JOŊRE 27

Kəsootoŋ koore Rom də Pol

1Bə minti sam koore naareŋ Itali də turti mootoŋ waataŋ wəraŋ, yə ayaŋ anə Pol də sərdə kaa kə daŋgay kasi hulum kəmana, səmu minti Zuliyusi. We haa kumna bə sooto kəsaŋ gə gud sooto kə kumna boblo Ogustəŋ. 2Are luŋ giidə turti mooto kəman də minti bəŋ Adramiti daŋ. A ɗe haa giidə sərdə vil də minti agəjaŋ də kan kəmtəŋ gə seŋka də Aziŋa. Kəya are kooroŋ faɗi. Aristarkə bə Tesaloniki bə giidə seŋka də Masedəwan gud are ada gəm. 3Ɗeŋ a deye dibiinim, turtiŋ məlaŋ Sidoŋa. Zuliyusi ji Pol pisi səm moŋ, wə əynu kəkəy bə ɗe a helɗe gədəəruŋ kir minti yə ɗee la a jəw guudu pisi. 4Bə minti are haraŋ bə kooreŋ, are doŋ kar agəjaŋ də ajomga də Sipərəŋa, a ko bə minti kaŋkaw gə minti bə bi da dər are da paapa bə ji ablaw baŋ. 5Kəya are cakɗaŋ kan kəmtəŋ gə Silisi daana Pamfili wəra. Are ɗeŋ a ve wəra Mira giidə seŋka də Lisiŋa. 6A ko toŋa ta, sooto bə saamaŋ fəlaŋ turti mooto kəman də minti a bəŋ Aleksandəri daŋ bə koore Itali. Kəya wə ɗeŋ a li are giidə faɗi.

7Are jəŋ hiti anə pər bə hoɗe anə ɗəlla-ɗəlla. Are leɗeŋ həɓiŋ wəra leɗe bə ɗe a li wəra a vil də Kinidiŋa. Kaŋkaw dər are də səɓaki səm moŋ, are paapa bə ze acekjewa anə weseka ba. Gud teŋa ta, are haŋ wəra Kereti agal kə tamkaŋa anəkay, a ko bə minti kaŋkaw paapa bə ji ada ablaw baŋ. Are kəlaŋ sar seŋka də minti kəlaŋ kaasa warna dər kan kəmtəŋ na, yə manta minti Salmone. 8Are doŋ bə zeede na anə kar də gəəli ablaw. Də teŋ keɗe, are ɗeŋ a tuli wəra a ko kəmana, yə məntu minti «Ko pisi bə malte turtiŋ», wə wəra anə maŋ sar vil də Lasaya.

Koŋ feke də kaŋkaw kəmtəŋ cəərə anə Pola giidə turtiŋa

9Hitiŋ raawaŋ are wəra ablaw kas kaŋkaw, gəryi bə turtiŋ koloŋ wəra də gəəli ablaw gəm, gud maa mo hi bə minti kaŋ *je də kuy duruŋ raawaŋ ne wəra#27.9 Adordə ko toŋa ha'aŋ, gəryi bə turtiŋ kole də gəəli ablaw gud bə minti koŋ ɗele feke də kaŋkaw kəmtəŋ haa də ko toŋ.. Kəya Pol wəətənəy minti: 10«Gədaarənti, a ɗiki dəna, áŋ raawaŋ ne də gəryi náŋ toŋ ha'aŋ, wə ɗe a ji baymele. Turtiŋ də kar gə giidəŋ keɗe ɗe a ɓalke wəra, ɗalba áŋ də kusrə áŋ, áŋ golde bə fele bese ada fele ɗaw.» 11Kə sooto bə saamaŋ ha'aŋ, wə məlaŋ ɗiki du haa cəərə hulum bə hoɗe turtiŋa də bərdəŋ, wə məlaŋ ɗiki du a kel kə Pola ba. 12Ana ha'aŋ paŋ, ko bə malte turtiŋ paapa pisi bə isi ada dər ko bə kosõõyeŋa ba. Kaa kə ablaw məlaŋ ɗiki di wəra minti té harə la bə koore. Té ase yaŋ, jəəne minti té neke yaŋ bə tuuki warna Feniksə naŋ. Feniksə toŋ, haa ko bə malte turti giidə ajomga də Keretiŋa bə minti kaŋkaw bi da agal də kaasam gula da, də agal də kaasam kemer də ko bə minti cəwaŋ dere ada naŋ. Ko toŋ ɗəwa bə minti yə isi ada bə raawe ko bə kosõõyeŋ wəra.

