Lukas 12

Arat siga Parisi ndalil pa pasulig

1Na jaman looy siꞌ, libu-libuhan na manusiyaꞌ lay kumpo ni awpan si Isa. Magdogsog-dogsog na sila sampay sikagiok-kagiok battis na ga.

Na pag nagnaꞌ si Isa mitsala, duhuꞌ-duhuꞌ yuk na ni ga mulit na, “Iyakin kam mari kam yaꞌ kalakkotan meꞌ arat siga Parisi. Sila ina magbawuꞌ-bawuꞌ jaꞌ sutsiꞌ. Kalaatan da ina meꞌ karuha pasulig njawom addunan taligu. Batan tabiat pasulig ina, san dangkitiꞌ du inannaꞌ, pag ngassob na, kalakkotan mimon addunan na. 2Indanan bi. Bong kinawnan kalaatan ina, san du pooy meꞌ manusiyaꞌ ngalimbu, tinayang du sikamimon song hallom. Damikiyan, mimon ma bay sinipuk, mastiꞌ pinalahil du ni sinōng. 3Sangkon iyakin kam, batan oy-oy ina bitsala bi ma bay sinipuk, mastiꞌ luu du sina masa na tanyag ni manusiyaꞌ sikamimon. Maka oy-oy ina bay tinibuꞌ-tibuꞌ meꞌ bi njawom bilik san bay gi kinunsiꞌ, mastiꞌ luu du sina masa na pinamahalayak ni mayran mari takale meꞌ sikamimon.

Soy pataꞌ kinatawuhan?

(Matiyu 10.28-31)

4“Siga kabagayan ku, daa na kam tawu ni manusiyaꞌ. Bana na, tapapatoy da baran bi, sugaꞌ paddus man naa yaꞌ na luu tapabuwat da. 5Arapun ilooy ya subay katawuhan bi yana Tuhan, batan sarī man ngalakkahan umu bi, luu gi kawasa na ngahiyakan kaam pa jawom nalkaꞌ. Sangkon, subay iya kinatawuhan.

6“Sugaꞌ daa kam ngingat ga yaꞌ kam hagaan pa Tuhan. Mindoga jaꞌ kam ni siga maya. Lima na eka da, ga duwa pilak du hagaꞌ da. Sugaꞌ san meꞌ looy, yaꞌ du luu san disu takupan meꞌ Tuhan. 7Kaam palagi saꞌ inintom meꞌ Tuhan. Lawak baw sina biddaꞌ hagaꞌ bi man siga maya san gi pooy eka da. Tandaꞌ bi yaꞌ takupan meꞌ Tuhan, san bū takōk bi, katoonan na du sina itungan na. Sangkon, daa na kam hanggaw ni oy maka oy na.”

Sagannap ma mangaku mmeꞌ ni si Isa

(Matiyu 10.32-33)

8Yuk si Isa lagi, “Baan ta kam banahan, soysoy ina mangaku ni awpan manusiyaꞌ mmeꞌ ya niyaku, yana Anak Manusiyaꞌ, malaingkan mangaku du sina ku mintu sukuꞌ ku ya ni awpan siga malaikat Tuhan. 9Sugaꞌ soysoy ina yaꞌ mangaku ni awpan jama mmeꞌ ya niyaku, malaingkan yaꞌ du sina ku mintu mangaku ga sukuꞌ ku ya ni awpan ga malaikat Tuhan.

10“Soysoy ina malaat aku, yana Anak Manusiyaꞌ, taampun gi du. Sugaꞌ soysoy ina malaat pabuwatan Rū Sutsiꞌ, yaꞌ na sina ya inampun.

11“Na luu du sina mintu masa bi sinungkuban sabap mmeꞌ na kam niyaku, boꞌ bi binoo pa langga atawa pa lumaꞌ saraꞌ hinukum. Pag ina mintu luu na katuwaꞌ ningkaam meꞌ looy, daa na kam hanggaw bong pooy meꞌ bi nampung atawa oy subay halling bi. 12Luu du sina Rū Sutsiꞌ maan kaam bong oy pataꞌ subay bitsala bi.”

13Pag-anu, luu na baw disu lalla ni baanan looy ngingan, yuk na, “Tuwan Guru, sōn doꞌ ku ba binahagian ni siyaka ku pusaka bay mbanan imuwa mmaꞌ kami.”

