ಅಪೊ.ಕ್ರಿ 1

1-3ಸನ್ಮಾನ್ಯ ಥಿಯೊಫಿಲಾ, ಯೇಸು ತಾನ್ ಅಜತ್‌ದ್ ದೆತ್ತೊಂಡಿ ಅಪೊಸ್ತಲೆರೆಗ್ ಪರಿಶುದ್ಧಾತ್ಮಡ್ ಅಪ್ಪಣೆ ಕೊರಿ ಬೊಕ್ಕ ಆಯನ್ ಈ ಲೋಕೊಡ್ದು ಮಿತ್ತ್ ದೆರ್ತಿ ದಿನತ ಮುಟ್ಟ, ಯೇಸು ಸುರು ಮಲ್ತಿನ ಮಾತೆತ್ತ ವಿಷಯ ಯಾನ್ ದುಂಬತ್ತ ವಿವರ ಮಲ್ತ್‌ದೆ. ಆಯೆ ಕಷ್ಟ ಬತ್ತ್‌ದ್ ಸೈತಿ ಬೊಕ್ಕ ಜೀವಾದುಲ್ಲೆ ಅಂದ್‌ದ್ ಬೇತೆ ಬೇತೆ ದೃಷ್ಟಾಂತೊಲೆಡ್ದ್ ಅಪೊಸ್ತಲೆರೆಗ್ ನಲ್ಪ ದಿನ ಮುಟ್ಟ ಅಪಗಪಗ ಅಕ್ಲೆಗ್ ತೋಜಾವೊಂದು ದೇವೆರೆ ರಾಜ್ಯದ ವಿಷಯೊಲೆನ್ ಪನೊಂದಿತ್ತೆ.

4-5ಇಂಚಾದುಪ್ಪುನಗ ಒಂಜಿ ಸರ್ತಿ ಅಪೊಸ್ತಲೆರೆ ಒಟ್ಟಗು ಕೂಡ್ದುಪ್ಪುನಗ ಯೇಸು ಪಂಡಿನಿ ದಾನೆಂದ್ಂಡ, “ಯೋಹಾನೆ ಜನೊಕುಲೆಗ್ ನೀರ್‌ಡ್ ದೀಕ್ಷಾಸ್ನಾನ ಮಲ್ಪಾದಿತ್ತೆ. ಆಂಡ ಒಂತೆ ದಿನತ ಉಲಯಿ ನಿಕ್ಲೆಗ್ ಪರಿಶುದ್ಧಾತ್ಮೊಡ್ದು ದೀಕ್ಷಾಸ್ನಾನ ಆವು. ಎನ ಅಮ್ಮೆ ಒಂಜಿ ವಾಗ್ದಾನ ಮಲ್ತ್‌ದೆ. ಯಾನ್ ಐತ ಬಗೆಟ್ ನಿಕ್ಲೆಗ್ ದುಂಬೇ ತೆರಿಪಾದೆ. ಆ ವಾಗ್ದಾನದ ವರೊಕ್ಕಾದ್ ನಿಕುಲು ಯೆರೂಸಲೇಮುಡೇ ಕಾತೊಂದುಪ್ಪುಲೆ,” ಅಂದ್‌ದ್ ಅಪ್ಪಣೆ ಕೊರಿಯೆ.