13Bə minti kaŋkaw gaŋ agal kə tamka da anə gəvalla kay daŋ, yə ɗəkəŋ wəra faɗi minti té de ku gəryi kə teŋ yaŋ máŋ nuutu wəra ta. Kəya yə haŋ kooso boblo bə minti yə a gəənu dər kana bə ənti turtiŋ adaŋ warda apəy da, yə raawaŋ bə hoɗe na maŋ-maŋ agəjaŋ də ajomga də Keretiŋa. 14Səma, əsəŋ anə weseka kəyaŋ, kaŋkaw haŋ da anə gəgəgi də səɓaki, yə bəŋ agal də ajomga da anəkay. Kaŋ mante kaŋkaw teŋ minti «Erakilon». 15Bə minti kaŋkaw gaŋ cəərə turti da anə vədəd kay daŋ, turtiŋ ɗempa a gerge pəda. Are paapa gə nakə-neke kir ji karman pəda gəm səm moŋ, yə haana dər kan kəmtəŋ na faɗi. 16Are haŋ wəra sar ajomga də Kodaŋa, agal kə tamkaŋa anəkay a ko bə minti kaŋkaw doŋ kəəsi adaŋ. Kəya are jəŋ wəra anə keɗe-keɗe bə seere turti cəncə də minti a jəŋ də əntə-ənti gud nayta mootoŋaŋ. 17Bədoona ta, are taɗna hãã are ɗeŋ a gaara wəra giidə turti mootoŋa. Kaa gə minti bə ji joŋreŋa gud turti mootoŋa kaana saama kəəyə, yə ceetəna wəra kaŋkaŋ#27.17 Yə kaŋ saama a turti mootoŋ haa minti a a caarte wəra dər kana ba.. Walka də minti té ɗe a li cəərə ajããya də malə-mele gud ko dər kana maŋ sar seŋka də Libiŋaŋ jəmnəy səm moŋ, yə gaŋ kəbaŋ gə eele gə minti luɓi ba gud turti da faɗi#27.17 Yə ge kəbaŋ teŋ kəmtəŋ gud turti da haa minti a a fele ko bə ɗe cəlam-cəlam pəda, daana bə keye turtiŋ bə hare dərə soki gud kaŋkaw na.. Kəya are raawaŋ nuutu bə daale na anə hoŋ dər kan na.

18Ɗeŋ a deye dibiinim, kaŋkaw kəmtəŋ nuutu bə halye turtiŋa də səɓaki. Kəya yə əsəŋ bə ke sərdə kar gə giidə na warna. 19Ɗəyaŋ dər hi bə soopeŋa kəyaŋ, kaa kə joŋre gə gud turtiŋ kaŋ sərdə kar gə tarə-tere gə sara warna dər kana máŋ té də kəəsi gadi. 20Are jəŋ hiti ablaw, are asaŋ cəwaŋ hõy ba, are asaŋ seskaŋ hõy bə gəm. Kaŋkaw teŋ nuutu kəm bə ji haa də səɓaki. Bə jəŋ máŋ kəyaŋ, ɗiki də are paapa bə mele minti are ve wəra dədərgə akas areŋa zugi pəda.

