ಅಪೊ.ಕ್ರಿ 3

ಪೇತ್ರೆ ಊನಾದಿತ್ತಿನಾಯನ್ ಗುಣ ಮಲ್ಪುನವು

1ಒಂಜಿ ದಿನ ಪೇತ್ರೆಲಾ ಯೋಹಾನೆಲಾ ಮಧ್ಯಾಹ್ನ ಮೂಜಿ ಗಂಟೆಗ್ ನಡಪುನ ಪ್ರಾರ್ಥನೆಗಾದ್ ದೇವಾಲಯೊಗು ಪೋಯೆರ್. 2ಅವುಲು ಪುಟ್ಟಿ ದಿನೊಡ್ದೇ ಕುಂಟೆ ಇತ್ತಿನಾಯನ್ ಕೆಲೆವೆರ್ ತುಂಬೊಂದು ಬತ್ತ್‌ದ್, ಆಯನ್ ದೇವಾಲಯದ ಪೊರ್ಲು ಬಾಕಿಲ್ ಪನ್ಪಿ ಬಾಕಿಲ್‌ದ ಬರಿಟ್ಟ್ ದಿನಾಲ ಬಿಕ್ಷೆ ನಟ್ಟೆರೆಗಾದ್ ಕುಲ್ಲಾವೊಂದಿತ್ತೆರ್. 3ಆಯೆ ದೇವಾಲಯದ ಉಲಯಿ ಪೋಪಿನ ಪೇತ್ರನ್ಲಾ ಯೋಹಾನನ್ಲಾ ತೂದು ಬಿಕ್ಷೆ ನಟ್ಟಿಯೆ. 4ಪೇತ್ರೆ, ಯೋಹಾನೆ ಇರ್ವೆರ್‌ಲಾ ಆಯನ್ ದೃಷ್ಟಿ ದೀದ್ ತೂಯೆರ್. ಪೇತ್ರೆ ಆಯಗ್, “ಎಂಕ್ಲೆನ್ ತೂಲ,” ಪಂಡೆ. 5ಆಯೆ ಅಕ್ಲೆಡ್ದ್ ದಾಲಾಂಡಲಾ ತಿಕ್ಕು ಅಂದ್‌ದ್ ಆಸೆಡ್ ಅಕ್ಲೆನ್ ಲಕ್ಷ ದೀದ್ ತೂಯೆ. 6ಅಪಗ ಪೇತ್ರೆ, “ಎನಡ ಬೊಳ್ಳಿ ಬಂಗಾರ್ ದಾಲಾ ಇಜ್ಜಿ, ಎನಡ ಇತ್ತಿನೆನ್ ನಿಕ್ಕ್ ಕೊರ್ಪೆ. ನಜರೇತ್‌ದ ಯೇಸು ಕ್ರಿಸ್ತನ ಪುದರ್‌ಡ್ ಲಕ್ಕ್‌ದ್ ನಡಪುಲ.” ಪಂಡ್ದ್ 7ಆಯನ ಬಲ ಕೈ ಪತ್ತ್‌ದ್ ದೆರ್ತ್ತ್‌ದ್ ಲಕ್ಕಾಯೆ. ಅವ್ವೇ ಗಳಿಗೆಡ್ ಆಯನ ಕಾರ್‌ಗ್ಲಾ ಗಂಟ್‌ಗ್ಲಾ ಬಲ ಬತ್ತ್ಂಡ್. 8ಆಯೆ ಲೈತ್‌ದ್ ಉಂತುದು ನಡತೆ. ಬೊಕ್ಕ ನಡತೊಂದು ಲೈತೊಂದು ದೇವೆರೆನ್ ಪುಗರೊಂದು ಅಕ್ಲೆನ ಒಟ್ಟುಗು ದೇವಾಲಯದ ಉಲಯಿ ಪೋಯೆ. 9ಆಯೆ ನಡಪುನೆನ್ಲಾ ಬೊಕ್ಕ ದೇವೆರೆನ್ ಪುಗರುನೆನ್ಲಾ ಜನೊಕುಲು ಮಾತೆರ್ಲಾ ತೂದು, 10ಇಂಬೆ ದೇವಾಲಯದ ಪೊರ್ಲು ಬಾಕಿಲ್ ಪನ್ಪಿ ಬಾಕಿಲ್‌ದಲ್ಪ ಕುಲ್ಲುದು ಬಿಕ್ಷೆ ನಟ್ಟುನಾಯೆನೇ ಅಂದ್‌ದ್ ಆಯನ ಗುರ್ತ ಪತ್ತ್‌ದ್ ಆಯಗ್ ಗುಣ ಆದುಪ್ಪುನೆನ್ ತೂದು ಮಾತೆರ್ಲಾ ಸೋದ್ಯೊಡುಲಾ ಬೆರ್ಮೆಡ್‌ಲಾ ದಿಂಜ್‌ದ್ ಪೋಯೆರ್‌.