ಯೇಸು ಪರಲೋಕೊಗು ಏರ್ದ್ ಪೋಯಿನವು

6-7ಅಪೊಸ್ತಲೆರ್ ಒಟ್ಟಾದುಪ್ಪುನಗ ಯೇಸುಡ ಕೇಂಡೆರ್, “ಕರ್ತವಾ, ಈ ಉಂದೇ ಸಮಯೊಡು ಇಸ್ರಾಯೇಲ್ ಜನೊಕುಲೆಗ್ ಕುಡೊರ ರಾಜ್ಯೊನು ಸಮ ಮಲ್ತ್‌ದ್ ಕೊರ್ಪನಾ?” ಪಂಡ್ದ್ ಕೇನ್ನಗ ಯೇಸು ಅಕ್ಲೆಡ ಪನ್ಪೆ, “ದಿನ ಬೊಕ್ಕ ಕಾಲೊಲೆನ್ ನಿರ್ಧಾರ ಮಲ್ಪುನ ಅಧಿಕಾರ ಅಮ್ಮೆರೆಗ್ ಒರಿಯಗ್ ಮಾತ್ರ ಉಪ್ಪುನು, ಅವೆನ್ ತೆರಿಯೊನ್ನವು ನಿಕ್ಲೆನವು ಅತ್ತ್. 8ಆಂಡ ಪರಿಶುದ್ಧಾತ್ಮೆ ನಿಕ್ಲೆ ಉಲಯಿ ಬನ್ನಗ ನಿಕುಲು ಬಲ ಪಡೆದ್ ಯೆರೂಸಲೇಮುಡ್ಲಾ ಇಡೀ ಯೂದಾಯೊಡ್ಲಾ ಸಮಾರ್ಯೊಡ್ಲಾ ಭೂಮಿದ ಕಡೆ ಮುಟ್ಟಲಾ, ನಿಕುಲು ಎನ ಸಾಕ್ಷಿದಾಕುಲಾದುಪ್ಪುವರ್.” 9ಈ ಪಾತೆರೊಲೆನ್ ಅಪೊಸ್ತಲೆರೆಗ್ ಪಂಡಿ ಬೊಕ್ಕ ಅಕುಲು ತೂವೊಂದುಪ್ಪುನಗ ಆಯನ್ ಮಿತ್ತ್ ದೆರ್ತ್ತ್‌ಂಡ್ ಮುಗಲ್ ಆಯನ್ ಮದೆ ಮಲ್ತಿನೆಡ್ದ್ ಅಕ್ಲೆ ಕಣ್ಣ್‌ಗ್ ತೋಜಂದೆ ಪೋಯೆ.

10ಯೇಸು ಮಿತ್ತ್ ಪೋವೊಂದುಪ್ಪುನಗ ಅಪೊಸ್ತಲೆರ್ ಬಾನದಂಚಿ ದೃಷ್ಟಿ ದೀದ್ ತೂವೊಂದುಪ್ಪುನಗ ಬೊಲ್ದು ಕುಂಟು ಪಾಡ್ದಿನ ರಡ್ಡ್ ಜನೊಕುಲು ಒರನೆ ಅಕ್ಲೆ ಕೈತಲ್‌ ಬತ್ತ್‌ದ್ ಉಂತಿಯೆರ್, 11“ಗಲಿಲಾಯದಾಕುಲೇ, ದಾಯೆಗ್ ಬಾನೊನೇ ತೂವೊಂದು ಉಂತುದರ್? ಉಂದೇ ಯೇಸು ನಿಕ್ಲೆ ಕಣ್ಣೆದುರುಡು ಎಂಚ ಪರಲೋಕೊಗು ಮಿತ್ತ್ ಏರ್ದ್ ಪೋಯೆನಾ ಅವ್ವೇ ರೀತಿಡ್ ಪಿರ ಬರ್ಪೆ,” ಅಂದ್‌ದ್ ಪಂಡೆರ್.

