Yohane 17

Dnurun Yesu

1Rmnengo kari nii ka Yesu de mita baro ma rmengo: “Tama, dehuk ka ali da. Braho su pkledax ka Laqi su, so maha pledax isu ka Laqi su. 2Ado wada su sbege heya ka pusu beyax qqlahang na kana muudus niqan heyi ma dara, dehuk na sbege su uka psteqan knuudus ka kana seediq bnege su heya. 3Kkela daha isu ma wano 1 bale ba Utux Baro. Kiya uri we mkela snkgulan su ka Yesu Kiristo kika kesun uka psteqan knuudus. 4Wada ku pkledax isu ka meeniq ku bobo dxeral. Kiya de wada mu qhdeun qmeepah ka bnege su kenan. 5Tama! Saya, braho su bale pkledax ku berah su. Kiya ka knledax mnsuupu ku isu berah snlmean bobo dxeral ciida.

6Wada mu sptuura ngayan su ka seediq gneegan su. Nnisu ka dheya ma wada su sbege kenan ma muyu kari su ka dheya uri. 7Bnege su kenan ida pneeyah sunan ka kana ani maanu we klaun daha saya. 8Ado kari bnege su kenan we wada mu sbege dheya ma wada mangal ka dheya. Klaun daha bale pneyah ku sunan ma snhiyun daha ka smnkagul su kenan. 9Sdurun mu ka dheya, uxe seediq bobo dxeral ka sdurun mu. Seediq bnege su kenan ka nii mu sdurun. Ado nnisu ka dheya. 10Kana nnaku we nnisu uri ma nnisu we nnaku uri. Spooda dheya wada ku mangal knledax. 11Maha ku isu hiya, uxe ku meeniq bobo dxeral, meeniq bobo dxeral ka dheya. Tama Mrtaso, braho su ado ngayan su, kiya ka ngayan bnege su yaku we qlhangi ka dheya. Kiya de maha mntena so ita mskingal ka dheya. 12Mntheyaq ku dheya ciida, pooda ku ngayan su, kiya ka ngayan bnege su yaku we plekuh ku dheya ma qmlahang ku dheya. Ckceka daha we wano laqi pkuuka we ini kuuka kana ka dheya. Kiya de maha mpbale ba ka kari Patis. 13Saya maha ku isu hiya, maha pttuku lhebun daha ka qnaras mu, kiya ka kari rnengo mu bobo dxeral. 14Wada mu sbege dheya ka kari su. Qmnriqu dheya ka bobo dxeral, ado uxe nbobo dxeral ka dheya. Mntena so uxe ku nbobo dxeral ka yaku. 15Uxe ku mdurun aangal su peeyah bobo dxeral ka dheya, wano qqlahang su dheya ma pqduriq peeyah naqah ka sdurun mu. 16Uxe nbobo dxeral ka dheya, so kiya uri uxe ku nbobo dxeral ka yaku uri. 17Braho su pdai knbale su prtaso dheya. Kari su we kika kesun bale ba. 18So su hmuwa smnkagul kenan bobo dxeral. So kiya uri mpskagul ku dheya mosa bobo dxeral uri. 19Ririh dheya ka spsaanak mu mrtaso kenan nanak. Kiya de so maha mrtaso mooda knbale ba ka dheya uri.”

20“Uxe wano dheya ka sdurun mu. Sdurun mu ka seediq mooda kari daha snhii kenan uri, 21so maha mpskingal ka dheya. Mntana so Tama meniq ckceka mu ma meniq ku ckceka su ka yaku. Kiya de mpsnhii ka seediq bobo dxeral isu ka smnkagul kenan. 22Knledax bnege su kenan we wada mu sbege dheya. So mmaha pskingal ka dheya mntena so mskingal ka ita. 23Meeniq ku ckceka daha ka yaku ma meeniq su ckceka mu ka isu. So nii mttuku bale mmaha 1 ka dheya, kklaun bobo dxeral ka smnkagul su kenan ma wada su gmaalu dheya mntena su so wada gmaalu kenan. 24Tama, meeniq ku inu we so maha theyaq yaku meeniq hiya ka seediq bnege su kenan uri. Kiya de qqita daha knledax mu bnege su kenan. Ado ida su gmaalu ba kenan peeyah berah snlmean su bobo dxeral. 25Tama msderux nooda! Ini kela sunan ka seediq bobo dxeral. Ida ku mkela sunan ka yaku. Dseediq nii we mkela isu ka smnkagul kenan. 26Wada mu spgkela dheya ka ngayan su ma ida mu ltudun ppgkela. Kiya we eeniq ckceka daha ka gnaalu wada su sgaalu kenan ma eeniq ku ckceka daha uri.”

Currently Selected:

Yohane 17: Stgdaya

Highlight

Copy