14Sugaꞌ yuk si Isa niiya, “Yaꞌ bitu ku bay pinapitu nohoꞌ nalassay palkalaꞌ meꞌ naa. Saꞌ inaa sukuꞌ ku mahagiꞌ altaꞌ jama.”

Disu sawraga ma basag mandang hāl junyaꞌ

15Pag-anu siꞌ, yuk si Isa ninsila sikamimon ndooy, “Iyakin kam. Ilagan bi napsu mulakab ni altaꞌ. San du ina dangoy eka altaꞌ manusiyaꞌ, yaꞌ du kasampulnaꞌ ni nyawa da.”

16Pag-anu siꞌ, lay na baw si Isa ngandalil, yuk na, “Luu disu jama dayahan bay kadarihan huma. Pag kattom na, yaꞌ na taambat na sampay yaꞌ na tabuwat ni siga buriga na. 17Honaꞌ-honaꞌ na, ‘Oy tu la man ku ngannaꞌ kattoman ku? Yaꞌ na bitu tabuwat.’ 18Pag-anu, talangga piki na na baw ngalangkat siga buriga na boꞌ buwat siga buriga mehe banahan man na ngannaꞌ kattoman na ka ga altaꞌ na. 19Honaꞌ-honaꞌ na, ‘Pag lupus jaꞌ mintu ga buriga ku, tud sannang na ku. Oy-oy gunahan niyaku, tahan ku ngaddoꞌ, taun pa taun. Maglami-lami na jaꞌ ku sampay nginum-mangan jaꞌ, boꞌ tuli.’ 20Sugaꞌ yuk Tuhan niiya, ‘Biddaꞌ na baw tu dupang nu. Sangom tuu du matoy na sina ko. Dari mimon altaꞌ ma bay kumpo nu para dī nu, kapa jama na sina.’ ”

21Dari yuk si Isa, “Ilooy na silay palas jama ma ngumpohan dī na altaꞌ, boꞌ ilooy ma hagaan pa Tuhan, yaꞌ san paruli na. Bong ndaꞌ mata, dayahan lalla looy siꞌ, sugaꞌ ni bandingan Tuhan, tud miskin ya.”

Daa kam hanggaw ni hāl meꞌ bi llum

(Matiyu 6.25-34)

22Pag-anu, yuk si Isa ni siga mulit na, “Daa na kam hanggaw ni hāl meꞌ bi llum, meꞌ sapantun hāl kinakan ka pamakoy bi. 23Batan saꞌ sina sat inaa maksud Tuhan bay muwanan kaam baran ddas ka nyawa na supaya tapakan bi atawa tapasammekan bi sadjaꞌ. Luu gi sina maksud na mas mehe gi man inaa kon na bay mapayak kaam pa junyaꞌ. 24Bong sat hāl balanjaꞌ bi, yaꞌ du sina kam pabiya Tuhan. Nnaa na kam mamintang ni siga uwak-uwak. Yaꞌ sila pandoy tanom ka ngattom sampay ngannaꞌ balanjaꞌ njawom buriga, malaingkan llum du sila batan luu na pin Tuhan malanjaan sila. Na bong sila binalanjaan meꞌ Tuhan, labi na baw kaam saꞌ binalanjaan salawak-lawak ehe hagaꞌ bi man ga manuk-manuk. 25Sarī gi, yaꞌ du sina tasambungan bi umu bi san lasa danjām san gi pooy meꞌ bi hanggaw. 26Na bong hanggaw yaꞌ san kasambung ni umu bi san lasa danjām, ongoy subay na pin kam hanggaw ni oy maka oy na?

27“Bong sat hāl pamakoy bi, nnaa na kam mamintang ni katumbu-tumbuhan njawom tawun. Yaꞌ sila maghulas-sangsāꞌ nahiꞌ badjuꞌ batan luu du Tuhan muwanan sila sumping-sumping bilang pamakoy da. Baan ta kam banahan, minsan Sultan Sulayman mattoꞌ meꞌ looy na eka altaꞌ na yaꞌ na taambat, lingkat pamakoy na yaꞌ du kaatu ni sumping-sumping. 28Na bong katumbu-tumbuhan ma dari jaꞌ llabas sumawung sampay tinunu tapamakoyan meꞌ Tuhan ka sumping-sumping, kaam palagi saꞌ binuwanan pamakoy meꞌ na. Pagka meꞌ looy, ongoy subay na pin kulang pangando bi niiya ngayaran kaam?

