Acts 2

Sa Ummayan Ni Ispiritu Santu Atta Namati

1Dummatong ḵad aḻgaw ni Gayagayan da Judyu we ngannonda Pentecost, nandatdatong da namati si osae boḻoy.#2:1 Sa pion ni Pentecost ḵanan ugalin da Judyu we anggangganasdae anggayagaya si sin-aḻgaw, maḻaḵpus limampuḻu we aḻgaw inggan ni Gayagayae Nallausan. Ngannonda bos gayagayan ni apite anggappiyaanda ḵan Apudyus gapu ta nan-apitda. Sana ḵadaḵoḻane gayagayan da Judyu. Mabasa si Exodus 23:16; 34:22; Leviticus 23:15-21; Numbers 28:26-31; Deuteronomy 16:9-12. 2Baag-en dingngoḻda bunguge naḻpu'd langite isun ni bungug ni ampigsapigsae bibbid woḵ nangalliwoḵ si boḻoye nandaḵdaḵnganda. 3Pun innilada da isudan delae apuye nansimpa'tta sin-ossaossa ḵan dida. 4Pune sadi, ummoy ḵabooḻan ni Ispiritu Santu ḵan dida woḵ insaḻaddae an-ugud atta nansabasabali ye ugude adidapun inadaḻe impaibagan ni Ispiritu ḵan dida.

5Sa sadi ye timpu, inninggaw da ummili'd Jerusalem we Judyu we namati ḵan Apudyus we naḻpu'tta nansabasabali ye ili si lubung. 6Dingngoḻda ḵad sadi ye bungug, aduadu da nadagupe sintataag te dingngoḻda da namati ḵan Jesus we nan-ugud si ḵuwadae ugud. 7Sintataagda woḵ ḵananda, “Daḵampun ḵamman aḵ losanda naḻpu'tte probinsiya'd Galilee da annae nan-ugud? 8Ngai inonae dongngon taḵu sin-ossaossa ḵan ditaḵu we an-ugud si ugudna? 9Awad da udum ḵan ditaḵu we naḻpu'tta saḵubna'd Parthia, Media, Elam, Mesopotamia, Judea, Cappadocia, Pontus, Asia, 10Phrygia, Pamphylia, Egypt ya da udume saḵubna'd Libya we dogana'd Cyrene. Ḵad da mangili ye naḻpu'd Rome, 11da Judyu ya da Gentil we amati ḵan Apudyus we isun da Judyu we amati ḵan siya. Ḵad da udume iCrete ḵan iyArabia. Ḵad annae dodongngon taḵu didae ibagabagada si ugud taḵu da nakaskasdaawe ḵingwan Apudyus.” 12Losanda nataag ḵan naalimuunan woḵ ḵanandae nan-asiimus, “Ngai nin ay pion ni sana ḵanan?”

13Yaḵon inninggaw os da udume inam-amsewda da namati woḵ ḵananda, “Uhu! Nabartekda!”

Sa Iwwaḻagawag Peter

14Pune sadi, summiḵad aḵ Peter ya da nasawaḻane apostol woḵ indangsoḻnae gumminga woḵ ḵanana, “Ḵailiyaḵe Judyu ya da losane ummili'd Jerusalem, andongoḻ ḵayu ta ipaḵaawatḵu pion ni sana ḵanan. 15Sa ḵananyu we nabartekda, daḵampun te suminaḻ. 16Yaḵon sana mituttuwaan ni imbagan Profeta Joel we an-uuggudon Apudyus si awe.

17“ ‘Ḵanan Apudyus, “Sa anungus ni aḻgaw,

ibuunḵu Ispirituḵ ta iinggaw atta tagu.

Da aabengyu, ipadtuda da ibagaḵ ḵan dida.

Da babaḻuyu, awad da mipaila ḵan didae isun di in-inop.

Ḵad da anḵamaḻong-ag, an-in-inopda bos.

18Taḵon ay da sammiluḵe laḻaḵi ḵan da bubai

ibuunḵu bos Ispirituḵ ta umoy ḵan dida

ḵad sa umali ye aḻgaw,

ampadtuda si mipanggob ḵan saḵon.

19Sa umali ye aḻgaw

awad da ipailaḵe nakaskasdaaw ad langit

ya da sinyal ad lutae daḻa ḵan apuy

ya sa angal-alliwoḵe asuḵ.

20Sa umali ye aḻgaw

gumiḵbot init ya sa soḻag ambalin aḵ daḻa,

maḵwa da sana si daan ni ampatog ḵan

madaydayawe mipauliyan Apu.

21Ḵad da losane tagu we anḵodaw aḵ ḵadagu

ḵan Apu, mataguda.” ’ ”

Ḵanan Peter sana impadtun Profeta Joel.#2:17-21 Joel 2:28-32.

