Yohane 15

Bale ba Pusu Lipas ka Yesu

1Yaku we bale ba pusu lipas, Tama mu ka mppdakil na. 2Kana ini pgheyi ka cida ckceka mu we sqetun na. Kana mhiyi na we gbbawan na smbleyaq smeqic so maha egu ka heyi na. 3Ado mnoda kari rnengo mu yamu ma wada namu bgurah ka yamu da. 4Eeniq klaali ckceka mu ka yamu, kiya de yaku we meeniq ku yamu klaali uri. Nasi ini plutuc pusu lipas ka cida na we ini tduwa mghei nanak. Nasi namu ini eeniq ckceka mu klaali ka yamu we maha namu so kiya uri. 5Yaku we pusu lipas ma cida ka yamu. Meeniq ckceka mu klaali we meeniq ku ckceka daha klaali uri. Seediq nii we maha mghei bale. Ado mlatac yaku we uxe namu mooda ani maanu. 6Nasi ini eeniq ckceka mu ka seediq we maha so sqada nganguc, mdengu de ngalun daha ma qada daha puniq psqama. 7Nasi namu meeniq ckceka mu klaali ka yamu we maha meeniq ckceka namu klaali ka kari mu uri. Ani maanu kmpesa namu ma dmurun namu we ptkuun mu mege yamu. 8Nasi egu ka pnugheyi namu we maangal knledax ka Tama mu. So kiya de mmaha tnugsaan mu ka yamu da. 9Gmaalu ku yamu mntena so Tama gmaalu yaku. Eeniq klaali ckceka gnaalu mu ka yamu. 10Nasi namu wada muyu kari pnosa mu we maha namu meeniq gnaalu mu klaali. Mntena so muyu ku kari pnosa Tama mu ma klaali meeniq ku gnaalu na.

11Wada mu srengo yamu ka so nii we eeniq lhebun namu ka qnaras mu. Kiya uri we maha mttuuku bale ka qnaras namu. 12Yamu we pggaalu, mntena so gmalu ku yamu. Nii we kari pnosa mu. 13Ririh dadal na wada qmada knuudus na we uka mgkala paru nii dungal ka gnaalu seediq. 14Nasi namu muyu kari pnosa mu de kiya ka dadal mu da. 15Bobo na de uxe maku kesun tnqliyan ka yamu, ado ini kela qneepah tnpusu sapah ka tnqliyan. Maanu so kiya dadal kesun maku ka yamu, ado wada mu spkeela yamu kana ka bnhangan mu peeyah Tama mu da. 16Uxe yamu ka gmnao yaku, yaku ka gmnao yamu. Smkagul ku yamu mosa namu mghei ma maha so bsiyaq ba ka gnhei namu. So namu spooda ngayan mu, ani maanu ka pnesa namu Tama we maha mege yamu ka heya. 17So nii ka kari pnosa mu we so namu maha pggaalu.

Qqnriqu Seediq Bobo Dxeral

18“Nasi qmnriqu yamu ka seediq bobo dxeral we tena wada plaale qmnriqu yaku ka dheya we klai. 19Nasi namu nbobo dxeral we maha gmaalu nheya nanak ka bobo dxeral. Ado yamu we uxe namu nbobo dxeral ka yamu. Yamu we gneegan mu peeyah ckceka bobo dxeral. Kiya ka qmnriqu yamu ka bobo dxeral. 20Iya chngii ka kari rnengo mu yamu: ‘Ini pgkala tnpusu sapah ka tnqliyan.’ Nasi wada tmraqil yaku ka dheya we mptraqil yamu uri. Nasi muyu kari mu ka dheya we maha muyu kari namu ka dheya uri. 21Kiya de ririh ngayan mu mooda meepah kana ani maanu quri yamu ka dheya. Ado ini daha klai ka smnkagul yaku. 22Nasi ku ini eyah tmgesa dheya ka yaku, dheya we uka qnquwan noda daha. Maanu so kiya, uka llixan ka qnquwan noda daha da. 23Qmnriqu yaku we qmnriqu tama mu uri. 24Nasi ku ini qeepah uxe qneepah seediq ckceka daha ka yaku we naka uka qnquwan noda daha. Maanu so kiya, saya yaku ma tama mu wada daha taan ma qmnriqu ba uri. 25So nii we kiya ka maha pbale ba kari ga spatis gaya hiya: ‘Uka pusu daha qmnriqu kenan ka dheya.’”

26“Kiya de skgulun mu peeyah Tama hiya ka mdayo, kiya ka Bgihur Utux bale ba pneeyah Tama. Meyah ka heya ciida we meyah pgkela yaku ka heya. 27Maha namu pgkela ka yamu uri, ado mnsuupu namu yaku peeyah pnrdingan.”

Currently Selected:

Yohane 15: Stgdaya

Highlight

Copy