Yohane 16

1“Wada mu srengo yamu ka nii we so uxe pktakur yamu. 2Lwaqun namu na peeyah sapah pssliyan ka yamu. Gisu ka ali ciida. Kiya de phuqil yamu ka dheya we ngalan daha so nii qmeepah Utux Baro. 3So nii ka noda daha we ado ini kela Tama ma ini kela yaku uri. 4Wada mu srengo yamu ka nii we, nasi meepah so nii ciida ka dheya, so namu maha lnglungun kari rnengo mu yamu.

Qpahun Bgihur Utux

Ini ku rengo nii yamu peeyah pnrdingan han, ado ida ku msuupu theyaq yamu. 5Maha ku Tama smnkagul kenan ka saya da. Ckceka namu we uka ka smiling kenan, ‘Maha su inu ho?’ 6Ado wada ku rmengo yamu so nii de kika pslhebun namu da. 7Ani so kiya de srengo mu yamu ka bale ba. Mosa ku we maha niqan rrihun namu. Nasi ku ini osa we uxe meeyah yamu hini ka mdayo. Nasi ku mosa de skgulun mu yamu hini ka heya. 8Meyah ka heya ciida de mpgkela qnquwan noda, quri mpsderux noda, mpsgao ma ptuura seediq bobo dxeral. 9Qnquwan daha noda we kiya ka ini snhii yaku. 10Quri msderux noda we kiya ka mosa ku Tama hiya ma uxe namu mqita kenan da. 11Psgao we kiya ka wada daan psgao ka mpqlahang bobo dxeral nii.

12Egu ba ka rrengo mu yamu nana. Kiya de uxe namu klaan lmngelung nana. 13Kiya de meeyah ka Bgihur Utux bale de meyah ddudul yamu mremux kana quri bale ba. Ado uxe mpeeyah heya nanak ka rrengo na. Rrengo na we kiya ka kana qnbhangan na. Kiya de pqbhangun namu na ka kana ani maanu mmeyah. 14Mpkledax yaku ka heya. Ado pqbhangun namu na ka nangal na peeyah kenan. 15Kana ga dooyun Tama we naku kana. Maanu so kiya de mprengo ku, pqbhangun namu na ka nangal na peeyah kenan.”

Mpqaras ka Pslhebun

16“Ini qbsiyaq de uxe namu mqita kenan da. Uxe mpqbsiyaq dungal we mqita namu kenan dungal.” 17Mpprengo ka duma tnugsaan na: “Maanu bale ka kari na: ‘Ini qbsiyaq de uxe namu mqita kenan da. Uxe mpqbsiyaq dungal we mqita namu kenan.’ Rmengo dungal: ‘Ado maha ku Tama hiya ka yaku.’” 18Kiya de smiling ka dheya: “Maanu bale ka kesun na ‘Uxe mpqbsiyaq’ da ho? Ini nami klai ga rmengo maanu ka heya?” 19Kmsiling heya ka dheya we klaun Yesu duma rngagan na: “Ma namu mppsiling kari mu nii ‘Ini qbsiyaq ka uxe namu mqita kenan da. Uxe mpqbsiyaq dungal we mqita namu kenan’ ho? 20Bale ba rngage maku, yamu we mplingis ma tsdamac lmingis. Kiya de mpqaras ka seediq bobo dxeral. Mpslhebun namu, kiya ka kiya maha kmpriyux mqaras ka pnslhebun namu. 21Mptnlaqi ka mqedil we maha pslhebun. Ado dehuk ka ali na. Kiya de bobo tmnlaqi de chngiyan na ka pnqrqilan na da. Ado mtuting bobo dxeral ka laqi kiya ka mqaras ka heya. 22Mntena so nii pslhebun saya ka yamu uri. Kiya de mqita ku yamu dungal we mpqaras ka lhebun namu da. Qnaras nii we uka daha glekun ani ima. 23Betaq ali ciida, uxe namu msiling ani maanu kenan. Bale ba rngage maku. Mooda ngayan mu ani maanu ka pgsaun namu Tama we mbege yamu ka heya. 24Betaq saya we ini namu poda ngayan mu mesa ani maanu. Pgsai saya, kiya de maangal namu. So maha mttuku ka qnaras namu.”

Wada ku Mbeyax Qnlangan

25“Quri oda nii we, spaangal mu kari rmengo yamu. Gisu ka ali de uxe ku mpaangal kari rmengo yamu da. Ptuura mu bale rmengo yamu ka quri Tama. 26Betaq ali ciida, pooda namu ngayan mu mesa. Kiya de uxe ku mprengo, ririh yamu ka mpesa ku Tama. 27Gmaalu yamu ka Tama, ado namu wada gmaalu yaku ma wada namu snhiyun ka pneeyah ku Tama ka yaku. 28Pneeyah ku Tama meyah ku bobo dxeral. Dungal we mplatac ku bobo dxeral maha ku Tama hiya.”

29Rmengo heya ka tnugsaan na: “Tai, pkleexan su ba rmengo saya duma ini su paangal kari rmengo. 30Saya we, mkela nami isu we mkela su kana ani maanu ma ani ini siling sunan ka seediq da. Peeyah saya snhiyun nami pneeyah su Utux Baro ka isu.” 31Cmiyuk dheya ka Yesu: “Snhii namu saya da ho? 32Tai, gisu ka ali. Bale ba nii dehuk da. Kiya de mpswaye namu ma mpbrinah namu pnyahan namu nanak. Maha wano yaku nanak. Kiya de, uxe mmaha yaku nanak, ado gaga msuupu theyaq yaku ka Tama. 33Wada mu srengo yamu ka so nii we so namu aangal mptbale lhebun namu meeniq ckceka kenan. Mqraqil namu ka meeniq bobo dxeral. Kiya de knremun. Wada ku mbeyax bobo dxeral ka yaku.”

Currently Selected:

Yohane 16: Stgdaya

Highlight

Copy