John 21

Sa Nampail-an Jesus Atta Pitu We Disipuluna

1Naḻaḵpus ḵad anna, nampaila'ḵ Jesus ḵasin atta disipuluna si Baybay Tiberias. Ḵaḵna inonae nangipaila si long-agna. 2Nandatdatong da Simon Peter, Thomas we ngannonda Ḵapil, aḵ Nathanael we iCana si ili'tte probinsiya'd Galilee, da duwae abeng Zebedee ya da duwae disipuluna. 3Ḵanan Simon Peter ḵan dida, “Iyyaḵ angugadiw.”

Ḵananda ḵan siya, “Umali ḵani.” Ummoyda woḵ nambangkada. Yaḵon sa sadi ye labi naippun innaḻada.

4Wiḵwiḵis ḵad, summiḵad aḵ Jesus atte taḻantag yaḵon adimpun da disipulu immatunan. 5Ḵanan Jesus ḵan dida, “Susunud! Awad innaḻayu'ḵ ugadiw?”

Ḵanandae summongbat, “Naippun!”

6Ḵanan Jesus ḵan dida, “Idawatyu tabuḵuḻyu si ḵapon si madawinan ni bangka woḵ awad da maaḻayu.” Pun indawatda ḵad, adidapun maḵabutbut te amod da natabuḵuḻane ugadiw.

7Pun sa disipulu we ay-ayaton Jesus ḵanana ḵan Peter, “Siya'ḵ Apu.” Dingngoḻ ḵad Simon Peter we siya'ḵ Apu, nansilup te namponas si nanḵewaaḻana woḵ pummaytuḵ si baybay. 8Yaḵon da udume disipulu we natenan si bangka, binutbutda tabuḵuḻe napnu'tta ugadiw te daḵampun aḵ adayuda si taḻantag te umoye singgasute mitro.

9Tummaḵdangda ḵad atte taḻantag, innilada usinge bumaḻabaḻa ya da nidawise ugadiw ya inninggaw os tinapay. 10Ḵanan Jesus ḵan dida, “Angidatong ḵayu si ugadiwe tinabuḵuḻanyu.” 11Pun summaḵyat aḵ Simon Peter atte bangka woḵ butbutona tabuḵuḻe napnu'tta danaḵḵoḻe ugadiw atte taḻantag. Naḻpaan aḵ limampuḻu ya tuḻu namungda. Taḵon ay nu aduadu da natabuḵuḻan, adipun napissay tabuḵuḻ.

12Pun ḵanan Jesus ḵan dida, “Awwayyu ta anugda taḵu.” Naippun naḵatuḻod atta disipuluna'ḵ angimus ḵan siya ḵanane, “Ngaiḵa?” Te igammudae aḵ Apu. 13Innaḻan Jesus tinapay ya sa ugadiw woḵ ittona ḵan dida. 14Sana piḵlun Jesus we nampaila'tta disipuluna si nagangput ummuli.

Sa Imbagan Jesus Ḵan Peter

15Nagangputda ḵad nanugda, ḵanan Jesus ḵan Simon Peter, “Simon we abeng John, amo ay-ayatom pagay saḵon nu da annae udum?”

Ḵanan Peter, “On Apu, igammume ay-ayatoḵ siḵa.”

Ḵanan Jesus, “Pun ayyuwanam da karneroḵ.”

16Ḵanan Jesus ḵasin, “Simon we abeng John, ay-ayatom pagay saḵon?”

Ḵanan os Peter, “On Apu, igammume ay-ayatoḵ siḵa.”

Ḵanan os Jesus, “Pun ayyuwanam da karneroḵ.”

17Pun impiḵlun Jesus ḵanan ḵan siya, “Simon we abeng John, ay-ayatom pagay saḵon?”

Pun nasuḻsuḻdung aḵ Peter te piḵlunae nangimus ḵan siya we ḵanana, “Ay-ayatom pagay saḵon?” Ḵanan Peter, “Apu, igammum da losan. Ḵad igammume ay-ayatoḵ siḵa.”

Ḵanan Jesus ḵasin, “Ayyuwanam da karneroḵ. 18Ibagaḵ ḵan siḵa ḵatuttuwaan. Sa ḵababaḻum, siḵa angigga si taḵyadnu ta maḵasaganaḵae umoy si ayam ya ummoyḵa si piom ayan. Yaḵon nu maḻaḵayḵa, andopaḵa ya awad de angigga si taḵyadnu ya ipuyutna siḵa si adimpun pione ayan.” 19Imbagan Jesus sana ta ipaigammuna inon Peter we matoy ta midayaw aḵ Apudyus. Ḵanana ḵan Peter, “Tun-udonaḵ.”

20Nantawili'ḵ Peter woḵ innilana disipulu we ay-ayaton Jesus we mituntun-ud ḵan dida. Siya nansaḻay si daḻnig Jesus si nangananda woḵ ḵanana, “Apu, ngai sanate angituyuḵ ḵan siḵa?” 21Innilan ḵad Peter, ḵanana ḵan Jesus, “Apu, ngai inon ni annae tagu nu?”

22Ḵanan Jesus, “Nu pioḵe sissiyae matagu inggana'ḵ mipauliyaḵ, ngai ḵad ain biyangnu? Tun-udonaḵ!”

23Nan-asidongoḻ atta susunud ḵan Kristu we adipun matoy annae disipulu. Yaḵon daḵampun aḵ imbagan Jesus ḵan siyae adipun matoy. Yaḵon ḵanana, “Nu pioḵe sissiyae matagu inggana'ḵ mipauliyaḵ ḵasin, naippun biyangnu.”

Sa Anungusna

24Sana disipulun Jesus we anaḵdoḻ atta sanae banag ya siya bos nangigili. Ḵad igammuni ye tuttuwa da tinaḵdoḻana.

25Yaḵon aduadu bos da ḵingwan Jesus. Nu sin-ossae migili da losan, potog nin ay annae lubung aḵ inggawan da iblu nu migilida.

Currently Selected:

John 21: kml

Highlight

Copy