LIKI 10

Yeesu ve kaa nuutu hor-hor seeɗa ciiri ɓasi warna

(Mat. 9.37-38; 10.7-16; Mar. 6.8-11; Liki 9.3-5)

1Adordə teŋa kəya, Barkaŋ vəraŋ *kaa gə guudu gaalaŋ hor-hor seeɗa ciiri ɓasi. Wə fəknəy warna ɓas-ɓasi tiinu na giidə kuli kəmtəŋ na daana a ko bə minti wə sə a bə ɗeete yaŋ də kusru ada naŋ keɗeŋ. 2Wə wəətənəy minti: «Kaasaw jəŋ ablaw, səma kaa kə cəməy gə kerpə-kerpe. Aŋ toosə bərdə akaŋ la minti wə vaa kaa gə joŋre da də ada bə bi a ceme kaasaw nuutuŋ wəra. 3Aŋ ɗee la! Ten vaanaŋ ha'aŋ damdi karmə kaamaŋ adəwaldə kaaya kə pəəri ana. 4Aŋ a humi mandəhaŋ bə feke soloy kaasəŋa ba, mandəhaŋ bə ve karman baalaŋ bə gəm, kalmasi bə gəm. Aŋ a de cəərəŋ a kəkəya bə mirki huluma ba.

5Bə minti aŋ ɗəlaŋ veŋ ne akera ger hulumaŋ, aŋ waatə la kəm minti: ‹Kəkaɓiŋ jəə la cəərə kuli toŋa!› 6Hulum bə bele kəkaɓiŋ jəəne adaŋ, kəkaɓi nəətiŋ ji yaŋ cuuru. Jəəne paapaŋ, kəkaɓi nəətiŋ hare yaŋ cəərəŋ da. 7Aŋ əsə la giidə kuli bə minti yə doonoŋ irku dəŋ ne adaŋ. Kar gə minti yə aynaŋ dəŋ ne keɗeŋ, aŋ həməy la, aŋ say la. Hulum bə joŋreŋ fele werke nuutuŋ kasi kaa gə minti wə bə kəyəya, haa akəsa. Aŋ a ɗe a həəti ger kaa gaalaŋa ba.

8Aŋ vaŋ ne giidə vil də minti yə doonoŋ irku dəŋ ne adaŋ, karman bə minti yə aynaŋ dəŋ neŋ, aŋ həmu la. 9Aŋ seerə kaa kə ɗeme gə giidə vil taŋ la wəra. Aŋ wəətəy la minti: ‹Hebkəna haa ko bə minti Pepeŋ maŋ bə hame kumna nuutuŋ cəərəŋaŋ.› 10Səma bə minti aŋ vaŋ ne giidə vil kəmana minti yə bəlaŋ doŋ irku dəŋ ada baŋ, aŋ vaa la wəra a kəkəy bə giidə vil taŋa. Aŋ wəətəy la minti: 11‹Golə la, tərwə də giidə vil nəəti də minti kampar areŋ, are po'oŋ dəŋ ha'aŋ dərəŋ na! Səma aŋ asə la wəra pisi minti hebkəna haa ko bə minti Pepeŋ maŋ bə hame Kumna nuutuŋ.› 12Ten waataŋ: hi kəman yaŋ məna, kəəti kə Pepeŋ ji yaŋ gəəli ablaw cəərə vil taŋa, dəŋaŋ kə vil də Sodom.»

Kaa gə minti ɗempa a de kel kə Yeesuŋ baŋ

(Mat. 11.21-23)

13«Gəəliŋ nəəti, aŋ kaanə Korazeŋ! Gəəliŋ nəəti, aŋ kaanə Betsaydaŋ! Gud minti miɗi bə minti jəŋ gerdəŋaŋ a jəə la giidə vil də Tira daana Sidoŋ, yə a kəna koloŋ kirki ne a baymeleŋ dayday. Yə a kəna təraŋ dəməəmə də laawe siri, yə a kəna əstəŋ dər koroya bə hage. 14Bədoona ana ta, dər hi bə kəətiŋaŋ, Pepeŋ jeme kəəti boblo yaŋ cəərəŋa, dəŋaŋ kə kaanə Tir də Sidoŋ. 15Te vil də Kapernam, te ɗəkəŋ haa minti Pepeŋ əŋkəy səməy yaŋ warna apəy na mo? Paapa! Wə bəsəy yaŋ wəra a ko kə kaa kə mee-meŋa.»