21Kaa gə minti giidə turtiŋa jəŋ hiti ne máŋ wəra anə pər bay hame karman ɗaw. Kəya Pol faŋ aduubə di bə wəətiya minti: «Gədaarənti, ten a waatənaŋ minti aŋ a yaakə ajomga də Keretiŋ ba. Aŋ a jeɓren kun laŋ, a haa marya. Kar teŋ gila sə a ɓalke wəra bədoona day ba daana yə sə a bese wəra bədoona day bə gəm. 22Səma bə hebkənaŋ, ten waataŋ minti aŋ teŋə dərəŋ la. Gud maa mo hulum guudəŋa anə məna bese wəra ba, səma turtiŋ taŋ bese wəra. 23Ten asaŋ kel teŋ haa gud bə minti *hulum bə digi kə Pepeŋ bə minti ten kəəsu daana bə jəw joŋreŋaŋ, bəŋ sarəna dər duugŋ taŋa kəna derra. 24Wə waatənan minti: ‹Pol, walka a jəm ba! Gud maa mo tam ɗe wəra kəm tiinə kumna boblo Sezara. Ana pa, Pepeŋ də bele nuutuŋ bə minti wə bə jəm dəma sarəmaŋ, yaake hulum anə məna gud kaa gə minti aŋ bə gəryi diiri keɗeŋ bə bese wəra ba.› 25Bədoona ta gədaarənti, aŋ teŋə dərəŋ la! Gud maa mo ten bə malə-mele ɗiki dən cəərə Pepeŋa. Kel gə minti wə wəətənəy gilaŋ, ji haa bədoona ana faɗi. 26Səma turtiŋ ɗe a mele waŋ wəra də áŋ sar ajomga kəman na.»

27Are máŋ haa dər duugŋ də hi bə hor cuuru waaɗe'iŋa bə minti kaŋkaw gə haa-he are dər kan kəmtəŋ gə minti yə məntəy minti «Mediteraneŋa». Ɗeŋ a deye dər duugŋa leŋ-leŋ, kaa kə joŋre gə gud turtiŋ əsəŋ bə ɗiki minti té maŋ bə tuuki ku keeŋe. 28Kəya yə gaŋ saama dər kana də karman bə eele ku bə ŋeɓe kələm diŋ. Yə fəlaŋ kan kasi pək-pəki hor cuuru waaɗe. Yə zeŋ anə ta'i kas warna tooto ɗəwa pa, yə vaŋ saamaŋ, yə fəlaŋ kələm də kan a ko toŋa kasi hor cuuru ɓasi. 29Kaa kə joŋreŋ jəmaŋ walka wəra gud bə minti turti ɗe a le wəra cəərə pərki kəmana ɗawmay moŋ. Kəya yə kaŋ kooso kəmtəŋ bə eele waaɗe də saama guudu də əntə-ənti sar turtiŋa dər kana dəgnə da anəkay. Kəya yə əsəŋ anə jəma'a laki bə mi ko bə weleŋa wardaŋ. 30Kaa kə joŋreŋ a ɗəkəŋ bə ve wəra. Kəya yə əsəŋ bə ziiri tərnə turtiŋ na warna dər kana na. Yə maltaŋ kel kə gadte wəra minti té li giidə bə ɗe a ənti saama də kooso bə eele ku tiinə turti nayta mooto da pa. 31Kəya Pol waataŋ sooto bə saamaŋ daana sooto nuutuŋ minti: «Kaa teŋ jəŋ giidə turti mootoŋa baŋ, aŋ neke bə ɗe a tuli wəra ku keeŋe na dədərgə bə gəm.» 32Bədoona kəya, sootoŋ jəmaŋ saama də minti yə a bə ziiri turtiŋa dəərə wəra, yə yaakəna warna dər kan na.

