ROMEŊ 8

Tiirə Pepeŋ bidi kaŋ wəra

1Bədoona ana, bə hebkənaŋ, kəəti kə Pepeŋ de kaa gə minti wəra gə tapə-tepe də Yeesu Kristuŋ pəda anə ceki. 2Gud maa mo Tiiru Cetcetaŋ də minti aye dədərgəŋ a kaŋ gud tepe neeteŋa də Yeesu Kristuŋ, abay cəərəna haa tá, daana doonon wəra ku abay kə baymele bə minti bə əsə-isi cəərəna bə ɗe a məlan a meŋa, haa tá gəm. 3Bədoona ana ta, Pepeŋ jəŋ karman bə minti *ku gili kə *Moyisiŋ a nəkaŋ bə jəw ba gud bə minti hulum a kusukiŋa wəra də dewe hasi bə ɗe də ku giliŋ. Wə jəŋ karman toŋ haa də bə minti wə gaŋ Kurmuyu derra'iŋ da də kusrə hulum kisirkiŋ suru damdi bə sar kaa kəsarkaŋ gə minti jəəti baymeleŋ ana gəm, bə əyu damdi karman bə keere ana cəərə baymeleŋa. Haa də hel taŋ minti wə təwaŋ baymele bə giidə kusrə kaa bə hatə-hate də baymeleŋ wəraŋ. 4Wə jəŋ teŋ bədoona haa minti, kel gə minti ku gili kə Moyisiŋ bele minti áŋ jəy laŋ, jəə la wəra gə doo-de kuy sar áŋ gə minti Tiiru Cetcetaŋ máŋ abay cəərə áŋaŋ, paapa kusrə áŋ bə hatə-hate də baymeleŋ pəda. 5Gud maa mo kaa gə minti ciiri abay haa kusri bə hatə-hate də baymeleŋ, humi kosoŋ haa cəərə karman bə minti a kusukiŋaŋ gəm. Səma kaayaŋ gə minti Tiirə Pepeŋ ciiri abay, humi kosoŋ haa cəərə karman bə minti a tiiruŋaŋ gəm. 6Jəəne minti áŋ ɗe haa gud kusrə áŋ bə hatə-hate də baymeleŋaŋ, áŋ haŋ haa kəkəy bə ɗe a meŋaŋ. Jəəne minti áŋ ɗe haa gud Tiirə Pepeŋaŋ, áŋ haŋ haa kəkəy bə ɗe a dədərgəŋaŋ daana a kəkaɓiŋaŋ gəm. 7Gud maa mo kaa gə minti ɗe gud karman bə minti giidə kusri bə hatə-hate də baymeleŋ bəluŋ, yə acukur də Pepeŋ, yə humi kosoŋ cəərə ku gili nuutuŋa bə gəm. Yə bəlaŋ ne nuutu minti té humi kosoŋ cuuruŋ, yə paapa gə nakə-neke ba. 8Kaa gə minti ciiri abay haa kar gə minti a kusukiŋaŋ, neke bə de dər Pepeŋ ba.

9Aŋ teŋ ha'aŋ, cəərəŋa abay haa paapa kar gə minti a kusukiŋaŋ ba, cəərəŋa abay haa Tiirə Pepeŋ gud bə minti a də əsə-isi giidəŋaŋ. Hulum bə minti Tiirə Kristu taŋ kəya jəŋ giidu baŋ, wə paapa kə Kristu ba faɗi. 10Jəəne minti Kristu bə əsə-isi giidəŋaŋ, də teŋ keɗe kusrəŋ ɗe a meŋa pərak-pəraki gud baymeleŋa. Səma Tiirə Pepeŋ ayaŋ dədərgəŋ gud bə minti Pepeŋ kolnoŋ wəra duru ɗeker. 11Ada pa, jəəne minti Tiirə Pep bə minti a haraŋ Yeesu wəra dədərgə adordə meŋaŋ də əsə-isi giidəŋaŋ, tó bə minti haraŋ Yeesu Kristu wəra dədərgəŋ aye dədərgəŋ yaŋ a kusrəŋ bə minti me wəraŋ. Bə ji kel teŋ haa Tiiru də minti də əsə-isi giidəŋaŋ.

