LIKI 8

Kəram gə minti bə ɗeete gud Yeesuŋ

1Adordə teŋa, Yeesu bə gəryi giidə vila də wəlasiŋ keɗe, bə waate *Kel pəsaŋ kəmarwaŋ gə *Kumna kə Pepeŋa a kaŋ. Kaa gə guudu hor ciiri ɓasiŋ bə gəryi duuru, 2də kəram gə minti wə a piitini kəwal wəra ciiriŋ daana gə minti wə a siirini wəra ku ɗeme neeteŋa. Kəram teŋ ha'aŋ, anə Mari də Magdala də minti Yeesu pəŋ kəwal seeɗa'iŋ wəra cəərəŋ, 3Jan mar Cusa, hulum bə ame joŋre kə *Erodiŋ, Suzan, də kəram gaalaŋ ablaw. Kəram teŋ káyáŋ Yeesu də *kaa gə guuduŋ də kar neeteŋ.

Ku kumti cəərə hulum bə reye kolɓoya

(Mat. 13.1-9; Mar. 4.1-9)

4Kaa kə ablaw təpaŋ sar Yeesu, yə pəətəŋ warda giidə kuli kəmtəŋ da dəra'-dəra'i keɗe. Kəya Yeesu wəətənəy də *ku kumti minti: 5«Hulum kəman kəlaŋ wəra bə ɗe a reye kolɓoy giidə aka nuutuŋa. Bə minti wə bə reye caw, surduŋ vaŋ agəjaŋ də kəkəy na. Kaŋ təytunu wəra, anə kaskoŋ təknu wəra kuya le'-le'i. 6Surduŋ vaŋ a ko bə pərkiŋa. Bə minti wə dəyaŋ wəraŋ, wə suŋ, səma wə hẽŋeŋ wəra keskeleki gud bə minti logom paapa guudu baŋ. 7Surduŋ ɗeŋ a ve a ko bə kəjəma. Yə suŋ də kumsi keɗe, səma kəjəm huufunu wəra. 8Surduŋ vaŋ a ko bə cimə-cimiŋa. Wə dəyaŋ wəra, wə suŋ wəra, wə waŋ degeɓ-geɓi. Kolɓoy bə məna, kəəsu məna waŋ pisi kəsi mo, bədoona.» Yeesu waataŋ koloŋ minti: «Hulum bə minti jəəne də kosoŋ kirka əskiŋ, wə əskə la pisi faɗi!»

Yeesu waate kel də ku kumti səm mo?

(Mat. 13.10-13; Mar. 4.10-12)

9Kəya, *kaa gə gud Yeesuŋ ləənu ku minti ku kumti té gə minti wə a wəətənəy kənaŋ, guudiŋ haa minti harmə mo? 10Wə hərnəy kel minti: «Aŋ teŋ ha'aŋ, kel gə waate sam *Kumna kə Pep gə minti a gə ŋoyə-ŋoyeŋ, wə vaɗnaŋ dəŋ wəra a nəənəŋ. Səma kaa kaayaŋ teŋ, ten wəətəy di də ku kumti haa minti jəəne nuutu minti diri bə goleŋ, yə a ase ba. Jəəne nuutu minti kusniy bə iskiŋ, yə a iski guudiŋ ba.»

Yeesu ke gud ku kumti gə cəərə hulum bə reye kolɓoy wəra

(Mat. 13.18-23; Mar. 4.13-20)

11«Golə la, gud *ku kumti teŋ haa minti: karman bə minti hulum bə rəyuŋ, haa kel kə Pepeŋ. 12Sərdə duru gə minti vaŋ agəjaŋ də kəkəyaŋ, haa kaa gə minti iski kel kə Pepeŋ. Səma Nərtitiŋ bi a humuy kel té gə minti a vaŋ tərməyiŋ wəra bə hay kuy wəra bay de, minti yə a fele seereŋ ba. 13Sərdə kaayaŋ gə minti a ko bə pərkiŋaŋ, haa kaa gə minti əski kel kə Pepeŋ, kəya yə doy də waale faɗiŋ. Səma yə paapa gə vaa-ve kəsar a kel teŋa ba. Yə de anə sawəwa, gəəliŋ fəlnəy neŋ, kəya yə yaake kəkəy bə minti yə cuuruŋ faɗi. 14Sirdi kaayaŋ gə minti awtaŋ adəwaldə kəjəmaŋ, haa kaa gə minti əski kel kə Pepeŋ. Səma geye bə ɗikiŋ, bə begeŋ, də ɗiki bə kar pəsaŋ gə cəərə seŋkaŋ, huufuŋ kel kə Pepeŋ wəra ku tərməyi garja. De neeteŋ si ajewa pəda. 15Kaasaw gə minti raytaŋ a ko bə cimə-cimiŋaŋ, haa kaa gə minti iski kel kə Pepeŋ, yə doy ŋəŋ ku tərməyi ɗeker pasaŋ. De neeteŋ ɗe ajewa pisi gud bə minti yə de giidi dər gəəliŋa.»