33Bə minti yə bə mi ko bə weleŋa tə pə moŋ, Pol əsəŋ bə ji kamkama a kaŋ minti yə hamə karman la. Wə minti: «Dayna hiti hor cuuru waaɗe aŋ bə mi də walka bədoona laki bay hame karman. 34Ten jəənəŋ kamkam, aŋ hamə karman la. Gud maa mo aŋ hamaŋ karman baŋ, aŋ neke bə seere wəra ku kel teŋa bə gəm. Ten waataŋ gəəzi, kaaɗe gə cəərə hulum guudəŋa anə məna lente wəra ba.»

35Wə waataŋ kel teŋ bədoona waata kəyaŋ, wə haŋ mappa, wə jəŋ suuse a Pepeŋ cuuru tiinə kaŋa gila keɗe, wə jəmnu, wə əsəŋ bə həmu faɗi. 36Kəya dər kaŋ haraŋ bə teŋe weseka, yə əsəŋ bə hame faɗi gəm. 37Are a jəŋ keɗe giidə turtiŋa ha'aŋ, kaa kəs-kəsi ɓasi də hor-hor seeɗa ciiri kənki. 38Yə seepteŋ wəra seepta kəyaŋ, yə haraŋ nuutu bə ke kaasaw gə minti a jəŋ giidə turtiŋa na warna dər kan na minti a pəə la wəra kəfaŋ.

39Bə minti koŋ əsəŋ bə jeme da warda hərhər, kaa kə joŋreŋ asaŋ ku keeŋeŋ, səma haa seŋka məntə mo, paapa də diri ba. Yə asaŋ ko kəman bə kalə-kele hurluki boblo-boblo də abəɗəskə ku. Kəya yə məlaŋ ɗiki di wəra minti té bə ɗe a mele turtiŋ ada na, jəəne minti kel teŋ ji yaŋ. 40Yə cəmaŋ saama də minti yə a əntəŋ turtiŋ dəərə a kooso kəmtəŋ bə minti yə a kəənu dər kanaŋ, yə yəəktunu warna dər kan na ada na. Bə minti kaayaŋ bə ceme saamaŋaŋ, kaayaŋ teŋ haraŋ bə bidi paaraŋa wəra bə həru a kuɗu bə harte ku turtiŋaŋ. Yə jəŋ teŋ wəra jəə kəyaŋ, yə ɗeŋ a geɓe dəməəmə də turti tiina bə ɗi kaŋkaw giidə bə hoɗaŋ. Kəya yə əsəŋ bə hare ku turtiŋ na cəərə ko bə abəɗəskə na anəkay faɗi. 41Səma yə asaŋ minti kan haŋ abəɗəskə, a də malə-mele gud ko ada ba. Kəya yə ɗeŋ a gere diŋis də turtiŋ cəərə! Kəya cəərə turtiŋ ɓəlaŋ warna ada na kə'i, dəgnə əsəŋ bə parke na warna həŋkəw-həŋkəw kas kan gə minti bə lata də səɓakiŋ.

42Kəsootoŋ məlaŋ ɗiki di máŋ kəya minti té awə kaa kə daŋgay la wəra kas walka də minti hulum ɗele deŋe wəra guudi də leele ɗawmay moŋ. 43Səma sooto bə saamaŋ wəra bə balə-bele minti tó seere Pol səm moŋ, wə həənəy kuy wəra bay ji kel gə minti yə a ɗikniy. Kəya wə waataŋ kaŋ minti: «Aŋ kaa gə minti asaŋ leeleŋ, aŋ gadtə la wəra kəm ajew dər kana bə leele bə ɗe a li warna ku keeŋe na. 44Aŋ kaaya teŋ, aŋ əstə la cəərə kəbaŋ pəmpərəŋ-pəmpəriŋa, ɗalba cəərə kar kəfaŋ-kəfaŋi gə turtiŋa.» Yə ɗeŋ a tuli wəra bay kel anə cem keɗe ku keeŋe haa də hel taŋ.

Currently Selected:

JOŊRE 27: KERNT05

Highlight

Copy