JOŊRE 26

Pol hare kel wəra cəərə kusru tiinə kumna Agripa

1Agripa waataŋ Pol minti: «Kəkəy hebkəna cəərəma bə waate kel gə cəərə kusrum wəra.» Bədoona ta, Pol haŋ kəəsu apəya, wə əsəŋ bə hare kel nuutuŋa wəra minti: 2«Agripa kumnaŋ, tarman də waale bə minti ten fəlaŋ kəkəy dayna tiinima bə hare kel cəərə kel gə minti kaanə Ziwifiŋ gaanan dən cəərəna keɗeŋ. 3Gud maa mo to'osi kə kaanə Ziwifiŋ wəra də dərəm keɗe, ɗiki bə minti yə caate awəy cuuru wəra də dərəm keɗe gəm. Bədoona ta, ten jəm kamkam, doo tarməyam la bə jeɓren kuna.

4Ãhãã. Ten a jəŋ aduubə də kamnan gə Ziwifiŋa daana gə Zeruzalema hãã a puranul dən daŋ, ten naanaanə moŋ, kəsaanan gə Ziwifiŋ keɗe wəra gə asə-ase kel teŋ. 5Ten wəra də diri dayday. Giidi doŋ haa neŋ, yə gə nakə-neke bə ji kəmnə də kəkəy minti ten a jəŋ haa gud kaanə *Farisiyeŋa. Aduubə də kaayaŋ gə Ziwifiŋa ha'aŋ, té gə minti gə əsə-isi də səɓaki bə ke awalna a Pepeŋ, haa té faɗi. 6Ten gil ku kəətiŋa hebkəna, haa gud ɗiki katən bə malə-meleŋa wəra cəərə karman bə minti Pepeŋ a waataŋ kəmoomo də áŋ wəra kaŋkaŋ cuuru minti tó bə jəw yaŋ. 7Haa karman tó bə minti kaasaw də áŋ gə minti guudi ta'-ta'i hor cuuru ɓasi məlaŋ ɗiki di bə əsu bə de ku wəra hõy gəm. Gud teŋa ta, yə bə ke awalna a Pepeŋ, daaway də duugŋ keɗe'i, geye neete paapaŋ. Gosə gole la kəm tə mo kumnaŋ, kaanə Ziwifiŋ gaanan də kel ha'aŋ, gud ɗiki tó bə minti wəra bə malə-meleŋ ta'i faɗi! 8Pepeŋ hare kaŋ wəra dədərgə adordə meŋa. Aŋ bə ɗəkəŋ haa naanaanə ɗiki, minti aŋ neke bə de gud kel teŋa baŋ mo?

9Ten də kusrən, ten a ɗəkəŋ kəm haa minti ten kolte gidiirə hel wəra keɗe bə awe sam Yeesu bə Nazaretiŋ wəra. 10Ten jəŋ Zeruzalema haa kel teŋ faɗi. Ten fəlaŋ abay bə ke kaa kə Pepeŋ ablaw a daŋgaya anə faɗ-faɗi haa kasi kəkamna kə *kaa kə keere Pepeŋa ɗaw. Yə waataŋ ne nuutu minti əwəy la wəraŋ, ten waate faɗi gəm minti: ‹Ten doŋ haa ne.› 11Ten saksaki haa bə kalte wəra giidə *kuli bə toose kə kaanə Ziwifiŋa keɗe, bə ɗe a ji daŋgay də kaa kə doo-deŋ minti yə waatə la wəra kas kusri minti té de gud Yeesu pəda. Sərkə də kel teŋ raawənan cəərən wəra səm moŋ, ten ɗeŋ hãã bə ɗe a ləsəy warna giidə vil də minti taŋ paapa náŋ baŋ.

12Bədoona ana ta, ɗeŋ a deye hõy, ten kooroŋ Damasi. Anə kəkamna də kaa kə keere Pepeŋ aynan abay keɗe bə ɗe a ji kel teŋ ada na. 13Bədoona ta kumnaŋ, də ko bə minti ten a kəkəy naŋ, də cəwa də daaway ɗekeraŋ, pəɗaki mooto kəman faŋ apəy da, welɗe dəŋ dəŋaŋ kə cəwa də apəyaŋ pə ɗaw. A wəlaŋ koŋ wəra cəərəna ɓəki, cəərə kaa gə minti a bə gəryi dəərən gəm. 14Are awtaŋ adawra wəra keɗe. Kəya ten əskəŋ dordə karman kəman bə mantan da də ku Hebere minti: ‹Sol! Sol! Tam ləsan haa səm mo? Tam məlaŋ waŋ haa bo. A ji kusrum damdi kurki bə minti le kəmpuru wəra ku gədəwa bə feɗkə-feɗkeŋaŋ ana ba.› 15Ten ləənu ku minti: ‹Kumnaŋ, tam haa mindi mo?› Barkaŋ harnan kel minti: ‹Haa kəna ten Yeesu tó bə minti tam bə ləsuŋ ta. 16Səma harə la bə fe apəya wəra cəərə kampərama. Gud maa mo ten vəɗaŋ kusrən wəra a nəənəm haa minti tam kolə la wəra hulum bə joŋre katən. Tam ji bərdə kəkəy yaŋ a kaŋ minti tam asnan dayna daana tam bə wəətəy sam kar gə minti ten vaɗtam dəm yaŋ də kusrən ajew naŋ gəm. 17Ten dom yaŋ wəra kasi gə Ziwifiŋa də kaayaŋ gə minti teŋ paapa gə Ziwifi baŋ. Ten bə gam yaŋ haa sar kaa teŋ 18bə ɗe a piŋtiy diri wəra, bə humuy warda dər tilməŋ da bə vay dər pəɗakiŋa, daana bə humuy warda dər ko bə minti *Sataŋ bə əsə-isi kumnaŋ cuuruŋ, bə vay a ko bə minti Pepeŋ bə əsə-isi kumna cuuruŋ gəm. Bədoona ta, yə doŋ ne guudəna, Pepeŋ vəəgi giidu yaŋ wəra cəərə baymele neeteŋa daana yə ɗe yaŋ a fele ko sar kaayaŋ gə minti wə koloŋ teŋ wəra kaa nuutuŋ gəm.› »

