LIKI 7

Yeesu seere hulum bə joŋre kə kumna də sooto

(Mat. 8.5-13; Zaŋ 4.46-54)

1Bə minti Yeesu təwaŋ kel kə waate nuutuŋ wəra keɗe a kaŋ, wə kəlaŋ giidə vil də Kapernama. 2Kumna də sooto kəsaŋ kəman yaŋ ada. Hulum bə joŋre nuutu bə minti wə bəlu ablaw kasi ɗeme, wə golde bə me. 3Bə minti wə əskəŋ sam Yeesuŋ, wə vaŋ kaa kəmtəŋ gə tiinə kaŋ suru a jəw kamkam minti wə bəəda a seere hulum bə joŋre kə toŋ wəra. 4Bə minti yə tuukuŋ sar Yeesuŋ, yə juunu kamkam ablaw, yə wəətunu minti: «Hulum toŋ bə nakə-neke kir minti tam kəyu la gud bə minti 5wə bele kaa náŋ ablaw. Hərsəŋ *kuli bə toose naareŋ haa tó.»

6Kəya Yeesu haraŋ diiri keɗe. Bə minti yə tuukuŋ maŋ sar kuliŋaŋ, kumna də sootoŋ vaŋ də gədəəru bə ɗe a waate Yeesu minti: «Barkaŋ, a geye kusrum ba! Ten paapa bə nakə-neke kir minti tam kalə la gerdəna ba. 7Gud teŋa ta, ten asaŋ kusrən paapa kir ɗe a ŋefe dəərəm də kusrən ba. Səma waatə kel la nəmti məna təwa, hulum bə joŋre nin seere yaŋ wəra. 8Ten ha'aŋ, kumna bə waatan səman yaŋ gəm. Ten waate sam kəsooto gəm. Ten waate kəman məna minti: ‹Ɗee la!›, wə ɗe. Ten waate naayaw minti: ‹Bəəda!›, wə bi da. Ten waate hulum bə joŋre nin minti: ‹Jəə la anəkay!›, wə ji.»

9Bə minti Yeesu əskəŋ kel teŋ kəyaŋ, wə ŋələŋ gud kel nuutuŋa. Wə haraŋ duru cəərə kaa gə minti bə ɗe guuduŋ, wə wəətənəy minti: «Ten waataŋ, jəə la nuutu *Israyel da ɗaw, ten fəlaŋ de hõy də ada bədoona ana ba.»

10Bə minti kaa gə minti kumnaŋ a vəənəy haraŋ aker na girdu naŋ, yə fəlaŋ hulum bə joŋreŋ wəra bə seerə-seere.

Yeesu hare kormə həlgə də bay wəra dədərgə

11Kəya Yeesu kooroŋ giidə vil də Nayin pa. *Kaa gə guuduŋ də kaa kə ablaw bə ɗe guudu. 12Bə minti Yeesu maŋ bə tuuki ku goŋ bə ɓəkə-ɓiki cəərə vilaŋ, kaa əsəŋ bə ve da warda lam bə hale hulum bə mee-me bə ɗe a gaw a tələŋkə. Pur toŋ kasi nuru ɗaaməna, nuru həlgə də bay. Kaa gə giidə kuliŋ ablaw kooroŋ bə ɗe a mele həlgəŋ. 13Bə minti Barkaŋ asnaŋ, wə asna caadə. Wə waatəna minti: «A hage ba!» 14Kəya wə zeŋ da, wə məlaŋ kəəsu a kəbaŋ gə hawa. A ko toŋa kaa kə həluŋ əsəŋ laki. Yeesu minti: «Puranul, ten waatam, faa la apəya!» 15Kəya wə faŋ je'i, wə əsəŋ bə waate kela. Yeesu əynu a nuru. 16Kaŋ keɗe jəŋ walka, yə tokɗoŋ Pepeŋ minti: «*Hulum boblo bə jogte ku mini kə Pepeŋ vəɗaŋ ne aduubə də áŋa. Pepeŋ bəŋ ne a keye kaa nuutuŋ.»

17Kel kə Yeesu teŋ duusuŋ wəra giidə seŋka də Zudeŋa keɗe daana seŋka də minti wəra cəərə ɓəki keɗeŋ.