29“Sangkon daa na kam hanggaw ni kapasal pooy meꞌ bi koleꞌ kinakan atawa inuman. 30Na siga jama ma yaꞌ toon Tuhan ina, ndang kinahanggawan meꞌ da bong pooy meꞌ da koleꞌ pakaradjaan meꞌ looy siꞌ. Boꞌ kaam ina, san kam yaꞌ na hanggaw. Ndang-ndang kinatoonan du sina meꞌ Mmaꞌ bi Tuhan gunahan ningkaam mimon inaa siꞌ. 31Sangkon pakutuun bi na meꞌ bi mmeꞌ ni pamarinta Tuhan. Basta ina inaa numbul satu ningkaam, malaingkan Tuhan sa muwanan kaam mimon ma kagunahan ningkaam.

Ngumpo altaꞌ ni sulgaꞌ

(Matiyu 6.19-21)

32“Na meꞌ kaam siga ipatan ku, san kam yaꞌ meka, daa kam hanggaw ni oy maka oy na. Ndang-ndang gāk du sina Mmaꞌ bi Tuhan muwanan kaam mimon supaat njawom pamarinta na. 33Bong ina kam ngumpo altaꞌ ntuu ni junyaꞌ, adakala tatangkaw lagi meꞌ sugaru atawa tapakaat meꞌ bokeꞌ. Sangkon gam na kam maballihan altaꞌ bi boꞌ pagsarakahun bi ni siga jama miskin. Meꞌ looy ilay, sibuꞌ du kam ka ngumpo altaꞌ ni sulgaꞌ ma yaꞌ na kuhi lungay atawa katis saumu. 34Indanan bi, nnoy-nnoy ina man altaꞌ bi, ndooy du atay bi.”

Subay kitabi saddiya ni katakka si Isa

35-36Maka yuk si Isa lagi, “Subay kam saddiya ni katakka ku ni sinōng meꞌ sapantun siga ata ngagad katakka papuꞌ da ma lay mmeꞌ ngawin. Bong ina siga ata mahap, ndang akket na sūꞌ da supaya pag takka papuꞌ da nugtug lawang, tahan da mukis. 37Bong ina siga ata ndang saddiya na ni katakka papuꞌ da, mastiꞌ sinupaatan jaꞌ sila. Tandaꞌ papuꞌ da kasulutan ninsila, saynan na na sina badjuꞌ na, boꞌ na matingkōꞌ ga ata na ni lamisahan na. Pag-anu, boꞌ iya na ya motangan sila. 38Adakala takka na papuꞌ da ni tangngaꞌ bahangi atawa deꞌ subu. Sugaꞌ sumilan-sumilan katakka na, mastiꞌ sinupaatan jaꞌ ga ata na bong sila masi ngagad ka saddiya.

39“Indanan bi. Jama ina bong tasayu na sumilan takka panangkaw pa lumaꞌ na, mastiꞌ saddiya jaꞌ ya maka jaga mari ya niyaꞌ katangkawan. 40Damikiyan kaam pun, subay du kam saddiya batan yaꞌ katoonan bi bong sumilan ku, yana Anak Manusiyaꞌ, pabeleng.”

Ata ma kanaalla

(Matiyu 24.45-51)

41Pag-anu, yuk si Pitel, “Tuwan, tuwaꞌ pa soy bitsala nu siꞌ? Ningkami, siga mulit nu sadjaꞌ kilay, atawa sampay ni jama sikamimon?”

42Sugaꞌ bbuwatan Papuꞌ Isa baw, lay jaꞌ darahan na bitsala na, yuk na, “Soysoy ina ata patong mamiki sampay magkanaalla ni papuꞌ na, iya na sina pineneꞌ meꞌ papuꞌ na magtakōk ni siga pagkahi na ata. Maka iya na inasahan makan sila tuktuk waktu man mangan. 43Dari ni katakka papuꞌ ina, bong ata na taabut masi buwat ilooy ma bay hinalap niiya, mastiꞌ njawom parasahan ayad jaꞌ ya. 44Baan ta kam banahan, iya na silay man papuꞌ na ngahalap altaꞌ na labbasakayi. 45Sugaꞌ bong ina ata yaꞌ kanaalla, njawom atay na, ‘Hallom gi du boꞌ papuꞌ ku pabeleng.’ Dari bbuwatan na minsanaꞌ pagkahi na ata, danda-lalla, boꞌ na magpakaruwan na jaꞌ nginum-mangan sampay maglangohan. 46Sugaꞌ hangat na buwat meꞌ looy, sakayi na kasayu, takka na papuꞌ na. Pag toklas na, pinidjalaꞌ ya saꞌ na gantaꞌ na meꞌ papuꞌ na, boꞌ na hiniyakan pa poan pinatabeꞌ ni mimon ma yaꞌ kanaalla ni papuꞌ da.