ದೇವಾಲಯೊಡು ಪೇತ್ರನ ಪಾತೆರೊಲು

11ಆಯೆ ಪೇತ್ರನ ಬೊಕ್ಕ ಯೋಹಾನನ ಕೈ ಪತ್ತೊಂದು ಉಂತೊಂದುಪ್ಪುನಗ ಅಚ್ಚಿರ ಪಡೆಯಿನ ಜನೊಕುಲು ಮಾತೆರ್ಲಾ ಸೊಲೊಮೋನು ಪನ್ಪಿ ಪುದರಿತ್ತಿನ ಮಂಟಪೊಗು ಗುಂಪುಗುಂಪಾದ್ ಪಾರ್ದ್ ಬತ್ತೆರ್. 12ಪೇತ್ರೆ ಉಂದೆನ್ ತೂದು ಜನೊಕುಲೆಗ್, “ಇಸ್ರಾಯೇಲ್ ಜನೊಕುಲೇ ನಿಕುಲು ದಾಯೆಗ್ ನೆಕ್ಕ್ ಅಚ್ಚಿರ ಪಡೆಪರ್? ನಿಕುಲು ಎಂಕ್ಲೆನೇ ದೃಷ್ಟಿ ದೀದ್ ತೂಪಿನಿ ದಾಯೆ? ಎಂಕುಲು ಸ್ವಂತ ಬಲೊಡ್ದಾವಡ್ ದೇವಭಕ್ತಿಡ್ದಾವಡ್ ಇಂಬ್ಯನ್ ನಡಪುಲೆಕ್ಕ ಮಲ್ತ ಅಂದ್‌ದ್ ಎನ್ನಡೆ. 13ನಮ ಪಿತೃಲಾಯಿ ಅಬ್ರಹಾಮು, ಇಸಾಕ್ ಯಾಕೋಬುನ ದೇವೆರ್ ತನ ಸೇವಕೆ ಆದುಪ್ಪು ಯೇಸುನು ಮೈಮೆ ಪಡೆಪಾದೆ. ನಿಕುಲು ಆಯನ್ ಅಧಿಕಾರಿಲೆಗ್ ಪತ್ತ್‌ದ್ ಕೊರಿಯರ್ ಬೊಕ್ಕ ಪಿಲಾತೆ ಆಯನ್ ಬುಡ್ಪಾವೊಡು ಅಂದ್‌ದ್ ನಿರ್ಧಾರ ಮಲ್ತಿನಪಗ ಆಯನ್ ಬೊಡ್ಚಿ ಅಂದ್‌ದ್ ತಡೆತರ್. 14ಯೇಸು ಪರಿಶುದ್ಧೆಲಾ ನೀತಿವಂತೆಲಾ ಆದಿತ್ತ್‌ಂಡಲಾ ಆಯನ್ ತಿರಸ್ಕಾರ ಮಲ್ತ್‌ದ್ ಕೊಲೆಗಾರನ್ ಬುಡುಗಡೆ ಮಲ್ಪೊಡು ಅಂದ್‌ದ್ ಪಿಲಾತಡ ನಟ್ಟೊಂಡರ್. 15ಜೀವದ ಅಧಿಪತಿನ್ ಕೆರ್ಪಾಯೆರ್. ಆಂಡ ದೇವೆರ್ ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯೆ. ಈ ಸಂಗತಿಡ್ ಎಂಕುಲೇ ಸಾಕ್ಷಿಲು. 16ನಿಕುಲು ತೂದು ಗುರ್ತ ಪತ್ತಿನ ಈ ನರಮಾನಿ ಗುಣ ಆವೆರೆ ಕಾರಣ ಆಯೆ ಯೇಸುನ ಪುದರ್‌ಡ್ ದೀಯಿನ ನಂಬಿಕೆನೇ; ಆ ಯೇಸುನ ಪುದರ್ ಆಯನ್ ಬಲ ಪಡೆಪಾಂಡ್, ಅಂದ್, ಆಯಡ ಉಂಡಾಯಿನ ನಂಬಿಕೆನೇ ಇಂಬ್ಯನ್ ನಿಕ್ಲೆ ಎದುರು ಪೂರ ಗುಣ ಮಲ್ತ್ಂಡ್.