19Bədoona ta Agripa kumna, ten doŋ ku karman tó bə minti bəŋ apəy da bə bi a veɗe wəra dərəna faɗi. 20Gud teŋa ta, ten waataŋ kel wəra kəm haa a kaanə Damasiŋ, adoro a kaanə Zeruzalem, wəra giidə seŋka də Zudeŋa neŋneŋ keɗe, daana a kaa gə minti teŋ paapa gə Ziwifi baŋ gəm. Ten wəətənəy wəra minti yə kolə kirkiy la a baymele neeteŋ, yə harə diri la gud Pepeŋa daana ɗe neeteŋ jəə la haa ɗe bə minti ge dər kaŋ wəra pəɗaki minti té gə kolə-kole gəəziŋ faɗi. 21Kaanə Ziwifiŋ doonon giidə *Kuli kə Pepeŋa, yə a ɗəlaŋ awan wəra haa gud kel teŋa kəya faɗi. 22Də teŋ keɗe, Pepeŋ bə keye cəərəna saksaki hãã dayna. Gud teŋa ta, ten dayna kəm kəna gil bə hare kela wəra cəərə kusrəna tiinə kaa gə minti paapa abay baŋ, də kaayaŋ gə minti teŋ abay. Kel té gə minti ten wəətənəy haa sar kel gə minti *kaa kə jogte ku mini kə Pepeŋ daana *Moyisi a waataŋ minti yə bə ɗe a de kuy yaŋ wəraŋ. 23Kel teŋ haa minti: «Kristu, *Hulum bə minti Pepeŋ ŋəmnu, bə se lasi yaŋ pal-pal, wə me yaŋ wəra, daana wə hare yaŋ wəra dədərgə adordə meŋa ajew haa tó faɗi. Wə hare yaŋ wəra dədərgə haa bə waate kaanə Ziwifiŋ də kaayaŋ gə minti paapa gə Ziwifi baŋ, minti seere yaŋ. Dər tilmə də baymele neeteŋa, seere toŋ ji yaŋ damdi pəɗaki a niini ana.»

Kumna Agripa waate ɗiki du cəərə Pola

24Bə minti Pol a bə waate kela cəərə kusru bədoona, Festusi naakaŋ ku faɗi minti: «Pol! Tam ɓalkaŋ wəra! Ase nəmti bə ablaw ɓalkənam cəərəm wəra!» 25Pol hərnu kel minti: «Festusi, hulum bobloŋ, ten paapa bə ɓalkə-ɓalke ba! Kel gə minti ten bə wəətiyaŋ keɗe yə kel kə gəəzi bə kə hulum bə minti cuuru pasaŋ ana gəm. 26Kumna Agripa wəra bə əskə-əski gud kel teŋ gəm. Gud teŋa ta, ten neke bə waate kel teŋ wəra anə pəɗaki bay walka tiinu. Də dərən wəra minti kel gə minti a jəətəŋ wəra də duru məna-məna keɗe'i, gud bə minti yə a jəətəŋ paapa dəgaaya-dəgaaya ba. 27Agripa kumnaŋ, tam de wəra gud kel gə minti *kaa kə jogte ku mini kə Pepeŋ a wəətənəy bə mo? Dərəna minti tam de guudi.» 28Kəya Agripa waataŋ Pol minti: «Də kel kə waate nəmtiŋ, tam a wəra maŋ bə gana bə ɗiki minti tam kolon hulum bə doo-de ɗe!» 29Pol hərnu kel minti: «Jəəne nuutu minti hiti jəə la ablaw bə ɗaw, ɗalba hiti ablaw ɗaw, ten toose Pepeŋ haa minti tam kumnaŋ, də kaa kaayaŋ gə minti bə jeɓren kuna hebkəna keɗeŋ, aŋ kolə la wəra damdi ten bə doo-de ana faɗi, səma paapa kaa kə daŋgay bə ten ana ba!»

30Agripa faŋ wəra apəya, kəya kumna Feliksə, Berenisi, də kaayaŋ gə minti a təpaŋ diiriŋ keɗe, pətəŋ wəra apəya faɗi gəm. 31Yə vaŋ warna bə waate kumsi na lam minti: «Hulum toŋ jəŋ karman bə minti wə falə meŋ la guudu bə faɗi, koo bə ge a daŋgaya bə gəm.» 32Agripa waataŋ Festusi minti: «Hulum toŋ a waatə la minti kumna boblo Sezar jamə kəəti də tó la baŋ awa, aŋ a sə a gaw.»

Currently Selected:

JOŊRE 26: KERNT05

Highlight

Copy