ROMEŊ Kel gə minti áŋ fələy giidə kefter toŋa
Kel gə minti áŋ fələy giidə kefter toŋa
Laate jəŋ anə maki təwa adordə me də Kristu daana hare du wəra dədərgəŋ, kaanə Ziwifi gə minti koloŋ gə doo-deŋ, damdi anə Akilasi də Pirsil (Joŋ. 18.2), ji yaŋ gə ɗalə-ɗele duusi bə Kel pəsaŋ kəmarwaŋ wəra giidə vil də Roma, vil də minti kumna bə cəərə seŋka də ablaw də ko toŋ ada bə əsə-isi giidəŋ. Tapi jəŋ wəra ajew-ajewa, də ko bə minti Pol kəm bə waate kela wəra giidə anə seŋka də Siiriŋa, Azi Cəncəŋa (dayna, yə manta Turki də Aziŋ), daana Geresiŋa gəm haa sə teŋ. Pepeŋ ayaŋ a Pol haa digiŋ minti wə ɗee la «hãã wəra agev də seŋkaŋa waaɗe keɗe'iŋ.» Pol bəlaŋ minti tó a ɗe paapa Rom təwa pəda, tó ɗe máŋ Espay gəm, haa sə teŋ. Kel nuutu gə adoro té gə minti wə ɗəmpənəy wəra tiinu bəy, wə bə jiiniy wəra moŋ, hulum asaŋ teŋ ba. Səma, a kəkəy bə ɗampe gəryi nuutuŋaŋ, wə jeereŋ kefter bə minti mele guudu minti: «a aŋ gə giidə vil də Rom» (1.7). Wə jiirunu a kaa kə doo-de gə giidə vil də Rom, sərdə kaa teŋ jəəti Tapi neeteŋ ger anə Pirsil də Akilasi (16.3-5).
Pol fəlaŋ duru də kefter toŋ kəya bə tope bəlam də kel a kaa kə doo-de gə koŋ adaŋ bə ase karman bə minti tó bə əskə-əski guuduŋ cəərə joŋre kə tó bə hulum bə gaa-ge a kaa gə minti paapa gə Ziwifi baŋ. Karman bə deŋe kefter nuutuŋ bə de bəlam də kel gə minti wə bə wəətiya wəraŋ pa pəda. Wə ayaŋ kəmtəŋ də kel nuutu teŋ minti: Kel pəsaŋ kəmarwaŋ haa səɓaki də minti Pepeŋ ji joŋre dəərə bə seere kaa gə minti doŋ neŋ keɗe, kaanə Ziwifiŋ gə minti iskiniy ajew, də kaa gə minti paapa gə Ziwifi baŋ gəm (1.16).
Kel gə minti a jəŋ aduubə də kaanə Ziwifiŋa də kaa gə minti paapa gə Ziwifi baŋ (daŋgeŋ haa cəərə kaa kə doo-de gə minti a paapa kaanə Ziwifi ba, minti yə kir ɗe naanaanə mo tiinə ku gili kə kaanə Ziwifiŋa) a sar kaa kə doo-de gə ajew haa kel kəmtəŋ faɗi. Áŋ falte kel teŋ giidə kefter baalaŋ-baalaŋ bə minti Pol, hulum bə gaa-geŋ, jiirtunuŋ, damdi toŋ a kaanə Galatiŋ anaŋ. Pol waate anə faɗi kəna haa minti Kel pəsaŋ kəmarwaŋ gə minti tó bə ɗe wəra diiriŋ, yə kə mindi mindi mo keɗe, bay geɗe hulum wəra faɗi (1.16). Wə doŋ bəlam də kel ada na cəərə kel gə minti Pepeŋ seere hulum bə lentə-lenteŋ bə minti məlaŋ ɗiki du cuuruŋ wəra naanaanə mo, koo wə a jəə la nuutu hulum muntu muntuŋ moŋ (1.18—8.39).
Wə zeŋ pa cəərə kel gə minti sərdə kaanə Israyel bə deye yaŋ anə ta'i a ko, yə de haa də Kristu ba. Wə waataŋ cəərə kel teŋa ada minti bay de bə haa neete toŋ paapa bə nakə-neke bə ji karman sar kel gə minti Pepeŋ a ɗəmpənəy wəra bəy ajewaŋ ba. Gud maa mo, pisi bə minti Pepeŋ bele jəw sar kaŋa bə ji yaŋ palpal (9—11). Bə hebkənaŋ, pisi bə minti Pepeŋ bə jəwa sar kaa gə minti paapa gə Ziwifi baŋ, kir əski guudu haa damdi wə məntənəy wəra kir minti yə jəə la wəra zugi a tó gə kolə-kole dədərgə di təmarwa gəəzə-gəəziŋ ana (12.1—15.13).
Pol a tewe bə cəərə kefteraŋ ayaŋ ku mini bə cəərə ɗiki bə gəryi nuutu bə ɗe Rom ada. Wə gəənu cuuru wəra də mirki nuutuŋ a kaŋ (15.14—16.27).
Kaa gə minti bə goldeŋ keɗe bəlam də kel gə topə-tope wəra a kuɗiŋa cəərə seere bə minti Pepeŋ əyu a kaŋ gud Yeesu Kristuŋ, yə aŋkaŋ kefter toŋ ne kəyaŋ, yə kole bə ŋili yaŋ nuutu gud kəmtəŋ də kel gə minti Pepeŋ a wəra bə ɗampə-ɗampe diiriŋ (11.33-36). A ko toŋa kəyaŋ, yə kole bə fele səɓaki bə kaw awalna də gəəzə-gəəzi də minti áŋ kir kaw duŋ yaŋ máŋ faɗi gəm.
Currently Selected:
ROMEŊ Kel gə minti áŋ fələy giidə kefter toŋa: KERNT05
Highlight
Share
Copy
Want to have your highlights saved across all your devices? Sign up or sign in
Texte de la Bible: Kera © Alliance Biblique du Tchad, 2004.