22Pinagatupan Peter woḵ ḵanana, “Susunude ganaḵ Israel, dongngonyu annae ibagaḵ ḵan diḵayu. Aḵ Jesus we iNazareth, pinanoḵnoḵan Apudyus ḵan diḵayu we imbuunna mipagapu'tta nakaskasdaaw ya da sinyale ḵingwan Apudyus ḵan diḵayu mipagapu ḵan siyae iniiggammuyu. 23Aḵ Jesus, gagangaye simsimmoḵ Apudyus we ipuḻangna ḵan diḵayu te siya inḵoddongna si awe. Ḵad diḵayu, impaipattoḻyu'tte kros ya impagongatyu'tta tagu. 24Yaḵon aḵ Apudyus, tinaguna ḵasin ya pinuḵayana'tte ḵatoy te naippun ḵabooḻan ni ḵatoy ḵan siya. 25Annaya nituttuwaan ni impadtun Ari David mipanggob ḵan Jesus we ḵanana,

“ ‘Innilaḵe pasig anna'ḵ Apu si sinagungḵu

te anna si madawinanḵu ta adiyaḵ maḵimut.

26Sana gapunae lumayad pusuḵ ya andaydayaw delaḵ.

Ḵad taḵon ay nu matoy long-agḵu, namnamaoḵe matagu.

27Te adimpun iwaḻang ḵalidodwaḵ ad Hades we igaw da natoy.

Ḵad adimpun os iyunud loposon long-ag ni mismu we sammilum.

28Impaigammum ḵan saḵon daḻane umoy si mataguwan

ḵad paḻayadom saḵon si annaam.’ ”#2:25-28 Psalm 16:8-11.

Sadi inggilin Ari David.

29Pun ḵanana, “Susunudḵu we ganaḵ Israel, antaḻgodaḵe angipaigammu ḵan diḵayu we aḵ Ari David we daḵdaḵoḻ taḵu natoy woḵ nilibon. Ḵad sa libonna awad ḵan ditaḵu inggana sinsanae aḻgaw. 30Gapu ta osae profetan Apudyus, inigammuna gattoḵe inkarin Apudyus ḵan siyae awad de osae ganaḵnae iggana si tronona.#2:30 Psalm 132:11; 2 Samuel 7:12-13. 31Pun inigammuna ya imbagana ummuliyan Kristu we adinapun iwwaḻang ad Hades we igaw da natoy ya adipun maḻpos long-agna.#2:31 Psalm 16:10. Siya ibagabagana Kristu we ibuun Apudyus. 32Sa annae Jesus tinagun Apudyus ḵasin ḵad losanni tinaḵdoḻan. 33Nipangatu'ḵ Jesus atte madawinan Apudyus woḵ innatod Amana ḵan siya ḵaḻabbongane angitod ḵan diḵani si Ispiritu Santu we inkarina ya imbuunna ḵan diḵani ta ilanyu ḵan dongngonyu da ḵingwan ni Ispiritu Santu. 34-35Te aḵ Ari David adipun nipangatu'd langit yaḵon siyae mismu nangibaga ḵanane,

“ ‘Ḵanan Apu atte Apuḵ: Tumuḵduḵa'tte madawinanḵu,

inggana'ḵ oḻgoḵ da ḵabusuḻnu.’ ”#2:34-35 Psalm 110:1; Hebrews 1:13.

36“Pun ipaigammuḵ ḵan diḵayu we losane ganaḵ Israel we aḵ Jesus we impattoḻyu'tte kros, pinilin Apudyus aḵ Apu ya Kristu.”

37Dingngoḻ ḵad da adu we tagu imbagan Peter, amod de babawida woḵ ḵananda ḵan Peter ya da udume apostol, “Susunude ganaḵ Israel, ngai ḵoonni?”

38Ḵanan Peter ḵan dida, “Ibabawiyu da basuḻyu ya agayyu we angwa ya awad osa ḵan diḵayu ampabonyag atte ngadan Jesu Kristu ta mapakawan da basuḻyu ya awatonyu atod ni Ispiritu Santu. 39Te sa annae kari para ḵan diḵayu ya da aabengyu ya da losane awad atta adayu we ili ya da losane pinilin Apudyus.”

40Adu we ugud imbagbagan Peter ḵan dida woḵ ḵananae nandagdagu, “Iligsiyu long-agyu si annae lunap!” 41Pun da nangawat si ugudna, nampabonyagda. Umoye tuḻullibu belang da nidoga.

42Impapatidae nan-adaḻ atta tuttudun da apostol ya nambubuḻunda, nanḵaḵaḵanda'tte tinapaye angiḵagasmoḵanda si natoyan Jesus ya nalluwaḻuda.

Sa Nantatagun Da Namati

43Nataag da adu we tagu te adu da nakaskasdaaw ya sinyale naḵwa mipagapu'tta apostol. 44Ḵad da losane namati, dam-oda andatdatong ya nan-aḵ-atodda. 45Ingnginada da lutada ya da ḵuḵuwada woḵ iwwaḻasda'tta udume namati sigun si ḵasapuḻan ni sin-ossaossa. 46Inaḻgawe andatdatongda ya an-os-ossaandae andayaw atte templo we boḻoy Apudyus. Ḵad sillalaylayaddae anḵaḵaḵan atte tinapay atta boḻoyda ya sipupusu layadda. 47Patilayune andaydayawda ḵan Apudyus, ḵad nas-om da tagu ḵan dida. Pun inaḻgawe dog-an Apudyus belang da matagu.

Currently Selected:

Acts 2: kml

Highlight

Copy