ಯೂದನ ಸ್ಥಾನೊಗು ಬೊಕ್ಕೊರಿಯನ್ ಅಜತ್‌ದ್ ದೆಪ್ಪುನವು

12ಬೊಕ್ಕ ಅಕುಲು ಇಪ್ಪೆಗುಡ್ಡೆಡ್ದ್ ಯೆರೂಸಲೇಮುಗು ಪಿರ ಬತ್ತೆರ್. ಆ ಗುಡ್ಡೆಗ್ಲಾ ಯೆರೂಸಲೇಮುಗ್ಲಾ ಸಬ್ಬತ್‌ದಿನತ್ತ ಸಾದಿದಾತ್ ಅಂದ್ಂಡ ಸುಮಾರ್ ಮುಕ್ಕಾಲ್ ಮೈಲ್‌ದಾತ್ ದೂರ ಇತ್ತ್ಂಡ್. 13ಅಕುಲು ಪೇಂಟೆಗ್ ಬತ್ತ್‌ದ್ ತನ್ಕುಲು ಉಪ್ಪುನ ಮಾಳಿಗೆದ ಕೋಣೆಗ್ ಪೋಯೆರ್. ಅಕುಲು ಏರೇರ್ ಪಂಡ ಪೇತ್ರೆ, ಯೋಹಾನೆ, ಯಾಕೋಬು, ಅಂದ್ರೆಯೆ, ಫಿಲಿಪ್ಪು ತೋಮೆ, ಬಾರ್ತೊಲೊಮಾಯೆ, ಮತ್ತಾಯೆ, ಅಲ್ಫಾಯನ ಮಗೆ ಯಾಕೋಬು, ದೇಶಾಭಿಮಾನಿ ಪನ್ಪಿ ಸೀಮೋನು, ಬೊಕ್ಕ ಯಾಕೋಬುನ ಮಗೆ ಯೂದೆ. 14ಮೊಕುಲು ಮಾತೆರ್ಲಾ ಒಂಜೇ ಮನಸ್‌ಡ್ ದೇವೆರೆಡ ಇಡೆ ಬುಡಂದೆ ಪ್ರಾರ್ಥನೆ ಮಲ್ತೊಂದಿತ್ತೆರ್. ಕೆಲವು ಪೊಂಜೊವುಲುಲಾ ಯೇಸುನ ಅಪ್ಪೆ ಆದುಪ್ಪು ಮರಿಯಲಾ ಆಯನ ಸಹೋದ್ರೆರ್‌ಲಾ ಅಪೊಸ್ತಲೆರೆ ಒಟ್ಟುಗು ಇತ್ತೆರ್.

ಯೂದನ ಬದಲ್‌ಗ್ ಬೊಕ್ಕೊಂಜಿ ಅಪೊಸ್ತಲನ್ ಅಯ್ಕೆ ಮಲ್ಪುನವು

15ಆ ದಿನೊಕುಲೆಡ್ ಸುಮಾರ್ ನೂತ್ತ ಇರ್ವ ಮಂದಿ ಸಹೋದ್ರೆರ್ ಸೇರ್ದುಪ್ಪುನಗ ಪೇತ್ರೆ ಅಕ್ಲೆ ನಡುಟು ಉಂತುದು ಇಂಚ ಪಂಡೆ. 16“ಎನ ಸಹೋದ್ರೆರೇ, ಯೇಸುನು ಪತ್ತಿಯೆರೆ ಸಾದಿ ತೋಜಾಯಿ ಯೂದ ಸಂಗತಿಡ್ ಪರಿಶುದ್ಧಾತ್ಮೆ ದಾವೀದನ ಬಾಯಿಡ್ದ್ ಪವಿತ್ರ ಶಾಸ್ತ್ರೊಡು ದುಂಬು ಪನ್ತಿನ ಸಂಗತಿ ನಡಪುನವು ಅಗತ್ಯದವು ಆದಿತ್ತ್ಂಡ್. 17ಯೂದೆ ನಮ ಒಟ್ಟುಡು ಇತ್ತ್‌ದ್ ಈ ಸೇವೆಡ್ ಪಾಲ್ ಪಡೆತಿನಾಯೆ ಆದಿತ್ತೆ.

18“ಈ ನರಮಾನಿ ತನ ಅನ್ಯಾಯೊಡ್ದು ತಿಕ್ಕಿನ ದುಡ್ಡುಡು ಒಂಜಿ ಕಂಡೊನು ದೆತ್ತೊಂಡೆ; ಬೊಕ್ಕ ಕುತ್ತ ಬೂರ್ದು ಬಂಜಿ ಪುಡಾದ್ ಕರ್ಲ್ ಪೂರ ಪಿದಿಯಿ ಬತ್ತ್ಂಡ್. 19ನೆತ್ತ ವಿಷಯ ಯೆರೂಸಲೇಮುದ ಮಾತ ಜನೊಕುಲೆಗ್ ತೆರಿದ್ ಬತ್ತಿನೆಡ್ದ್ ಆ ಕಂಡೊಗು ಅಕ್ಲೆನ ಪಾತೆರೊಡು ಅಕೆಲ್‌ದಮಾ, ಪಂಡ್ಂಡ, ‘ನೆತ್ತೆರ್‌ದ ಕಂಡ,’ ಅಂದ್‌ದ್ ಪುದರ್ ದೀಯೆರ್.

