ROMEŊ 3

Hulum ɗekeri tiinə Pepeŋa anə məna paapa

1Jəəne bədoona anaŋ, karman bə minti hulum bə Ziwifi dəŋaŋ kaa kaayaŋ duuruŋ, haa maa mo? Keye bə minti tanta də jamə-jeme kəynu duuruŋ, haa a maa toŋa mo? 2Gəəzi, yə kəyu ablaw cəərə kara keɗe! Gud maa mo, məna, Pepeŋ ayaŋ kel nuutuŋ anə faɗi haa kasi kaanə Ziwifiŋa. 3Gəəzi sirdi jəŋ ɓeti gud kel teŋa ba. Ana gud kel teŋ haa minti Pepeŋ bə ji saksaki ɓeti pəda gud bə minti yə a əsəŋ ɓeti baŋ mo? 4Paapa bədoona ba anə ceki! Pepeŋ bə əsə-isi saksaki haa cəərə gəəziŋa, jəəne nuutu minti kaŋ ŋete kel keɗeŋ. Yə haa damdi wəra gə jeerə-jeere giidə kefter nuutuŋa cuuru ana minti: «Dər kel nəmti gə waateŋaŋ, kaŋ ase yaŋ wəra kaŋkaŋ minti tam saksaki ɗeker. Jəəne minti yə jamnam kəəti dəm neŋ, wə neke bə dom ba anə ceki gəm#3.4 Ps. 51.6.»

5Hebkəna ten waate kel haa də aŋar də ɗiki bə minti cəərə kaŋaŋ. Yə waataŋ ne minti baymele bə minti áŋ bə jəwaŋ keye bə ge gud ɗeker kə Pepeŋ wəra pəɗaki a kaŋ, áŋ neke bə waate minti harmə mo? Haa minti Pepeŋ paapa ɗeker ba bə minti wə kole waŋ daana wə ji daŋgay də áŋ mo? 6Paapa bədoona ba anə ceki gəm! A jəə la minti Pepeŋ paapa ɗeker baŋ, wə bə ɗe a jeme kəəti də kaa gə cəərə seŋkaŋ hõy naanaanə pə mo?

7Kumundu ba hulum neke bə waate pa minti: jəəne minti baymele bə minti ten bə jəwaŋ keye kaŋ bə ase minti Pepeŋ ji haa saksaki ɗeker daana wə fele tokɗeŋ a ko toŋaŋ, ten bə ji naanaanə bə doo-de də kəəti gud bə minti ten hulum bə baymeleŋ pə mo? 8Jəəne bədoonaŋ, maa bə haanaŋ kuŋ wəra bay waate mo minti áŋ jəə baymeleŋ la minti pisiŋ vaɗə la wəraŋ? Sərdə kaa yaŋ bə sarte are daana bə waate cəərə are minti are bə hate haa kel teŋ kəya. Kəətiŋ ɗe yaŋ a de kaa teŋ, haa akəsa faɗi!

9Cəərə kel ge a ko toŋa ta'a minti harmə mo? Áŋ gə Ziwifiŋ, áŋ teŋ dəŋaŋ kaa kaayaŋ cəərə karmana nuutu mo? Paapa anə ceki. Gud maa mo ten a kaanaŋ gud kel da ne warda kanda minti: koo hulum bə Ziwifi, koo paapa bə Ziwifi ba, baymeleŋ ciiri kumna keɗe faɗi. 10Damdi wəra bə jeerə-jeere giidə Kefter kə Pepeŋa ana minti:

Hulum bə minti ɗeker dər Pepeŋa, paapa, koo nuutu məna.

11Hulum bə minti anə məna bə ase gud kel kə Pepeŋ, paapa.

Koo məna bə minti bə gulduŋ, paapa gəm.

12Yə keɗe yaakaŋ kəkəy kə Pepeŋ wəra,

Yə koloŋ wəra gə ɓalkə-ɓalke keɗe,

Anə məna bə minti ji pisiŋ, paapa, koo nuutu məna#3.12 Ps. 14.1-3.

13Durdi ta'a haa damdi teɗker də minti ku wəra hoŋ ana;

kel gə kisilɗiŋ haa gə ji tiniini də kaŋ;

kel gə kuy haa bə məyawna də kancaw ana faɗi#3.13 Ps. 5.10; 140.4.

14Kuya haa guɗbusiŋ daana kel kə bəyhiŋ saksaki#3.14 Ps. 10.7.

