Yohane 19

1Kiya de posa kari ka Pilatos ma desun daha smebuc ka Yesu. 2Supi we tunun daha bunuh pako ma spkbunuh daha tunux na ma plkusan daha bbaro lukus mgtdiyuc. 3Meyah berah na ka dheya ma rmengo: “Tai so mpkuudus ani betaq knuwan! Qbsuran paru seediq Yudaya!” Kiya de smebuc dqeras na. 4Meyah nganguc dungal ka Pilatos ma rmengo dheya: “Tai! Ltudun mu madis pqita yamu hini ka heya, so namu klaun ini mu slai ani maanu qnquwan na.” 5Kiya de meyah nganguc ka Yesu, ida kiya kmbunuh pako ma mlukus mtgdiyuc mlatac ka heya. Rmengo ka Pilatos: “Tai! Seediq nii!” 6Mita heya ka dpusu msapuh ma dmpqlahang de mdiras rmengo: “Ptaani jyujika! Ptaani jyujika!” Rmengo dheya ka Pilatos: “Aangal nanak yamu ma ptani jyujika. Ado ini mu slai ani maanu qnquwan na.” 7Cmiyuk heya ka seediq Yudaya: “Niqan gaya nami. Pooda gaya nami we mndungus phqilun ka heya. Ado wada na ngalan laqi Utux Baro ka heya nanak.”

8Mbahang kari nii ka Pilatos de krinah miicu da. 9Kiya de mremux dungal sapah na ma rmengo Yesu: “Pneeyah su ba inu ka isu?” Kiya de ini ciyuk ka Yesu. 10Kiya de rmengo heya ka Pilatos: “Uxe su mprengo kenan ho? Ini su kela peni nii ku niqan pusu beyax ppaalix mu sunan ma niqan ka pusu beyax mu uri pbetaq ku jyujika isu ho?” 11Cmiyuk ka Yesu: “Nasi uxe pneyah baro ka bnege isu, kiya de uka beyax su psgao kenan. Maanu so kiya de bnege sunan ka seediq we mgkala paru qnquwan na.” 12So kiya de, kmpalix Yesu ka Pilatos. Kiya de mdiras mlawa ka seediq Yudaya: “Nasi su plaxun ka seediq nii de uxe su dadal Kaisar ka isu da. Kana kmqbsuran paru nanak we kiya ka tbrinah Kaisar.”

13Mbahang kari nii ka Pilatos de pltadun na maadis ka Yesu ma tleung tlungan psgeegan ga dxeral snapo btunux. Kari Hiburu we Gabbata kesun. 14Ciida we pkelu yaa ceka naali psramal ali smseman hrnasan. Rmengo seediq Yudaya ka Pilatos: “Tai, nii ka qbsuran namu paru!” 15Maanu so kiya de mdiras mlawa ka dheya: “Phuqil! Phuqil! Ptaani jyujika!”. Smiling dheya ka Pilatos: “Ye mu maha btaqun mu jyujika ka bukung namu paru ho?” Cmiyuk ka dpusu msapuh: “Wano Kaisar we uka ka qbsuran miyan paru.” 16Kiya de Pilatos we sbege na dheya ka Yesu pteetu daha jyujika heya.

Pteetu Jyujika Yesu

(Mat 27:32-44. Mrk 15:21-32. Ruk 23:26-43)

Kiya de desun daha ka Yesu. 17Mheal jyujika na nanak meyah nganguc ka Yesu, betaq dxeral rngerang qrari tunux. Kari Hiburu we Golgota kesun. 18Spteetu daha jyujika hiya ka Yesu ma msuupu heya spteetu daha ssiyo hiya ka 2 seediq ma mgckceka ka Yesu. 19Matis 1 ngayan qrtinuh ka Pilatos ma spteetu na bobo jyujika: “Yesu seediq Najare, qbsuran paru seediq Yudaya.” 20Smepu ngayan pnatis nii ka hbaro seediq Yudaya, ado ga smdaling alang ka pntuwan daha jyujika Yesu ma ngayan pnatis 3 klegal we kari Hiburu, Roma ma Hellenis han. 21Kiya de rmengo Pilatos ka dpusu msapuh seediq Yudaya: “Iya kesi ‘Qbsuran paru seediq Yudaya’ matis. Btasi: ‘Yaku we bukung ku paru seediq Yudaya mnesa ka seediq nii.’” 22Cmiyuk ka Pilatos: “Wada ku matis de uka lixan da.”