Zaŋ Batisi ve kaa sar Yeesu

(Mat. 11.2-6)

18*Kaa gə gud Zaŋ Batisiŋ əsəŋ bə tope bəlam də kel gə minti Yeesu jiiniŋ wəra keɗe a Zaŋ. Kəya Zaŋ mantaŋ guudi ɓasi, 19wə vəənəy sar Barkaŋ a law ku minti: «Tam haa hulum bə minti a sə a bi mo? Jəəne paapaŋ, are məə baalaŋ la mo?» 20Bə minti yə tuukuŋ sar Yeesuŋ, yə wəətunu minti: «Zaŋ Batisi vaŋ are səram da a lam kum minti: ‹Tam haa hulum bə minti a sə a bi mo? Jəəne paapaŋ, are məə baalaŋ la mo?›»

21Dər ko toŋa, Yeesu seereŋ kaŋ wəra ablaw ku gidiirə ɗeme ablaw. Wə pəŋ kəwal wəra ablaw cəərə kaŋa, wə pəŋtəŋ dər kaa kə bəwə-bəwi wəra ablaw gəm. 22Kəya wə haraŋ kel a kaa gə minti Zaŋ vəənəy daŋ minti: «Aŋ ɗee la a waate Zaŋ cəərə kel gə minti aŋ əsnəy daana iskiniŋ: kaa kə bəwə-bəwiŋ bə ase, kaa kə dəlay bə ɗe, kaa kə fə̃yaŋ seereŋ wəra, kaa kə nəŋkaŋ bə iski, kaa kə mee-meŋ haraŋ wəra dədərgə, kaa kə caacaŋ bə iski *Kel Pəsaŋ kəmarwaŋ kə Pepeŋa. 23Waaleŋ kə hulum bə minti yaakaŋ de bə guudən gud kel dəna baŋ.»

Yeesu waate sam Zaŋ Batisi

(Mat. 11.7-11, 16-19)

24Bə minti kaa gə minti Zaŋ a vəənəy daŋ kooroŋ kooraŋ, Yeesu əsəŋ bə waate sam Zaŋa a kaa kə ablaw minti: «Aŋ a ɗeŋ a gole giidə fula haa maa mo? Hulum bə boobo bə minti bə velwe akas derga ɗoote kas kaŋkaw ana mo? 25Jəəne paapaŋ, aŋ ɗeŋ a gole haa maa mo? Hulum bə ganə-gene də dəməəmə pasa mo? Səma kaa kə hurma gə minti gə ganə-gene də dəməəmə pasaŋ, teŋ ger kəkamnaŋa. 26Aŋ ɗeŋ a gole haa maa tə mo? *Hulum bə jogte ku mini kə Pepeŋ mo? Bədoona gəəzi ten waataŋ ha'aŋ, wə dəŋaŋ hulum bə jogte ku mini kə Pepeŋ pə ɗaw. 27Zaŋ ha'aŋ hulum bə minti Kefter kə Pepeŋ waataŋ wəra cuuru minti: ‹Ten Pepeŋ bə gam hulum bə digi yaŋ tiinim na a ɗampam kəkəy warna tiinim na#7.27 Mal. 3.1.› 28Səma ten waataŋ, adəwaldə kaa gə minti kəram wəənəy keɗeŋ, hulum bə deŋe Zaŋ boblo paapa anə məna ba. Ana doloy ɗaw, hulum bə minti jəəne nuutu adoro ne'-ne'iŋ a *Kumna kə Pepeŋaŋ, wə dəŋaŋ Zaŋ boblo.

29Kaŋ keɗe, də *kaa kə tope lambaŋ ada gəm, əskəŋ kel kə Zaŋ. Yə asaŋ minti Pepeŋ ɗeker, yə doŋ haa bə ji batem kə Zaŋ. 30Səma kaanə *Farisiyeŋ də *kaa kə hate ku gili kə Pepeŋ, té bəlaŋ kel gə minti giidə Pepeŋ a bəlnəy ciiri ba a ko bə minti yə bəlaŋ ji bə batem kə Zaŋ baŋ.»

31Yeesu waataŋ pa minti: «Ten ŋarə kaa kə dogoynaŋ la haa də mindi tə mo? Yə təkaŋ haa anə mindi mo? 32Yə gə ŋarə-ŋere də kəmar koncoŋ gə minti gə əsə-isi a ko bə aluma. Yə naakte kuy a kumsi minti:

‹Are ufnu parway, aŋ hurgunu ba!

Are haŋ gudul bə hage, aŋ hagaŋ ba!›

33Bədoona ana, Zaŋ Batisi bəŋ, wə hamte anə hərəp-hərəpi ba, wə sete kumuy bə gəm. Aŋ minti: ‹Wə də kəwal cuuru!› 34Ten *Kormə Hulúm bəŋ, ten hame, ten se. Aŋ minti: ‹Golə hulum toŋ la kəm! Wə də həryəm də kar keɗe, də kumuy gəm. Wə jaa də kaa kə tope lambaŋ, də kaa gə minti jəəti baymele ablaw gəm.› 35Də teŋ keɗe, ase kə Pepeŋ vəɗaŋ wəra pisi ɗeker ha'aŋ a kaa gə minti fəlnuŋ keɗe.»

