JOŊRE 28

Pol giidə ajomga də Malteŋa

1Bə minti are seereŋ wəra seeraŋ, kaŋ waataŋ are minti ajomga də minti are giidəŋ, sam minti Malte. 2Kaa gə minti də kuliŋ adaŋ jəŋ are pisi ba ga'i ba. Kəya yə kuŋ cəwa mooto wəra a are anə ŋiɓ, yə mantaŋ are ku da bə bi a hoole gud bə minti koŋ əsəŋ bə hage daana wə əsəŋ bə ji kosõõyeŋ gəm. 3Pol a kooroŋ bə ɗe a humi kəbaŋ da bə bi a vay dər cəwaŋa. Bə minti wə bə ve kəbaŋa a cəwaŋ, a zidiŋ kəbaŋ gə kəəsuŋ. Kəya hənji vaŋ warda də ada, a huunu kəəsu pərət, a bəsaŋ ada gaɓi. 4Bə minti kəmnə də seŋkaŋ asaŋ hənjiŋ də gaɓə-geɓe kasi Pola bədoona gaɓi tə pə moŋ, yə əsəŋ bə waate kumsi minti: «Hulum toŋ kəla, haa hulum bə awe kaa pal-pal. Gud maa mo wə seereŋ nuutu warda dər kan da, səma kəəti bə apəya duunu, wə ji caw bə faɗi.» 5Pol jeteŋ kəəsu wəra anəkay, hənjiŋ vaŋ warna anə jəgab a cəwa na faɗi, koo a ɗəmnu anə weseki ba. 6Ana ha'aŋ, kaayaŋ a bə mi máŋ haa minti wə hope haa hope ɗaw, kumundu ba wə bə awe máŋ haa anə kiŋ bə mee-me warna faɗi ɗaw. Yə məŋ kel teŋ anə taata, yə ɗeŋ a ase ha'aŋ, wə paapa bə hage ɗeme anə weseka ba. Kəya yə koloŋ ɗiki di faɗi, yə əsəŋ bə waate minti: «Haa pepe kəman ɗe!»

7Anə maŋ sar ko bə minti are adaŋ, ko kə hulum kəman a jəŋ ada. Sam hulum toŋ minti Pibliyusi, wə haa kumna bə ajomgaŋ. Wə doŋ irku də are də beleŋ, are jəŋ hiti soope girdu. 8Buru a kəɓəra bədoona bəy, kusru bə salmə-salme anə pəwəŋ, giidu bə haw kusi golde bə əwu. Kəya Pol kooroŋ bə ɗe a hilɗu. Wə əsəŋ bə toose Pepeŋa, wə məlaŋ kəəsu cuuru, kəya wə siirunu wəra faɗi. 9Adordə kel teŋa kəyaŋ, kaa kə ɗeme gə minti a jəŋ giidə ajomgaŋa gila keɗeŋ, əsəŋ bə kolte da suru da kolte, wə siirtiniy warna gəm. 10Kəya yə jəətəŋ kar kə he cəərə are apəya nuutu faɗi. Bə minti koŋ nəkaŋ wəra bə hare bə li turtiŋa, yə ayaŋ kar gə minti caadi bə ɗe a ji sar are a gəryi naareŋaŋ wəra keɗe.

Pol tuuki Roma

11Are jəŋ kitir soope giidə ajomgaŋa. Adoro, are haraŋ bə koore giidə turti kəmana də minti a təwaŋ ko bə kosõõyeŋ giidə ajomgaŋa gəm. A a bəŋ haa Aleksandəri da, a də sam sara minti «pepe kəmkun#28.11 Dər ko toŋa ateŋa ha'aŋ, gidiirə pepeŋ ablaw faɗi. Kaa gə minti bə ji joŋreŋa gud kətartawaŋaŋ, yə humuŋ bə əməy ciiri haa pepe kəmkun, anə Kastor daana Poluksə.». 12Are ɗeŋ a mele də turtiŋ ku kan gə Sirakosiŋa bə hiti soope. 13A ko toŋa, are haraŋ bə hoɗe na anə kar kəsnə koŋ na bə ɗe Regiyoŋ. Ɗeŋ a deye dibiinim, kaŋkaw gaŋ agal kə tamkaŋ da anəkay. Kəya are tuluŋ warna Pusol na dər hiti ɓasi faɗi. 14Giidə vil taŋa, are fəlaŋ kaa kə doo-de ada. Yə mantaŋ are minti are ɗee la a hiti ger té kir aluma məna. Kəya are raawaŋ də kampa bə koore Rom. 15Kaa kə doo-de gə Rom a əskəŋ sam are warnaŋ səm moŋ, yə kooroŋ da bə bi a jeme dər are wəra hãã a ko kəmana bə minti yə məntu minti «Aluma də Apiyusiŋ». Sirdi kəman bə mi are a ko bə minti kaa kə gəryiŋ faakete adaŋ, yə məntu minti «Kuli soope bə həəti». Bə minti Pol əsnəy anəkay, wə jəŋ suuse a Pepeŋ, duru haraŋ bə teŋe faɗi.