12Bədoona ana kəsaananti, áŋ kir de ku kel kə Tiiru Cetcetaŋ wəra doole. Səma áŋ doy kuy paapa a kusrə áŋ bə hatə-hate də baymeleŋ minti áŋ ɗee la gud karman bə giidu bəluŋa ba. 13Jəəne minti aŋ ɗe haa guuduŋ, aŋ me yaŋ wəra. Səma aŋ awaŋ kel kə bayməlaŋ gə minti aŋ jəy a kusukiŋa ne wəra də Tiirə Pepeŋ, aŋ ji yaŋ dədərgə. 14Gud maa mo kaa gə minti Tiirə Pepeŋ bə ɗe diiri haa taŋ, yə karmə Pepeŋ. 15Tiiru də minti aŋ falnaŋ koloŋ kafkam ba, a haraŋ dər walkaŋa bə gəm. A koloŋ ana ɗaw ha'aŋ karmə Pepeŋ. Ge áŋ bə mante Pepeŋa minti: «Aba, Barən!», haa tá faɗi. 16Tiiru taŋ də kusrə bə ge áŋa bə ase wəra ku tarmə áŋa minti áŋ haa karmə Pepeŋ. 17Áŋ karmə Pepeŋ ta ŋaanaanə moŋ, áŋ ɗe a fele kar pəsaŋ gə minti Pepeŋ əyəy a kaa nuutuŋ. Áŋ də Kristuŋ, áŋ ɗe a ɓarse karman bə minti Pepeŋ əyu duŋ yaŋ gəm, gud bə minti, áŋ gə minti bə se lasiŋa duuruŋ ɓarse boblo nuutuŋ yaŋ də kumsə áŋ gəm.

Kel kə məyan də minti áŋ ɗe a fəlaŋ

18Wəra cəərəna kaŋkaŋ minti, lasi də minti áŋ bə saara də ko toŋ hebkənaŋ, haa karman weseki tiinə boblo bə minti Pepeŋ ɗe a əyu a áŋ. 19Gud maa mo, kar gə minti Pepeŋ jiiniy keɗe bə mi hiŋa bə anə laki bə minti wə veɗe kərmuyu wəra pəɗaki duruŋ. 20Kar gə səɓakiŋ koloŋ abay cəərə kar gə minti Pepeŋ jiiniy, kəya yə kulnuy wəra karman bə boobo. Bəlaŋ minti kel teŋ jəə la bədoonaŋ haa paapa kar gə minti Pepeŋ jiiniy ba; bəlaŋ bədoona haa Pepeŋ. Də teŋ keɗe kəkəy yaŋ ciiri bə mele ɗiki di cəərə karmana: 21wə bidi kar gə minti wə jiiniy yaŋ wəra keɗe. Kəya yə ji kafkam kə kar gə minti cimniy wəraŋ pəda, yə fele bidi bə minti karmə Pepeŋ bə ɗe a fəlu yaŋ dər boblo nuutuŋaŋ. 22Áŋ gə asə-ase minti, hãã hebkəna, kar gə minti Pepeŋ jiiniy keɗe bə nuumi daana bə lese damdi həlgə də doo-de we ana. 23Bə nuumi paapa té təwa ba: áŋ gəm, áŋ gə minti Pepeŋ ayaŋ Tiiruŋ a áŋ damdi ku kar gə minti wə bə əyəy yaŋ a áŋ anaŋ, áŋ bə nuumi tarmə áŋa a kəkəy bə miŋa minti Pepeŋ kole áŋ kərmuyu gə gəəzə-gəəziŋ, haa minti wə bidi kusrə áŋ yaŋ wəra keɗe. 24Gud maa mo Pepeŋ seereŋ áŋ wəra, səma kəm haa dər ɗiki də áŋ bə malə-meleŋa. Jəəne minti karman bə minti áŋ məlaŋ ɗiki də áŋ cuuru meleŋ, áŋ bə əsu də dər áŋ, áŋ mante toŋ mele bə ɗiki pəda, gud bə minti hulum mele ɗiki du na mele cəərə karman bə minti wə bə əsu wəra də duruŋ pəda faɗi. 25Səma jəəne minti áŋ gə malə-mele ɗiki də áŋ cəərə karman bə minti áŋ əsnu kəm wəra də dər áŋ baŋ, áŋ isi haa ŋəŋ bə məwa faɗi.

