Acts 1

Sa Nangikariyana Si Ispiritu Santu

1Patpatgoḵe Theophilus,

Sa ummunae iblu we inggiliḵ, imbagaḵ da losane ḵingwan Jesus ya da intuttuduna nisaḻad si lapuna 2inggana si aḻgawe nipangatuwana'd langit. Yaḵon sa daanna mipangatuwan ad langit, innatodna bilinna mipagapu'tte Ispiritu Santu atta apostol we pinilina. 3Naabus ḵad natoy aḵ Jesus woḵ ummuli, dam-on nampaila'tta disipuluna si unog ni opatpuḻu we aḻgaw ya adu da ḵingwanae angipanoḵnoḵe tuttuwae ummuli woḵ intuttuduna mipanggob si ampangatan Apudyus.

4Sa inninggawana ḵan dida, binilin Jesus dida ta adida tenan ad Jerusalem yaḵon uwayonda inkarin Apudyus we Ama we isun ni imbagana ḵan dida si awe. 5Te nambonyag aḵ John si danum yaḵon sa sin-aḵitane aḻgaw mabonyaganda'tte Ispiritu Santu.

Sa Nipangatuwan Jesus Ad Langit

(Mrk. 16:19-20; Luk. 24:50-53)

6Nandatdatong ḵad ḵasin da apostol ḵanandae nangimus ḵan Jesus, “Apu, sinsana ḵamman amaḻyawam atta iRome we angipangat ḵan ditaḵu ta ditaḵu we ganaḵ Israel ampangat?”

7Ḵanan Jesus we summongbat ḵan dida, “Daḵampun aḵ ḵasapuḻane igammuwonyu timpu te abus aḵ Amaḵ we Apudyus aḵ angiḵoddong mipagapu si ḵaḻabbongana nu ngai maḵwa si umali ye aḻgaw. 8Yaḵon nu umali Ispiritu Santu ḵan diḵayu, maittan ḵayu'tte ḵabooḻan Apudyus ta iwaḻagawagyu mipanggob ḵan saḵon sina'd Jerusalem ya da adu we ili'tta probinsiya'd Judea ḵan Samaria ya sa intero we lubung.”

9Inabus ḵad Jesus imbaga da sana, nipangatu'd langite tatangngadonda inggana'ḵ natalingdan atte libuu.

10Sa anatangngadanda si ayonana'd langit, nasaniḵad da duwae anghel we nansilup aḵ itaḵ si daḻnigda, 11woḵ ḵananda, “Diḵayu we naḻpu'tte probinsiya'd Galilee, ngaipa ḵayu sisiḵad sinae tatangngadonyu'd langit? Aḵ Jesus we innilayu we nipangatu'd langite naḻpu ḵan diḵayu, mipauli bose iissuna nangil-anyu si ḵesanana'd langit.”

Sa Napasantan Judas

12Pun nipauli da apostol ad Jerusalem we naḻpu si Beleg Olives we adani'd Jerusalem. Sa boot ni Beleg Olives we umoy ad Jerusalem umoye sinkilomitro. 13Dummatongda ḵad ad Jerusalem, ummoyda si ngatu we kuwartun ni boḻoye inggawanda. Da inninggaw ḵad aḵ Peter, John, James, Andrew, Philip, Thomas, Bartholomew, Matthew, James we abeng Alphaeus ya aḵ Simon we ngannonda Angitaḵdog si ilina ya aḵ Judas we abeng James. 14Sana nan-os-ossaanandae nangipapati ye alluwaḻu we nidoga da udume bubbubai ya aḵ Mary ye inan Jesus ya da sunudna.

15Sin-aḻgawan ḵad, nandatdatong da namati ḵan Jesus we batug di naḻpaan aḵ duwampuḻu belangda. Pun summiḵad aḵ Peter woḵ ḵanana, 16“Susunud ḵan Kristu, ḵasapuḻane mituttuwa Ugud Apudyus we impaigilin ni Ispiritu Santu ḵan Ari David si awe mipanggob si maḵwa ḵan Judas we nangipuyut atta nanoḵma ḵan Jesus. 17Aḵ Judas buḻunni te siya osae dinutuḵan Jesus we maḵaserbi ḵan diḵani ye apostol.”

18Annaya naḵwa ḵan Judas. Sa pilaḵe inawatna'ḵ tangdanna si ḵingwana, ingnginada'tte lutae ummoyna nangongatan si long-agna. Nan-uḻsunge naottag woḵ binnumtaḵ buwangna woḵ nibutlaḵay bagisna. 19Inigammun ḵad da umili'd Jerusalem da naḵwa ḵan siya, nginadananda sadi ye luta'ḵ Akeldama, sa piona ḵanan, Lutae Nadimoḵ.

20Pinagatupan Peter woḵ ḵanana, “Sa inggilin Ari David atte iblu we Psalm, ḵanana,

“ ‘Mabaawan oḵyan boḻoyna ya ippun umoy inggaw’

ya ‘awad oḵyan osa'ḵ mipasani si saadna.’ ”#1:20 Da Psalm 69:25; 109:8.

21-22“Ḵasapuḻane ampili taḵu si mipasani ḵan Judas ta awad midoga ḵan diḵani ye angiwaḻagawag mipanggob si ummuliyan Apu Jesus. Sa piliyan taḵu ḵasapuḻane sa nibuḻubuḻun ḵan diḵani si inggawan Jesus, nisaḻad si nambonyagan John inggana si nipangatuwan Jesus ad langit.”

23Pun imbagada da ngadan da duwae ampiliyanda, aḵ Matthias ya aḵ Joseph Barsabbas we nangngadan os aḵ Justus. 24Pun ḵanandae nalluwaḻu, “Apu, gapu ta siḵa angigammu'tta ḵasomsomḵan da losane tagu, ipaigammum ud ḵan diḵani nu ngai pinilim atta annae duwa 25aḵ mipasani si ḵinaapostol Judas. Te nan-awidana nanserbiyanae ḵinaapostolna woḵ ummoy si ḵuwanae lugar.”

26Pun nambubbunutda ḵad nabunut aḵ Matthias woḵ midoga'tta nasawaḻan aḵ ossaane apostol.

Currently Selected:

Acts 1: kml

Highlight

Copy