Ruka 17

Kari Tnugeesa Yesu

(Mat 18:6-7, 21-22. Mrk 9:42)

1Rmengo tnugsaan na ka Yesu dungal: “Ida mpniqun ka ptakur seediq. Kiya de smtali bale ka pktakur seediq nii! 2Betaq pskripuc 1 tgbiciq seediq nii we nuuqu malu seegul nduyung na ka glangan ma sqada rcilung. 3Qlahang nanak ka yamu! Nasi wada pqluqah sunan ka mtswai su we dduli rmengo. Nasi kmpriyux lnglungan na ka heya we srwai. 4Nasi mn7 pqluqah sunan 1 ali ka heya we mn7 wada kmpriyux lnglungan na uri ma rmengo sa: ‘Mppriyux ku lnglungan da’, asi su ka srwaun ka heya.”

Beyax Snhiyan

5Rmengo Bukung ka snkgulan: “Braho su bukung, prnai miyan hiya ka snhiyan nami.” 6Rmengo ka Bukung: “Nasi mntena 1 demux rehak sama karic ka snhiyan namu we ani su sun sa rmengo: ‘Gbilun gamil ma osa hmeru rcilung’ ka qhuni tgdiyuc we, ida maha mbahang yamu ka dheya.

Qpahun Tnqliyan

7Ima namu ka niqan tnqliyan kndalax qnpahan mnosa tmabul ma tmabu miric rudu meyah sapah ciida de asi su rngagi: ‘Aguh tleung ma ekan nhari hnpure’ ho? 8Ya uxe maha so nii rmengo tnqliyan na peni? ‘Psrmali ku uqun gbiyan, pskreti habik su ma qpahi betaq ku mnhedu mekan ma mimah. Bobo na hiya de mahi ma uqi ka isu.’ 9Muyu nkari so nii qmeepah ka tnqliyan, qbsuran nii de ye maha mprengo ‘Mhuwe su bale’ na ho? 10Nasi so nii de, bobo namu qmneepah kana nkari mu yamu we wano rmengo kari so nii: ‘Tnqliyan uka ririh ka yami. Ndaan nami meepah nii we qqpahun nami ka nii.’”

Pklmeun ka 10 Msburo Heyi

11Mosa Yerusalem ciida ka Yesu we mnoda Samareia ma Galil. 12Kiya de mremux 1 alang de smterung heya ka 10 seediq mnarux msburo heyi. Smtheya mheyu ka dheya ma 13pmbaro quwaq daha rmengo: “Yesu mptgesa, glaani nami!” 14Mita ka Yesu de rmengo dheya: “Saani pqita msapuh ka heyi namu.” Mosa ka dheya ciida we wada psbgrahun ka heyi daha da. 15Taxa ckceka daha hiya we taan na gisu ta malu mesa de mbrinah meyah paru ba quwaq na tndahu Utux Baro. 16Kiya de tgtemaq berah papak Yesu uri ma mqaras ba heya. Seediq nii we seediq Samareia. 17Rmengo ka Yesu: “Uxe 10 heyi ka wada pklmeun buro heyi peni? Ga inu ka 9 di? 18Wano seediq icil nii nanak ma uka dungal ka mbrinah ttndahu daha Utux Baro ho?” 19Kiya de rmengo heya ka Yesu: “Tutuy ma osa! Wada pkuudus sunan ka snhiyan su.”

Eeyah Qnlhangan Utux Baro

(Mat 24:23-28, 37-41)

20Smiling ka seediq Parisay: “Meeyah knuwan ka qnlhangan Utux Baro?” Cmiyuk rmengo ka Yesu: “Ini tai doriq ka eeyah qnlhangan Utux Baro. 21Uxe mprengo so nii uri ka seediq: ‘Tai, nii hini!’ Uxe uri we: ‘Tai, gaga hiya!’ Ado gaga meniq ckceka lhebun namu ka qnlhangan Utux Baro.” 22Kiya de rngagan na ka tnugsaan na: “Meeyah ka ali, qmqtaun namu ka 1 ali Laqi seediq we uxe namu taun. 23Maha mprengo yamu so nii ka seediq: ‘Tai, gaga hiya: Tai, nii hini!’ Iya osa nganguc ka yamu ma iya snegul dheya! 24Ado eeyah ali na ka Laqi Seediq we maha mntena wilaq tqwilaq peeyah karac hini ma betaq nhdean karac hiya. 25Kiya de heya we asi ka mooda egu mqraqil ma qqada seediq mknexal saya. 26Ado hmuwa mesa ka ali Noax ciida de maha so ali kiya ka ali Laqi seediq uri. 27Seediq ciida we Betaq mekan ma mimah, mangal mqedil ma mosa rseno ka dheya. Dehuk ka ali mremux asu ka Noax de meyah ka rnecux qsiya paru ma wada pkuuka kana dheya da. 28Mntena so ali Lot uri. Mekan ma mimah, maruy ma gnbaruy, mhuma ma smmalu ka dheya. 29Dehuk ka ali mlatac peeyah Sedom ka Lot de mtuting peeyah baro ka puniq mgceyas kuuka kana dheya. 30Maha so nii ka ali pntuura Laqi seediq uri. 31Ali ciida, ga dnamux ka seediq ma ani ga truma sapah ka qyqeya na we iya osa mtuting mangal. Ga qnpahan ka seediq we iya osa sapah uri. 32Yamu we lngelung ka mqedil Lot. 33Ani ima kmkraguh knuudus na we pgdangun na ka knuudus na. Sqada na ka knuudus na we pkdusun na ka knuudus na. 34Rngage maku, keeman ciida we mtaqi 1 qlapo ka 2 heyi we desun ka 1 ma lixun ka 1. 35Msuupu tmekan tkanan ka 2 mqedil we desun ka 1 ma lixun ka 1. 36Ga qnpahan ka 2 heyi we desun ka 1 ma lixun ka 1.” 37Rmengo Yesu ka tnugsaan na: “Bukung! Gaga inu peni?” Rmengo ka Yesu: “Gaga inu ka heyi wada mhuqil we ga msseli hiya ka qdiro uri.”

Currently Selected:

Ruka 17: Stgdaya

Highlight

Copy