16Yeesu waataŋ *kaa gə guuduŋ pa minti: «Hulum bə minti bə iski guudəŋaŋ, wə bə iski haa guudəna. Hulum bə minti balnaŋ kel dəŋ baŋ, wə bəlaŋ ba haa kel dən. Hulum bə minti balnan kel dən baŋ, wə bəlaŋ ba haa kel də hulum bə minti gaanan daŋ gəm.»

Kaa hor-hor seeɗa ciiri ɓasiŋhare da sar Yeesu da

17Kaa hor-hor seeɗa ciiri ɓasi gə minti Yeesu a vəənəy haraŋ suru da də waale ablaw. Yə əsəŋ bə wəətu minti: «Barkaŋ, koo kəwal də kusri əskətəŋ ku are gud səmama!» 18Yeesu hərnəy kel minti: «Ten asaŋ *Sataŋ bə awe da apəy da damdi ko welɗeŋ ana. 19Golə la! Ten aynaŋ abay də tayte kancaw də turtiŋ, bə ɓalke səɓaki kə Hulum bə acukur dəŋ wəra keɗe. Karman neke bə jəŋ baymele anə weseka pəda. 20Səma, aŋ a waale gud bə minti kəwal əskətənəŋ kuŋ ba, aŋ waalə la ha'aŋ gud bə minti səmaŋ bə jeerə-jeere apəy naŋ.»

Yeesu tokɗe Pepeŋ

(Mat. 11.25-27)

21Də ko toŋ faɗi Tiiru Cetcetaŋ ɗosoŋ tarmə Yeesu wəra də waaleŋ. Kəya wə minti: «Ten tokɗom Aba, Bərdə ko bə apəyaŋ də ko bə adawraŋ, gud bə minti tam meteŋ kel teŋ wəra dər kaa kə asə-aseŋa daana dər kaa gə minti də ciiriŋa, səma tam vəɗnəy wəra a kəmar koncoŋ. Bədoona Aba, teŋ doonom dərəm bə ji bədoona ana.» 22Kəya Yeesu əsəŋ bə waate kaŋa minti: «Barən aynan kar wəra keɗe. Hulum anə məna asaŋ minti Kormə Pepeŋ haa mindi mo ba, əsnu ha'aŋ Abaŋ ɗaaməna. Hulum asaŋ minti Abaŋ haa mindi mo ba, əsnu ha'aŋ Kurmuyuŋ ɗaaməna daana hulum bə minti Kurmuyuŋ bele vəɗu du wəraŋ.»

23A ko toŋa kəya, wə haraŋ duru cəərə *kaa gə guuduŋa, wə wəətənəy bay ciiri minti: «Waaleŋ nəəti gud bə minti dərəŋ bə ase kel teŋa. 24Ten bə waataŋa: *kaa kə jogte ku mini kə Pepeŋ də kəkamnaŋ ablaw a bəlaŋ minti té asə kar gə minti aŋ bə əsəyaŋ la, səma yə əsnəy ba. Yə a bəlaŋ minti té əskə kel gə minti aŋ bə iskiyaŋ la, səma yə iskiniy ba.»

Ku kumti cəərə hulum bə Samari pisiŋa

(Mat. 22.34-40; Mar. 12.28-31)

25Kəya *hulum kəman bə hate ku gili kə Pepeŋ faŋ apəya gud bə minti wə bele gole koɗ Yeesu. Wə ləənu ku minti: «Hulum bə hateŋ, ten jəə maa la minti ten falə dədərgə də bay teweŋ laŋ mo?» 26Yeesu wəətunu minti: «Kel gə jeerə-jeere giidə *ku giliŋa minti harmə mo? Tam əŋku haa naanaanə mo?» 27Wə hərnu kel minti: «Tam balə Barkaŋ Pep nəmti la də ku tarməyam keɗe, də dədərgə dəm keɗe, də səɓaki dəm keɗe, də ɗiki dəm keɗe#10.27 Deut. 6.5. Tam balə kumsum la damdi kusrum ana faɗi#10.27 Lév. 19.18.» 28Yeesu wəətunu minti: «Tam haraŋ kel a kuɗiŋa. Jəə la bədoona ana, tam fele dədərgəŋ yaŋ.»

