ಅಪೊ.ಕ್ರಿ 2

ಪರಿಶುದ್ಧಾತ್ಮ ವರ ಬತ್ತಿನವು

1ಪಂಚಾಶತಮ#2:1 ಪಂಚಾಶತಮಐವನೆ ದಿನತ ಬೊಕ್ಕ ಆಚಾರಣೆ ಮಲ್ಪುನ ಪರ್ಬೊಗು ಪಂಚಾಶತಮ ಪರ್ಬ. ಯೇಸು ಕ್ರಿಸ್ತನ ಮರಣ ಅವ್ವೇ ಸಮಯೊಡು ಆತಿನಿ. ಪರ್ಬದ ದಿನ ಬನ್ನಗ ಅಕುಲು ಮಾತೆರ್ಲಾ ಒಂಜೇ ಮನಸ್‌ಡ್ ಒಂಜಿ ಜಾಗ್‌ಡ್ ಸೇರ್ದಿತ್ತೆರ್. 2ಅಪಗ ಬಿರುಗಾಳಿ ಬೀಜುನಂಚ ಬಾನೊಡು ಒಂಜಿ ಶಬ್ಧ ಉಂಡಾದ್ ಅಕುಲು ಕುಲ್ಲುದಿತ್ತಿನ ಇಲ್ಲಡ್ ದಿಂಜಿದ್ ಪೋಂಡು. 3ಬೊಕ್ಕ ಅರ್ಲೊಂದಿತ್ತಿ ತೂತ ಲೆಕ್ಕಂತಿನ ನಾಲಯಿಲು ಪಾಲ್ ಆದ್ ಅಕ್ಲೆಗ್ ತೋಜಿದ್ ಅವು ಒರಿ ಒರಿಯನ ಮಿತ್ತ್ ಕುಲ್ಲುಂಡು. 4ಅಪಗ ಅಕುಲು ಮಾತೆರ್ಲಾ ಪರಿಶುದ್ಧಾತ್ಮದ ಶಕ್ತಿಡ್ ದಿಂಜಿದ್ ಬೇತೆ ಬೇತೆ ಭಾಷೆಲೆಡ್ ಪಾತೆರಿಯೆರೆ ಸುರು ಮಲ್ತೆರ್.

5ಬಾನದ ತಿರ್ತ್ ಉಪ್ಪು ಮಾತ ಜನಾಂಗೊಲೆಡ್ದ್ ಬೈದಿನ ಭಕ್ತೆರಾಯಿ ಯೆಹೂದ್ಯೆರ್, ಯೆರೂಸಲೇಮುಡು ಒಟ್ಟಾದಿತ್ತೆರ್. 6-7ಆ ಮಲ್ಲ ಸ್ವರೊನು ಕೇಂಡ್ದ್ ಜನೊಕುಲೆನ ಒಂಜಿ ಮಲ್ಲ ಗುಂಪು ಸೇರ್ದ್ ಬತ್ತ್‌ದ್ ಪ್ರತಿ ಒರಿಯಡ ತನ್ಕುಲೆ ಭಾಷೆಡ್ ಪಾತೆರುನೆನ್ ಕೇಂಡ್ದ್ ಅಚ್ಚಿರೊಡು ದಿಂಜಿದ್ ಪೋಯೆರ್. ಮಾತೆರ್ಲಾ ಬೆಚ್ಚಿದ್ ಒರಿಯಡೊರಿ ಪಂಡಿನಿ ದಾನೆಂದ್ಂಡ, “ಇಂದಾ, ಪಾತೆರೊಂದುಪ್ಪುನ ಮೊಕುಲು ಗಲಿಲಾಯದಾಕುಲ್ಲತ್ತಾ? 8ಆಂಡ ನಮ ಸ್ವಂತ ಭಾಷೆಡೇ ಮೊಕುಲು ಪಾತೆರುನೆನ್ ಕೇನೊಂದುಲ್ಲತ್ತಾ ಉಂದು ಎಂಚ? 9ನಮ್ಮ ನಡುಟು ಪಾರ್ಥ್ಯೆರ್, ಮೇದ್ಯೆರ್, ಎಲಾಮ್ಯೆರ್, ಮೆಸೊಪೊತಾಮ್ಯೆರ್, ಯೂದಾಯೆರ್, ಕಪ್ಪದೋಕ್ಯೆರ್, ಪೊಂತ, ಆಸ್ಯ, 10-11ಫ್ರುಗ್ಯ, ಪಂಫುಲ್ಯ, ಐಗುಪ್ತ, ಕುರೇನೆದ ಬರಿಟ್ಟುಪ್ಪು ಲಿಬ್ಯ ಈ ಜಾಗ್‌ಡುಪ್ಪುನಾಕಲುಲಾ ರೋಮುಡ್ದು ಬತ್ತಿ ಪ್ರಯಾಣಿಕೆರ್, ಐಟ್ಟ್ ಕೆಲೆವೆರ್ ಪುಟ್ಟು ಯೆಹೂದ್ಯೆರ್, ಬಾಕಿದಾಕುಲು ಮತೊಕು ಸೇರ್ದಿನಾಕುಲುಲಾ ಕ್ರೇತ್ಯೆರ್, ಅರಾಬ್ಯೆರ್ ಆದುಪ್ಪು ನಮ್ಮಕುಲು ನಮ ಭಾಷೆಡೇ ದೇವೆರೆನ ಮಲ್ಲಕಾರ್ಯೊಲೆ ಬಗೆಟ್ ಪನ್ಪಿನೆನ್ ಕೇನೊಂದುಲ್ಲತ್ತಾ,” ಅಂದ್‌ದ್ ಪಂಡೆರ್. 12ಮಾತೆರ್ಲಾ ಅಚ್ಚಿರೊಡು, “ಉಂದು ದಾನೆ ಆದುಪ್ಪು?” ಅಂದ್‌ದ್ ಒರಿಯಡೊರಿ ಕೇನೊಂದಿತ್ತೆರ್.