47“Siga ata ina, bong katoonan da kahandak papuꞌ da, boꞌ yaꞌ bean da, malaingkan bohat sina mintu pidjalaꞌ njataꞌ da. Sibuꞌ du karuha da ka jama llagpiꞌ pabasag. 48Sugaꞌ soysoy baw ina ata awam ni kahandak papuꞌ na, san ya bay magsāꞌ gantaꞌ man na pataꞌ llagpiꞌ, malaingkan yaꞌ du kalanduꞌ bohat pidjalaꞌ ni jataꞌ na. Sangkon indanan bi. Soysoy ina bay kabuwanan paeka, mastiꞌ meka du tinaat meꞌ Tuhan niiya. Damikiyan, soysoy meka bay hinalap niiya, meka du hinolat niiya.”

49Pag-anu siꞌ, lay na baw si Isa makoy sumping bitsala, yuk na, “Aku itu bay pitu malakkot api ni sikaliput junyaꞌ. Boꞌ kainagon ku tu noleyab na.#(12.49) Meꞌ kasohean ngahati, api looy tuwaꞌ pa Rū Sutsiꞌ ma nutsiꞌ atay manusiyaꞌ meꞌ karuha api ngalakkahan sakot mmas mari porol. 50Sugaꞌ lumingkaꞌ doꞌ situ ku duhuꞌ njawom kabinsanaan mehe. Sangkon yaꞌ na pin situ sannang pamiki ku ngkod-ngkoran yaꞌ gi bay paddus.

Jama magsaggaꞌ sabapan si Isa

(Matiyu 10.34-36)

51“Kasohean ina kanna da aku bay pitu ga moo kasalassayan. Boꞌ ko, gam pin ina magsulemaꞌ na pamiki manusiyaꞌ sabapan ku. 52Ndaun bi sa. Labba man batnaa, sabapan ku, luu na sina masa njawom lima eka jama dampalūng, magsaggaꞌ na labbasakayi. Kon meꞌ looy sabap tallu mmeꞌ niyaku, kuwan ilooy duwa niyaꞌ, bong saꞌ magsonsang. 53Sabapan ku, siga induꞌ-mmaꞌ magsaggaꞌ na ka ga anak da. Kuwan siga matoa, magsaggaꞌ na du ka ga iwan da.”

Meka Yahudi yaꞌ kabistu bong oy garaꞌ Tuhan njataꞌ si Isa

(Matiyu 16.2-3)

54Pag-anu, yuk si Isa ni baanan ga jama ndooy, “Ntuu ni lahat tabi, bila kam ngita andom pōꞌ man saddopan, tatunaꞌ bi na sina song uwan na lahat. Boꞌ uwan du bana. 55Maka tiyap-tiyap niyup na baliyu man sātan, tatunaꞌ bi na song pasuꞌ na lahat. Boꞌ pasuꞌ du bana lahat. 56Pandoy baw kam mindogahan kaadaan lahat, sugaꞌ ongoy baw taggahaꞌ yaꞌ san tabistu bi bong oy pabuwat Tuhan ni batnaa? Mag-awam-awaman jaꞌ bitu kam.

57“Pamikihan bi na bong oy pataꞌ pabuwat bi padpad yaꞌ gi kam kalabuan hukuman Tuhan. 58Kaadaan bi ina batnaa sibuꞌ du karuha na ka jama pinalkalaꞌ. Na tiyap-tiyap ina jama pinalkalaꞌ, sapatut na subay pagbuli-bulihan na miha kasalassayan ka jama ma malkalaꞌ iya, taggahaꞌ pinaggos na baw ya binoo pa lumaꞌ huwis. Maka adakala takka ndooy, pina-ntan na baw ya meꞌ huwis pa mman pulis nohoꞌ njīl. 59Baan ta kam banahan, bong ina ya lay na njīl, niyaꞌ sina ya umōꞌ ngkod-ngkoran yaꞌ gi bay tapuwasan na multa na labbasakayi. Aku ilay bay maan kaam meꞌ looy siꞌ supaya tūs bi na lān man bi mahap na pa Tuhan padpad yaꞌ gi kam bay kalabuan hukuman na.”

Currently Selected:

Lukas 12: sjm

Highlight

Copy