LIKI 9

Yeesu ve kaa nuutu hor ciiri ɓasiŋ bə ɗe a waate kel kə Pepeŋ

(Mat. 10.1-14; Mar. 6.6-13)

1Yeesu təpaŋ cəərə *kaa gə guudu hor ciiri ɓasiŋ. Wə əynəy səɓakiŋ daana abay də sarme kəwal keɗe, də seere kaa kə ɗemeŋ wəra gəm. 2Kəya, wə vəənəy a waate sam *Kumna kə Pepeŋ daana a seere kaa kə ɗemeŋ wəra. 3Wə wəətənəy minti: «Aŋ a he karman kaasəŋa bə ɗe a gəryiŋ ba: aŋ a he gədəwa ba, aŋ a humi mandəhaŋ ba, mappa bə gəm, soloy bə gəm. Aŋ a humi dəməəmə də ɓasi kaasəŋa ada ba. 4Aŋ tuukuŋ ne giidə kuliŋaŋ, hulum bə minti doonoŋ irku dəŋ neŋ, aŋ həətə la haa girdu hãã bə minti aŋ koore wəra giidə seŋka taŋaŋ. 5A ko muntu mo keɗe bə minti kaŋ bəlaŋ doŋ irku dəŋ baŋ, aŋ yəəkəy kuli neeteŋ la. Bə minti aŋ ɗəlaŋ ne bə kooreŋ, aŋ po'e tərwə də kampəraŋ la wəra bə ji bar kəkəy wəra minti yə jəŋ baymele.»

6Kəya yə kooroŋ, yə raawtaŋ giidə wəlasi daalaŋ-daalaŋa wəra keɗe, bə waate Kel pəsaŋ kə Pepeŋa. A koŋa keɗe, yə seereŋ kaa kə ɗemeŋ wəra.

Erodi hoyoŋ wəra gud kel də Yeesu

(Mat. 14.1-2; Mar. 6.14-16)

7Bə minti *Erodi, kumna bə Ziwifi bə Galileŋ əskəŋ kel də Yeesu wəra keɗeŋ, wə hoyoŋ wəra ablaw, gud bə minti sərdə kaa yaŋ bə waate minti Zaŋ Batisi haraŋ warda dədərgə adordə meŋ da. 8Sərdə kaŋ minti vəɗaŋ wəra haa *Eli bə dayday. Sirdiŋ pa minti hulum adəwaldə *kaa kə dayday gə jogte ku mini kə Pepeŋa haraŋ wəra dədərgə. 9Kəya Erodi əsəŋ bə waate minti: «Jəmaŋ cəərə Zaŋ wəra haa ten. Səma hulum bə minti ten əski sam kel teŋ gila cuuruŋ, haa mindi mo?» Kəya wə əsəŋ bə golde kəkəy bə ŋefe duuru.

Yeesu aye hame a kaa ablaw

(Mat. 14.13-21; Mar. 6.30-44)

10Bə minti *kaa kə vaa-ve gə minti Yeesu a fəknəy warnaŋ haraŋ suru daŋ, yə əsəŋ bə tupu bəlam də kel gə minti yə a jiiniŋ wəra keɗe a nuunu. Kəya Yeesu humnuy bay ciiri, yə haŋ kəkəy bə koore Betsayda. Yə ɗeŋ a isi maŋ sar vila, a ko bə minti hulum paapa ada baŋ. 11Bə minti kaa kə ablaw əskəŋ kel teŋ, yə həənu bəlam du. Bə minti yə tuukuŋ suruŋ, wə mirkiniy. Wə wəətənəy sam *Kumna kə Pepeŋ, wə seerteŋ kaa kə ɗemeŋ wəra.

12Bə minti cəwaŋ bə dereŋ, *kaa gə guudu hor ciiri ɓasiŋ zeŋ suru da daana yə wəətunu minti: «Yaakə kaa la, yə koorə la giidə anə wəlasi daana anə kuli weryek-weryeki bə agəjaŋ duŋ bə ɗe a golde kar kə hame kuya daana bə fele ko bə hi, gud bə minti áŋ wəra maska.» 13Səma Yeesu hərnəy kel minti: «Aŋ də kusrəŋ əyəy hame la haa aŋ.» Yə hərnu kel minti: «*Mappa kasi are kəna wiiɗiw də aska ɓasi bagŋ. Tam bəlaŋ ne minti are ɗee la a gusi kar gə hame da a kaa kə ablaw keɗeŋ, marya.» 14A ko toŋa kaa kaŋkar təwa ada guɓ-guɓi wiiɗiw.

