ROMEŊ 4

Kəkəy bə minti Pepeŋ kole Abraham duuru ɗeker

1Áŋ ɗəkə la kəm cəərə moomo də áŋ *Abrahama. A hulum kisirki du kəm caw, wə fəlaŋ haa maa mo? 2A jəə la minti Pepeŋ koloŋ Abraham duru ɗeker haa gud kar gə minti wə a jiiniy, wə sə a ufi ku nuutu guudi. Səma paapa tiinə Pepeŋa ba. 3Gud maa mo, wəra bə jeerə-jeere giidə Kefter kə Pepeŋa minti: «Abraham doŋ gud Pepeŋa, gud teŋa ta Pepeŋ əŋkunu hulum ɗekeri#4.3 Gen. 15.6.» 4Bə minti hulum jəŋ joŋre neŋ, yə wirku. Səma werke toŋ paapa bə karman bə ayə-aye bə boobo ana ba, wə haa karman bə minti wə a jəŋ joŋre cuuru. 5Kə hulum bə minti məlaŋ ɗiki du paapa cəərə kar gə minti wə bə jiya baŋ, wə məlnu ana ɗaw cəərə Pep bə minti kole kaa kə ji baymeleŋ wəra duru ɗeker, wə aŋke haa de kə hulum toŋ bə kulu wəra duru ɗeker. 6*Davidi a waataŋ dayday haa kel té gə mənaŋ gəm bə minti wə waate sam waale kə hulum bə minti Pepeŋ əŋku hulum ɗekeri bay aŋke kar gə minti wə a jiiniy. Wə minti:

7«Waaleŋ kə kaa gə minti Pepeŋ vəəgəŋ giidu wəra cəərə laŋte neeteŋa,

daana wə piiniy baymele neeteŋ wəraŋ gəm.

8Waaleŋ kə hulum bə minti Barkaŋ paapa bə əŋku baymele nuutuŋa cuuru baŋ#4.8 Ps. 32.1-2.»

9Sam waale toŋ bə waatə-waate haa a kaa gə *camə-ceme təntəri wəraŋ təwa mo? Paapa, wə kə kaa gə təntəri gə bay cemeŋ gəm. Gud maa mo áŋ a waataŋ kanda minti: Pepeŋ aŋkaŋ Abraham ɗeker haa gud bə minti wə doŋ guuduŋ. 10Pepeŋ əŋkunu ɗeker haa də ko mundu mo? Ajew də jeme də tənturuŋa mo, adordə jeme dəŋa mo? Paapa adoro də ba, ajew də faɗi! 11Pepeŋ kulnu duru ɗeker gud de nuutuŋa haa də ko bə minti wə a kəm bay *jeme tənturuŋ faɗi. Adoro, wə wəətunu minti wə jamə la wəra bə ge dər minti tó kulnu wəra dər tó ɗeker. Bədoona ana ta, Abraham koloŋ bar kaa gə təntəri gə bay cemeŋ keɗe gə minti gə doo-de gud Pepeŋa gə minti wə kulnuy wəra duru ɗeker gəm. 12Wə haa bar kaa gə təntəri gə camə-ceme wəraŋ gəm. Ten waataŋ bədoona paapa gud təntəri də camə-cemeŋa təwa ba, səma gud bə minti yə bə ɗe a bəlam də bar áŋ Abrahama bə minti a bə doo-de gud Pepeŋa ajew də jeme bə tənturuŋ.