Pol ji bərdə kəkəy cəərə Yeesu Kristu giidə vil də Roma

16Bə minti are tuluŋ Roma tulə, kəkamnaŋ gə giidə vil ayaŋ kəkəy a Pol bə ɗe a həəti bay cuuru giidə kuli kəmana, də sooto bə əmu cuuru ada məna gəm. 17Wə jəŋ hiti soope kəyaŋ, wə mantaŋ kəkamnaŋ kə kaanə Ziwifiŋ minti yə bəəda a ŋefe də tó. Bə minti yə təpaŋ ciiri wəra tapə girduŋ, wə wəətənəy minti: «Kəsaananti, ten jəŋ karman bə baymele anə weseka bə kole ku cəərə kaa náŋ gə Ziwifiŋa ba, cəərə to'osi kə kəmoomo də áŋa bə gəm. Də teŋ keɗe, gə Ziwifiŋ doonon Zeruzalema, yə aynan a kaanə Rom damdi daŋgay ana. 18Bə minti yə goloŋ dər kel katən golə, yə a bəlaŋ yaakan bə koore, gud bə minti yə fəlaŋ karman anə weseki sarəna kir minti ten falə me la guudu ba. 19Səma gə Ziwifiŋ əsəŋ wəra ŋəŋ minti kaanə Rom a gan ba. Ten koloŋ bə mante minti kumna boblo Sezar jəman kəəti dən la. Də teŋ keɗe, ɗiki dən paapa bə malə-mele bə ge kel cəərə kəsaanan gə Ziwifiŋa ba. 20Haa kəya kel gə minti ten mantənaŋ da minti aŋ bəəda a nele dəərən keɗe ciiriŋ. Gud maa mo ten də gaalay toŋ gila ha'aŋ, gud bə minti ɗiki dən wəra bə malə-mele cəərə hulum bə minti kaanə *Israyel a məlaŋ ɗiki di wəra cuuruŋ.» 21Kəya gə Ziwifiŋ hərnu kel minti: «Naareŋ ha'aŋ, kaanə Zudeŋ jeereŋ kefter da hõy a are də kel dəm ba. Koo hulum anə məna gud kəsaanə áŋ gə Ziwifiŋ gə ko toŋ da bəŋ hõy a tope bəlam də kel gə cəərəm a are ba, bə bi a waatam səmam baymele bə gəm. 22Səma, kel gə minti tam bə ɗikiyaŋ ha'aŋ, are bele iskiy kuma faɗi. Gud maa mo are wəra gə asə-ase minti, Tapi də minti tam adaŋ ha'aŋ, kaŋ gargete də awəy dəərə wəra a koŋa keɗe.» 23Kəya yə ŋəmaŋ hi baalaŋ duuru bə ŋefe də kumsi.

Hi bə minti yə a ŋəmnu tuukuŋ kəyaŋ, yə bəŋ girdu da máŋ ablaw dəŋaŋ bə minti yə a bəŋ acekjew. Bədoona ta, də ko bə bəbəgiŋ hãã cəwa ɗeŋ a dere adawra kurmusi, Pol bə tupuy bəlam də kela cəərə *Kumna kə Pepeŋa daana cəərə Yeesu. Wə bə kay diri də *ku gili kə *Moyisiŋ daana də kel gə minti *kaa kə jogte ku mini kə Pepeŋ a jiiriniy wəraŋ, minti kel gə minti tó wəətəy cəərə Yeesu ha'aŋ, yə gəəzi. 24Sərdə kaa doŋ gud kel nuutuŋa minti yə kel kə gəəzi, sərdə kaayaŋ bəlaŋ de guudi bə gəm.

25Bə minti kaanə Ziwifiŋ əsəŋ bə koore wəra sar Polaŋ, kuy bay tepe. Kəya Pol haraŋ bə wəətəy karmana ada məna minti: «Kel té lami gə minti Tiiru Cetcetaŋ kulnuy ku Ezaya, hulum bə jogte ku mini kə Pepeŋ, bə waate kəmoomo dəŋaŋ, yə kel kə gəəzi:

26‹Ɗee la sar kaa teŋa#28.26 Wə waate haa kənaŋ sam kaanə Israyel., wəətəy la minti:

Aŋ bə əski kel yaŋ də kosnoŋ, səma guudiŋ əski kaasəŋa ba.

Aŋ bə gole yaŋ də dərəŋ, səma aŋ bə ase karman ba.

27Gud maa mo kaa teŋ hẽŋeŋ ku tərməyi wəra haa hẽŋe,

yə ruptuŋ kusniy wəra haa rupti,

yə guɓtuŋ diri wəra haa guɓti.

Yə ji teŋ bədoona haa minti

té a ase də dər té ba, té a əski də kosnə té ba,

té a yaake kel pəsaŋ bə kele ku tarmə té ba.

Bədoona ana, yə hare diri sarən da

minti ten seerə té la bə gəm#28.27 Es. 6.9-10.›»

28Kəya Pol wəətənəy pa minti: «Kel teŋ jəə la wəra cəərəŋa minti: bə hebkənaŋ, seere tó bə minti bəŋ kasi Pepeŋ daŋ, wə əyu máŋ haa a kaa gə minti teŋ paapa gə Ziwifi baŋ. Teŋ ha'aŋ, yə bə əski!» [ 29Bə minti wə waataŋ kel teŋ waataŋ, kaanə Ziwifiŋ meereŋ haa bə ce awəya ablaw aduubə də kumsi cəərə kel teŋa.]

30Bədoona ta, Pol laataŋ ɓasi giidə kuli bə minti wə a həənu bə werkete cuuruŋ. Kaa gə minti də caadə ɗe suruŋ, kaltaŋ ada na, wə haŋ ku hulum warna anə məna ba. 31Wə waataŋ kel wəra cəərə *Kumna kə Pepeŋa daana wə hataŋ kaŋ cəərə Barkaŋ Yeesu Kristu wəra bay walka, kaanə Rom həənu ku wəra bə gəm.

Currently Selected:

JOŊRE 28: KERNT05

Highlight

Copy