Lampaŋ wele koŋ

(Mar. 4.21-25)

16«Hulum do'oŋ lampa neŋ, wə guɓi karman wəra cəərə ba, wə mala wəra gud kəɓəra bə gəm. Wə mala wəra apəya a ko bə maltaŋa minti kaŋ vaŋ ne aləwa naŋ, yə asə pəɗakiŋ la. 17Kar gə metə-mete gə hebkənaŋ, Pepeŋ vəɗəy yaŋ wəra. Kel gə dəgaaya-dəgaayaŋ, Pepeŋ gay guudi yaŋ wəra pəɗaki.

18Aŋ doo kusrəŋ la pisi a kəkəy bə iski kela. Hulum bə minti əskəŋ kel neŋ, we fele yaŋ ada ablaw pa. Səma, hulum bə minti ɗempa a iski kel baŋ, nuutu weseki gə minti wə ɗiki minti tó iskiniy, yə ɓəlku du wəra ada ɓalka pa.»

Kamnə Yeesu gə gəəzə-gəəziŋ

(Mat. 12.46-50; Mar. 3.31-35)

19Nər Yeesu də kəsəənuŋ bəŋ suru maŋ, səma yə ɗempa a fele ko bə ɗe suru ba kas kaa kə ablaw. 20Kaŋ waataŋ Yeesu minti: «Ba'i kəm baŋ, anə nərəm yaŋ kəna laki tiilima də kəsaanam, yə də tay dəm.» 21Səma Yeesu haraŋ kel a kaŋ keɗe minti: «Anə nərən də kəsaanan haa kaa gə minti bə jeɓre kel kə Pepeŋa daana bə ji joŋre diiriŋ.»

Yeesu zeme kaŋkaw

(Mat. 8.18, 23-27; Mar. 4.35-41)

22Hõy məna, Yeesu luŋ giidə turti də *kaa gə guuduŋ. Kəya wə wəətənəy minti té cakɗə la warna agal də vor naytaŋ na. Kəya yə zogoŋ turtiŋ, yə kooroŋ. 23Bə minti yə bə hoɗe lam, Yeesu kəlaŋ kin. Ɗe a goleŋa, kaŋkaw kəmtəŋ haŋ da ne. Kan əsəŋ bə acce giidə turtiŋa. Turtiŋ əsəŋ bə dere, yə maŋ bə bese wəra. 24Kəya kaa gə gud Yeesuŋ bəŋ suru, yə gunnu wəra. Yə wəətunu minti: «Hulum bə hateŋ! Hulum bə hateŋ! Áŋ wəra bə bese!» Yeesu gunuŋ wəra, wə jəmaŋ təbay a kaŋkaw də kan gə caɓtə-caɓteŋ minti yə zemə la. Kəya yə zemeŋ, yə əsəŋ ɗeket-keti faɗi. 25Adordə teŋa kəya, Yeesu waataŋ kaa gə guuduŋ minti: «De nəətiŋ ane mo?» A ko toŋa kəya, walka jiini, yə ŋələŋ ablaw. Yə əsəŋ bə le ku kumsi minti: «Hulum toŋ ha'aŋ, wə haa gidiirə hulum muntu pə mo minti wə jeme təbay a kaŋkaw də kan, yə humi kosoŋ cuuruŋ?»