13ಕೆಲೆವೆರ್, “ಮೊಕುಲು ಪೊಸ ದ್ರಾಕ್ಷಾರಸ ಪರ್ದ್ ಅಮಲಾತೆರ್,” ಅಂದ್‌ದ್ ಗೇಲಿ ಮಲ್ತೆರ್.

ಪೇತ್ರನ ಪಾತೆರೊಲು

14ಅಪಗ ಪೇತ್ರೆ ಪತ್ತೊಂಜಿ ಜನ ಅಪೊಸ್ತಲೆರೆ ಒಟ್ಟುಗು ಉಂತುದು ಮಲ್ಲ ಸ್ವರೊಟ್ಟು ಅಕ್ಲೆಗ್ ಇಂಚ ಬೋಧನೆ ಪನಿಯೆರೆ ಸುರು ಮಲ್ತೆ. “ಯೆಹೂದ್ಯೆರೇ, ಯೆರೂಸಲೇಮುಡುಪ್ಪು ಮಾತ ಜನೊಕುಲೇ, ಈ ಸಂಗತಿ ದಾನೆ ಅಂದ್‌ದ್ ನಿಕ್ಲೆಗ್ ಗೊತ್ತಾಪಿಲೆಕ್ಕ ಎನ ಪಾತೆರೊಗು ಕೆಬಿ ಕೊರ್ಲೆ. 15ನಿಕುಲು ಎನ್ನಿಲೆಕ್ಕ ಮೊಕುಲು ಅಮಲೇರ್ದಿನಕುಲತ್ತ್‌, ಇತ್ತೆ ಕಾಂಡೆ ಒಂರ್ಬ ಗಂಟೆ ಆತಿನಾತೆ. 16ಆಂಡ ಈ ಪೊರ್ತು ಮೂಲು ನಡತೊಂದಿತ್ತಿನ ಬಗೆಟ್ ಯೋವೆಲ್ ಪ್ರವಾದಿಡ್ದ್ ಪಂಡಿನವೇ, 17‘ಕಡೇ ದಿನೊಟು ಯಾನ್ ಮಾತ ಜನೊಕುಲೆ ಮಿತ್ತ್ ಎನ ಆತ್ಮೊನು ಕಡಪುಡುವೆ. ನಿಕ್ಲೆ ಅಂಜೊವುಲ್ಲಾ ಪೊಂಜೊವುಲ್ಲಾ ಪ್ರವಾದನೆ ಮಲ್ಪೆರ್, ನಿಕ್ಲೆ ಜವನ್ಯೆರ್ ದರ್ಶನೊಲೆನ್ ತೂಪೆರ್, ನಿಕ್ಲೆನ ಹಿರಿಯಾಕುಲೆಗ್ ಕನ ಕಟ್ಟು. 18ಉಂದತ್ತಂದೆ ಆ ದಿನೊಟು ಎನ ದಾಸೆರೆ ಮಿತ್ತ್‌ಲಾ ದಾಸಿಯೆರೆ ಮಿತ್ತ್‌ಲಾ ಎನ ಆತ್ಮೊನು ಕಡಪುಡ್ದು ಅಕುಲುಲಾ ಪ್ರವಾದನೆ ಮಲ್ಪೆರ್. 19-20ಕರ್ತವೆ ಕುಡೊರ ಬರ್ಪಿನ ಗಂಭಿರದ ದಿನ ಬರ್ಪಿನೆಕ್ಕ್ ದುಂಬು ಯಾನ್ ಬಾನೊಡು ಕಾರ್ನಿಕೊಲೆನ್ ತೋಜಾವೆ, ಭೂಮಿಡ್ಲಾ ಗುರ್ತೊಲೆನ್ ಉಂಡು ಮಲ್ಪುವೆ, ನೆತ್ತೆರ್, ತೂ ಬೊಕ್ಕ ಮಿತ್ತ್ ಪೋಪಿನ ಪುಗೆ ಮಾತ ಉಪ್ಪು, ಸೂರ್ಯೆ ಕತ್ತಲೆ ಆವು, ಚಂದ್ರೆ ನೆತ್ತೆರ್‌ದಂಚ ಕೆಂಪಾವು. 21ಆಂಡ ಕರ್ತವ ಪುದರ್‌ನ್ ಲೆಪ್ಪುನಾಕುಲೆಗ್ ರಕ್ಷಣೆ ಆವು,’ ಅಂದ್‌ದ್ ದೇವೆರ್ ಪನ್ಪೆ.