20“ಆಯನ ಸಂಗತಿಡ್, ‘ಆಯನ ಇಲ್ಲ್ ಹಾಳಾದ್ ಪೋವಡ್, ಐಟ್ಟ್ ಒಕ್ಕೆಲ್‌ದಾಂತೆ ಉಪ್ಪಡ್, ಆಯನ ಉದ್ಯೋಗ ನನೊರಿಯಗಾವಡ್,’ ಪಂಡ್ದ್‌ಲಾ, ಕೀರ್ತನೆ ಗ್ರಂಥೊಡು ಬರೆದುಂಡು.”

21-22“ಅಂಚಾಯಿನೆಡ್ದ್, ಕರ್ತವೆ ಆದುಪ್ಪು ಯೇಸು ನಮ್ಮೌಲು ಬರೊಂದು ಪೋವೊಂದು ಇತ್ತಿ ಮಾತ ಸಮಯೊಡು ಅಂದ್ಂಡ ಯೋಹಾನೆ ನೀರ್‌ದ ದೀಕ್ಷಾಸ್ನಾನ ಮಲ್ಪಾವೊಂದಿತ್ತಿ ಕಾಲೊಡ್ದು ಯೇಸು ನಮ ಕೈತಲ್‌ಡ್ದ್ ಮೇಲೋಕೊಗು ಏರ್ದ್ ಪೋಯಿನ ದಿನ ಮುಟ್ಟ ಎಂಕ್ಲೆಡೊಪ್ಪ ಯೇಸು ಸೈತಿನಾಕುಲೆಡ್ದ್ ಲಕ್ಕಿನೆಕ್ಕ್ ಸಾಕ್ಷಿ ಪನ್ಪಿನಾಯೆ ಆವೊಡು.”

23ಅಪೊಸ್ತಲೆರ್ ಇರ್ವೆರೆನ್ ಉಂತಾಯೆರ್. ಒರಿ ಬಾರ್ಸಬೆ ಪನ್ಪಿ ಯೋಸೇಫು, ಆಯನ್ ಯುಸ್ತೆ ಅಂದ್‌ದ್ ಮೇಲ್ ಪುದರ್‌ಡ್ ಲೆತ್ತೊಂದಿತ್ತೆರ್ ಬೊಕ್ಕೊರಿ ಮತ್ತೀಯೆ. 24-25ಬೊಕ್ಕ ಅಕುಲು ಇಂಚ ಪ್ರಾರ್ಥನೆ ಮಲ್ತೆರ್, “ಕರ್ತವ ಮಾತೆರ್ನ ಉಡಲ್‌ನ್ ತೆರಿದುಲ್ಲ. ಯೂದೆ ಅಪೊಸ್ತಲೆ ಪನ್ಪಿ ಈ ಸ್ಥಾನೊನು ಬುಡ್ದು ತನ ಜಾಗ್‌ಗ್ ಪೋಯಿನೆಡ್ದ್ ಆ ಸ್ಥಾನೊನು ಸೇರಿಯೆರೆ ಈ ಇರ್ವೆರೆಡ್ದ್ ಏರೆನ್ ಈ ಅಜತ್‌ದನಾ ಆಯನ್ ತೋಜಾದ್ ಕೊರ್ಲ.” 26ಬೊಕ್ಕ ಅಪೊಸ್ತಲೆರ್ ಇರ್ವೆರೆನ ಪುದರ್‌ಡ್ ಚೀಟ್ ಪಾಡಿಯೆರ್, ಚೀಟ್ ಮತ್ತೀಯಗ್ ಬತ್ತ್ಂಡ್. ಬಾಕಿದ ಪತ್ತೊಂಜಿ ಜನ ಅಪೊಸ್ತಲೆರೆ ಒಟ್ಟುಗು ಮತ್ತೀಯೆಲಾ ಲೆಖ್ಖೊಗು ಸೇರಿಯೆ.

Currently Selected:

ಅಪೊ.ಕ್ರಿ 1: ತುಳು

Highlight

Copy