Yeesu pi kəwal wəra cəərə huluma

(Mat. 8.28-34; Mar. 5.1-20)

26A ko toŋa kəya, Yeesu də kaa gə guuduŋ tuukuŋ giidə seŋka də Gerasəna, seŋka də minti wəra cakaɗi agal də vor naytaŋ na, ɗeker tiinə seŋka də Galileŋa. 27Bə minti Yeesu luŋ wəra adawraŋ, hulum yaŋ giidə kuliŋa ada bəŋ a ŋefe duuru. Hulum toŋ, kəwal cuuru. Wə hətəŋ ablaw bay ve dəməəmə suru. Wə həəti giidə kuli ba, wə həəti warna cəərə teɗker na. 28-29Kəwal bə ləsu saksaki. Kaŋ a kəətunu agəyam kəəsu daana kəmpuru keɗe, səma wə wiɗtu wəra. Kəwal koorte warna duuru maska na. Bə minti wə asaŋ Yeesuŋ, wə naaktaŋ ku, wə bəŋ a ve də guguuru tiinu. Wə waataŋ koloŋ minti: «Yeesu, Kormə Pep bə Daŋə-Deŋeŋ, kel nin haŋ maa sarəma mo? Ten jəm kamkam, a ləsan ba!» Wə waataŋ teŋ ha'aŋ gud bə minti Yeesu a waataŋ kəwal minti yə pəə la wəra cuuruŋ.

30Kəya Yeesu ləənu ku minti: «Səmam minti harmə mo?» Tó minti: «Səman minti ‹Kaa kə Ablaw›.» Wə waataŋ bədoona haa gud bə minti kəwal cuuru ablaw paapa kirka aŋke ba. 31Kəya kəwal jəŋ kamkam a Yeesu minti wə a ve té a tələŋkə kələmləm də bay nobeŋa ba.

32Anə maŋŋa sar ko toŋa, gaduuru yaŋ bə hame cəərə pərkiŋa ada ablaw anə gəd-gədi. Kəwal əsəŋ bə ji kamkama a Yeesu minti wə ayə kəkəy la a té bə feke cəərə gaduuru teŋa. Kəya wə əynəy kəkəy faɗi. 33A ko toŋa kəwal pəŋ wəra cəərə huluma, yə ɗeŋ a feke cəərə gaduuruŋa. Ɗe a gole kəyaŋ, gaduuruŋ sorkoŋ warda də tara cəərə pərkiŋ da, yə vaŋ anə cuuwa dər kana, yə meŋ wəra ada cap-cap-capi keɗe.

34Bə minti kaa kə ame gaduuruŋ asaŋ kel gə minti jəŋ kəyaŋ, yə rəyaŋ də tara, yə kooroŋ giidə vil daana giidə kuli bə agəjaŋ dəŋ bə ɗe a tope bəlam də kel teŋ a kaŋ. 35Kəya kaŋ vaŋ wəra, yə kooroŋ da bə bi a gole karman bə minti a jəŋ faɗi. Bə minti yə tuukuŋ sar Yeesuŋ, yə asaŋ hulum bə minti kəwal a jəŋ cuuru wəra cin kampar Yeesu, wə bə tarə-tere dəməəmə suru, wə wəra anə kaŋkaŋ gəm. Kəya walka jəmnəy gud kel teŋa. 36Kaa gə minti a asaŋ kel teŋ keɗeŋ, yə əsəŋ bə tope bəlam də kela a kaa gə minti tuukuŋ siri adoroŋ. Yə tupniy bəlam də hel də minti hulum seereŋ wəra dəərəŋ.

37Kəya kaa gə giidə seŋka də Gerasənaŋ keɗe jəŋ kamkam a Yeesu minti wə yaakə seŋka kə té la, gud bə minti walka jiini ablaw. Kəya Yeesu luŋ giidə turtiŋa bə koore. 38Hulum bə minti kəwal pəŋ wəra cuuruŋ əsəŋ bə jəw kamkama minti wə yaakə tó la bə ɗe guudu gəm. Səma Yeesu hərnu, wə wəətunu minti: 39«Ɗee la akera a tope bəlam də kel gə minti Pepeŋ jiini sarəmaŋ keɗe.» Kəya wə kooroŋ faɗi, wə ɗeŋ a isi bə tope bəlam də kel gə minti Yeesu jiiniy suru keɗeŋ wəra giidə vila keɗe.