22“ಇಸ್ರಾಯೇಲ್ ಜನೊಕುಲೇ, ಎನ ಪಾತೆರೊಲೆನ್ ಕೇನ್ಲೆ, ನಿಕ್ಲೆಗ್ ತೆರಿದುಪ್ಪುಲೆಕ್ಕ ದೇವೆರ್ ನಜರೇತ್‌ದ ಯೇಸುನ ಕೈಡ್ದ್ ಬಲತ್ತ ಕಾರ್ಯೊಲೆನ್ಲಾ ಕಾರ್ನಿಕೊಲೆನ್ಲಾ ಗುರ್ತೊಲೆನ್ಲಾ ನಿಕ್ಲೆ ಉಲಯಿ ಮಲ್ತಿನೆಡ್ದ್ ಆಯೆ ನಿಕ್ಲೆಗ್ ಮೆಚ್ಚಿಗೆ ಆತಿನಾಯೆ ಪಂಡ್ದ್ ನಿಕ್ಲೆಗ್ ತೋಜಾದ್ ಕೊರಿಯೆ. 23ಆ ಯೇಸು, ದೇವೆರೆನ ಯೋಜನೆದ ಪ್ರಕಾರ ನಿರ್ಧಾರ ಆತಿನೆಡ್ದ್ ನಿಕುಲು ಅನ್ಯಾಯಗಾರೆರೆ ಕೈಕ್ ಕೊರ್ದು ಆಯನ್ ಕ್ರುಸ್ಸುಗ್ ಪಾಡ್ದ್ ಕೆರಿಯರ್. 24ಆಂಡ ದೇವೆರ್ ಆಯನ್ ಮರಣದ ಬೇನೆಡ್ದ್ ಬುಡ್ಪಾದ್ ಲಕ್ಕಾಯೆ. ದಾಯೆಗಂದ್ಂಡ, ಆಯನ್ ಮರಣ ಬಂಧನೊಡು ದೀಯೆರೆ ಸಾದ್ಯ ಇಜ್ಜಾಂಡ್. 25ಆಯನ ಸಂಗತಿಡ್ ದಾವೀದೆ, ‘ಕರ್ತವೆ ಏಪಲಾ ಎನ ಎದುರುಡೇ ಉಪ್ಪುನೆನ್ ತೂವೊಂದಿತ್ತೆ, ಯಾನ್ ಪಂದಂದಿಲೆಕ್ಕ ಆಯೆ ಎನ ಬಲತ್ತ ಮರ್ಗಿಲ್‌ಡೇ ಉಲ್ಲೆ. 26ಅಂಚಾಯಿನೆಡ್ದ್ ಎನ ಉಡಲ್ ಸಂತೋಷೊಡುಂಡು; ಎನ ನಾಲಯಿ ಆನಂದೊಡು ಪಾತೆರೊಂದುಂಡು; ಎನ ಶರೀರ ನಿರೀಕ್ಷೆಡ್ ನಿಲೆ ಆದುಂಡು. 27ದಾಯೆಗಂದ್ಂಡ, ಈ ಎನ ಜೀವಾತ್ಮೊನು ಪಾತಾಳೊಡು ಬುಡ್ಪುಜ. ನಿನ ಮೋಕೆದಾಯಗ್ ಕುರಿಯುನ ಅವಸ್ಥೆನ್‌ ತೋಜಾವುಜ. 28ಜೀವದ ಸಾದಿನ್ ಎಂಕ್ ತೆರಿಪಾಯ. ನಿನ ಎದುರು ಯಾನ್ ಸಂತೋಷೊಡು ಉಪ್ಪುಲೆಕ್ಕ ಮಲ್ಪುವ,’ ಅಂದ್‌ದ್ ಪನ್ತೆ.