17“ಸಹೋದ್ರೆರೇ, ಅವು ಉಪ್ಪಡ್, ನಿಕುಲು ಆ ಕಾರ್ಯೊನು ತೆರಿಯಂದೆ ಮಲ್ತರ್ ಅಂದ್‌ದ್ ತೆರಿದೆ; ನಿಕ್ಲೆನ ಅಧಿಕಾರಿಲುಲಾ ತೆರಿಯಂದೆ ಮಲ್ತೆರ್. 18ಇಂಚ ಆಪುಂಡು ಅಂದ್‌ದ್ ದೇವೆರ್ ಸುರುಟ್ಟೇ ತೆರಿಪಾದಿತ್ತೆ. ಕ್ರಿಸ್ತೆ ಶ್ರಮೆ ಅನುಭವ ಮಲ್ತ್‌ದ್ ಸೈಯೊಡು ಅಂದ್‌ದ್ ಮಾತ ಪ್ರವಾದಿಲೆ ಬಾಯಿಡ್ದ್ ದುಂಬೇ ಪನ್ಪಾದಿನ ಪಾತೆರೊಲು ಇಂಚ ನಡಪಾಯೆ. 19ಅಂಚಾಯಿನೆಡ್ದ್ ದೇವೆರ್ ನಿಕ್ಲೆ ಪಾಪೊಲೆನ್ ಮಾಜಾದ್ ಬುಡ್ಪಿಲೆಕ್ಕ ನಿಕುಲು ಪಶ್ಚಾತಾಪ ಪಡೆದ್ ಆಯ ಕಡೆಕ್ಕ್ ತಿರ್ಗ್‌ಲೆ. ತಿರ್ಗಿಯರ್ಡ ದೇವೆರ್ ಕೊರ್ಪಿ ಸಮಾಧಾನದ ದಿನೊಕುಲು ಒದಗ್‌ದ್ ಬರು. 20ಬೊಕ್ಕ ಆಯೆ ನಿಕ್ಲೆಗ್ ನೇಮಕ ಮಲ್ತಿ ಕ್ರಿಸ್ತೆ ಆದುಪ್ಪು ಯೇಸುನು ಕಡಪುಡ್ದು ಕೊರುವೆ. 21ಆಂಡ ಮಾತೆನ್ಲಾ ಸರಿ ಮಲ್ಪು ಕಾಲ ಬರ್ಪಿ ಮುಟ್ಟ ಯೇಸು ಪರಲೋಕೊಡೇ ಉಪ್ಪೊಡು. ಆ ಕಾಲದ ಸಂಗತಿಡ್ ದೇವೆರ್ ಪೂರ್ವೊಡ್ದಿಂಚಿ ತನ ಪರಿಶುದ್ಧ ಪ್ರವಾದಿಲೆ ಬಾಯಿಡ್ದೆ ಪನ್ಪಾದೆ. 