Yohane 18

Qrapun ka Yesu

(Mat 26:47-56. Mrk 14:43-50. Ruk 22:47-53)

1Bobo rmnengo kari nii ka Yesu de msuupu tnugsaan na mlatac ma mntaril sipo ayu Qidron. Ga hiya ka malu dxeral ga phmaan phepah ma qhuni. Mosa mremux hiya ka Yesu ma tnugsaan na. 2Mkela dxeral nii ka Yehudah mbaruy heya uri. Ado mneegu msuupu tnugsaan na msseli hiya ka Yesu. 3Yehudah we desun na ka 1 rahul supi ma mpqlahang peeyah dpusu msapuh ma seediq Parisay. Dmoi camo ma hiru ma qyqeya mccebu ma meyah hiya. 4Ado klaun Yesu ka ani maanu mmeyah heya de mosa smterung ma rmengo dheya: “Ima ka gimun namu?” 5Cmiyuk ka dheya: “Yesu seediq Najare.” Rmengo dheya ka Yesu: “Yaku ka kiya.” Ga mheyu msuupu dheya hiya ka Yehudah mbaruy heya uri. 6Rmengo dheya ka Yesu: “Yaku ka kiya.” Tgkiwax quri bukuy ka dheya ma mtakur dxeral. 7Smiling dungal dheya ka Yesu: “Ima ka gimun namu?” Rmengo ka dheya: “Yesu seediq Najare.” 8Rmengo ka Yesu: “Wada ku rmengo yamu da, ‘Yaku ka kiya.’ Nasi yaku ka gimun namu we posa ka seediq nii.” 9Rmengo so nii ka Yesu we kiya ka maha mpbale ba rnengo na: “Seediq bnege su kenan we uxe mu prdangun ani 1.” 10Dmoi hlmadac ka Simon Petros. Kiya de hgluqun na ka hlmadac na ma smipaq tnqliyan paru msapuh ma slapi na hiya ka narac birac na. Malxos kesun ka ngayan tnqliyan kiya. 11Kiya de rngagan Yesu ka Petros: “Yuqaani rudu ka hlmadac su! Pngerah mahan bnege na kenan ka Tama mu we ya mu uxe mahun ho?”

Desun Berah Anas ka Yesu

12Qmerac Yesu ka 1 rahul supi ma qbsuran 10'00 supi daha ma dmpqlahang seediq Yudaya ma mekuy heya. 13Kiya de pllayun daha madis berah Anas. Ado heya we baki Kayapas paru msapuh ka heya. 14Kayapas nii we kiya ka rmnengo dseediq Yudaya cuuxal: “Rmirih seediq mhuqil ka taxa seediq we paru ba rrihan na.”

Dmeqo Yesu ka Petros

(Mat 26:69-70. Mrk 14:66-68. Ruk 22:55-57)

15Smnegul Yesu ka Simon Petros ma 1 dungal tnugsaan. Ado klaun paru msapuh ka tnugsaan nii ma msuupu Yesu mremux nganguc sapah paru msapuh. 16Mheyu rhengun nganguc ka Petros. Kiya de klaun paru msapuh ka 1 tnugsaan we rngagan na ka weewa mpqlahang rhengun ma pstmaun na ruma ka Petros. 17Weewa mpqlahang rhengun we rngagan na ka Petros: “Uxe su tnugsaan seediq gaga ka isu uri peni?” Rmengo ka heya: “Uxe ku.” 18Kiya de ado msekuy psqama bagah ma mheyu malah hiya ka dtnqliyan ma dmpqlahang. Msuupu dheya mheyu malah hiya ka Petros uri.

Smiling Yesu ka Pusu Msapuh

(Mat 26:59-66. Mrk 14:55-64. Ruk 22:66-71)

19Kiya de smiling Yesu quri tnugsaan na ma tnugesa na ka paru msapuh. 20Cmiyuk heya ka Yesu: “Pkleexan ku ba rmengo kana seediq ka yaku. Tmgesa ku klaali pnssliyan seediq Yudaya sapah pssliyan ma Sapah Thmkuwan. Ini ku gruus rmengo ani maanu. 21Hmuwa, ma su smiling kenan. Sai smiling ka seediq mnbahang rnengo mu. Ado klaun daha ka rnengo mu.” 22Rmnengo so kari nii ka Yesu de smebuc baga dqeras na ka 1 mpqlahang ga mheyu hiya ma rmengo: “Hmuwa, ma su mchaya cmiyuk paru msapuh ho?” 23Cmiyuk heya ka Yesu: “Nasi mqnuuqu ka rnengo mu we pgklai ku ka qnquwan mu. Nasi ini qnuuqu ka rmengo mu we hmuwa, ma su smebuc kenan ho?” 24Kiya de bkean daha ka Yesu ma skgulan Anas mosa berah Kayapas paru msapuh hiya.