15Kəmpəri lətəy duŋriya lete bə ɗe a awe kaŋ;

16a ko muntu muntu mo bə minti yə haŋ ne adaŋ,

yə ɓalke kel də toŋ wəra

daana yə feke kaa dər gəəliŋa gəm;

17kəkəy bə kəkaɓiŋ paapa də diri ba#3.17 Es. 59.7-8.

18Walka də Pepeŋ paapa siri ba anə ceki faɗi#3.18 Ps. 36.2.

19Ana áŋ wəra gə asə-ase minti, kel gə minti *ku giliŋ hətəy keɗeŋ, wə hətəy haa a kaa gə minti bə ɗe guuduŋ. Kel teŋ bədoona ana'i kir minti kəkəy a ji cəərə huluma anə məna bə biŋi ku ba daana minti kaŋ neŋneŋ keɗe asə la wəra minti kəəti kə Pepeŋ bə doo-de diiri. 20Haa gud teŋa ta minti, jəəne nuutu minti hulum kəman a ɗee la gud ku giliŋa keɗeŋ, Pepeŋ kole hulum anə məna duru ɗeker cəərə teŋ ba. Gud maa mo ku giliŋ keye hulum haa bə ase minti wə jəŋ baymeleŋ təwa faɗi.

Pepeŋ kole kaŋ duru ɗeker haa gud deŋa

21Bə hebkənaŋ, Pepeŋ kole hulum ɗeker duru naanaanə bay kele *ku gili kə *Moyisiŋ adaŋ moŋ, wə wəra bə gaa-ge dər áŋ cəərə kel teŋa. Səma, kefter bə ku giliŋ daana kə *kaa kə jogte ku mini kə Pepeŋ a waataŋ wəra ajew bədoona gəm. 22Pepeŋ kole kaŋ duru ɗeker haa gud de neete bə gud Yeesu Kristuŋa. Wə ji də hulum mundu mundu mo bə minti doŋ neŋ haa bədoona ana, gud maa mo wə gole kaŋ gəga'-gəga'i 23gud bə minti yə keɗe kaa kə ji baymeleŋ. Gud teŋa ta, yə wəra gə haa-he giidi tooto sar Pepeŋa dər boblo nuutuŋa. 24Səma gud pisi nuutuŋa, wə kole kaŋ duru ɗeker boobo anə faɗi haa gud tepe neeteŋa də Yeesu Kristu, hulum bə minti bidiy wəra ku baymeleŋaŋ. 25Pepeŋ ayaŋ damdi karman bə keere ana haa tó faɗi, kir minti wə pəə baymele kə kaa gə minti doŋ ne guuduŋ la wəra də kor du. Karman bə minti wə juunuŋ ge dər minti tó jəŋ haa ɗeker bə minti tó sə a ji daŋgay də kaa kə dayday gud baymele bə minti yə a bə juutuŋ, 26səma tó məətəŋ. Wə ge dər pa minti wə kəm dayna ɗeker, gud maa mo wə bə balə-bele minti tó jəə la ɗeker, daana tó kole kaa gə minti doŋ gud Yeesu la wəra ɗeker dər tó gəm.

27Kəya karman bə minti hulum hagə sam kusru la guuduŋ, haa maa pə mo? Karman pa pəda anə ceki faɗi, gud bə minti aŋkeŋ hebkəna haa paapa humi bə kosoŋ bə cəərə ku giliŋ pəda, máŋ hebkəna haa deŋ. 28Gud maa mo, haa kəna karman bə minti are bə waate wəra bədoona anaŋ, minti: Pepeŋ kole hulum duru ɗeker haa gud deŋa, paapa gud bə minti wə doŋ ku kel gə giidə ku giliŋ wəraŋ ba. 29Kumundu ba, Pepeŋ haa Pep kə kaanə Ziwifi təwa mo? Wə paapa Pep kə kaa gə minti paapa gə Ziwifi baŋ bə mo? Ana ɗaw, wə Pep neeteŋ gəm, 30gud bə minti wə məna haa tó faɗi. Wə kole kaanə Ziwifiŋ duru ɗeker haa gud deŋa, wə kole kaa gə minti paapa gə Ziwifi baŋ duru ɗeker haa gud deŋa gəm. 31Áŋ jəəne gə doo-de bədoonaŋ, kel teŋ ge dər haa minti áŋ koloŋ ku giliŋ wəra karman bə bay keye mo? Paapa anə ceki. Áŋ bə ge dəra wəra cəərə keye du bə gəəzə-gəəziŋa ɗaw!

Currently Selected:

ROMEŊ 3: KERNT05

Highlight

Copy