Kəya Yeesu waataŋ kaa gə guuduŋ minti: «Cəməy guudi la wəra ta'-ta'i hor wiiɗiw-hor wiiɗiw, yə baarə la adawra.» 15Kəya yə duunu ku, yə əstəŋ kaŋ wəra bədoona ana. 16Kəya Yeesu humuŋ mappa wiiɗiwaŋ də aska ɓasaŋ kəəsu, wə haŋ duru apəya, wə jəŋ suuse ciiri, adoro wə ɓarsaŋ dər mappaŋ də askaŋ, wə əynəy a kaa gə guuduŋ minti yə əyəy la a kaa kə ablaw. 17Mindi mindi mo hamaŋ wəra a tay du. Kaa gə guuduŋ humuŋ kar kə hame gə minti taakaŋ; yə ɗostoŋ kəlam hor cuuru ɓasi də mappa də ɗoklə-ɗokleŋ.

Piyer minti Yeesu haa Kristu daana Yeesu waate sam me du

(Mat. 16.13-21; Mar. 8.27-31)

18Hõy məna Yeesu bə toose Pepeŋa wəra agəjaŋa də *kaa gə guuduŋ suru. A ko toŋa, wə ləənəy kuy minti: «Kaa gə ablaw bə waate cəərəna minti ten haa mindi mo?» 19Yə hərnu kel minti: «Sərdə kaa minti tam haa Zaŋ Batisi. Sərdə kaa kaayaŋ minti tam haa *Eli bə dayday, kaayaŋ teŋ minti tam haa hulum kəman gud *kaa gə dayday kə jogte ku mini kə Pep bə minti a meŋ wəra, wə haraŋ wəra dədərgəŋ.» 20Kəya wə ləənəy ku gəm minti: «Aŋ gəm ta, aŋ waate cəərəna minti ten haa mindi mo?» Kəya Piyer minti: «Tam haa Kristu, *Hulum bə minti Pepeŋ ŋəmnuŋ.» 21Kəya wə wəətənəy wəra kaŋkaŋ minti yə a waate teŋ wəra kəya a hulum ba. Bə kay guudi wəra a niiniŋ wə minti: 22«Ten *Kormə Hulúm kir se gəəli ablaw. Kaa kəmtəŋ gə tiinə kaanə Ziwifiŋ, kəkamna kə *kaa kə keere Pepeŋ, də *kaa kə hate ku gili nuutuŋ, bə məlan dərən yaŋ wəra, yə bə awan wəra gəm. Dər hi bə soopeŋa, ten hare yaŋ wəra dədərgə adordə meŋa.»

Hulum tepe gud Yeesu naanaanə mo

(Mat. 16.24-28; Mar. 8.34—9.1)

23Kəya Yeesu waataŋ kaŋ keɗe minti: «Hulum bə minti bəlaŋ ne minti tó han bəlam dən, wə ŋoryə kusru la wəra, wə takə kəbaŋ gə larga nuutu gə me la a hiŋa keɗe, kəya wə tapə la guudəna nuutu ta. 24Gud maa mo hulum bə minti bele anə ɗaaməna minti tó jəə la caw saksakiŋ, wə bese dədərgə du wəra haa bese ɗaw. Səma hulum bə minti bəsaŋ dədərgə du ne wəra guudənaŋ, wə seereŋ dədərgə du wəra haa seere gəm. 25Yə ayə bege bə cəərə seŋkaŋ la wəra keɗe nuutu a hulum kəman ɗaw, wə kəyu a maa mo jəəne minti wə ɓalkaŋ dədərgə du ne wəraŋ? 26Hulum bə minti bə ji kese bay waate kel dən daana kel katən jəw kese aduubə də kaŋa, ten Kormə Hulúm bə ji kese yaŋ bay wəətu kel du gəm də bə minti ten harə da dər pəɗaki katən, kə Barən daana kə *kaa kə digi cetceti kə Pepeŋ də gəm. 27Gəəzi ten waataŋ, aŋ kaa gə minti hebkəna laki kənaŋ, sərdə kaa guudəŋa me wəra ajew də minti yə bay ase *Kumna kə Pepeŋa ba.»