26Ana paŋ, Tiirə Pepeŋ bə keye áŋa dər dewe náŋa. Áŋ paapa bə toose a kuɗuŋa ba, kəya Tiiruŋ də kusrə bə toose Pepeŋa a koɗ áŋa dər nuumi naataŋa, gud bə minti kel kə waateŋ nəkaŋ bə wəətu wəra ba. 27Pepeŋ ase karman bə ku tarmə kaŋ tə kəm, wə ase karman bə minti Tiiruŋ bə ɗukuŋ gəm gud bə minti a tuusu a koɗ kaa nuutuŋa haa damdi giidu beleŋ ana'i. 28Áŋ gə asə-ase gəm minti, kə kaa gə minti bele Pepeŋ, gə minti wə a məntənəy wəra bə de ku karman bə minti wə a ɗəmpunu wardaŋ, karman muntu muntu mo bə minti tuli ciiriŋ, wə ɗe a awe cuuru diiri haa a pisiŋa. 29Gud maa mo kaa gə minti wə əsnəy warda ajew, wə haŋ ɗiki wəra ciiri faɗi gəm minti tó zey wəra dəra'i a tó kir minti yə kolə la bə he Kurmuyuŋa anə dege'-dege'i faɗi. Bədoona ana wə ji yaŋ beskeŋ də kəsəənu gə ablaw. 30Kaayaŋ gə minti wə haŋ ɗikiŋ bə zey wəra dəra'i a kusruŋ, wə məntənəy wəra gəm minti yə kolə la kə tó. Té gə minti wə a məntənəy wəraŋ, wə kulnuy wəra duru ɗeker gəm. Té gə minti wə kulnuy wəra duru ɗeker, wə əynəy boblo nuutuŋ gəm.

Karman jeme aduubə də áŋ wəra də bele kə Pepeŋ ba

31Áŋ də kel məntəŋ gə waate pə mo? Jəəne minti Pepeŋ gud áŋaŋ, mindi neke bə gerge tiinə áŋa pə mo? 32Wə yaakaŋ Kurmuyu derra'iŋ eŋ bay ɗoote ba, wə əynu wəra a meŋ gud áŋa keɗe. Wə ayaŋ Kurmuyuŋ wəra gud áŋa ɗaw tə kəm, wə bə aye kar kaayaŋ keɗe a áŋ baŋ naanaanə mo? 33Mindi neke bə ge kaa gə minti Pepeŋ ziiniy wəra dəra'i a kusruŋ də kel pə mo? Pepeŋ də kusru kulnuy wəra duru ɗeker. 34Hulum neke bə doy də kəəti pəda, gud maa mo Yeesu Kristu meŋ wəra, ada pa wə haraŋ wəra dədərgə adordə meŋa, wə bə əsə-isi a kasi kemer kə Pepeŋa daana wə bə waate kela gud áŋa haa tó. 35Maa toŋ neke bə ɓarse áŋ wəra də bele kə Kristuŋ mo? Lasiŋ mo, gəəli bə dere laawe a áŋ mo, kaa kə ji caa a áŋ mo, tay mo, caacaŋ mo, ko bə siiti meŋ mo, meŋ də kusru gadi faɗi mo? 36Kel teŋ damdi wəra bə jeerə-jeere giidə Kefter kə Pepeŋa ana minti: «Gud kel dəma are saksaki haa ku meŋa. Kaŋ gole are damdi kaamaŋ gə ɗe a ceme wəra ana faɗi#8.36 Ps. 44.23.» 37Səma dər kel teŋa keɗe, áŋ raawaŋ cəərə bulum wəra ɗaw gud Hulum bə minti bə bele áŋaŋ. 38Gəəzi ten wəra bə asə-ase cəərəna anə kaŋkaŋ faɗi minti: Koo meŋ, koo ji bə dədərgəŋ, koo *kaa kə digi kə Pepeŋ, koo kar gə minti kəkamna apəyaŋ, koo ko bə hebkənaŋ, koo ko bə ajew naŋ, koo kar kə abay-abay gə apəyaŋ, 39koo ko bə minti apəya kəna baŋ, də nayto bə minti adawra gud seŋkaŋa kəna baŋ, koo karman baalaŋ bə minti Pepeŋ a juunuŋ neke bə ɓarse áŋ wəra də bele kə Pepeŋ ba, bele toŋ bə minti wə juunu sar áŋa gud tepe náŋa də Yeesu Kristu Barkaŋ náŋaŋ.

Currently Selected:

ROMEŊ 8: KERNT05

Highlight

Copy