Ruka 18

Mqedil Mqrinuc ma Mpsgao

1Smmalu 1 pnungalan kari tnugsaan na ka Yesu. Kiya ka so maha dmurun klaali ma uxe daha kkuuwic lnglungan. 2Rmengo: “Ga meniq 1 alang hiya ka 1 mpsgao ini kiicu Utux Baro ma ini psbrinah seediq uri. 3Ga alang hiya ka 1 mqedil mqrinuc. Meyah heya hiya klaali ma rmengo: ‘Braho su, cyuki ku hiya ka pais mu.’ 4Bsiyaq na ba ini cyuki han. Bobo na de rmengo nanak lhebun na: ‘Ani ku ini kiicu Utux Baro ma ini ku psbrinah seediq uri we 5ado so smhngeras smqeya kenan ka mqedil mqrinuc nii ma cyuki mu hiya. So uxe na eeyah klaali smqeya kenan.’” 6Rmengo ka Bukung: “Qbhangi ka rnengo ini ksderux mpsgao nii. 7Seediq gneegan Utux Baro ani keeman ma diyan mlawa heya. Ye na uxe dyagun thuwe na cmiyuk peni? 8Rngage maku, uxe na beyo cyukun ka dheya. Kiya de meyah ka Laqi seediq, ye na maha sllayun so nii snhiyan meniq bobo dxeral nana ho?”

Dnurun Seediq Parisay ma Maangal Pila Nqbsuran

9Pnungalan kari Yesu quri seediq lmngelung msderux ku ba ma smbiciq qmita seediq: 10“Mosa Sapah Thmkuwan dmurun hiya ka 2 seediq. Parisay ka 1 ma maangal pila nqbsuran ka 1. 11Mheyu ka Parisay ma dmurun so nii: ‘Utux Baro! Mqaras ku ba sunan. Yaku we ini ku pntena taxa seediq kmraki mangal, ini ksderux lnglungan ma mmhemuc msuupu. Ini ku pntena maangal pila nqbsuran nii uri. 12Yaku we mn2 ku ptgaya ini ekan ka 1 cenga sngayan. Ani maanu nangal mu we wada mu sbege 1 tnugmxalan kana.’ 13Seediq maangal pila we smtheya mheyu ma ani qqita baro we miicu. Wano beebu berah na nanak ma rmengo: ‘Utux Baro, glaani ku hiya yaku we seediq ku niqan qnquwan noda!’ 14Rngage maku, wada sapah ka seediq nii de nuuqu wada ngalan msderux ooda seediq ka heya ma ini ngali so kiya ka seediq Parisay. Ado smparu nanak we sbciqun. Smbiciq nanak we spruun.”

Smbleyaq Lqlaqi Biciq ka Yesu

(Mat 19:13-15. Mrk 10:13-16)

15Madis laqi daha meyah mita Yesu ka duma seediq, mptelung daha heya. Taan tnugsaan na ka dseediq nii de kseengun daha. 16Lmawa dheya ka Yesu ma rmengo: “Peeyah kenan hini ka laqi, iya htrani. Ado so nii ka seediq ga meniq qnlhangan Utux Baro. 17Bale ba rngage maku, ani ima mkmangal qnlhangan Utux Baro we nasi ini pntena laqi de ida uxe mpteme hiya.”

Migin Uka Psteqan Knuudus ka Qbsuran Mbleyaq

(Mat 19:16-30. Mrk 10:17-31)

18Smiling Yesu ka 1 qbsuran mpqlahang: “Malu mptgesa, asi ku ka qmeepah maanu ho kiya ka mptduwa ku mangal uka psteqan knuudus ho?” 19Rmengo heya ka Yesu: “Ma su rmengo mesa malu ku ka yaku ho? Wano 1 ba Utux Baro we uka ka kesun malu. 20Ida su klaun ka kari gaya pndakar: ‘Iya mmhemuc msuupu, iya phuqil, iya geeguy, iya qberiq pgkela, sprui ka tama ma bubu su.’” 21Rmengo ka seediq kiya: “Kana so nii we wada mu ndwaun dmoi peeyah ku laqi da.” 22Mbahang kari nii ka Yesu de rngagan na: “Niqan 1 ka ini su pttuku nana. Sai gmbaruy ka kana dnoi su ma bqani qrinuc seediq. So kiya de maha niqan dnoi su meniq karac baro. Kiya uri we eyah smnegul kenan.” 23Mbahang kari so nii ka heya de asi qnaqah kuxul. Ado mbleyaq bale ka heya.

24Mita heya ka Yesu ma rmengo: “Mremux qnlhangan Utux Baro ka mbleyaq seediq we teyal ba mqriqu! 25Mremux qnlhangan Utux Baro ka mbleyaq seediq we nuuqu msleexan pooda beling qumi ka dapa bukung!” 26Smiling ka mnbahang: “So kiya de ima ka mtduwa pkdusun di?” 27Rmengo ka heya: “Ini tklai ka seediq we tklaan kana Utux Baro.” 28Rmengo ka Petros: “Tai, wada miyan laxan ka ani maanu ma smnegul miyan sunan da.” 29Rmengo ka Yesu: “Bale ba rngage maku. Ririh qnlhangan Utux Baro malix sapah uxe uri we mqedil, mtswai, rudan na ma laqi na we 30uka ka ini angal mgkala ba kdesan saya ma maangal uka psteqan knuudus kdesan na mmeeyah.”

Mn3 Kari Pgeela Mpqraqil ma Mpkuudus Ka Yesu

(Mat 20:17-19. Mrk 10:32-34)

31Kiya de Yesu we desun na ka 12 tnugsaan na ma rmengo dheya: “Tai, maha ta Yerusalem, kana pnatis dmpgeela kari quri Laqi seediq we mmaha mpbale kana. 32Sbege daha seediq icil qnlhangan ka heya. Phlisun daha, psqaun daha ma truqun daha dqeras. 33Kiya uri ma sbetun daha ma phqilun daha. Mk3 ali de mpkuudus peeyah hnqilan.” 34Ooda nii we ini bale klai dtnugusaan na. Mgleing ka dungus kari nii ma ini daha klai maanu ka rnengo na.

Pklmeun ka Seediq Mbudu

(Mat 20:29-34. Mrk 10:46-52)

35Smdaling Yerixo ka Yesu ciida we tleung siyo elu ka 1 mbudu ga mesa uqun. 36Qbhangan na ka hbaro ba seediq moda hiya de smiling, maanu ka kiya. 37Rngagan daha: “Nii moda hini ka Yesu seediq Najare.” 38Kiya de mdiras rmengo ka heya: “Laqi Dawid, Yesu, glaani ku!” 39Ga tgeela mkkesa ka seediq we mseang heya ma iya squwaq kesun na. Kiya de krinah mdiras rmengo ka heya: “Laqi Dawid, Yesu, glaani ku!” 40Asi heyu ka Yesu ma dmurun seediq maadis heya. Dehuk berah na de slingan na, 41“Maanu ka ddaun mu qmeepah sunan ho?” Rmengo ka heya: “Bukung! Mqmita ku.” 42Rmengo ka Yesu: “Mqita su da! Snhiyan su ka wada pkmalu sunan da.” 43Asi qita ka seediq mbudu ma mkleelu tmdahu Utux Baro smnegul Yesu. Mita so nii ka kana knhbaro seediq de tmdahu Utux Baro uri.

Currently Selected:

Ruka 18: Stgdaya

Highlight

Copy