Yeesu də həlgə də jəəti baymeleŋ

36Hulum bə *Farisiyeŋ kəman yaŋ mantaŋ Yeesu bə bi a hame so girdu. Yeesu ɗeŋ girdu, wə əsəŋ cin bə harə-hare kəmpuru gal guudu bə hame soŋa. 37Doloy, həlgə kəman də jəəti baymele yaŋ giidə kuliŋa ada. Bə minti a əskəŋ minti Yeesu yaŋ bə hame ger hulum bə Farisiyeŋa kənaŋ, a tuluŋ də tərnə dayga pərki kaasa, yə mante pərki toŋ minti «albaater». Son bə siisi pisi bə gusi awəy-awəy giidu. 38A bəŋ sar Yeesu duuru, a əsəŋ kerkə kəmpuru maŋ. A əsəŋ bə loɗe kampar Yeesu wəra də kan kə dərə. Kəya a sətnu kəmpuru wəra də kaaɗe gə cəərə, a suɓnu kəmpuru, a gəənu son ada.

39Səma hulum bə Farisiyeŋ bə minti a məntunu girdu daŋ asaŋ kel teŋ kəyaŋ, wə ɗəkəŋ ku tərmuyu minti: «Hulum toŋ a jəə la ha'aŋ *hulum bə jogte ku mini kə Pepeŋ, wə a sə ase kel də həlgə də ɗuutuŋ, minti a həlgə də bayməla.» 40Yeesu əsəŋ bə waate hulum bə Farisiyeŋa minti: «Simoŋ, ten də taynə waatam kel». Simoŋ doŋ haa minti: «Hulum bə hateŋ, waatə la!» 41Yeesu minti bəŋa: «Kaa kəman a jəŋ ɓasi, yə jəmaŋ bal kasi hulum bə ayte bala. Məna, nuutuŋ badəgar wiiɗiw. Naytoŋ kəs-kəsi wiiɗiw. 42Yə ɓasi keɗe, yə nəkaŋ bə werke bal ba. Kəya bərdə bal yəəkənəy di wəra ɓasi keɗe bay werke. A ɗiki dəmaŋ, aduubə də kaa ɓasiŋa mindi bele bərdə bal deŋe kumsuŋ mo?» 43Simoŋ hərnu kel minti: «Ten ɗiki minti haa hulum bə minti bal nuutuŋ dəŋaŋ kə naytoŋ.» Yeesu wəətunu minti: «Tam waataŋ akəsa.»

44Kəya wə haraŋ duru cəərə həlgəŋa. Wə waataŋ Simoŋ minti: «Golə həlgə taŋ la! Ten kəlaŋ gerdəma aləwa, tam aynan kan kə baade kamparən ba. Səma naataŋ, a baadənan kamparən wəra də kan kə dərə, a sətnəy wəra də kaaɗe gə cəərə. 45Tam soɓnon gabyan bə mirki ba. Səma naataŋ, a yaakənan kamparən bay soɓe ba hãã bə minti ten kəlaŋ ger dəmaŋ. 46Tam gaanan son cəərəna ba. Səma naataŋ, a gaanan son bə siisi pisiŋ kamparəna. 47Gud teŋa ta ten waatam, baymele naata bə ablaw fəlaŋ vəəgi bə giiduŋ ne wəra, haa gud bə minti a jəŋ bele bobloŋ sarənaŋ. Səma, hulum bə minti yə vəəgəŋ giidi cuuru wesekiŋ, bele nuutuŋ weseka gəm.» 48Kəya Yeesu waataŋ həlgəŋ minti: «Baymele niitiŋ fəlaŋ vəəgi bə giiduŋ ne wəra.»

49Kaa kaayaŋ gə minti bə hame soŋa duuruŋ əsəŋ bə ɗiki ku tərməyi minti: «Hulum toŋ ha'aŋ, wə mindi minti wə gədaŋ hãã bə vəəgi giidu cəərə baymeleŋa mo?» 50Səma Yeesu waataŋ həlgəŋ minti: «De niitiŋ siiriniy ne wəra. Ɗee la kəkaaɓa.»

Currently Selected:

LIKI 7: KERNT05

Highlight

Copy