29“ಸಹೋದ್ರೆರೇ, ಆಂಡ ಪೂರ್ವಜೆರ್ ಆದಿತ್ತಿನ ದಾವೀದನ ಸಂಗತಿಡ್ ಯಾನ್ ಧೈರ್ಯ ಮಲ್ತ್‌ದ್ ನಿಕ್ಲೆಡೊಪ್ಪ ಪಾತೆರೊಲಿ ಅವು ದಾನೆಂದ್ಂಡ ಆಯೆ ಸೈತಿ ಬೊಕ್ಕ ಆಯನ್ ಸಮಾಧಿ ಮಲ್ತೆರ್. ಆಯನ ಸಮಾಧಿ ಇನಿ ಮುಟ್ಟಲಾ ನಮ್ಮಲ್ಪನೇ ಉಂಡು. 30ದಾವೀದೆ ಪ್ರವಾದಿ ಆದಿತ್ತ್‌ದ್ ನಿನ ಸಂತತಿಡೇ ಯಾನ್‌ ಒರಿಯನ್ ನಿನ ಗದ್ದಿಗೆಡ್ ಕುಲ್ಲಾವೆ ಪಂಡ್ದ್ ದೇವೆರ್ ಆಜ ಪಾಡ್ದ್ ಪನ್ತಿನೆನ್ ತೆರಿದಿನಾಯೆ ಆದ್‌ 31ದುಂಬಗ್ ಆಪಿನೆನ್ ತೆರಿದ್ ಕ್ರಿಸ್ತನ ಪುನರುತ್ಥಾನದ ಬಗೆಟ್‌ ಆಯೆ ಪಾತಾಳೊಡೆ ಒರಿಯುಜೆ; ಆಯನ ಶರೀರೊನು ಕುರಿಯೆರೆ ಬುಡ್ಪುಜಿ ಪಂಡ್ದ್‌ಲಾ ಪಂಡೆ.