Pepeŋ waataŋ sam karman wəra haa a kaa kə doo-deŋ

13Pepeŋ a waataŋ *Abraham daana kaasaw du warda minti tó əyəy seŋkaŋ wəra keɗe. Wə a wəətunu wəra bədoona haa paapa gud bə minti wə humuŋ kosoŋ cəərə *ku giliŋaŋ ba, səma gud bə minti wə a kulnu wəra duru ɗeker gud de nuutuŋaŋ. 14A jəə la kəna minti fele karman bə minti Pepeŋ a wəətunu səmu wəraŋ haa kaa kə humi kosoŋ cəərə ku giliŋaŋ, de bə gud Pepeŋ a wəra máŋ haa karman bə boobo daana karman bə minti wə a wəətunu səmu wəraŋ sə a bese wəra anəkay faɗi gəm. 15Gud maa mo, ji minti Pepeŋ kolə waŋ la cəərə kaŋa haa ku giliŋ. Ku giliŋ a jəə la paapaŋ, hulum sə a neke bə ɓəlku bə gəm.

16Gud teŋa ta, karman bə minti Pepeŋ a wəətunu səmu wəraŋ, bə əsə-isi haa cəərə deŋa kir minti wə jəə la wəra pəɗaki karman bə minti wə əynu a kaasaw də Abraham keɗe boobo. Wə əyu haa a kaa gə minti bə humi kosoŋa cəərə ku giliŋaŋ, daana a kaayaŋ gə minti doŋ damdi Abraham a doŋ anaŋ gəm. Gud maa mo, Abraham haa bar áŋ gə doo-deŋ keɗe 17damdi wəra bə jeerə-jeere giidə Kefter kə Pepeŋaŋ ana minti: «Ten jəŋ minti tam jəə la bar gidiirə kaa ablaw#4.17 Gen. 17.5 Haa minti wə fele beebe yaŋ..» Wə bar áŋ tiinə Pep bə minti wə doŋ guuduŋ, Pep tó bə minti hare kaa kə mee-meŋ wəra dədərgə, daana wə kole karman bə minti a paapaŋ wəra bə ji caw də kel gə kuŋ faɗiŋ. 18Abraham raawaŋ saksaki də de nuutu bə gud Pepeŋ daana bə malə-mele ɗiki du cuuru, koo də ko bə minti ɗiki du bə malə-meleŋ gole dər kaŋa wəra kel kə booboŋ. Gud de nuutuŋa wə koloŋ bar gidiirə kaa ablaw damdi Pepeŋ a wəətunu wəraŋ ana minti: «Kaasaw dəm bə ɗe a ji yaŋ ablaw bədoona ana#4.18 Gen. 15.5.» 19Bə minti Pepeŋ a wəətunu sam karman toŋ wəra ha'aŋ, laate du wəra kəsi mo, bədoona ana. Də teŋ keɗe, wə gəyaŋ dər de nuutuŋa ba, wə a nuutu wəra maŋ bə jeme meŋ, daana muru Saraŋ a paapa kir we pəda gəm. 20Wə yaakaŋ de nuutu bə gud Pepeŋ ba daana ɗiki du bə malə-mele bə cəərə karman bə minti Pepeŋ a wəətunu səmu wəraŋ bə gəm. Ana ɗaw ha'aŋ, de nuutuŋ əynu səɓaki daana wə koloŋ bə tokɗe Pepeŋ. 21Wə wəra bə asə-ase cuuru kaŋkaŋ minti, karman bə minti Pepeŋ a wəətunu səmu wəraŋ, wə bə nakə-neke bə daw ku wəra. 22Haa gud teŋa ta minti Pepeŋ əŋkunu ɗeker duru gud de nuutuŋaŋ. 23Kel té gə waatə-waate minti Pepeŋ əŋkunu ɗeker duruŋ, gə jeerə-jeere haa paapa a Abraham təwa ba. 24Yə gə jeerə-jeere haa a áŋ gəm, áŋ gə minti Pepeŋ kole áŋ duru ɗeker gud bə minti áŋ doŋ gud tó Pep bə minti haraŋ Yeesu Barkaŋ náŋ wəra dədərgə adordə meŋaŋ. 25Pepeŋ əynu wəra a meŋ gud baymele náŋa, wə hərnu wəra dədərgə haa minti tó kole áŋ la wəra dər tó ɗeker.

Currently Selected:

ROMEŊ 4: KERNT05

Highlight

Copy