ROMEŊ 7

Hulum bə doo-deŋ wəra bə bədə-bidi ku ku giliŋa

1Kəsaananti, karman bə minti ten waataŋ dəŋ, aŋ wəra gə asə-ase duuru ɗaw, gud maa mo aŋ gə asə-ase *ku giliŋ. Wə bə əsə-isi abay haa cəərə hulum bə minti kəm caw dədərgəŋ təwa. 2Aŋ gosə gole la kəm cəərə həlgəŋa də gedraŋ. Bə minti wə kəm caw dədərgəŋ, ku giliŋ bə əntə-ənti dəərə suru. Səma wə meŋ ne wəraŋ, a wəra də bədə-bidi ku ku gili tó bə minti a əntənə duuruŋa. 3Bədoona ana, jəəne minti gedraŋ kəm caw, a kooroŋ ne a isi gud koŋkor baalaŋaŋ, yə manta həlgə də jəə-ji piwpiw. Səma gedraŋ meŋ ne wəraŋ, a wəra də bədə-bidi ku ku giliŋa. Kəkəy cəərə bə ɗe a de koŋkor baalaŋ, a jəŋ paapa piwpiw ba. 4Kəsaananti, kel dəərəŋ haa bədoona ana gəm. Gud tapi nəətiŋa də Kristuŋ, aŋ meŋ wəra duuru bə minti wə meŋ wəra a kəbaŋ gə largaŋaŋ, kəya me dəŋ ɓarsənaŋ wəra də ku giliŋ. Aŋ máŋ kə hulum baalaŋ, hulum tó bə minti haraŋ wəra dədərgə adordə meŋaŋ, kir minti aŋ jəə la haa kar gə keye agal kə Pepeŋa. 5Bə minti áŋ a kəm bə ɗe a kusukiŋaŋ, ɗiki bə baymele bə ku tarmə áŋ a koloŋ də səɓaki haa gud ku giliŋa. Wə jəŋ joŋreŋ də áŋ daana cuuru awaŋ haa me bə kaŋ. 6A dayday áŋ a a daŋgaya kasi ku giliŋa, səma bə hebkənaŋ adəwaldə áŋ wəra də ɓarsə-ɓarse duuru, wə paapa abay cəərə áŋa pəda. Kəya áŋ gə nakə-neke bə ji joŋre a Pepeŋ də kəkəy kimirwi bə minti Tiiru Cetcetaŋ ge dər áŋ cuuruŋ, paapa də nayto bə tawə-tewe bə minti bə əsə-isi cəərə kel gə jeerə-jeere gə giidə ku giliŋ pəda.

Joŋre kə ku giliŋ

7Áŋ waate hebkəna minti harmə mo? *Ku giliŋ baymele mo? Paapa anə ceki faɗi! Səma wə a jəə la baŋ, baymeleŋ a haa karman maa moŋ, a paapa də dərən ba. Wə minti: «A saane karman kə kumsum ba.» Wə a waatə la bədoona baŋ, ten sə a ase baymele toŋ bə gəm. 8Bə minti ten əskəŋ ku gili toŋ kəyaŋ, baymeleŋ fəlaŋ duru bə zogton guudən a gidiirə saane bə kara ablaw faɗi. Gud maa mo ku giliŋ a jəə la baŋ, baymeleŋ a haa karman bə mee-me wəra. 9A dayday bə minti ku giliŋ a kəm paapa də dərən baŋ, ten a nuutu caw faɗi. Səma bə minti ten əsnu wəra kəyaŋ, baymeleŋ gunuŋ wəra giidəna faɗi, 10kəya koloŋ máŋ wəra bə mee-me haa ten. Bədoona ana ta, ku gili bə minti sə a ɗe də kaŋ a dədərgəŋaŋ, wə ɗeŋ máŋ dəərən a meŋa ɗaw. 11Baymeleŋ fəlaŋ duru bə kan kun də ku giliŋ, kəya wə haŋ ku giliŋ bə ɗe dəərən a meŋa. 12Bədoona ana ku giliŋ bəŋ haa kasi Pepeŋ da. Kel məntəŋ məntəŋ mo gə giiduŋ, yə cetceti, ɗeker daana pəsaŋ gəm.

13Kəya karman pisiŋ koloŋ karman bə minti ɗeŋ dəərən a meŋa haa tó mo? Paapa anə ceki! Ɗeŋ dəərən ada haa baymeleŋ. Kəya wə haŋ karman pisiŋ bə ɗe a məlan ku meŋa. Yə haa bədoona kir minti baymeleŋ naanaanə moŋ, kaŋ asə la wəra pis-pisi. Bədoona ana, gud ku giliŋa ta, gud baymeleŋ gaŋ wəra minti wə wəra bə daŋə-deŋe baymele hasi.

Duuri bə ku tarmə áŋ

14Áŋ wəra gə asə-ase minti *ku giliŋ haa a tiiruŋa, səma ten toŋ haa a kusukiŋa, bə gusə-gusi wəra kafkam a baymeleŋ. 15Gəəzi, ten paapa bə ase gud karman bə minti ten bə jəwaŋ ba. Gud maa mo, karman bə minti ten bele jəw, ten ji paapa toŋ pəda. Ten ji máŋ haa naayaw tó bə minti ten a paapa də caadə he'e suru baŋ ɗaw. 16Jəəne minti karman bə minti ten bəlu baŋ ten jəw, kel teŋ ge dər minti ten bə doo-de haa minti ku giliŋ karman pisi. 17Bədoona ana ta, baymele bə minti ten jəw, jəw paapa ten ba. Baymele bə giidənaŋ jəw haa tó. 18Gud maa mo, ten wəra bə asə-ase minti pisiŋ paapa giidəna ba. Ten waate haa sam kusrən a kusukiŋa. Ku tarməna haa caadə ji pisiŋ, səma ten paapa bə nakə-neke bə jəw ba, 19gud bə minti, pisi bə minti ten bele jəw, ten ji toŋ ba. Baymele bə minti ten bele jəw baŋ, ten ji máŋ haa toŋ ɗaw. 20Jəəne minti ten ji haa karman bə minti ten bele jəw baŋ, ji bədoona haa paapa ten ba, baymele bə giidən jəw haa tó.

21Bədoona ana karman bə minti ten bə asə-ase wəra duuruŋ haa minti: bə minti ten bele ji pisiŋ, ten bə nakə-neke bə ji máŋ haa baymeleŋ ɗaw. 22Gal giidən da anə nemnem ha'aŋ, ten wəra də waale anə fənay-fənay də ku gili kə Pepeŋ. 23Səma ten bə ase kel gaalaŋa bə ji joŋre gal giidəna gə minti bə duuri də kaayaŋ gə minti ten bə doo-de haa guudi də ɗiki dən. Kel gaalaŋ té gə minti ji joŋreŋ giidənaŋ, kolnon kafkam kə baymele bə minti cəərəna abay. 24-25Tarman wəra də jamə-jeme ba ga'i ba! Bədoona ana ten haa bə kəyaŋ ana: dər ɗiki dəna, ten ɗe haa gud ku gili kə Pepeŋa. Səma a kusukiŋa, ten ɗe haa gud baymele bə minti cəərəna abay. Don wəra kasi kusrən tó bə minti bə ɗe dəərən a meŋaŋ haa mindi pə mo? Suuseŋ a Pep bə minti bə ji teŋa də Yeesu Kristu, Barkaŋ náŋ!

Currently Selected:

ROMEŊ 7: KERNT05

Highlight

Copy