32“ಈ ಯೇಸುನೇ ದೇವೆರ್ ಲಕ್ಕಾಯೆ ಉಂದೆಕ್ಕ್ ಎಂಕುಲು ಮಾತೆರ್ಲಾ ಸಾಕ್ಷಿದಾಕುಲಾದುಲ್ಲ. 33ಯೇಸು ದೇವೆರೆ ಬಲತ್ತ ಕೈಡ್ದ್ ಮಿತ್ತ ಸ್ಥಾನೊಗು ಏರ್ದ್ ಪೋದು ವಾಗ್ದಾನ ಮಲ್ತ್‌ದಿನ ಪರಿಶುದ್ಧಾತ್ಮ ವರೊನು ಅಮ್ಮೆರೆಡ್ದ್ ಪಡೆದ್ ಎಂಕುಲೆ ಮಿತ್ತ್ ಮೈತ್‌ದ್ ನಿಕುಲು ಇತ್ತೆ ತೂಪಿನಲಾ ಕೇನುನಲಾ ಅವ್ವೇ ಆದುಂಡು. 34-35ಪರಲೋಕೊಗು ಏರ್ದ್ ಪೋತಿನಿ ದಾವೀದೆ ಅತ್ತ್. ತಾನೇ ಪನ್ತಿನ ಪಾತೆರ ದಾನೆಂದ್ಂಡ, ‘ಯಾನ್ ನಿನ ವೈರಿಲೆನ್ ನಿನ ಪಾದಪೀಠ ಮಲ್ಪುನ ಮುಟ್ಟ ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಅಂದ್‌ದ್ ಕರ್ತವೆ ಎನ ಕರ್ತವಡ ಪಂಡೆ.’

36“ಅಂಚಾಯಿನೆಡ್ದ್ ನಿಕುಲು ಕ್ರುಸ್ಸುಗು ಪಾಡ್ಪಾಯಿನ ಈ ಯೇಸುನೇ, ದೇವೆರ್ ಕರ್ತವೆ ಆದ್‌ಲಾ ಕ್ರಿಸ್ತೆ ಆದ್‌ಲಾ ಮಲ್ತೆ ಪನ್ಪಿನ ಪಾತೆರ ಇಸ್ರಾಯೇಲ್ಯೆರೆನ ಗೋತ್ರದಾಕುಲೆಗ್ ಮಾತೆರೆಗ್‌ ಸರಿಯಾದ್ ತೆರಿದುಪ್ಪಡ್,” ಅಂದ್‌ದ್ ಪಂಡೆ.

37ಉಂದೆನ್ ಕೇಂಡ್ದ್ ಅಕ್ಲೆ ಉಡಲ್‌ಗ್ ಹಾಕಿಲೆಕ್ಕ ಆಂಡ್. ಅಕುಲು ಪೇತ್ರಗ್ಲಾ ಬಾಕಿದ ಅಪೊಸ್ತಲೆರೆಗ್ಲಾ, “ಸಹೋದರೆರೆ, ಇತ್ತೆ ಎಂಕುಲು ದಾನೆ ಮಲ್ಪೊಡು,” ಅಂದ್‌ದ್ ಕೇಂಡೆರ್.

38ಪೇತ್ರೆ ಅಕ್ಲೆಗ್, “ನಿಕ್ಲೆನ ಪಾಪೊಲು ಪರಿಹಾರ ಆವರೆಗಾದ್ರ ನಿಕುಲು ಮಾತೆರ್ಲಾ ಪಶ್ಚಾತಾಪ ಪಡೆದ್ ಯೇಸು ಕ್ರಿಸ್ತನ ಪುದರ್‌ಡೇ ದೀಕ್ಷಾಸ್ನಾನ ಮಲ್ತೊನ್ಲೆ, ಅಪಗ ನಿಕುಲು ಪರಿಶುದ್ಧಾತ್ಮನ ವರೊನು ಹೊಂದುವರ್, ಅಂದ್‌ದ್ ಪಂಡೆ. 39ಆ ವಾಗ್ದಾನ ನಿಕ್ಲೆಗ್ಲಾ ನಿಕ್ಲೆನ ಜೋಕುಲೆಗ್ಲಾ ದೂರದಾಕುಲೆಗ್ಲಾ ಬೊಕ್ಕ ನಮ ದೇವೆರಾದುಪ್ಪು ಕರ್ತವೆ ತನ ಕಡೆಕ್ಕ್ ಲೆಪ್ಪುನಾತ್ ಜನೊಕುಲೆಗ್ಲಾ ಉಂಡು.” ಅಂದ್‌ದ್ ಪಂಡೆ.