Yeesu seere tərnə Zayrusiŋ daana həlgə də minti ɗootoŋ dəməəmə nuutuŋ

(Mat. 9.18-26; Mar. 5.21-43)

40Bə minti Yeesu haraŋ daŋ, kaŋ mirkunu də waale gud bə minti yə a bə məwa. 41A ko toŋa kəya, hulum bəŋ sar Yeesu, səmu minti Zayrusi. Wə kumna cəərə *kuli bə toose kə kaanə Ziwifiŋ adaŋ. Kəya wə haɓaŋ tiinə Yeesu, wə juunu kamkam minti wə ɗee la ger tó, 42gud bə minti tərnə tó wəra maŋ bə me. A kəəsu tá məna faɗi, laate də kampar hor cuuru ɓasi. Bə minti Yeesu a kəkəy bə ɗeŋa ger Zayrusiŋ, kaa kə ablaw bə hibtu. 43A ko toŋa həlgə yaŋ ada, tiirə laataŋ bə ɗəma hor cuuru ɓasi. A bəsaŋ kar naataŋ wəra keɗe a kəkəy bə ɗeete a doktoroŋa. Də teŋ keɗeŋ, hulum seerəna wəra anə məna ba. 44Kəya a əskəŋ sam Yeesu da, a həənu bəlam du da. A zeŋ kirku, a ɗeŋ a ɗoote ku dəməəmə nuutuŋ. Hebkən-hebkəna faɗi, tiirə yaakəna wəra.

45Kəya Yeesu minti: «Mindi ɗootonon mo?» Kaŋ keɗe maltaŋ kuy minti paapa té ba. A ko toŋa Piyer minti: «Hulum bə hateŋ, kaa gə minti bə hebtəma wəra ɓəki keɗe ɗootonom haa té.» 46Səma Yeesu minti: «Hulum ɗootonon. Ten asaŋ minti səɓaki kəlaŋ wəra sarəna.» 47Bə minti həlgəŋ asaŋ wəra minti tá paapa kir mete kel teŋ pədaŋ, a bəŋ bə miiri yaɓ-yaɓi, a haɓaŋ tiinu. Kəya a tupnu bəlam də kel gə minti tá ɗuutunu guudiŋ wəra tiinə kaŋa keɗe, daana minti tá seereŋ wəra faɗi ŋaanaanə moŋ. 48Kəya Yeesu waatəna minti: «Tərnənti, de niitiŋ siiriniy ne wəra. Ɗee la kəkaaɓa.»

49Ku bay awe adawra cekiŋ, hulum kəman bə ger kumna bə cəərə kuli bə tooseŋ tuluŋ bə bi a wəətu minti: «Tərnəm warda də mee-me, a geye hulum bə hateŋ pəda.» 50Bə minti Yeesu əskəŋ kel teŋ, wə waataŋ Zayrusi minti: «Tarməyam a ceme wəra ba, doo la guudəna təwa faɗi, a seere yaŋ wəra.»

51Bə minti wə tuukuŋ ger Zayrusiŋ, wə yaakaŋ hulum baalaŋ bə kele guudu ba. Wə yaakaŋ ha'aŋ anə Piyer də Zaŋ, də Zaki, də bar tər, də nərə təwa'i. 52Kaŋ keɗe bə hage, bə laawe gud kel də təra. Kəya Yeesu minti: «Aŋ a hage ba! A paapa də mee-me ba, səma a kəlaŋ kəna kin.» 53Kəya kaŋ əsəŋ bə dəfɗu faɗi gud bə minti yə wəra gə asə-ase minti a wəra də mee-me. 54Kəya Yeesu kəlaŋ gud təra, wə haana kaasa, wə waatəna koloŋ minti: «Tər, faa la apəya!» 55A haraŋ wəra dədərgə, a faŋ wəra apəya faɗi. Yeesu wəətənəy minti yə aya hame la. 56Kamnaŋ bəsaŋ máŋ kuy ha'-ha'i gə ŋələ-ŋili, səma Yeesu wəətənəy minti, kel gə minti jəŋ ha'aŋ, yə a wəətəy wəra a hulum ba.

Currently Selected:

LIKI 8: KERNT05

Highlight

Copy