ROMEŊ 5

Yeesu tepe áŋ də Pepeŋ

1Bədoona ana, Pepeŋ wəra bə kolə-kole áŋ ɗeker duru gud deŋa tə pə moŋ, kəkaɓiŋ máŋ hebkəna aduubə də áŋa də Pepeŋ gud Barkaŋ náŋ Yeesu Kristuŋa. 2Bəŋəŋ kəkəy wəra cəərə áŋa minti áŋ falə pisi bə minti Pepeŋ jəw sar kaŋaŋ la boobo faɗiŋ haa tó, gud bə minti áŋ gə doo-de guuduŋ. Áŋ gə əsə-isi də səɓaki haa dər pisi toŋa gəm, daana áŋ ufi ku áŋ haa gud ɗiki də áŋ bə malə-mele bə cəərə Pepeŋa minti wə ɗe a ɓarse boblo nuutuŋ yaŋ də áŋ. 3Ada pə ɗaw haa minti, áŋ ufi ku áŋ dər lasi də awte cəərə áŋa gud bə minti wəra də dər áŋ minti lasi taŋ kolə áŋ gə nakə-neke bə halaŋ. 4Bə minti áŋ halnaŋ neŋ, áŋ ji yaŋ ɓeti a kəkəy bə minti Pepeŋ goloŋ koɗ áŋ neŋ. Áŋ jəəne ɓeti a gole bə koɗ áŋaŋ, ɗiki də áŋ ji yaŋ bə malə-mele saksaki cəərə Pepeŋa gəm. 5Ɗiki də áŋ bə malə-mele toŋ kole kese a áŋ ba, gud bə minti Pepeŋ ayaŋ bele nuutuŋ ku tarmə áŋa də Tiiru Cetcetaŋ də minti wə a ayna a áŋ.

6Gəəzi, bə minti áŋ a saksaki paapa bə he baymele bə sar áŋa wəra baŋ, Kristu bəŋ a me wəra gud áŋ kaa kə ji baymeleŋa bə pəw wəraŋ. A ŋəmaŋ ko toŋ haa Pepeŋ. 7Aŋ wəra gə asə-ase minti hulum jəəne nuutu ɗeker, gəəli ablaw minti kumsu bə me wəra a kuɗuŋ. Jəəne minti hulum ji pisiŋ, ɗalba hulum de haa bə aye kusru wəra a meŋ gud toŋa ɗawmay. 8Səma Pepeŋ gaŋ gud bele nuutu bə cəərə áŋ wəra haa də bə minti Kristu bəŋ a me wəra gud áŋa də ko bə minti áŋ kəm kaa kə bayməlaŋ ɗaw. 9Pepeŋ koloŋ áŋ wəra duru ɗeker haa gud kor də Kristu gəm. Bədoona ana, wəra cəərə áŋa faɗi minti wə de áŋ yaŋ wəra ku kəəti kə Pep bə minti sə a ɗe a de áŋ. 10A dayday bə minti áŋ a kəm acukur də Pepeŋ, wə haraŋ bə tepe áŋa duuru də me də Kurmuyuŋ. Bədoona ta minti áŋ wəra gə tapə-tepe duuruŋ, wəra cəərə áŋa faɗi minti wə ɗe a de ku seere áŋ yaŋ wəra gud bə minti Kurmuyuŋ dədərgə caw gəm. 11Kəm ada pə ɗaw haa minti, Pepeŋ jəŋ kir minti áŋ ufi ku áŋ la gud bə minti Barkaŋ náŋ Yeesu Kristu haraŋ bə tepe áŋa duuru haa toŋ.