40ಪೇತ್ರೆ ನನಲಾ ಕೆಲವು ಪಾತೆರೊಲೆಡ್ದ್ ಅಕ್ಲೆಗ್ ಎಚ್ಚರಿಕೆ ಕೊರ್ದು, “ಮೊಡಂಕ್ ಬುದ್ಧಿದ ಈ ಸಂತಾನೊಡ್ದು ತಪ್ಪಾವೊನ್ಲೆ,” ಪಂಡ್ದ್ ನಟ್ಟೊಂಡೆ. 41ಅಪಗ ಆಯ ಪಾತೆರೊನು ಒಪ್ಪಿನಾಕುಲು ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್. ಆ ದಿನೊಟು ಸುಮಾರ್ ಮೂಜಿ ಸಾರ ಜನ ಅಕ್ಲೆ ಒಟ್ಟುಗು ಸೇರಿಯೆರ್. 42ಮೊಕುಲು ಅಪೊಸ್ತಲೆರೆನ ಬೋಧನೆನ್ ಕೇನುನೆಟ್ಲಾ ಸಹೋದ್ರೆರೆನ ಅನ್ಯಮನ್ಯೊಡು ರೊಟ್ಟಿ ಪೊಲ್ಪುನೆಟ್ಲಾ ಪ್ರಾರ್ಥನೆಡ್ಲಾ ನಿಲೆ ಆದಿತ್ತೆರ್.

ನಂಬುನಾಕುಲೆನ ನಡವಳಿಕೆ

43ಮಾತ ಜನೊಕುಲೆಗ್ಲಾ ಪೋಡಿಗೆ ಪತ್ತ್ಂಡ್. ಮಸ್ತ್ ಕಾರ್ನಿಕೊಲುಲಾ, ತೋಜಿದ್ ಬರ್ಪಿ ಕಾರ್ಯೊಲುಲಾ ಅಪೊಸ್ತಲೆರೆ ಕೈಡ್ದ್ ನಡತ್ಂಡ್. 44ನಂಬಿನಾಕುಲು ಮಾತೆರ್ಲಾ ಒಟ್ಟುಗು ಇತ್ತ್‌ದ್ ತನ್ಕುಲೆಡಿತ್ತಿನೆನ್ ಸಂತೋಷೊಡು ಪಟ್ಟೊಂದು ಜೀವನ ಮಲ್ತೊಂದಿತ್ತೆರ್. 45ತನ್ಕುಲೆ ಭೂಮಿ ಆಸ್ತಿಲೆನ್ಲಾ ವಸ್ತುಲೆನ್ಲಾ ಮಾರ್ದ್ ಬತ್ತಿ ಕಾಸ್‌ನ್ ಮಾತೆರೆಗ್ಲಾ ಅಕಲ್ನಕಲ್ನ ಅಗತ್ಯೊಗು ತಕ್ಕ ಪಟ್ಟ್‌ದ್ ಕೊರೊಂದಿತ್ತೆರ್. 46ಅಕುಲು ದಿನಾಲ ಒಂಜೇ ಮನಸ್ಸಾದ್ ದೇವಾಲಯೊಡು ಕೂಡೊಂದಿತ್ತೆರ್. ಅಕ್ಲೆನ ಇಲ್ಲ್ ಇಲ್ಲಡ್ ರೊಟ್ಟಿ ಪೊಲ್ತುದು ಸಂತೋಷೊಡ್ಲಾ ಶುದ್ಧ ಮನಸ್‌ಡ್ಲಾ ವಣಸ್ ಮಲ್ತೊಂದಿತ್ತೆರ್. 47ದೇವೆರೆಗ್ ಸ್ತುತಿ ಮಲ್ಪುನಾಕುಲುಲಾ ಮಾತ ಜನೊಕುಲೆ ದಯೊನು ಪಡೆಯೊಂದಿತ್ತೆರ್‌. ಪ್ರತಿ ದಿನ ಹೆಚ್ಚೆಚ್ಚ ಜನೊಕುಲು ರಕ್ಷಣೆ ಪಡೆಯೊಂದು, ಕರ್ತವೆ ಅಕ್ಲೆನ್ ಮಾತೆರೆನ್ಲಾ ಕೂಟೊಗು ಕೂಡಾವೊಂದಿತ್ತೆ.

Currently Selected:

ಅಪೊ.ಕ್ರಿ 2: ತುಳು

Highlight

Copy