Yeesu koloŋ dəra'i

(Mat. 17.1-8; Mar. 9.2-8)

28Kampar hiti azəgən adordə bə minti Yeesu a waataŋ kel teŋ, wə humuŋ anə Piyer, də Zaŋ, də Zaki guudu. Yə luŋ cəərə pərkiŋa bə ɗe a toose. 29Bə minti wə bə tooseŋ, duru anəkayya koloŋ hal. Dəməəmə nuutuŋ koloŋ wəra bə welɗe bərwa pələk-pələki. 30Ɗe a goleŋa, kaa ɓasi pəŋ diri bə keɗpe də Yeesu; haa anə *Moyisi də *Eli gə dayday. 31Yə vəɗaŋ dər pəɗaki də apəyaŋa, bə naale cəərə me du Zeruzalem naŋ. Me du haa de bə ku joŋre nuutuŋ wəra. 32Dər ko toŋa, Piyer də kaa kaayaŋ a kina seɗem-ɗem. Bə minti yə gunuŋ wəraŋ, yə asaŋ pəɗaki də apəy kə Yeesuŋ daana kaa ɓasiŋ suru laki.

33Bə minti kaa ɓasiŋ bə yaake Yeesuŋ, Piyer wəətunu minti: «Hulum bə hateŋ, haa pisi bə minti áŋ kənaŋ. Bədoona ana, are tope muryuki yaŋ soope, məna a nəənəm, məna a Moyisi, məna a Eli gəm.» Wə waataŋ haa minti harmə mo, guudiŋ paapa də duru ba. 34Bə minti wə bə waate bədoona anaŋ, aŋolooro bəŋ. Bə minti aŋolooro máŋ bə kulɓuyaŋ, walka jəŋ *kaa gə guuduŋ ablaw. 35Pepeŋ waataŋ kel da ada minti: «Haa kormon bə minti ten ŋəmnu. Aŋ jiɓru ku la pisi!» 36Də bə minti Pepeŋ waataŋ kel wəra anəkay, yə asaŋ máŋ Yeesu təwa'i. Yə zemeŋ seɗem cəərə kel teŋa. Dər ko toŋa, kel gə minti yə əsnəy, yə wəətənəy wəra a hulum ba.

Yeesu pi kəwal wəra cəərə pura

(Mat. 17.14-18; Mar. 9.14-27)

37A dibiini diŋa, Yeesu də kaa gə guudu soope'iŋ vaŋ warda cəərə pərkiŋ da adawra da. Kəya kaa kə ablaw jəmaŋ dər Yeesu. 38A ko toŋa hulum yaŋ adəwaldə kaa kə ablawa ada, wə əsəŋ bə naakte ku koloŋ minti: «Hulum bə hateŋ, ten jəm kamkam, asan caadə kormon la! Gud bə minti wə kaasəna məna faɗi. 39Kəwal ɗəltutu. Yə ɗəlnu neŋ, wə naake ku faɗi gəm, yə lədtu də səɓaki, kiɗikiŋ jupi wəra ku kip-kipi. Yə ləsu ablaw, yə təəku gəəli-gəəli, yə gəyu wəra ablaw. 40Ten jəŋ kamkam a *kaa gə guudum minti yə pəə kəwal teŋ la wəra, səma yə nəkaŋ ba.»

41Yeesu haraŋ kel minti: «Aŋ kaa té gə bay deŋ daana gə gul-gula gə hebkənaŋ! Hãã də ko muntu mo minti ten kirka a ji kəm dəərəŋ minti aŋ kolə la gə doo-deŋ? Hãã kotnə mo minti ten kirka a halaŋ kəm hale saksakiŋ? Bəəda də kormoyom kanda.» 42Bə minti pur bə bi da sar Yeesu daŋ, kəwal gəənu adawra kiŋtiŋ, yə əsəŋ bə lədtu kik-kik. Səma Yeesu jəmaŋ təbay a kəwal anə kaŋkaŋ faɗi, wə seereŋ pur wəra, wə əynu a buru. 43Kaŋ keɗe ŋələŋ gud səɓaki mooto kə Pepeŋa.

Yeesu hare bə waate sam me du

(Mat. 17.22-23; Mar. 9.30-32)

Bə minti kaŋ kəm gə ŋələ-ŋili cəərə kel gə minti Yeesu a jiiniŋ, wə waataŋ *kaa gə guuduŋ minti: 44«Aŋ holkə kosnoŋ la wəra pisi: yə bə aye ten *Kormə Hulúm yaŋ wəra a kaŋ.» 45Té ana ha'aŋ, yə əskəŋ gud kel nuutu gə minti wə wəətənəy ba. Pepeŋ mitniy guudiŋ wəra minti yə a iskiy ba. Yə ɗempa a mante gud kel teŋ ku pəda gəm, kas walka du.

