sarī bong bana-bana du ya bay lakka man Tuhan.

17-18Na si Isa siꞌ tu, ndang katoonan na bong oy njawom pamiki da. Dari yuk na ninsila, “Bong bina bistahan bi kawasa ku mapōꞌ siga seytan lakka man Belsibul, magsāꞌ sina kam. Batan sat bi saꞌ māꞌ magsaggaꞌ na panghuluꞌ seytan ka ga pagkahi na seytan. Bong nnaꞌ ta pa disu sultan ka ga raayat na, bong sila wā sibonoꞌ, mastiꞌ langkat jaꞌ pamarinta na. Damikiyan, bong bay luu dampalūng wā sasaꞌ-manasaꞌ, yaꞌ hallom, langkat du paglūng da. Na Belsibul pun ina, bong ya magsaggaꞌ ka siga pagkahi na seytan, mastiꞌ yaꞌ du natas pamarinta na.

19“Boꞌ na, bong siꞌ ina bana bitsala bi Belsibul bay muwanan aku kawasa man ku mapōꞌ siga seytan, soy baw lay bay muwanan siga mulit bi kawasa man da mapōꞌ seytan? Bong bina meꞌ naa akka bi, san sina siga mulit bi mismu, tabanding da du tud magsāꞌ kam. 20Padahal, ilooy ilay siꞌ kon ku kapalakka siga seytan man sabapan kawasa-kapatut Tuhan ni jataꞌ ku. Maka ilooy na silay siꞌ buktiꞌ mehe luu na pamarinta Tuhan takka pitu pa mman bi.”

21Pag-anu siꞌ, yuk si Isa, “Siga seytan ina, sibuꞌ du karuha da ka lalla basag kawasa na nganjagahan lumaꞌ na paayad, boꞌ togob pakakas lagi. Yaꞌ sina luu kaasok lumaꞌ na ngaddoꞌ altaꞌ na. 22Sugaꞌ bong ina ya bay llān meꞌ disu ma lumabi kawasa na man iya, mastiꞌ ā jaꞌ sina ya. Maka siga pakakas na mimon ma inasahan meꞌ na mastiꞌ kinaddoꞌ na. Sampay mimon altaꞌ na kinaddoꞌ na du meꞌ kalaban na, boꞌ binahagiꞌ-bahagiꞌ meꞌ na ka ga soheꞌ na.”

23Pus meꞌ looy, yuk si Isa ninsila, “Na soysoy ina yaꞌ nanggehan aku, malaingkan nguntra aku. Maka soysoy yaꞌ nabangan aku ngaliyun jama pa jawom okoman ku, sibuꞌ du ya ka malawak jama mman ku.”

Tabiat siga seytan pag lay pinōꞌ

(Matiyu 12.43-45)

24Maka yuk si Isa lagi, “Bong luu seytan bay pinōꞌ man jawom baran jama, bbuwatan na ina ngalataan kadilehan yaꞌ bohean miha pahaliyan na. Sugaꞌ bong ina ya yaꞌ nammu, honaꞌ-honaꞌ na, gam na ya pabeleng pa bay limpaꞌ na njawom baran jama looy. 25Dari pag takka na, takita na na jama looy meꞌ karuha lumaꞌ lassa na sampay lay na pinatimmos. Sugaꞌ masi du yaꞌ magjama.#(11.25) Ndaun futnot ni Matiyu 12.44. 26Dari magti sina seytan looy ngaddoꞌ siga pagkahi na pituꞌ seytan maat gi man iya, boꞌ boo na pa bay limpaꞌ na maglumaꞌ. Pag toklas na ina, jama looy ma bay sineytan, malasahi gi man sibuwa.”

Kagakan sabanna

27Na pus si Isa mitsala meꞌ looy, luu na baw disu danda njawom baanan ga jama ndooy lay mitsala pahaddo, yuk na, “Tuwan, njawom supaat la danda looy ma bay maddi sampay maduruꞌ kau.”

28Sugaꞌ yuk si Isa, “Labi na baw bilay Daꞌ saꞌ sinupaatan sagannap ma pakale sampay ngasip ni palman Tuhan.”

Jama doman ngita sipat kawasa Tuhan

(Matiyu 12.38-42; Malkus 8.11-12)

29Na sasang pasampun boꞌ pasampun na pin eka manusiyaꞌ kumpo ndooy, yuk si Isa ninsila, “Maat la angkat-angkatan batnaa! Yaꞌ sila kuhi pitsayaꞌ aku bay pinapitu meꞌ Tuhan bong sila yaꞌ bay pinakitahan sipat kawasa. Sugaꞌ yaꞌ du situ sila pinakitahan sipat sarī man meꞌ ilooy ma bay katuwaꞌ ni Nabi Yunus mattoꞌ.#(11.29) Sipat kawasa ma awnan si Isa meꞌ tuu: Yana meꞌ Nabi Yunus ilay bay pingkaꞌ njawom battong daying mehe tallu ngallaw boꞌ na pōꞌ, damikiyan, si Isa pun, paddus tallu ngallaw halloman na njawom kubu, pōꞌ du ya. 30Ilooy ilay ma bay katuwaꞌ ni Nabi Yunus mattoꞌ, yana sipat ni siga jama Niniba iya bay pinapilay meꞌ Tuhan pa mman da. Damikiyan, ilooy ilay mintu ma katuwaꞌ niyaku, yana Anak Manusiyaꞌ, yana sipat du ni angkat-angkatan batnaa aku bay pinapitu meꞌ Tuhan.