29Hulum toŋ bele ɗekre kel nuutuŋ səm moŋ, wə haraŋ bə le ku Yeesu minti: «Hulum bə agəjaŋ dən haa mindi mo?» 30Yeesu hərnu kel minti: «Hulum kəman faŋ Zeruzalem da bə sorke bə koore giidə seŋka də Zeriko. Bə minti wə a kəkəya caw, wə awaŋ kasi kaa kə aguma. Kəya yə duunu, yə humuŋ kar nuutuŋ wəra dəgaaya də dəməəmə də suruŋ keɗe, yə lətnu, lətnu, lətnu. Kəya yə kooroŋ, yə yəəkunu ləmkər.

31Kəya *hulum bə keere Pepeŋ haŋ kəkəy toŋ bə ɗe caw gəm. Bə minti wə asaŋ hulum anəkay, wə doŋ wəra kar, wə kooroŋ. 32Hulum kəman a kaasaw də *Levi tuukuŋ bədoona ana pa. Bə minti wə asaŋ hulum kəyaŋ, wə doŋ wəra kar, wə kooroŋ. 33Səma, *hulum bə Samari yaŋ bə gəryi a kəkəy toŋa caw gəm. Bə minti wə tuukuŋ də aŋar duŋ, wə əsnu caadu. 34Wə zeŋ suru da, wə kəənu son dər tosoŋa, wə juunu gud kəɗaw dəra gəm, kəya wə kulnə. Wə həənu cəərə agerhẽ nuutuŋa, wə kooroŋ duuru a kuli bə həəti kə kaa kə gəryiŋ. A ko toŋa kəya, wə juunu guudu ablaw. 35A dibiini diŋa, wə humuŋ soloy dər hiti bə ji joŋre ɓasi, wə əynu a bərdə kuliŋ. Wə wəətunu minti: ‹Jəw guudu la. Jəəne minti tam ɓalkaŋ soloy ne dəŋaŋ bə minti ten aynam dəm kəyaŋ, ten werkem yaŋ wəra ten də kusrən a ko bə minti ten haraŋ də neŋ.›»

36Kəya Yeesu minti: «A ɗiki dəmaŋ, gud kaa té soope'iŋa lakaŋ, hulum bə agəjaŋ də hulum bə minti awaŋ kasi kaa kə agumaŋ, haa muntu mo?» 37Hulum bə hate ku gili kə Pepeŋ hərnu kel minti: «Haa hulum bə minti jəŋ giidu pəsaŋ suruŋ.» Yeesu wəətunu minti: «Tam gəm, ɗee la a ji bədoona gəm.»

Yeesu ger anə Marta də Mari

38Bə minti anə Yeesu bə gəryi lam, wə tuukuŋ giidə wəlasi kəmana. Həlgə yaŋ ada, sam minti Marta, a duunu irku du gerda. 39Nawrə yaŋ, sam minti Mari. A əsəŋ maŋ cin kampar Barkaŋa bə iski kel nuutuŋa. 40Səma Marta bə geye də joŋreŋ ataaya ablaw. Kəya a bəŋ sar Yeesu, a wəətunu minti: «Barkaŋ, kel teŋ paapa bə ɗaməma bə mo minti nawrən yaakənan bə ji joŋreŋa məna'iŋ? Waatə la minti a bəəda a kəyan!» 41Barkaŋ harna kel minti: «Marta, Marta, te bə ɗiki daana te bə geye kusri də kar kə ji gə ablaw. 42Səma karman yaŋ məna bə daŋə-deŋe kumsuŋ. Mari ŋəmaŋ gal pəsaŋ, hulum nəkaŋ bə doorə də wəra kaasa ba.»

Currently Selected:

LIKI 10: KERNT05

Highlight

Copy