Dmeqo Yesu Dungal ka Petros

(Mat 26:71-75. Mrk 14:69-72. Ruk 22:58-62)

25Ciida mheyu malah ka Simon Petros ma rngagan daha: “Uxe su tnugsaan na ka isu uri peni?” Dmeqo ka Petros ma rmengo: “Uxe ku.” 26Rmengo heya ka 1 tnqliyan paru msapuh, kiya ka dadal seediq wada slapun birac Petros, rmengo ka heya: “Uxe misu qntaan msuupu su dheya meeniq malu dxeral ga phmaan phepah ma qhuni hiya ka isu peni?” 27Dmeqo dungal ka Petros. Kiya de asi qqugu ka rodux da.

Psiling Berah Pilatos ka Yesu

(Mat 27:1-2, 11-14. Mrk 15:1-5. Ruk 23:1-5)

28desun daha sapah qbsuran peeyah sapah Kayapas ka Yesu. Lmedax mgrebu ka ciida. Ini teme sapah qbsuran ka seediq Yudaya. Kcugun daha mpsrutiq ma uxe meekan smseman hrnasan ka dheya. 29Maanu so kiya de meyah nganguc ka Pilatos mosa dheya hiya duma smiling: “Maanu ka bnege namu qnquwan seediq nii ho?” 30Cmiyuk ka dheya: “Nasi ini qeepah naqah ka seediq nii we kani nami bqani sunan.” 31Rmengo dheya ka Pilatos: “Desi nanak yamu ka seediq nii, pdai gaya namu nanak slingi ka heya!” Rmengo ka seediq Yudaya: “Uka beyax nami phuqil seediq ka yami.” 32Nii we kiya ka maha ma bale ba rnengo Yesu quri mphuwa mesa mhuqil ka heya.

33Mosa mremux sapah na ka Pilatos dungal ma tosun na mlawa ka Yesu ma rngagan na: “Isu we qbsuran su paru seediq Yudaya ho?” 34Cmiyuk heya ka Yesu: “Rnengo su nanak ka kari nii ho? Uxe uri we spooda daha sunan quri rmengo yaku ka dseediq ho?” 35Cmiyuk ka Pilatos: “Seediq ku Yudaya ka yaku peni? Dyamu nanak ma dpusu msapuh ka gisu su daha sbege kenan. Maanu ka qnpahan su ho?” 36Cmiyuk ka Yesu: “Qnlhangan mu we uxe nbobo dxeral nii. Nasi nbobo dxeral ka qnlhangan mu de naka ririh yaku mpcebu ka dtnqliyan mu ma uxe ku na daha bbege seediq Yudaya. Ado qnlhangan mu we uxe nbobo dxeral nii.” 37Kiya de smiling heya ka Pilatos: “So kiya de yaa su qbsuran paru ka isu ho?” Cmiyuk ka Yesu: “Isu nanak ka rmnengo qbsuran ku pau. Nii ka sptuting mu ma seeyah mu bobo dxeral. Ado mpgkela ku knbale ba. Kana seediq nbale ba we mbahang kari mu.” 38Rmengo heya ka Pilatos: “Maanu ka kesun su bale ba?”

Ngalan Mndungus Phqilun ka Yesu

(Mat 27:15-31. Mrk 15:6-20. Ruk 23:13-25)

Rmnengo nii ka Pilatos de mosa nganguc seediq Yudaya dungal ma rmengo dheya: “Ini mu slai ani maanu qnquwan na ka heya. 39Kiya de niqan ka gaya namu we rraguh mu yamu smseman hrnasan ciida ka 1 seediq. Mpraguh ku yamu ka qbsuran paru seediq Yudaya nii ho?” 40Maanu so kiya de mdiras rmengo dungal ka dheya: “Uxe seediq nii! Barabbas!” Barabbas nii we mpgeeluk gmeeguy ka heya.

Currently Selected:

Yohane 18: Stgdaya

Highlight

Copy