Adam daana Yeesu Kristu

12Baymeleŋ kəlaŋ giidə seŋkaŋa gud huluma məna Adam, bəŋ də meŋ haa baymeleŋ gəm. Kəya meŋ əsəŋ bə de kaŋa keɗe gud bə minti yə keɗe jəŋ baymeleŋ. 13Ajew də *ku giliŋaŋ, baymeleŋ a yaŋ wəra cəərə seŋkaŋa ɗaw. Səma bə minti ku giliŋ a kəm paapaŋ, Pepeŋ əŋkunu cəərə kaŋa ba. 14Də teŋ keɗe dər Adam da hãã dər *Moyisi, jəŋ abay cəərə kaŋa haa meŋ, koo nuutu cəərə kaa kaayaŋ gə minti a jəŋ paapa baymele kə Adam derra baŋ. Adam toŋ bə ŋarə-ŋere də hulum bə minti yaŋ bə biŋ.

15Səma karman bə minti Pepeŋ əyu a kaŋ boobo daana baymele bə minti Adam a juunuŋ, adəwaldi wəra gə ɓarsə-ɓarse anə hayaŋ faɗi. Gəəzi meŋ doŋ kaa kə ablaw gud baymele kə hulum tó məna'iŋa, səma pisi bə minti Pepeŋ jəw sar kaŋaŋ dəŋu boblo ɗaw. Wə juunu haa gud huluma məna, Yeesu Kristu. Kəya wə duusunu wəra pisi duusa cəərə kaa kə ablawa faɗi. 16Karman bə minti Pepeŋ əyu a kaŋ, wə wəra hal də nayto bə minti kaŋ fəlu gud baymele bə minti hulum məna'i toŋ a juunuŋ. Gud maa mo, gud baymele kə hulum məna'iŋaŋ, Pepeŋ jəmnu kəəti du, kəətiŋ duunu. Səma karman bə minti kaŋ fəlu gud aye bə minti Pepeŋ əyu booboŋ, haa minti wə kuluy wəra ɗeker duru, koo jəəne nuutu minti yə a jəŋ baymeleŋ ablaw. 17Gəəzi jəŋ baymeleŋ haa hulum məna, kəya meŋ koloŋ abay cəərə kaŋa keɗe gud hulum tó məna'iŋa gəm. Bədoona ana, wəra cəərə áŋa faɗi minti, gud Yeesu Kristu məna'iŋa, kaŋ fele pisi bə minti Pepeŋ jəw ciiri wəra ablaw hasi, daana wə kuluy wəra duru ɗeker gəm. Kəya kaa teŋ ji yaŋ zugi dədərgə daana də abay gud Yeesu Kristu. 18Áŋ asaŋ ne, gud baymele kə huluma məna, kəətiŋ doŋ kaŋ wəra keɗe. Bədoona ana gəm, gud joŋre bə kel ɗeker kə huluma məna, kaŋ keɗe wəra gə bədə-bidi ku kəətiŋa daana yə fele dədərgəŋ. 19Gud bay humi bə kosoŋ kə hulum məna'iŋa, kaa kə ablaw koloŋ kaa kə bayməlaŋ. Bədoona ana gəm, gud humi bə kosoŋ kə huluma məna, kaa kə ablaw kole dər Pepeŋa ɗeker gəm.

20Bə minti ku giliŋ əsəŋ bə ji joŋreŋ, baymeleŋ jəwaŋ ablaw faɗi. Baymeleŋ jəwaŋ kəya ŋaanaanə moŋ, pisi bə minti Pepeŋ jəw cəərə kaŋaŋ dəŋnu cuuru máŋ pisi daŋə ɗaw. 21Bədoona ana, damdi baymeleŋ a jəŋ cəərə kaŋa abay bə ɗe diiri a meŋa anaŋ, də kəkəy bə minti Pepeŋ kole kaŋ wəra duru ɗeker, pisi bə minti wə jəw ciiriŋ, ji ciiri abay bə ɗe diiri a dədərgə də bay teweŋa gud Yeesu Kristu Barkaŋ náŋa.

Currently Selected:

ROMEŊ 5: KERNT05

Highlight

Copy