31“Baan ta kam banahan, pag taabut ina mintu llaw Tuhan ngahukum manusiyaꞌ, kaam jama angkat-angkatan batnaa sinusunan na sina kam meꞌ danda looy ma panghuluꞌ ni lahat Seba maruhuꞌ-ruhuꞌ. Bistahun bi doꞌ, san ya lay ni dambilaꞌ junyaꞌ, lay du ya pilay pa mman Sultan Sulayman bong pin takale na jaꞌ lawom kapandoyan na. Boꞌ kaam ina, luu na batnaa ntuu ni awpan bi patingkat labi man Sultan Sulayman, sugaꞌ yaꞌ san paruli bi bitsala na. 32Sampay siga jama man Niniba mattoꞌ, pag taabut llaw hukuman Tuhan, pōꞌ du sina mintu sila nusunan kaam. Man da pataꞌ nusunan kaam batan pag bay jaꞌ takale da umanat Nabi Yunus, tud bay paruli da sampay lay na tawbatan da dusa da. Boꞌ kaam ina angkat-angkatan batnaa, luu na ntuu ni awpan bi patingkat gi man Nabi Yunus, sugaꞌ yaꞌ san paruli bi bitsala na.”

33Pus meꞌ looy, lay na baw si Isa ngandalil tōꞌ na pa palitaan, yuk na, “Yaꞌ sina luu jama pus na nantikan palitaan, tinangkopan na baw ka undam. Mastiꞌ gowet na jaꞌ sina pa jataꞌ supaya ngita soysoy paasok.”

Jama ma mahap sambuhan mata na

(Matiyu 6.22-23)

34Yuk si Isa lagi, “Bong ina kam mandang jaꞌ meꞌ bi nulut kahandak Tuhan, sibuꞌ du kam ka jama mahap sambuhan mata na. Yaꞌ kam magsiꞌ sabap pamiki bi lay na pinadantaan. Sugaꞌ bong ina kam mandang jaꞌ meꞌ bi nulut dī bi, sibuꞌ du kam ka jama sakihan mata na. Yaꞌ tumampak meꞌ bi ngandaꞌ. Sibuꞌ du karuha bi ka jama bagagap jaꞌ njawom lindom. 35Sangkon paayad-ayad kam taggahaꞌ kanna bi lay na pinadantaan pamiki bi, boꞌ ko, masi kam njawom lindom. 36Sugaꞌ bong ina kam mandang jaꞌ meꞌ bi nulut kahandak Tuhan, malaingkan tud pinadantaan pamiki bi. Dari ko ngawon, mimon baran bi meꞌ sapantun pannoꞌ meꞌ dantaꞌ. Yaꞌ na kam njawom lindom samasakali batan meꞌ karuha luu na sūꞌ ninag njataꞌ bi paninggai-paninggai jaꞌ kam.”

Bandingan si Isa pasal siga Parisi ka ga guru saraꞌ agama

(Matiyu 23.1-36; Malkus 12.38-40)

37Pag lupus si Isa mitsala, lay na baw ya binoo mangan meꞌ disu Parisi pa lumaꞌ da. Dari siꞌ lay na ya mmeꞌ. Maka lay na ya paharung mangan. 38Sugaꞌ tud bay jayip Parisi looy pag ndaꞌ na yaꞌ san si Isa bay ngikut lanan ni agama da bong pooy meꞌ siga Yahudi ngosoan tangan da boꞌ mangan.

39Dari yuk si Isa niiya, “Kaam ina siga Parisi, inaa du jagahan bi kasutsian ni poan. Bong siꞌ ibaratan sawan atawa pinggan, ni poan du kosoan bi. Sugaꞌ njawom, pabiya bi jaꞌ pannoꞌ meꞌ jinisan kalalamaan. Meꞌ naa du sina karuha njawom atay bi, masi du pannoꞌ meꞌ napsu mulakab ka jinisan kalaatan. 40Kulang pamiki bitu kam. Saꞌ ba, Tuhan bay mapayak baran bi ni poan sampay atay bi njawom? Sangkon daa sat baran bi sadjaꞌ sutsiun bi. Sampay njawom atay bi, subay du sinutsiꞌ. 41Naraka kam ni jama miskin ni kahilas atay bi. Meꞌ looy ilay, luu na sipat sutsiꞌ na atay bi.