Mindi dəŋaŋ kumsu boblo mo?

(Mat. 18.1-5; Mar. 9.33-37)

46Kaa gə gud Yeesuŋ əsəŋ bə ce awəya aduubə də kumsi minti, mindi dəŋaŋ kumsu boblo aduubə də té mo. 47Kəya, Yeesu əsnəy ɗiki di, wə haŋ beebe konce, wə usnu suru maŋ. 48Wə wəətənəy minti: «Hulum bə minti doŋ kel də beebe konceŋ ne kəya gud səmanaŋ, wə doŋ haa kel kətan gadi faɗi. Hulum bə minti doŋ kel kətan neŋ, wə doŋ haa kel də hulum bə minti gaanan daŋ gadi faɗi gəm. Səma, hulum bə minti hare kusru adoro adəwaldəŋa keɗeŋ, wə kole boblo dəŋaŋ kumsuŋ haa tó.»

Hulum bə minti paapa acukur dəŋ baŋ, wə hulum nəəti

(Mar. 9.38-41)

49Zaŋ əsəŋ bə waate Yeesu minti: «Hulum bə hateŋ, are fəlaŋ hulum kəman bə pi kəwal da warda kanda də səmam. Are wəətunu minti wə a doge bə ji kel teŋa hõy pəda, gud bə minti wə paapa hulum bə tapə-tepe guuduma də are ba.» 50Yeesu hərnu kel minti: «Aŋ a haw ku wəra ba. Hulum bə minti joŋre nuutuŋ paapa acukur də joŋre nəətiŋ baŋ, wə haa hulum nəətiŋ faɗi.»

Kaa kəman giidə seŋka də Samariŋa ɗempa a de irku də Yeesu ba

51Bə minti hi kə Yeesu bə koore apəyaŋ wəra maŋ, Yeesu minti tó koore Zeruzalem pərak-pəraki. 52Wə vaŋ kaa kə digi ajew na. Kəyaŋ, yə kooroŋ, yə ɗeŋ a tuuki giidə wəlasi kəmana giidə seŋka də *Samariŋa, bə ɗe a ɗampe ko a nuunu.

53Bə minti kaa gə giidə seŋka taŋ asaŋ minti Yeesu a kəkəya kəna bə ɗe Zeruzalem, yə duunu irku du ba#9.53 Kaanə Ziwifiŋ də kaanə Samariŋ acukur də kumsi. Gud acukur neete taŋa, kaanə Samariŋ ɗempa a de irku də Yeesu girdi ba haa sə teŋ.. 54Bə minti anə Zaki də Zaŋ, *kaa gə guuduŋ, asaŋ kel teŋ kəyaŋ, yə wəətunu minti: «Barkaŋ, tam bele minti are mantə cəwa də apəy da bə bi a kuy wəra mo?» 55Səma Yeesu haraŋ duru ciiri, wə jəmnəy təbay. 56A ko toŋa kəya, yə kooroŋ warna giidə wəlasi daalaŋ na.

Tepe bə gud Yeesuŋ naanaanə mo?

(Mat. 8.19-22)

57Bə minti anə Yeesu kəm a kəkəyaŋ, hulum kəman wəətunu minti: «Ten tepe guuduma a ko bə minti tam ɗe adaŋ keɗe.» 58Yeesu hərnu kel minti: «Anə gəbaygaŋ də tələŋkə neete, anə kaskoŋ də kuli neete gəm. Səma ten *Kormə Hulúm, ko nin bə isi lam bə faake paapa.»

59Yeesu waataŋ hulum baalaŋ pa minti: «Tapə la guudəna!» Səma hulum wəətunu minti: «Taakan la kəm bə ɗe a ge barən warda a tələŋkə da.» 60Yeesu hərnu kel minti: «Taakə kaa kə mee-me la bə jogɗe titi neeteŋa. Ɗee la a waate nəmtiŋ sam *Kumna kə Pepeŋ.»

61Kəya hulum baalaŋ waataŋ pa minti: «Barkaŋ, ten bə tepe yaŋ guuduma, səma taakan la kəm bə ɗe a waate kel a kaa gə giidə kuli nin.» 62Yeesu wəətunu minti: «Hulum bə minti doŋ agay də kəccəŋ ne kəəsu bə keɗéŋ, wə haraŋ duru ne adoroŋ, wə paapa bə nakə-neke karman a Kumna kə Pepeŋa ba.» – 9 10

Currently Selected:

LIKI 9: KERNT05

Highlight

Copy