23Supi we bobo wada pteetu jyujika ka Yesu de ngalun daha ka lukus na ma tg4 daha maasu ma sugun daha txtaxa heyi. Kiya de lukus na tgtruma we uka snisan ma ida 1 ba tnunan peeyah baro. 24Maanu so kiya de mpprengo ka dheya: “Iya ta sgliqi. Pdaane ta blebil qreti ma teta mmaha nima ho?” So nii we kiya ka maha bale ba Pnatis:

“Pssugun daha ka lukus mu mgbaro,

pdaun daha blebil qreti ka lukus mu tgtruma.”

Wada mesa mooda ka dsupi. 25Ga mheyu ssiyo jyujika Yesu hiya ka bubu na ma mtswai bubu na ma Maria mqedil Klopas, Maria seediq Magdalene. 26Qtaan Yesu ka bubu na ma tnugsaan sgaalu na ga mheyu ssiyo na hiya de rngagan na ka bubu na: “Bubu, tai, nii ka laqi su.” 27Kiya de rngagan na ka tnugsaan na kiya: “Tai, nii ka bubu su.” Kiya de peeyah ciida, tnugsaan na we desun na sapah na ka heya da.

Mhuqil ka Yesu

(Mat 27:45-56. Mrk 15:33-41. Ruk 23:44-49)

28Bobo ooda nii, mkela ka Yesu wada mhedu ka kana ani maanu da ma so maha mbale ba Pnatis de, rmengo: “Mhqeni ku da.” 29Ga hiya ka rusuq ga stenge sino tgbasi. Kiya de pttkui daha rmebu sino tgbasi ka wata rcuxan ma sbekuy daha hdilun ma sqemul daha quwaq na. 30Mnimah biciq sino tgbasi ka Yesu de rmengo: “Mnhedu da!” Kiya de msqelung tunux na ma msetuq hengak na da.

Btaqan Hwiras ka Yesu

31Ado ali nii we ali psramal, ado paru ali ka ali sngayan. So kiya de seediq Yudaya we meyah mesa Pilatos ggremung daha papak daha ma hdilun daha peeyah hiya. Kiya de so uxe eeniq bobo jyujika hiya ali sngayan ka heyi daha 32Maanu so kiya de meyah ka supi, papak tgplaale seediq ma papak taxa seediq mnsuupu Yesu pnteetu jyujika we wada daha gremun kana da. 33Kiya de meyah Yesu hiya ka dheya de taan daha tena wada mhuqil ka heya duma ini daha gremi ka papak na. 34Kiya de 1 supi we btaqan na smbrangan na ka hwiras Yesu ma asi criyu ka dara ma qsiya. 35Qmnita so nii ka seediq we wada pgkela bale ba ka nii. Klaun na nanak ka rnengo na we bale ba ka kiya, so namu ssnheyi uri. 36Wada so nii we kiya ka maha ma bale ba ka kari Patis: “Uxe gremun ka ani 1 buuc na.” 37Gaga rmengo ka 1 kari ga spatis Patis Mrtaso dungal: “Mpcmiyah seediq bntaqan daha ka dheya.”

Smeku Heyi Yesu

(Mat 27:57-61. Mrk 15:42-47. Ruk 23:50-56)

38Bobo na nii de meyah mesa Pilatos aadis na heyi Yesu wada mhuqil ka Yosehu seediq Yalimatay. Heya we tnugsaan Yesu, ado miicu seediq Yudaya ma kiya ka tgleing mptnugsaan Yesu. Smruwa ka Pilatos. Kiya de desun na ka heyi Yesu. 39Meyah ka Nikodemos uri ma, kiya ka mnita Yesu keeman tgberah na. Heya we maadis yaa 30 sneengan geluq mngihur gnmaxan geluq skenux. 40Muyu gaya smeku seediq Yudaya ka dheya ma psaan daha ricuh malu skenux ma qriyan tninun malu ware keguy ka heyi Yesu. 41Ga pnttuwan jyujika Yesu hiya ka 1 malu dxeral ga phmaan phepah ma qhuni. Ga ckceka na hiya ka 1 bgurah habung uxe pnsaan seediq. 42Ado ali ciida we ali pnsrmalun seediq Yudaya kiya ma ga smdaling ka habung de skuun daha hiya ka Yesu.

Currently Selected:

Yohane 19: Stgdaya

Highlight

Copy