42“Siya-siya kam la siga Parisi! Pandoy baw kam nong sabahagiꞌ sapū ni sikamimon altaꞌ bi pa Tuhan sampay na ni mimon lampa-lampahan bi. Sugaꞌ yaꞌ san baw paruli bi ilooy ma puntukan banahan, yana buwat kaintongan ni pagkahi bi maka maaseꞌ pa Tuhan. Subay siꞌ inaa na doꞌ paruhuun bi, boꞌ bi mogbogan siga saraꞌ ilooy kasohean meꞌ sapantun muwan sabahagiꞌ sapū.

43“Siya-siya kam la siga Parisi! Bong kam njawom langga, kainagon bi subay na pin kaam ni lugar patingkat ni duhuan. Maka tuktuk bi ni mayran, kainagon bi subay na pin kam inalak.

44“Siya-siya kam la siga Parisi! Ndaꞌ mata, sutsiꞌ kam ni poan, sugaꞌ yaꞌ san tasayu jama tud lamaꞌ njawom atay bi. Sibuꞌ du kam ka kubu yaꞌ magsunduk tagiok leꞌ jama. Yaꞌ san tasayu da ga luu njawom na haluꞌ ma katamak ninsila.”

45Pag-anu siꞌ, luu na baw disu guru saraꞌ agama pasambung, yuk na, “Uy, Tuwan Guru, bong bina meꞌ naa, sampay kami patabeꞌ-tabeꞌ nu na du pinahinaꞌ.”

46Pag tampung si Isa, “Ndang bina. Kaam pun ina iyadu, siya-siya du kam! Bbuwatan bi ngalogos jama mogbogan jinisan aturan awod. Bong dalil ta pa boonan bohat, jama jaꞌ sohoꞌ bi manangkit. Kuwan kaam, yaꞌ san nabang moo san lasa dangkitiꞌ. 47-48Tigiꞌ baw kam buwat lumaꞌ-lumaꞌ lingkatan taꞌ kubu kanabi-nabihan ma bay pinapatoy meꞌ kabboꞌ-bboan bi. Sat bi saꞌ māꞌ bong siꞌ kam ndang bay na luu ni bay jaman kabboꞌ-bboan bi, yaꞌ kam bay mmeꞌ meꞌ uwahan da. Sugaꞌ siya-siya sina kam batan ni sabana na, dambuwaꞌ mukalnaꞌ du kam ka ga kabboꞌ-bboan bi, yaꞌ doman ngasip ni kahandak Tuhan. 49Sangkon, ni kalawom akka Tuhan, ndang luu na bay garaꞌ na mungka kalaatan bi. Yuk Tuhan maruhuꞌ, ‘Sohoꞌ ku du sina mintu kanabi-nabihan ka ga rasul pa mman bangsa Yahudi. Pag pōꞌ da ina mintu, kasohean bininsanaꞌ, kuwan kasohean sampay pinapatoy!’ ”

50Yuk si Isa lagi, “Sabapan kadarihan bi angkat-angkatan batnaa, bbos-bbos talapay du sina kam ni hisab Tuhan ni bay kapatoy mimon kanabi-nabihan labba man jaman junyaꞌ bay pinapayak ngabut sampay batnaa.#(11.50) Kon angkat-angkatan da tabeꞌ ni hisab Tuhan ni bay kapatoy mimon kanabi-nabihan sabap inuru na pin meꞌ da kajahatan kabboꞌ-bboan da. Boꞌ nduhunan lagi meꞌ da batan sila, lay gi taaku da mapatoy si Isa Almasi, yana Anak Tuhan. 51Labba man kapatoy si Habil mattoꞌ ngabut sampay kapatoy Nabi Zekaraya ma bay pinapatoy ni sallangan pangulbanan ka langga mehe, meꞌ halling sambat ku na siꞌ, tabeꞌ du angkat-angkatan bi batnaa ni hisab Tuhan ni kapatoy da.

52“Siya-siya sina kam siga guru saraꞌ agama! Batan wā kam kasanggalang ni jama ma doman toon kabanahan pasal Tuhan. Yaꞌ gi kam kuhi nūs lān man bi tabeꞌ ni pamarinta Tuhan, gam pin sinaggaꞌ gi meꞌ bi jama ma doman tabeꞌ.”

53Pag lupus si Isa halling meꞌ looy, lay na ya palakka mandooy. Kuwan siga guru saraꞌ agama ka ga Parisi baw siꞌ tu, tud bay dugahan niiya. Dari labba mandooy, daran na ya sinual 54balangkali tasiit da na ya ni bitsala na, boꞌ luu na danan man da malkalaꞌ iya.

Currently Selected:

Lukas 11: sjm

Highlight

Copy