22ಮೋಶೆ ಇಂಚ ಪನ್ತೆ, ‘ದೇವೆರಾದುಪ್ಪು ಕರ್ತವೆ ಎನನ್ ತಯಾರ್ ಮಲ್ತಿಲೆಕ್ಕ ನಿಕ್ಲೆನ ಸಹೋದ್ರೆರೆಡ್ ಬೊಕ್ಕೊರಿ ಪ್ರವಾದಿನ್ ನಿಕ್ಲೆಗ್ ತಯಾರ್ ಮಲ್ತ್‌ದ್ ಕೊರುವೆ. ಆಯೆ ನಿಕ್ಲೆಗ್ ಪನ್ಪಿನ ಮಾತ ಪಾತೆರೊಲೆಗ್ ಕೆಬಿ ಕೊರ್ದು ಕೇನ್ಲೆ. 23ಆ ಪ್ರವಾದಿನ ಪಾತೆರ ಕೇನಂದೆ ಉಪ್ಪುನ ಪ್ರತಿ ಒರಿಲಾ ನಮ ಜನೊಕುಲೆಡ್ದ್ ದೂರ ಆದ್ ನಾಶ ಆಪೆ,’ ಪನ್ಪಿನವೇ. 24ಉಂದತ್ತಂದೆ ಸಮುವೇಲೆಲಾ ಆಯಡ್ದ್ ಬೊಕ್ಕ ಬತ್ತ್‌ದ್ ಪ್ರವಾದನೆ ಮಲ್ತಿನ ಮಾತ ಪ್ರವಾದಿಲುಲಾ ಈ ದಿನೊಕುಲೆ ವಿಷಯೊಡು ತೆರಿಪಾದೆರ್. 25ನಿಕುಲು ಆ ಪ್ರವಾದಿಲೆ ಶಿಷ್ಯೆರ್, ದೇವೆರ್ ನಮ ಪಿತೃಲೆ ಒಟ್ಟುಗು ಮಲ್ತ್‌ದಿ ಒಡಂಬಡಿಕೆಗ್ ಬಾಧ್ಯೆರಾದುಲ್ಲರ್. ಆಯೆ ಅಬ್ರಹಾಮುಗು, ‘ನಿನ ಸಂತಾನೊಡ್ದು ಭೂಮಿದ ಮಾತ ಕುಟುಂಬೊಲೆಗ್ ಆಶೀರ್ವಾದ ತಿಕ್ಕು,’ ಅಂದ್‌ದ್ ಆ ಒಡಂಬಡಿಕೆನ್ ಮಲ್ತ್‌ದೆ ಅತ್ತಾ? 26ಸುರು ನಿಕ್ಲೆಗಾದೇ, ದೇವೆರ್ ತನ ಸೇವಕನ್ ತಯಾರ್ ಮಲ್ತ್‌ದ್ ನಿಕ್ಲೆಡ್ ಒರಿ ಒರಿಯನ್ ಅಕುಲಾಕುಲೆ ಪಡಿಕೆಂತಿ ಗುಣೊಡ್ದು ತಿರ್ಗಾದ್ ನಿಕ್ಲೆನ್ ಆಶೀರ್ವಾದ ಮಲ್ಪೊಡು ಅಂದ್‌ದ್ ಯೇಸುನು ಕಡಪುಡ್ದೆ,” ಪಂಡ್ದ್ ಪಂಡೆ.

Currently Selected:

ಅಪೊ.ಕ್ರಿ 3: ತುಳು

Highlight

Copy